Lúkɩ 20 - Neyo

Ɔ̀ nyɛ́ Zozíi pɔ́waá?

¹ Yruú a múó kʋ́, Zozíi kʋ Lagɔ̀wlʋ̀kádʋ̀ɔ̀ a mnɩ́ ɔ́ cɩ́a nyʋa bhè ɔ́ salaá Lagɔ a Námadìè, fɩɩ́n bhè Lagɔ̀bʋ̀bɔ̀nyʋa káda, lɔ̀ a másɛnyʋa lé dɔ̀panyʋa yio gɔ̀

² lé á yrɔ́ɔ́ mà: «Nyɔ gbáa nyɛ́ mɔ̀ lɔ̀ lé ɩ̀ nie wɔlɩ́ɛ́ lɩ̀à áa, ɔ̀ nyɛ́ lɛ́ kɛtɛkʋ́ mɔ̀ bhʋ́anɩ pɔ́wa áa?»

³ Zozíi anɩ́: «Ná sɛ́fʋɔ́, náa yrá caa amɔ a, a srʋ mɔ́ɔ:

⁴ Nyɔ gbá cíe Záan lé ɔ́ ŋwʋ́ nyʋa nyú wlú à? Lagɔ cíeó, mà nyʋa cíeóo?»

⁵ Zozíi yrá a, á bhlalɩɩ́ kʋ́ á pʋpʋ́ a nyièdɩ, ɩ́mɩ́ ŋwɔ́ɔ mà: «À nɩ̀ cí mànɩ́ Lagɔ cíe Záan a, ɔ́ yi àmɔ̀ yrá mà bhè ɛ̀kʋ̀ʋ̀ lé a nɩ́ ɔ cícíwɔlɩɛ́ wɔlɩ́ kʋ́ bhá à?

⁶ À nɩ̀ cí sáà mànɩ́ nyʋa cíeó a, nyʋa fɩ́ɛ́ kʋ̀ jrè gɔ̀ a, á yi àmɔ̀ cɔ́kpalɩ́ pá á ká àmɔ̀ bhlá, máà á yì saá mà Záan, Lagɔ a nékʋ́cinyɔ ɔ́ ŋwɔ́ɔ wázɔ̀.»

⁷ Bhʋ́ á srʋ Zozíi mà: «Nyɔɔ́ ɔ̀ cíe Záan a, à nɩ́ ɔ́ yì.»

⁸ Zozíi anɩ́: «Àa, a nɩ nɩ́ ɔ́ yì a, ná sɛ́fʋ dɛ́ɛ́ ɩ́ bhá pɔ́waá lé ɩ́ nie wɔlɩ́ɛ́ fɩ́ɛ́ lɩ̀à a, nɩ́ ka amɔ srʋ.»

Glàyʋ̀làgba a mnɩ́ a nɔnʋzrɩ̀nyʋa a núnúó

⁹ Zozíi pá núnúó a múó jrèè, ɔ́ anɩ́ mà: «Nyɔ a múó glɩ glàyʋ̀làgba, lé ɔ́ gháyɩ lágbàà nɔnʋzrɩ̀nyʋa gɔ̀ lé ɔ́ mʋ lówùduú ɔ ká cɩ́cátanyɩ zi.

¹⁰ Tányɩɛ́ mʋ́ glàyʋ̀ɔ̀ zalɩmà a, lágbɩ̀kànyɔ̀ɔ̀ cíe ɔ cóyʋ nɔnʋzrɩ̀nyʋ̀àà gɔ̀, a ká yɩ́ bhábhà bhè a kɔ́ɔ́ nɩ dá nyɛ́. Mà nɔnʋzrɩ̀nyʋ̀àà bhli nyɔɔ́ kʋ́ lé á bhitoó, lé á jɩ́lɔɔ́, lé nyɔɔ́ la gblɔ̀gbɩpʋpʋ́ lé ɔ́ yi.

¹¹ Lé ɔ́ cíe sɔ́kʋ́ ɔ cóyʋ ànɔ, lé á bhitoó, á trʋlɔɔ́ lé á jɩ́lɔɔ́, lé ɔ ya glɔ̀gbɩ pʋpʋ sɔ́ yrɩ́bha lé á yi.

¹² Lé ɔ́ cíelaá ta cóyʋ gɔ̀, céamúó sɔ́kʋ́, á bhlio kʋ́ lé á bhitoó á ŋwʋ́ ɔ́ jí lé á jɩ́lɔɔ́.

¹³ Bhʋ́ lágbɩ̀kànyɔ̀ɔ̀ anɩ́: Cégbá ɩ́ yi yɩ́ lɛ́ nɩ áa? Ná yi yɩ́ mɔ́ɔ mɔ̀glʋ̀ ná wàwàyʋ̀ɔ̀ cíe, ɩ́ yì saá mà ɔ́mɔ́ á yì kpá ŋwʋ́.

¹⁴ Mà nɔnʋzrɩ̀nyʋ̀àà yɛ́ yʋ́ɔ́ a, á bhla fɩ́ɛ́ wɔlɩ́ kʋ́ á pʋpʋ a nyièdɩ, ɩ́mɩ́ ŋwɔ́ɔ mà: Jáalinyɔɔ́ ɔ́mɔ́ yie ɔ̀, à bhlɔ́ɔ́ lé lágbàà ká àmɔ̀ wlɩ plɩ́ɩ!

¹⁵ Á bhlio kʋ́ lé á sɔɔ́ lágbàà a mnɩ́ lé á bhlɔ́ɔ́.» Bhʋ́ Zozíi yrá yɩ́ lɛ́ mà: «Cégbá mʋ́ glàyʋ̀làgbàà a kanyɔ yi yɩ́ lɛ́ nɩ áa?

¹⁶ Ɔ́ nɩ yi a, ɔ́ yi nɔnʋzrɩ̀nyʋ̀àà bhlá, lé ɔ́ yi lágbàà yígàdà nyʋa gɔ̀ gháyɩ.» Wɔlíɛ́ ɔ́ cí a, ɩ́ bhli a, nyʋa aanɩ: «Ɩ́ na ŋnɩ kɔ́ɔ̀kɔ́!»

¹⁷ Zozíi dʋdʋ̀ a diin lé ɔ́ srʋ á mà: «Lagɔ̀bɔ̀gʋ a mnɩ́ a wɔlɩdrèè à ŋwɔ́ɔ mà: Cɔ́kpalɩ́bhuó, ghlɩpanyʋa pá wá klá a, Ámá à gbá zɩmnɛ́ wlʋɔ́ wlɩɩ́. Á gba áa?

¹⁸ Nyɔɔ́ nɩ̀ bhli bhʋ́anɩ cɔ́kpalɩ́bhuó jɩ̀ zɔ̀ a, ɔ wlú yi gá, ɩ́zà nyɔ jɩ̀ a nɩ bhli a, á yio wlawlaà.»

¹⁹ Zozíi cí sɩ́tɛ̀ a, Lagɔ̀bʋ̀bɔ̀nyʋ̀àkádàà lé lɔ̀ a másɛnyʋaá yɩbhlɩ saá mà ámá ɔ́ sa, ɩ́ ka ŋnɩ́ lé á yrá yɩ́ kakamnɩ́lɛ́ lɩ̀à ɔ́ kʋ́ bhlibhlíé, mà á gúu nyʋaá kʋ̀ ʋ́ a kʋ́.

Sezáa a lapóo a pɛ́lɛɛ́

²⁰ Wlʋ́ yɩ́ ʋ́ a, áa bɛlɛ yɩ́ Zozíi, áa ŋwʋ́ɛ́ yɩ́ ɔ nɩnɩgbɩɛ fɩ́ɛ́ yɩ́gɔ̀, á cíeloó yrʋnyʋa bɩ́ a kɔ́ɔ́ zɔ̀ sa, lé ɔ nɩ páa wɔlɩ́ neé a, a kɔ́ɔ́ kʋ́ bhli a kɔ́ɔ́ Wlɔmɛ́ɛnyʋa a kámanyɔɔ́ wlɩ ŋwʋ́.

²¹ Á yrɔ́ɔ́ mà: «Másɛɛ̀, à yì saá mà, ɩ̀ cíe lé ɩ̀ cɩ́a námasa; nɩɩ gbázɩ̀ nyʋa mʋ́, wɔlɩ́ɛ́ Lagɔ yrá a, ɩ́mɩ́ ɩ̀ cɩ́a.

²² Naa, srʋ ca àmɔ̀ a: Wlɔmɛ́ɛnyʋa a lóo Sezáa a lapóo, à pɛ́ la a, mà à ná pɛ́ la áa?»

²³ Mà cémʋ́ Zozíi yɩbhlɩ a yɩ́ a mnɩ́ a wɔlɩ́ a, ɔ́ srʋ á mà:

²⁴ «A pápa ca mɔ́ɔ flèejìè a, kɛ́ɛ́ yɛ́.» Á lɔɔ́ flèejìè a, bhʋ́ ɔ́ yráa mà: «Nyɔ gbá kɔ̀ɔ̀ wlú yà ɔ ŋnɩ́ sɔ́ kʋ flèejìè lɩ̀à jɩ̀ a?» Á anɩ́: «Lóoó Sezáa.»

²⁵ Bhʋ́ Zozíi srʋ á mà: «Áá! Lɛ́ ŋwɔ́ɔ Sezáa a lɛ́ a, a nyɛ́ ɛ́ Sezáa, ɩ́zà ɛ̀ ŋwɔ́ɔ Lagɔ a nɛ a, a nyɛ́ ɛ́ Lagɔ!»

²⁶ Wɔlíɛ́ ɔ́ cíi nyʋaá fɩ́ɛ́ drɩ̀ a, ɩ́ mnaá neé lé nyɔ a múó nɩ́ wɔlɩdrè bɩ́ dí, á lɔ̀fɩ́ɛ́ dìdinii.

Kúdùkuo á galɔ̀ wɔlɩ́?

²⁷ Nyʋa á wlele Sadisɩɛ́nyʋa a, a nɩ́ bhá kúdùkuo a galɔ̀ wɔ̀lɩ́ɛ́ cɩ́cása kʋ́, ámá nyʋaá, áa zùò yi Zozíi gɔ̀, lé á yrɔ́ɔ́ mà:

²⁸ «Másɛɛ̀, Moyízɩ a lɔ̀ cíe mà: Nyɔ yà ɔ ŋwnɔ́ sɔ́ nɩ nɩ́ yʋ́ va lé ɔ nɩ kú a, Ɔ nɩ́ayʋ bhá kʋ́zrɩ̀ŋwnɔ̀ɔ̀ lé lɔ́lɔ́kpaá nɩ ka tuo.

²⁹ Naa Másɛɛ̀, ɩ̀ dʋdʋɛɛ, níayúó a gbàásɔ́ a wɔlɩ́. Tagàanɔɔ́ sí a, ɔ yà ŋwnɔ́ɔ́ sɔ́ nɩ́ yʋ́ va, lé ɔ́ kú.

³⁰ Lé sɔ́anɔɔ́ bhá kʋ́zrɩ̀ŋwnɔ̀ɔ̀,

³¹ lé taánɔɔ́ bhá sɔ́kʋ́ ŋwnɔ́ɔ́ a múóó, céamúó, á yɔ̀sɔ́ nɩ́ yʋ́ va lé áa sɔ́ɔ́ pla mɔ̀ɔ lé á kú, sɩ́tɛ̀ àààn, lé áa gbàásɔ́ɔ́ bhɩa, a nɩ́ yʋ́ tɩ.

³² Zɔ̀bhɩ̀àdàà ŋwnɔ́ a sɛ́fʋ pla mɔ̀ lé ɔ́ kú.

³³ Ɩ́ kʋ lɛ́ saá a, kúdùkuo nɩ galɔ̀ kɛ́zɔ̀ a, á gbàásɔ́ a nyièdɩ, nyɔ gbá nà kà ŋwnɔ́ɔ́ bhá à?»

³⁴ Bhʋ́ Zozíi srʋ á mà: «Dɛ́ zɩkpa zɔ̀, bhʋ́alɛ́ yuwle yà ŋwná sɔ́ síé,

³⁵ mà nyʋaá Lagɔ gbázɩ̀ mʋ́ lé à kà galɔ̀ kɔ́ɔ́ ɔ̀ yie a zà a, a nɩ́ ka yɩ́ Lagɔduú mɔ̀ɔ síi,

³⁶ lé á nɩ́ ka yɩ́ sáà kú. Kplɔkplɔzìzi bhísakʋ́ á na ká yɩ́ kʋ. Á ya wá yɩ́ galɔ̀ a, á ya pʋ, á ŋwɔ́ɔ yɩ́ Lagɔ a yúó.

³⁷ Ànɩ̀ɛ̀ ŋwɔ́ɔ kúdùkuo a galɔ̀ wɔlɩ́ɛ́ a, Moyízɩ mɔ̀glʋ̀ yɩ́ɩ wá cí, tányɩɛ́ mʋ́ ɔ́ cí wá vɩ́dà vɩ́dàkpàká a wɔlɩ́ɛ́ a, bhʋ́ ɔ́ wle wá Lagɔ: Ablaámʋ a Lagɔ, Izákɩ a Lagɔ, lé Zakɔ́bʋ a Lagɔ.»

³⁸ Zozíi srʋ á sɔ́kʋ́ mànɩ́: «Lagɔ nɩ́ kúdùkuo a Lagɔ ŋwɔ́ɔ, mà nyʋaá à gà lé à kʋ̀ pɩ́pɩ́ kʋ́ a, á Lagɔ ɔ́ ŋwɔ́ɔ. À nɩ̀ ŋwɔ́ɔ Lagɔ a zà a, á lɔ̀fɩ́ɛ́ à gà lé à kʋ̀ kɔ́.»

³⁹ Lɔ̀ a másɛnyʋa á zùò kʋ la ʋ́, á srʋ ɔ́ mà: «Másɛɛ̀, wɔlɩ́ɛ́ ɩ̀ cí a, nà bhɩa ʋ́ mɩ́!»

⁴⁰ Ɩ́ bhli a, nyɔ nɩ́ yɩ́ sɔ́kʋ́ mɔ́ wɔlɩ́ kʋ́ yráà.

Kláyɩ́sɩ lé Davídɩ

⁴¹ Zozíi srʋ á mànɩ́ «Ɛ̀kʋ̀ lé á nie mà: Kláyɩ́sɩ Davídɩ a yʋ́ ɔ́ ŋwɔ́ɔ áa?

⁴² Davídɩ mɔ̀glʋ̀ ya wá mɩ́ lɔbhlɩbɔ̀gʋ a mnɩ́ cíi, ɔ́ cí wá mà: Kanyɔ Lagɔ srʋ wá ná Kanyɔ mà: Plɩ́ɩ ná lilie kʋ́ kà sá bɔ́ɔ̀

⁴³ Bɔ́ɔ ʋ́ àààn lé ká nɩ lé Kà nàa gblɩ̀nyʋa jɩ̀namnɩgbìté mʋ́ pláa.

⁴⁴ Naa, sɩ́tɛ̀ mʋ́ Davídɩ mɔ̀glʋ̀ wlele wá Kláyɩ́sɩ Kanyɔ, cégbá mʋ́ ɩ́ kʋ yɩ́ sɔ́kʋ́ lé ɔ́ Kanyɔ yi sɔ́kʋ́ ɔ yʋ́ plɩ́ à?»

A mányɩ lɔ̀ a másɛnyʋa a nɩnɩgbɩ kʋ́

⁴⁵ Nyʋaá fɩ́ɛ́ à pʋ Zozíi nyúkwlí a, a klʋ́ jɩ̀ ɔ́ srʋ ɔ́ kʋjɩ̀nyʋ̀àà mà:

⁴⁶ «A mányɩ lɔ̀ a másɛnyʋa a nɩnɩgbɩ kʋ́, ámá à pla bànɩ̀kádɩ mʋ́ lé à bie, á yrá lé dɛɛ́ nyʋa zù a, a pá ʋ́ má yúó lé a ŋwʋ́ ʋ́ má. A nɩ pla zúfʋcɛcɩghlɩɛ́ a mnɩ́ a, á wà drɩ̀ a kpí a mnɩ́ bɔ́ɔlɛ. Lé a nɩ wle a sáà lilíé a zà a, kpíkadɩ a mnɩ́ a bɔ́ɔlɛɛ́ á yrá.

⁴⁷ Á bháʋ́ kʋ́zrɩ̀ŋwna a kakalɩ, lé a nɩ bhibhie a, á trʋmalɛ á bhibhie wɔlɩ́ɛ́ mʋ́, nyʋa káá yɩ́gɔ̀ ŋwʋ́. Náa srʋɛ amɔ mà wɔlɩ́ɛ́ fɩ́ɛ́ á nie lɛ́ a, á yi kɛ́zɔ̀ Lagɔ a drɩ̀ ɩ́ kpaá pɛ́ɛ.»