Lúkɩ 21 - Neyo

Kʋ́zrɩ̀ŋwnɔ nyɛ́ lé ɔ́ zi nyʋaá fɩ́ɛ́ kʋ́

¹ Tányɩɛ́ mʋ́ Zozíi pla Lagɔ̀wlʋ̀kádʋ̀ɔ̀ a mnɩ́ lé ɔ́ dʋdʋ̀ a, nyʋaá à ŋwʋ́ɛ́ bhɔ́klɔɔ́ a mnɩ́ moníi a, lɛkanyʋa a pʋpʋ kʋ̀.

² Ɔ́ mʋ sɔ́kʋ́ dʋdʋ̀ kà a, ɔ́ yɛ́ ŋazɩ̀kʋ̀zrɩ̀ŋwnɔ a múó, lé ɔ́ páa bhɔ́klɔ a mnɩ́ pìkìni a sɔ́.

³ Ɩ́ nɩ Zozíi lé ɔ́ sané: «Cɩ́cása a mnɩ́, náa srʋɛ amɔ mà ŋazɩ̀kʋ̀zrɩ̀ŋwnɔ̀ɔ̀ lɩ̀à nɩ̀ɩ lɛ́ ka a, moníe ɔ́ ŋwʋ́ bhɔ́klɔ a mnɩ́ a, ɩ́ zù lé ɩ́ zi moníe nyʋa fɩ́ɛ́ ŋwʋ́ mɔ̀ a, kʋ́!

⁴ Ámá lɛkanyʋaá, moníe á ŋwʋ́ bhɔ́klɔ a mnɩ́ a, ɩ nɩ́ á gbʋ́ kaa. Mà ɔ́mɔ́ ŋazɩ̀kʋ̀zrɩ̀ŋwnɔ̀ɔ̀, ɔ́ nɩ moníe fɩ́ɛ́ ɔ́ ka la lé ɔ ká la li a, ɩ́mɩ́ ɔ́ ŋwʋ́ mɔ̀ɔ.»

Á yi Lagɔ̀wlʋ̀ɔ̀ wla

⁵ Nyʋa àna cíé Lagɔ̀wlʋ̀kádʋ̀ɔ̀ a námawɔlɩ, cémʋ́ á bhá námacɔkpalɩ́ lé náma lɩ́ɛ́ fɩ́ɛ́ nyʋa nyɛ́ wá bhlagɔ̀gɔ̀sa Lagɔ a, lé á pʋ́ a. Zozíi nú wɔlɩ́ɛ́ á cí a, bhʋ́ ɔ́ srʋ á mà:

⁶ «Wlʋɔ́ a dʋdʋɛ lɛ́ dɛ́ a, yruú yi ʋ́ kʋ, lé á yiú wla lé lɛ́ nɩ́ ka ʋ́ tuo.»

Zɩkpa a bhɩabhɩatanyɩ yie

⁷ Bhʋ́ á yrá Zozíi mà: «Másɛɛ̀, tányɩ gbá mʋ́ bhʋ́anɩ wɔlɩ́ɛ́ na ká ŋnɩ áa? Lɛ́gbá à nà kà bhá, lé à kà tányɩɛ́ yɩbhlɩ áa?»

⁸ Zozíi anɩ́: «A nɩ nɩ a, a mányɩ, nyʋa nɩ ka amɔ nyɩ́glɩ̀. Mà nyʋa kɔ́kɔ́mnɩ́ yi ná ŋnɩ́ mʋ́ yii lé á yi cí mà: Mɔ́ ŋwɔ́ɔ Kláyɩ́sɩ! Lé ɩ Tányɩɛ́ ya ŋnɩ! Mà a ná jɩ́ á kʋ́!

⁹ A yi sáà tʋ́ a wɔlɩ́ nú, a yi yrè nú, di ná wlʋ́ amɔ mnɩ́, mà sɩ́tɛ̀ mʋ́ ɩ́ na ká fɩ́ɛ́ plɩ́ɩ, mà zɩkpa á bhɩabhɩa tanyɩ nɩ́ àyɩ kakamnɩ́lɛ́ ŋnɩ.»

¹⁰ Lé Zozíi srʋ á sɔ́kʋ́, ɔ́ anɩ́: «Bhlɩ́ ànɛ a mnɩ́ a nyʋa yi glù sɔɔ̀, lé á yi bhlɩ́ ànɛ tʋ́ fa. Lé léyibhlɩ yi ɛlileyibhlɩ ànɛ tʋ́ fa.

¹¹ Dʋ̀dʋ yi tɩtɛɛ̀, lé kɔkwɛ yi pla, plɩ́plɩ́gu yi bhlɩ́ kɔ́kɔ́mnɩ́ a mnɩ́ pla, ŋanɩmawɔlɩ yà lɛ̀wɔ̀lɩ kɔ́kɔ́mnɩ́ sɔ́ yi lagowlú wlʋ́ ɩ́ yi kwlíi lé nyʋa yii yɛ́.

Á yi Zozíi a kʋjɩ̀nyʋ̀àà kalɩmɛ nyɛ́

¹² Mà fɩ́ɛ́ lé wɔlɩɛ́ lɩ̀à ká ŋnɩ a, á yi amɔ kʋ́ bhli lé á yi amɔ kalɩmɛ mʋ́ ŋwʋ́ ná zà. Nyʋa yi amɔ zúfʋcɛcɩghlɩ a mnɩ́ tɩ́tɩ́ ŋwʋ́, lé á yi amɔ jɩ̀ ŋwʋ́, á yi amɔ gɔ̀mnànyʋa yà léyuo sɔ́ gɔ̀ tɩ́tɩ́ ŋwʋ́ ná ŋnɩ́ mʋ́.

¹³ Bhʋ́ a tányɩɛ́, a yi mɔ́ɔ bɩ́ plɩ́, a yi ná ŋwɔ́nɩ́srɩ̀lɛ nɩ.

¹⁴ A ná bhɔtɔ lé a ká cí mànɩ́: cégbá à yi cí lé à yi à nyòku kʋ́ bhla áa?

¹⁵ Mà cémʋ́ a na ká cí a, mɔ́ɔ nà kà amɔ mɩ́ neé páa, a gblɩ̀nyʋa nɩ́ ka amɔ neé bhɩa, a yi á sɩà.

¹⁶ Amɔ mɔ̀glʋ̀ a tinyʋa, a nɛ́nyʋa, a níayúó, a bheyinyʋa, yi amɔ pɛ́lʋ́ ŋwʋ́ a ká amɔ bhlá, á yi aa nyièdɩ a nyʋa kɔ́kɔ́mnɩ́ kúbhlajɩ̀ɩ ŋwʋ́.

¹⁷ Nyʋaá fɩ́ɛ́ yi amɔ mʋ́ gblɩ̀ ná zà.

¹⁸ Mà ná srʋɛ amɔ, a nyièdɩ a nyɔ a múó a wlú a nyíplʋ nɩ́ ka tuo.

¹⁹ Naa, a ŋwʋ́ fɩ́ a tɛ́ma mʋ́, mà a mʋ́ tɛmɛɛ́ mɛ́ nà kà ʋ́ a zizi neé sa!

Zelízalɛ́mʋdùò yi bhusuloò

²⁰ Tányɩɛ́ mʋ́ a nɩ yɛ́ Zelízalɛ́mʋdùò lé sʋ́ja nɩ glalʋʋ klʋ́ a, a yɩbhlɩ saá mà ʋ́ wlawlatanyɩ ya ŋnɩ.

²¹ Bhʋ́ a tányɩɛ́, nyʋaá à kʋ̀ Zudéebhlɩ a mnɩ́ a, á yi gú lé á yi kíkí a nyièdɩ mʋ! Nyʋa ànàà kʋ Zelízalɛ́mʋduú a, á yi mɔ̀ɔ wlʋ́, ànàà kʋ̀ bìdí kʋ́ nɔnʋ a, a nɩ́ ka yɩ́ dú yrɩ́bhà!

²² Bhʋ́ a yrié a mnɩ́, bhʋ́ Lagɔ na ká Zelízalɛ́mʋduú a nyʋa plɔɔ bhʋ́alɛ nɩnɩgbɩɛ fɩ́ɛ́ ɩ̀ jɩ́jrɔ̀ wá Lagɔ̀bɔ̀gʋ a mnɩ́ a, ɩ ká neé sralɔɔ̀.

²³ Kplé lé ɛ́ kla gbádɩ̀ŋwna lé ŋwná à nyɩ́a yúó a, á yi miè, kalɩmɛ yi bhlɩ́ɛ́ a mnɩ́ pla, lé Lagɔ yi mɔ̀ a nyʋa dɩ kʋ́ ŋwʋ́.

²⁴ Tʋ́ yi bhli, á yi nyʋa àna bhlá, á yi àna kʋ́ bhli á yia bhlɩ́ jɩ̀ géyilɛ kʋ́ fa, bhlɩ́ɛ́ ɛ̀ nɩɩ́ Lagɔ yi a, á yi Zelízalɛ́mʋdùò bhusu, á yi sɩ́tɛ̀ a kalɩmɛ a yɛ́ dà kʋ àààn lé a tányɩɛ́ Lagɔ ŋwʋ́ wá ʋ́ a, ɛ́ yi bhɩa.

Nyɔɔ́ a Yuwliyʋɔ́ a yrɩ́bha tanyɩ

²⁵ Tányɩ yi ʋ́ kʋ, lé yrʋ́ lé cʋ́ bhè lagɔ̀drà sɔ́, a yi ɩ mnɩ́ lɛ̀wɔ̀lɩ̀ɛ̀ ɩ̀ nà kà yrúkanyʋa neé mna a, yɛ́ɛ. Vʋ̀vɔ̀lʋ yà jilakwɩɛ́ sɔ́ɔ́ ɩ̀ wlʋ́ɛ́ jie lé ɩ̀ yie a, ɩ́ yi kɛ́zɔ̀ nyʋa nyakalɩ bhláà.

²⁶ Wɔlíɛ́ ɩ̀ nà kà zɩkpa zɔ̀ ŋnɩ a, ɩ́ yi kɛ́zɔ̀ nyʋa ŋanɩmɛ bhláà. Lagɔɔ́ a pɔ́waá à kʋ mɔ̀ɔ a, á yi tɩtɛɛ̀.

²⁷ Bhʋ́ á na ká Nyɔɔ́ a Yuwliyʋɔ́ yɛ́, ɔ ká jrù a mnɩ́ laa lé ɔ ká yi, ɔ yà ɔ pɔ́wa yà ɔ blɔ̀blɔ́ɔ́ sɔ́.

²⁸ Tányɩɛ́ mʋ́ bhʋ́anɩ wɔlɩ́ɛ́ na ká ŋnɩ a, a bhá yɩ́ wɛ́ kʋ́, lé a bhá fɩ́, mà a flíiflíitanyɩ ya ʋ́ mɛ́!»

Sií a tɔpɔɛ́ a núnúó

²⁹ Zozíi pá núnúó a múó mà: «A dʋdʋ̀ figíesuó, lé si ànɩ̀ɛ̀ ɩ̀ kʋ̀ klá a mnɩ́ a!

³⁰ Ɩ nɩ tɔpɔ a, á yɩbhlɩɛ yɩ́ saá mà kɔ̀kɔ̀yrʋ̀ ya ʋ́ mɛ́.

³¹ A sɛ́fʋ, a nɩ yɛ́ yɩ́ ɩ́mɩ́ a, a yɩbhlɩ yɩ́ saá mà Lagɔ a Léyibhlɩɛ́ a tányɩ ya ʋ́ mɛ́.

³² Náa srʋɛ amɔ cɩ́cása mà bhʋ́anɩ nyʋa a jànyɩ̀ɛ̀ nɩ́ ka bhɩa lé wɔlɩ́ɛ́ fɩ́ɛ́ lɩ̀à yi ŋnɩ.

³³ Lagɔ yà dʋ̀dʋ sɔ́ yi plɩ́, mà ná cícíwɔlɩ nɩ́ ka kɔ́ɔ̀kɔ́ plɩ́.

A mányɩ a nyoku kʋ́

³⁴ A mányɩ a nyoku kʋ́, a di nɩ ka kʋ́ ŋnɔ́maà mà yrié fɩ́ɛ́ ɩ́mɩ́ ɩ̀ nɩ́ glɩ̀sɩ́sɩ ŋwɔ́ɔ lé ɩ ká ŋnɩ́ ka lé a ká nʋ́ mná, ɩ́zà a ná bhɔtɔ sáà a kɔ́ɔ́ a zà, a ná málɩɩ́ kʋ́ lé Nyɔɔ́ a Yuwliyʋɔ́ a yiyiyruó ʋ ká lɛ amɔ zɔ̀ vú

³⁵ dàda bhísakʋ́, a nɩ ka lɛ amɔ wlú gbí. Mà Kanyɔ a yruó, yrúkanyʋa fɩ́ɛ́ a zà ʋ́ yie.

³⁶ A ná ŋwɔ́ɔ̀, a bhibhie tányɩɛ́ fɩ́ɛ́ lé a ká mʋ́ tɛ́maà a ká nyakalɩɛ́ fɩ́ɛ́ ɩ̀ nà kà yi a, ne wlʋ́, bhʋ́ a yi míi lé a yi Nyɔɔ́ a Yuwliyʋɔ́ a drɩ̀ nynʋ́vʋ̀.»

³⁷ Gàgàzrɩ̀ bhʋ́ Zozíi cɩ́alɛ Lagɔ̀wlʋ̀ɔ̀ a mnɩ́, yrʋ́ nɩ bhli a, ɔ́ mnɛ yɩ́ Olivíe kikéé a wlú pʋ́ʋ ka.

³⁸ Geglìà míi, nyʋa fɩ́ɛ́ ŋnɩlɔ Lagɔ̀wlʋ̀kádʋ̀ɔ̀ a mnɩ́ wlú lé á pʋɔ nyúkwlí.