Lúkɩ 18 - NeyoA ná sɩa bhibhie kʋ́ 1 Zozíi pá núnúó a múó, ɔ ká á pápa cémʋ́ á na ká nɩ lé a ká kɔ́ɔ̀kɔ́ bhibhie bhè a nɩ́ ka sɩa a. 2 Ɔ́ anɩ́: «Dú a múó a mnɩ́, mɔ̀ɔ lɔ́ya a múó kʋ, mà ɔ nɩ́ ŋwʋ́ ʋ́ Lagɔ, lé ɔ nɩ́ ŋwʋ́ sáà ʋ́ nyɔ. 3 Ʋ́mʋ́ dúo mnɩ́, kʋ́zrɩ̀ŋwnɔ a múó kʋ mɔ̀, lé ɔ́ yie kɔ́ɔ̀kɔ́ lɔ́yaá yɛ́ ka lé ɔ́ srʋ ɔ́ mà: Ɩ́bhìè, ná wɔlɩ́ɛ́, nàa drʋlɩɩ́ kʋ́ bhè ɩ ká yɩ́ cílo! 4 Ŋwnɔ́ɔ́ nɩ cí a, lɔ́yaá nɩ́ mányɩlɔɔ́. Mà yruú a múó kʋ́, lɔ́yaá srʋ ɔ nyoku mà: Aan, nɩ́ ŋwʋ́ cɩ́cása ʋ́ Lagɔ lé nɩ́ mányɩ sáà nyɔ, 5 mà cémʋ́ ŋwnɔ́ lɩ̀à yie lɛ́ kɔ́ɔ̀kɔ́ mɔ́ɔ kwlɩ́ yɩa ka a, ɩ́ yrá lé ká ɔ wɔlɩ́ mányɩ bhè ɔ ká mɔ́ wlú wlʋ́.» 6 Kanyɔ cí sɔ́kʋ́ mà: «A pʋ wɔlɩ́ɛ́ bhàlʋ̀lɔ̀nyàà cí a, nyúkwlí! 7 A nɩ́ saá yì mà Lagɔ nɩ́ ka ɔ yúó à wleó gàgàzrɩ̀ lé dɩ́bɩ sɔ́ a, wɔlɩ́ mányɩ, mà ɔ́ yi fɩ́ɛ́ tányɩ pláa a? 8 Náa srʋɛ amɔ mà Lagɔ yi ɔ yúó à wleó a, wɔlɩ́ kʋ́ vʋ́vʋ̀à. Nyɔɔ́ a Yuwliyʋɔ́ nɩ yi sɔ́kʋ́ a, ɔ́ yi nyʋa kà bhʋ́anɩ fádùò a, zɩkpa zɔ̀ ŋnɩɩ?» Falizɩ́ɛyʋ yà lapóo a kʋbhlinyɔ sɔ́ a núnúó 9 Nyʋa àna kʋ ʋ́ lé á bhá a nyoku náma nyʋa kʋ́ Lagɔ a drɩ̀ lé á zi a lía kʋ́, ɩ́mɩ́ kà ŋnɩ́ a zà Zozíi pá sɔ́kʋ́ núnúó lɩ̀à. 10 Ɔ́ anɩ́: «Nyʋa a sɔ́, ámá mʋ Lagɔ̀wlʋ̀kádʋ̀ɔ̀ a mnɩ́ bhibhie ka. Múó ŋwɔ́ɔ Falizɩ́ɛyʋ, lé ànɔ ŋwɔ́ɔ lapóo a kʋbhlinyɔ. 11 Mà Falizɩ́ɛyʋɔ́ nynʋ́vʋ̀ kʋ́, lé ɔ́ bháʋ́ bhibhie wɔlɩ́, ɔ́ anɩ́: Aan, à tʋ́ Lagɔ àyúó kà cémʋ́ ɩ̀ nɩ mɔ́ɔ lé nɩ́ wlʋ́ mànɩ́ nyʋa àna a, ɩ́ pá mɔ̀ ɩ yúóó! Ámá, á ghlíe, á nɩnɩgbɩ nɩ́ sá srí, á yrá a lía a ŋwná! Ná nɩnɩgbɩ nɩ́ wlʋ́ mànɩ́ lapóo a kʋbhlinyɔɔ́ lɩ̀à! 12 Ɩ́ pʋ́lɛ kleé sɔ́ɔ kʋ́ wúkɩ a mnɩ́, lé ɩ́ pɛ́lɛ ná kakalɩɛ́ fɩ́ɛ́ a wlú dímʋ. 13 Mà, à nɩ̀ ŋwɔ́ɔ lapóo a kʋbhlinyɔɔ́ a, bɩ́ kʋ́ mɔ̀ ɔ́ nynʋ́vʋ̀, ɔ nɩ́ míi ɔ ká wlú kʋ́ bhá, ɔ́ bhite ɔ́ digblè bhè ɔ́ bhibhie, ɔ́ nie: Wé! Ɩ́bhìè Lagɔ, wɔtɔma duo ná zà mà ɩ́ yi saá mà nyumonyɔ ɩ́ ŋwɔ́ɔ! 14 Náa srʋɛ amɔ mà cémʋ́ lapóo a kʋbhlinyɔɔ́ bhibhie lɛ́ a, Lagɔ ŋwnʋ́ ɔ́ bhibhiewɔlɩɛ́ kʋ́, lé ɔ́ mʋ gbó, mà Falizɩ́ɛyʋɔ́, Lagɔ nɩ́ ɔ́ bhibhiewɔlɩɛ́ kʋ́ ŋwnʋ́. Nyɔɔ́ ɔ̀ yrá lé ɔ̀ kà ɔ nyoku nyɔ kʋ́ bhá a, Lagɔ ɔ́ɔ kwléloó sá, mà nyɔ ɔ̀ kwléle ɔ nyoku sá a, ɔ́mɔ́ Lagɔ bhá kʋ́.» Zozíi pá yúó nyú ( Matíe 19.13‑15 ; Málɩ́kɩ 10.13‑16 ) 15 Nyʋa la aa yísradàda Zozíi gɔ̀ ɔ ká á glɔ̀gbɩ jɩ̀ ŋwʋ́. Mà ɔ́ kʋjɩ̀nyʋ̀àà yɛ́ nyʋaá à la yúó a, áa jɩ́laá. 16 Mà Zozíi srʋ nyʋaá mà, a la aa yúó, ɔ́ anɩ́: «A cíe yúó sá, a ká mɔ́ gɔ̀ yi, a ná jɩ́laá, mà Lagɔ a Léyibhlɩɛ́, nyʋa à wlʋ́ mànɩ́ yúó lɩ̀à a, ámá kɛ̀ɛ̀. 17 Cícása a mnɩ́, náa srʋɛ amɔ mà, ɔ̀ nɩ̀ nɩ́ Lagɔ a Léyibhlɩɛ́ a wɔlɩ́ɛ́ kʋ́ bhli yʋ́ bhísakʋ́ a, ɔ́ nɩ́ ka mɔ̀ɔ pla.» Lóo a múó yrá pʋ́pʋ́ɛ́ ( Matíe 19.16‑30 ; Málɩ́kɩ 10.17‑31 ) 18 Zúfʋnyʋa a kámanyɔ a múó yrá Zozíi mà: «Námamasɛɛ̀, cégbá mʋ́ ɩ́ yi nɩ lé ɩ́ yi kɔ́ɔ́ ʋ̀ nɩ́ bhɩàda ka a, yɛ́ a?» 19 Zozíi anɩ́: «Ɛ̀kʋ̀ʋ̀ lé ɩ̀ wlele mɔ́ɔ náma masɛ áa? Nyɔ nɩ́ kɔ́ kʋ lé ɔ ká námaa, à nɩ̀ nɩ́ Lagɔ a múó ŋwɔ́ɔ a. 20 Lé ɩ̀ yì Jràmáá nie mà: Nà bháʋ́ ɩ̀ liyʋ a ŋwnɔ́, nàa bhlá nyɔ, nàa ghlíì, nàa gʋa ɩ̀ liyʋ gbʋ́ jɩ̀, ɩ́zà ŋwʋ́ sáà ʋ́ ɩ̀ nɛ́ lé ɩ̀ tʋ́!» 21 Nyɔɔ́ srʋ ɔ́ mà: «Másɛɛ̀, bháa ná zɔ̀kpɩ́anɔ kʋ́ lé kà zɩmnɛ́ ŋnɩ a, ɩ́ ŋwʋ́ɛ́ ʋ́ jràmá a lɔ̀fɩ́ɛ́.» 22 Zozíi nú wɔlɩ́ɛ́ nyɔɔ́ cí a, ɔ́ srʋ ɔ́ mà: «Wɔlɩdrè a múó tuo mɔ̀ɔ lé nɩ̀ɩ́ àyɩ nɩ. Mʋ lé ŋwʋ́ nà kakalɩɛ́ fɩ́ɛ́ pɛ́lʋ́, moníe nà kà yɛ́ a, bhábhalɩɩ́ ŋazɩ̀nyʋa, mà ɩ̀ yi lagɔduú mɔ̀ léyri lii, lé yi lé jɩ́ mɔ́ɔ kʋ́!» 23 Mà wɔlɩ́ɛ́ Zozíi cí a, ɩ́ nyumò nyɔɔ́ a klʋ́, cémʋ́ ɔ́ ŋwɔ́ɔ lɛkanyɔ a, ɩ́ ka ŋnɩ́ lé wɔlɩ́ɛ́ ɔ́ nú a, ɩ́ bhlɔ́ɔ́ lé ɩ́ wɔtɔmalɔɔ́ kpɩkpɩ gɔ̀. 24 Tányɩɛ́ mʋ́ Zozíi yɩbhlɩ saá mà kpɩkpɩ yɔɔ́ gɔ̀ wɔtɔma a, ɔ́ srʋ ɔ́ mà: «Wé! Lɛkanyɔ ká Lagɔ a Léyibhlɩɛ́ a mnɩ́ pla a, ɩ́ ka gbʋ́! 25 Ɩ́ ka gbʋ́ lé ɩ́ zi mnagwlì ká kwʋɛ́ a fleé a mnɩ́ blée a, kʋ́.» 26 Ɔ́ cí sɩ́tɛ̀ a, nyʋaá à pʋɔ nyúkwlí a, á sa né: «Naa, sɩ́tɛ̀ mʋ́ ɩ ká kʋ a, nyɔ gbá yi míi lé ɔ̀ yi ʋ́ neé wlʋ́ à?» 27 Lé Zozíi srʋ á, ɔ́ anɩ́: «Wɔlíɛ́ nyɔ nɩ́ ka míi a, Lagɔ yii míi.» 28 Lé Pɩ́ɛ́lɩ srʋ ɔ́, ɔ́ anɩ́: «Másɛɛ̀, dʋdʋ̀ʋ̀, àmɔ̀ à wlʋ́ à kakalɩɛ́ fɩ́ɛ́ a gbʋ́ lé à jɩ́ mɔ̀ kʋ́.» 29 Zozíi anɩ́, cɩ́cása mnɩ́ a zà a, ná srʋɛ amɔ mà, nyɔɔ́ nɩ̀ wlʋ́ Lagɔ a Léyibhlɩɛ́ a zà ɔ gbó a, lé ɔ nɩ wlʋ́ ɔ ŋwnɔ́ gɔ̀, ɔ nɩ́ayʋ gɔ̀, ɔ nɛ́ yà ɔ tʋ́ sɔ́ gɔ̀, ɔ yúó gɔ̀ a, 30 lɩ́ɛ́ fɩ́ɛ́ ɔ́ wlʋ́ lɛ́ sɩ́tɛ̀ gɔ̀ a, ɔ́ yii dɛ́ zɩkpa lɩ̀à zɔ̀ yɛ lé ɔ́ yii gɔ̀ plɩ, fɩ́ɛ́ lé zɩkpa àna yie a, ɔ́ yi kɔ́ɔ́ ʋ́ nɩ́ bhɩàda ka a yɛ́. Zozíi anɩ́ ɔ́ yi kú lé ɔ́ yi galɔ̀ ( Matíe 20.17‑19 ; Málɩ́kɩ 10.32‑34 ) 31 Zozíi wle ɔ́ kʋjɩ̀nyʋ̀àà kʋ́gbá sɔ́ɔ lé ɔ yàsɔ́ gbʋ́gbʋʋ̀ lé ɔ́ srʋ á mà: «A dʋdʋ̀ʋ̀, àa mnɛ yɩ́ lɛ́ Zelízalɛ́mʋ lé wɔlɩ́ɛ́ fɩ́ɛ́ Lagɔ a nékʋ́cinyʋaá jɩ́jrà wá Nyɔɔ́ a Yuwliyʋɔ́ a zà a, ɩ́ ká yɩ́ neé sralɔɔ̀. 32 Á yio nyʋaá à nɩɩ Zúfʋnyʋa ŋwɔ́ɔ a, wlɩ ŋwʋ́ lé á yio nyumosa kʋ́ bhlii, á yio nyɩa, á yio dàdɩ kʋ́ pá. 33 A yio sɩ́á, lé á yio bhlá. Mà ɔ nɩ kú a, tayruó kʋ́, ɔ́ yi galɔ̀.» 34 Wɔlíɛ́ fɩ́ɛ́ Zozíi cí lɛ́ sɩ́tɛ̀ a, ɔ́ kʋjɩ̀nyʋ̀àà nɩ́ ɩ mnɩ́ nú, a nɩ́ sáà ɩ́ gba yì. Zozíi yalɩma yɩ́cucúbhlanyɔ ( Matíe 20.29‑34 ; Málɩ́kɩ 10.46‑52 ) 35 Zozíi ŋnɩ Zelikóo a, yɩ́bhlanyɔ a múó bɔ́ɔ nyúzɔ kʋ́ ɔ́ zra plɩ́plɩ́nyʋa. 36 Ɔ́ nú nyʋa à plɩ́ɛ́ a á yrè a, bhʋ́ ɔ́ yraá mà: «Wɔlɩ gbá kʋ̀ʋ̀ bhè nyʋa sa yrè à?» 37 Bhʋ́ á srʋ ɔ́ mà: «Nazalɛ́tɩ a Zozíe ɔ́mɔ́ ɔ̀ plɩ́ɛ́.» 38 Bhè ɔ́ blì, ɔ́ pá wɔlɩ́: «Zozíi ooo, à tɩtɔ Davídɩ a yʋ́ʋ! Ɩ́bhìè, yɛ́ ná ŋazɩ kʋ́ àyé!» 39 Mà nyʋaá à kʋ̀ ɔ drɩ̀ a, á salɔɔ́ yrè wlú, ɔ bhli nékʋ́. Mà ɔ nɩ́ pʋ a nyúkwlí, ɔ́ wle kɔ́ɔ̀kɔ́, ɔ́ nie: «À tɩtɔ Davídɩ a yʋ́ʋ, yɛ́ ná ŋazɩ̀gbɩ kʋ́ àyé!» 40 Mà tányɩɛ́ mʋ́ Zozíi nú ɔ cícíwɔlɩ a, ɔ́ nynʋ́vʋ̀, lé ɔ́ srʋ nyʋaá mà a yɔ̀sɔ́ yi, á yi lé á ŋnɩ Zozíi gɔ̀ a, bhʋ́ ɔ́ yrɔ́ɔ́ mà: 41 «Wɔlɩ cegbá á, ɩ̀ yrá lé nɩ nɩ nàa zà a?» Yɩ́bhlanyɔɔ́ anɩ́: «Kanyɔɔ̀, nɩ lé ká sɔ́kʋ́ kʋ́ yɛ́!» 42 Ɔ́ cíí a, Zozíi srʋ ɔ́ mà: «Yɛ́ kʋ́, mà nà fádùò ya mɔ̀ pʋ́à, yà yalɩma!» 43 Fɩɩn lé ɔ yɩ́ɛ́ ylée, ɔ́ yɛ́ yɩ́ kʋ́, ɔ́ɔ jɩ́ yɩ́ Zozíi kʋ́, bhè ɔ́ bhlɩɛ ɔ́ falɛ Lagɔ ŋwnú. Nyʋaá kʋ̀ ʋ́, lé à yɛ́ ɔ́ a, á bhá sáà ʋ́ Lagɔ a ŋwnú falɛ kʋ́. |
© (Active), Wycliffe Bible Translators, Inc. All rights reserved.
Wycliffe Bible Translators, Inc.