Lúkɩ 2 - Neyo

Zozíi a vavatanyɩɩ́

¹ Bhʋ́ a tányɩɛ́, bhlɩ́ a kámanyɔ Sezáa Ogúsʋ, gbáa né sá bhlɩ́ɛ́ fɩ́ɛ́ jɩ̀, lé nyʋa fɩ́ɛ́ ká a ŋnɩ́ bɔ́gwɩ jɩ̀ ŋwʋ́.

² Bhlɩ́ɛ́ fɩ́ɛ́ jɩ̀ a nyʋa ká tagàda a ŋnɩ́ jɩ́jrà a, gɔ̀mnàà á wlele wá Kiliniúsʋ a, ɔ́mɔ́ ɔ̀ kámalɛ wá Silíibhlɩɛ́.

³ Nyʋaá fɩ́ɛ́, áa mnɛ a ŋnɩ́ bɔ́gwɩ jɩ̀ ŋwʋ́ ka, ɔ̀ nɩ̀ kʋ a, ɔ́ɔ mnɛ ɔ́ vaàda.

⁴ Ɩ́mɩ́ ɩ̀ nɩ Zɔ̀zɛ́fʋ lé ɔ́ wlʋ́ Galiléebhlɩ a dúó á wlele Nazalɛ́tɩ a, lé ɔ́ mʋ Zudéebhlɩ a dúó ɔ̀ ŋwɔ́ɔ Bɛtlɛɛ́mʋ a, dúó mnɩ́ á va lóo Davídɩ a. Máà Zɔ̀zɛ́fʋ a gbó a nyɔ lé ɔ lɔ́lɔ́kpɩnyɔ ɔ̀ ŋwɔ́ɔ Davídɩ.

⁵ Zɔ̀zɛ́fʋ yà Malíi sɔ́ mʋ mɔ̀ɔ a ŋnɩ́ jɩ́jrà kà, bhè Malíi ka nɩkplaá.

⁶ Naa, mɔ̀ɔmɔ̀ á kʋ lé Malíi a vavatanyɩ ŋnɩ.

⁷ Ɔ́ va yuwliyʋ, ɔ́mɔ́ ɔ̀ ŋwɔ́ɔ ɔ tagàyʋ. Cémʋ́ bhlɩ́ɛ́ mnɩ́ á mʋ a, wlʋɔ́ á ŋwʋ́ ʋ́ lé lówùdùnyʋa ká sápʋ́ a, a nɩ́ mɔ̀ɔ yɩ́ yɛ́ɛ a, Malíi ɔ́ɔ pɩpɩa yʋ́ɔ́ lɔkwɩɩ́ lé ɔ́ púoloó sikʋkʋpɩʋɔ́ mna lile a mnɩ́.

Lagɔ a kplɔkplɔzìzi sa Zozíi a vavadìè dòdòbhlìi a kʋjɩ̀nyʋ̀àà

⁸ Ɛ́mɛ́ bhlɩ́ɛ́ a múó a mnɩ́, mɔ́ɔmɔ dòdòbhlìi a kʋjɩ̀nyʋ̀àà, áa pʋ́lɛ lágbɩ a mnɩ́ lé yrʋ́ nɩ bhli a, á dɛdɛ á mnaá.

⁹ Naa, bhʋ́ á kʋ lé Lagɔ a kplɔkplɔzùzu flʋlaa yɩ́, ʋ́ flʋ kɔ́ɔ̀kʋ́ ámá yɩ́ a, Lagɔ a blɔ̀blɔ́ɔ́ a nápɛ ŋanà a kʋ́, ɩ́ nɩ lé, ŋanɩmɛɛ́ yilaá kʋ́.

¹⁰ Lé kplɔkplɔzùzùò srʋ á mà: «Ŋanɩmɛ ná bhlá amɔ, mà námadìè ɩ̀ nà kà bhlɩ́ɛ́ fɩ́ɛ́ a lɔlɔ ŋwɔ́ɔ a, ɩ́mɩ́ ɩ́ laa lé ɩ́ yi amɔ srʋ ka.

¹¹ Zɩmnɛ́ a yruó lɩ̀à, á ya Davídɩ ɔ bhlé, a ʋ́neésanyɔ vaà, ɔ́mɔ́ ɔ̀ ŋwɔ́ɔ Kláyɩ́sɩ, lé Kanyɔ.

¹² Wɔlɩ́ɛ́ a na ká bhá lé a kɔ́ɔ́ yɩbhlɩ a, ɩ́mɩ́ ɩ̀ ŋwɔ́ɔ mà, a nɩ mʋ a, a yi yísradɔ̀dɔ̀ a sa pʋ anɔ yɛ́, á pɩpɩɔ́ lɔkwɩɩ́ lé á púoloó sikʋkʋpɩʋɔ́ mna lile a mnɩ́.»

¹³ Wɔlɩ́ɛ́ kʋ àyɩ kplɔkplɔzùzùò neé bhè blà kplɔkplɔzìzi ànɩ kɔ́kɔ́mnɩ́ yà lʋ́ sɔ́ pla, ɩ́ bhlɩɛ ɩ́ falɛ Lagɔ ŋwnú, ɩ́ nie:

¹⁴ «Lagɔ ghlí lé ʋ́ zi kɔ́ a lɔ̀fɩ́ɛ́ kʋ́, Ʋ́ nyɛ́ kɔ́ a nyʋa fɩ́ɛ́ ʋ́ wà a pʋ́pʋ́ɛ́!»

¹⁵ Tányɩɛ́ mʋ́ kplɔkplɔzìzìè wlʋ́ bhlií a kʋjɩ̀nyʋ̀àà gɔ̀ a, ɩ́ɩ gblà lagɔɔ́, lé á pʋpʋ́ á fafa wɛ́ gɔ̀, ɩ́mɩ́ ɩ̀ ŋwɔ́ɔ mà: «À kà Bɛtlɛɛ́mʋ mʋ! Wɔlíɛ́ fɩ́ɛ́ ɩ̀ plɩ́ lɛ́ lé Kanyɔ pápa lɛ́ àmɔ̀ a, à kɩ̀ɩ yɛ́.»

¹⁶ Lé á vʋ́vʋ̀à kʋ́ lé á mʋ mɔ̀ɔ. Á mʋ a, á ŋnɩ mɔ̀ɔmɔ̀ Malíi yà Zɔ̀zɛ́fʋ sɔ́ lé yísradɔ̀dɔ̀ɔ̀, ɔ́ pʋ́ sikʋkʋpɩʋɔ́ mnɩ́.

¹⁷ Tányɩɛ́ mʋ́ á yɛ́ ɔ́ a, áa sa mɔ̀ɔ wɔlɩ́ɛ́ fɩ́ɛ́ kplɔkplɔzùzùò srʋ á yʋ́ɔ́ a zà a.

¹⁸ Nyʋaá fɩ́ɛ́ pʋ wɔlɩ́ɛ́ bhlií a kʋjɩ̀nyʋ̀àà cí a, nyúkwlí a, neé mnaá.

¹⁹ Mà ɛ̀ nɩ̀ ŋwɔ́ɔ Malíi a, wɔlɩ́ɛ́ fɩ́ɛ́ plɩ́ɛ́ a, ɔ́ɔ ŋwʋ́ɩ́ yɩ́gɔ̀ lé ɔ́ bhobhuí.

²⁰ Wɔlíɛ́ bhlií a kʋjɩ̀nyʋ̀àà yɛ́ lɛ́ lé á nú a, ɩ́ ka ŋnɩ́ lé lʋ́ á bhá lé á yrɩ́bha á kʋda, á falɛ Lagɔ ŋwnú bhè á mnɛ.

²¹ Yʋ́ɔ́ yɛ́ yri gbàáta a, áa díó kʋ́ lé á ŋwʋ́ ɔ́ ŋnɩ́, ŋnɩ́ɛ́ á ŋwʋ́ ɔ́ a, ɩ́mɩ́ ŋwɔ́ɔ Zozíi, ŋnɩ́ɛ́ ɔ nɛ́ nɩ́ àyɩ wá ɔ nɩkpla pla lé kplɔkplɔzùzùò pápa wá mɔ́ a.

Á fa Zozíi Lagɔ̀wlʋ̀ a mnɩ́

²² Ɛ̀ nɩ̀ ŋwɔ́ɔ Moyízɩ a Jràmáá a mnɩ́ a, a nɩ va yʋ́ a, ɔ́ ka tányɩ lé ɔ tinyʋa fleó zɔ̀ lé á ŋwʋ́ ɔ́ Lagɔ wlɩɩ́. Ɩ́ yruó ŋnɩ a, Malíi yà Zɔ̀zɛ́fʋ sɔ́ fa yʋ́ɔ́ Lagɔ̀wlʋ̀ a mnɩ́ Zelízalɛ́mʋ lé á ŋwʋ́ ɔ́ Lagɔ wlɩɩ́.

²³ Sɩ́tɛ̀ mʋ́ á jɩ́jrà Lagɔ̀jràmá a bɔ́gʋ̀ɔ̀ a mnɩ́, ɩ́mɩ́ ŋwɔ́ɔ mà: Ŋwnɔ́ nɩ va tagàyùwlíyʋ a, áa ŋwʋ́ ɔ́ Lagɔ wlɩɩ́.

²⁴ Lagɔ̀jràmá a mnɩ́, á ka lé a sa dáblìi a sɔ́ a nɩ nɩ́ dáblìi yɛ́ a, á yi kpóòkpí a sɔ́ saà.

Simeyɔ́ɔ pá Lagɔ yúó yísradɔ̀dɔ̀ɔ̀ a zà

²⁵ Nyɔ a múó kʋ wá Zelízalɛ́mʋ lé á wleloó wá Simeyɔ́ɔ. Ɔ nɩnɩgbɩ srí wá námasa sá, ɔ́ ŋwʋ́ɛ́ wá sáà ʋ́ Lagɔ á niwɔlɩ lé Blɔ̀blɔ̀zùzùò kʋɔ́ wá námasa jɩ̀. Ɔ́mɔ́ Simeyɔ́ɔ, ɔ́ɔ gláa tányɩɛ́ nà kà ŋnɩ lé Lagɔ ká Izrayɛ́lɩnyʋa yízɔ̀ sɛ a.

²⁶ Mà Blɔ̀blɔ̀zùzùò ya wá mɔ́ srʋ mà: «Ɩ̀ yi fɩ́ɛ́ Kanyɔ a Kláyɩ́sɩɛ́ yɛ́ fɩ́ɛ́ lé kwɩ́ yi mɔ̀ fa.»

²⁷ Tányɩɛ́ mʋ́ yʋ́ɔ́ a Lagɔ̀wlʋ̀kádʋ̀ɔ̀ a mnɩ́ a fafatanyɩ ŋnɩ bhè ɔ yà ɔ tinyʋa sɔ́ mʋ lé a ká lɩ́ɛ́ Lagɔ̀jràmá cɛ́cɩlɛ́ a, sa a, Blɔ̀blɔ̀zùzùò tíe Simeyɔ́ɔ lé ʋ́ fɔɔ́ Lagɔ̀wlʋ̀kádʋ̀ɔ̀ a mnɩ́,

²⁸ tányɩɛ́ mʋ́ ɔ́ ŋnɩ a, ɔ́ bhá yísradɔ̀dɔ̀ɔ̀ kʋ́, lé ɔ́ pá Lagɔ nyú lé ɔ́ srʋ ɔ́ mà:

²⁹ «Kanyɔɔ̀, cémʋ́ ɩ̀ srʋ wá mɔ́ɔ a, ɩ́mɩ́ ŋnɩ yɩ́ lɛ́, Naa, cíe yɩ́ nà cóyʋɔ́ sá bhè ɔ kú yɩ́ nà blɔ̀blɔ́ a mnɩ́!

³⁰ Máà ná yɩ́ sɔ́ ya yɩ́ à ʋ́neésanyɔɔ́ yɛ́.

³¹ Ʋ́neésanyɔɔ́ ɩ̀ kwlée nyʋaá fɩ́ɛ́ a zà a.

³² Ɔ́mɔ́ ŋwɔ́ɔ nápɛ, ɔ́mɔ́ nà kà ŋnɩ́ ka lé kɔ́ a nyʋaá fɩ́ɛ́ ká mɔ̀ yɩbhlɩ, Ɩ́mɩ́ nà kà kɛ́zɔ̀ Izrayɛ́lɩnyʋaá à ŋwɔ́ɔ nà yúó a, a kwɛ́ mʋ́ gbáa.»

³³ Mà wɔlɩ́ɛ́ fɩ́ɛ́ Simeyɔ́ɔ cí yísradɔ̀dɔ̀ɔ̀ a zà a, ɩ́ mna Zɔ̀zɛ́fʋ yà Malíi sɔ́ neé.

³⁴ Lé Simeyɔ́ɔ páá nyú, lé ɔ́ srʋ Malíi mà: «Ɩ̀ dʋdʋɛ yʋ́ɔ́ lɩ̀à a, ɔ́ɔ yi lé Izrayɛ́lɩnyʋa kɔ́kɔ́mnɩ́ ká zɔ̀ bhli, lé kɔ́kɔ́mnɩ́ ká glù sɔɔ̀. Ɔ́mɔ́ Lagɔ bhá lé ɔ́ pápa a, mà nyʋa nɩ́ kɩɩ́ kʋ́ ŋwnʋ́.

³⁵ Ɩ́mɩ́ nà kà ŋnɩ́ ka lé wɔlɩ́ɛ́ fɩ́ɛ́ kʋ̀ nyʋa kɔ́kɔ́mnɩ́ a di a yɩ́ a, ɩ ká zɔ̀ flʋʋ̀. Ɩ́zà mɔ̀ Malíi, kalɩmɛɛ́ nà kà yɛ́ a, ɛ́ yi gɔ̀ plɩ́, ɛ́ yi wlʋ́ mànɩ́ nyɔ á srí jrɛ̀ duo a yɩ́.»

Lagɔ a nékʋ́ciŋwnɔ Ánɩ fa Lagɔ ŋwnú yʋ́ɔ́ a zà

³⁶ Lagɔ a nékʋ́ciŋwnɔ a múó, ɔ́mɔ́ á wlele wá Ánɩ, ɔ́ ŋwɔ́ɔ wá nyɔɔ́ ŋwɔ́ɔ Asɛ́ɛ a, ɔ lɔ́lɔ́kpɩnyɔɔ́ á wlele Fanʋ́ɛ́lɩ a, ɔ ŋnɩ́keyʋ. Náà ɔ́mɔ́ Ánɩɛ́, ɔ́ zùbòè ya mɔ̀ɔ bhɩa, mà tányɩɛ́ mʋ́ ɔ́ ŋwɔ́ɔ wá ŋnɩ́dɔ̀gbá a, ɩ́ yʋwlɩɛ́ ɔ́ bhá wá a, ɔ́ zió gɔ̀ lɩkpɩ a gbàásɔ́.

³⁷ Tányɩɛ́ mʋ́ yʋwlɩɛ́ kú a, Ánɩ nɩ́ yɩ́ sɔ́kʋ́ si lé ɔ́ yɛ́ lɩkpɩ a gwlɩ̀ mɔ̀na lé mɔ̀na. Ɔ nɩ́ wlʋ́ yɩ́ la Lagɔ̀wlʋ̀ɔ̀ gwá, ʋ mnɩ́ ɔ́ kʋɛ lé ɔ́ bhibhie gàgàzrɩ̀ lé dɩ́bɩ lé ɔ́ pʋlɛ kleé.

³⁸ Simeyɔ́ɔ ká lɛ́ yʋ́ɔ́ yà ɔ tinyʋa sɔ́ nyú pá a, Ánɩ flʋ zɔ̀ lé ɔ́ fa Lagɔ ŋwnú, lé ɔ́ cí yʋ́ɔ́ a wɔlɩ́ nyʋa gɔ̀, nyʋaá fɩ́ɛ́ à gláa Zelízalɛ́mʋ a flíiflíi yruó a.

Malíi yà Zɔ̀zɛ́fʋ sɔ́ ya Nazalɛ́tɩ yrɩ́bha

³⁹ Tányɩɛ́ mʋ́ Malíi ya Zɔ̀zɛ́fʋ sɔ́ bhɩa kɔ́ɔ̀kʋ́ Lagɔ̀jràmá a nɔnʋɔ́ zɔ̀ a, áa yrɩ́bha a bhlé Nazalɛ́tɩ, Galiléebhlɩ a mnɩ́.

⁴⁰ Mà yʋ́ɔ́ nynile, bhè ɔ yà fɩ́ke sɔ́ glɛ́ bhè Lagɔ a glɔ̀gbá kʋ bhlà mɔ́ jɩ̀.

Zozíi ka lɩkpɩ kʋ́gbá lɩkpɩ sɔ́ lé ɔ́ pla Lagɔ̀wlʋ̀ɔ̀ a mnɩ́

⁴¹ Lɩkpɩɛ́ fɩ́ɛ́ a mnɩ́, Malíi ya Zɔ̀zɛ́fʋ sɔ́ mnɛ Zelízalɛ́mʋ Zúfʋnyʋa flíiflíiglɩ̀sɩ́sɩ̀ɛ̀ a zà.

⁴² Zozíi ka lɩkpɩ kʋ́gbá lɩkpɩ sɔ́ lé a yɔ̀sɔ́ mʋ mɔ̀ɔ glɩ̀sɩ́sɩ̀ɛ̀ kʋ́, sɩ́tɛ̀ mʋ́ á nie kɔ́ɔ̀kɔ́.

⁴³ Á kʋ mɔ̀ɔ lé glɩ̀sɩ́sɩ̀ɛ̀ bhɩa lé á yrɩ́bha, mà a ká yrɩ́bha a, Zozíi tuo mɔ̀ɔ lé ɔ tinyʋaá sɔ́ɔ́ nɩ́ saá yɩbhlɩɩ̀.

⁴⁴ Á yì saà mà, ɔ́ kʋ nyʋaá a yà sɔ́ námɛ a nyièdɩ. Á zi fɩ́ɛ́ yruú a lɛblɩ̀ nyúzɔ kʋ́, lé á bháa ʋ́ ɔ́ mʋ́mɔɛ kʋ́ á nyʋa yà á yɩbhlɩnyʋa sɔ́ nyièdɩ.

⁴⁵ Lé cémʋ́ a nɩ́ yɛ́ ɔ́ a, áa yrɩ́bha lé á mʋ ɔ́ mʋ́mɔ ka Zelízalɛ́mʋ.

⁴⁶ Á mʋ́mɔ ɔ́ yri a ta a mnɩ́, fɩ́ɛ́ lé á yɛ́lɔ Lagɔ̀wlʋ̀ɔ̀ a mnɩ́. Á yɛ́ ɔ́ a, ɔ́ bɔ́ɔ lɔ̀ a másɛnyʋa a nyièdɩ ɔ́ pʋ a nyúkwlí bhè ɔ́ yrálɛ bhlà má kwɛ́sɩ̀nɛ̀ kʋ́.

⁴⁷ Mà nyʋa fɩ́ɛ́ à pʋɔ nyúkwlí a, cémʋ́ ɔ́ nie lé ɔ́ nyɛ́ kwɛ́sɩ̀nɛ̀ á yrálɔɔ́ kʋ́ a, ɛ ása áa, neé mnaá.

⁴⁸ Ɔ tinyʋa yɛ́ ɔ́ a, di wlʋ́ á mnɩ́. Lé ɔ nɛ́ srʋ ɔ́ mà: «Bhè ná yʋ́, ɛ̀kʋ bhè ɩ̀ bhli àmɔ̀ sɩ́tɛ̀ kʋ́ à? Dʋdʋ̀ʋ̀, yáa ɩ̀ tʋ́ sɔ́, mɔ̀ à nɩ̀ kà la mʋ́mɔ a, mɔ̀ à mʋ́mɔ, yà àmɔ̀ duo mnɩ́ sa!»

⁴⁹ Bhʋ́ ɔ́ srʋ ɔ nɛ́ mà: «Ɛ̀kʋ̀ʋ̀ bhè a mʋ́mɔ mɔ́ a? A nɩ́ sa yì mà, ɩ́ ka lé ká ɩ Tʋ́ a wlʋ a mnɩ́ kʋʋ?»

⁵⁰ Mà wɔlɩ́ɛ́ ɔ́ cí a, a nɩ́ ɩ mnɩ́ nú.

⁵¹ Lé ɔ yà sɔ́ yrɩ́bha Nazalɛ́tɩ, Zozíi ŋwʋ́ɛ́ wá ʋ́ ɔ tinyʋa. Mà wɔlɩ́ɛ́ fɩ́ɛ́ lɩ̀à ɔ nɛ́ ŋwʋ́ɩ́ ɔ́ duo a mnɩ́.

⁵² Cémʋ́ tányɩ nie lé ɛ́ plɩ́ɛ́ a, sɩ́tɛ̀ mʋ́ Zozíi yà fíke sɔ́ gblá ʋ́, Lagɔ a drɩ̀ lé yrúkanyʋa a drɩ̀.