Online Bible

Lúkɩ 17 - Neyo

Nyumosa a ninie lé nyɔ a ciecú
( Matíe 18.6‑7 , 21‑22 ; Málɩ́kɩ 9.42 )

¹ Lé Zozíi srʋ ɔ́ kʋjɩ̀nyʋ̀àà mà: «Wɔlɩ ka lé ɩ ká yrúkanyɔ nɩ lé ɔ ká nyumosa nɩ. Mà mɔ̀ nyɔɔ́ kɔ̀ɔ nɩnɩgbɩ nà kà ɩ̀ liyʋ nɩ lé ɔ ká nyumosa nɩ a, kplé ya mɔ̀ kla!

² Bhʋ́anɩ nyɔ a nɩnɩgbɩ ká nyʋaá à ŋwnʋ́ Lagɔ̀wɔ̀lɩ̀ɛ̀ kʋ́ a, nɩ lé a ká nyumosa nɩ a á zà a, áa yio cókpalɩ́bhuo blɛɛ́ gʋa lé á yio jié páà.

³ Naa, a mányɩ a nyoku kʋ́! Ɩ̀ nɩ́ayʋ́ nɩ nɩ nyumosa a, cílo gɔ̀, ɔ nɩ yɩbhlɩ ɔ́ nyumoé a, cielo.

⁴ Ɩ́zà ɔ nɩ bhli mɔ̀ nyumosa kʋ́ yruú a mnɩ́, gbàásɔ́ kʋ́ a, lé ɔ nɩ yɩbhlɩ ɔ́ nyumoé gbàásɔ́ kʋ́ a, lé ɔ nɩ bhibhie mɔ̀ a, cielo!»

Lagɔ a fádùò a mʋ́ tɛmɛɛ́

⁵ Lé Zozíi a cíecíenyʋaá srʋ ɔ́ mà: «Kanyɔɔ̀, nɩ lé à ditátɩ́ɛ́ ká mʋ́ tama!»

⁶ Kanyɔ anɩ́: «A fádùò a mʋ́ tɛmɛɛ́ nɩ wlʋ́ cɩ́cása mà mutádɩ̀yie a, a yi míi lé a yi suó lɩ̀à srʋ mà: Suú, soglù, lé ŋwnʋ́vʋ̀ jie a mnɩ́, lé suó yi amɔ kpá ŋwʋ́!

A plɩ́ coyuó à zrɩɛ náma nɔnʋ a

⁷ Á nyièdɩ a nyɔ gbá yi cóyʋ ka, lé ɔ́ yi ɔ lágbaá nɔnʋ wlʋ́, ɩ́zà ɔ mnaá kʋ́ lɔ́bhʋ ka wlʋ́ lé ɔ̀ yio srʋ mà: Vʋ́vʋ̀à kʋ́ gblà tébhle jɩ̀ kà li áa?

⁸ Mà ɔ̀ nɩ kɔɔ́ srʋ mà, ɔ pi lelilɩ, lelilɩɛ́ nɩ yri a, ɔ cɩ́cɩ fɩ́ɛ́ ɔ́ nɔnʋzrɩ̀kòtìè lé ɔ kɔ́ lelilɩɛ́ drɩ̀ ŋwʋ́ ɔ ká li, ɔ ká mná fɩ́ɛ́ lé ɔ́mɔ́ mɔ̀glʋ̀ ká cɩɩ li ɔ ká mná à?

⁹ Kanyɔɔ nɩ́ ka cóyʋɔ́ yúó pá, nɔnʋɔ́ ɔ́ zrɩlɔɔ́ gà a zà a?

¹⁰ Naa, a sɛ́fʋ, nɔnʋɔ́ Lagɔ nyɛ́ amɔ a, a nɩ zrɩ ʋ́ a, a srʋ á nyoku mà: Cóyuo à ŋwɔ́ɔ, nɔnʋɔ́ à nà kà la zrɩ a, ʋ́mʋ́ à zrɩ.»

Zozíi yalɩma kosugɔ̀bhlànyʋa a kʋ́gbá

¹¹ Tányɩɛ́ mʋ́ Zozíi mnɛ wá Zelízalɛ́mʋ a, Samalíi yà Galilée sɔ́ a gbùgblùyɩ̀ kʋ́ ɔ́ plɩ́ɩ.

¹² Mà dúó mnɩ́ ɔ́ pla a, kosugɔ̀bhlànyʋa a kʋ́gbá yio nyúzɔ kʋ́, mà a nɩ́ ɔ́ gɔ̀ mɛ́

¹³ lé á pɔ́ɔ́ wɔlɩ́: «Másɛɛ̀, Zozíi, Ɩ́bhìè yɛ́ à ŋazɩ kʋ́ àyé!»

¹⁴ Zozíi yɛ́ a, ɔ́ srʋ á mà: «A mʋ Lagɔ̀bʋ̀bɔ̀nyʋa gɔ̀ a ká amɔ dʋdʋ̀.» Á kʋ Lagɔ̀bʋ̀bɔ̀nyʋa a dú a nyúzɔ kʋ́ lé áa kʋ́gbáá yalɩma.

¹⁵ Mà tányɩɛ́ mʋ́ á nyièdɩ a gupuonyɔ a múó yɩbhlɩ saá mà ɔ́ ya yalɩma a, ɔ́ wlʋ́ a nyièdɩ lé ɔ́ yrɩ́bhà, ɔ́ pá gbányìdi ɔ́ falɛ Lagɔ ŋwnú.

¹⁶ Ɔ́ yi lé ɔ́ sra Zozíi a drɩ̀ koti sá, ɔ́ srɔɔ wlú lé ɔ́ pɔ́ɔ́ yúó. Samalitɛ́ɛyʋ kʋ̀ʋ.

¹⁷ Bhʋ́ Zozíi yrá mà: «Bhè áa kʋ́gbá nɩ́ lɛ́ yalɩma a, dɛ́gbá ànàà fɛnaá kʋ áa?

¹⁸ Á nyièdɩ a nyɔ a múó coco nɩ́ pɛ́pɛ́lɩ bhobho ɔ ká yrɩ́bha lé ɔ ká Lagɔ yúó pá, ɛ̀ nɩ̀ nɩ́ lówùdùyʋ̀ɔ̀ lɩ̀à a múó ŋwɔ́ɔ a?»

¹⁹ Lé Zozíi srʋ ɔ́ mà: «Soglù kà mʋ, mà nà fádùò ya mɔ̀ pʋ́a!»

Lagɔ a Léyibhlɩɛ́ a yiyitanyɩɛ́ a wɔlɩ́
( Matíe 24.23‑28 , 37‑41 )

²⁰ Tányɩ a múó Falizɩ́ɛnyʋa yrá Zozíi mà: «Tányɩ gbá mʋ́ Lagɔ a Léyibhlɩɛ́ a pɔ́waá na ká yi áa?» Bhʋ́ ɔ́ srʋ á mà: «Lagɔ a Léyibhlɩɛ́, ɛ́ɛ nɩ́ náa lé ɛ ká yi lé nyʋa kɛ́ɛ́ dʋdʋ̀.

²¹ Lé a ká cí mà: A dʋdʋ̀ Lagɔ a Léyibhlɩɛ́ mɛ́ lɛ̀, ɛ́mɛ́ kʋ̀ dɛmɔ̀! Mà Lagɔ a Léyibhlɩɛ́ kʋ amɔ nyièdɩ.»

²² Lé ɔ́ srʋ ɔ́ kʋjɩ̀nyʋ̀àà mà: «Yruú yi ʋ́ kʋ, lé Nyɔɔ́ a Yuwliyʋɔ́ a yɛ́tʋ yi amɔ bhlá mà a nɩ́ ka yɩ́ míi.

²³ Nyʋa yi amɔ srʋ mà: Ɔ́mɔ́ kʋ dɛ́! Lé àna yi amɔ srʋ mà: Ɔ́mɔ́ kʋ̀ dɛmɔ̀! Á yi céana cí, a ná jɩ́ á kʋ́ a ká soó fa lé a ká dɛ́ á kʋ a, mʋ!

²⁴ Mà cémʋ́ lagɔ̀ɔ̀ nɩ wɛ́zɛ lé ʋ́ ŋana lɛ́ dáa fɩ́ɛ́ a, sɩ́tɛ̀ Nyɔɔ́ a Yuwliyʋɔ́ a yiyitanyɩɛ́ a yruó na ká kʋ.

²⁵ Mà ɔ́ ka lé ɔ yɛ́ fɩ́ɛ́ kalɩmɛ, lé janyɩ̀ɛ̀ lɩ̀à mnɩ́ a nyʋa ná ŋwnʋ́ ɔ́ wɔlɩ́ kʋ́.

²⁶ Wɔlíɛ́ ɩ̀ ŋnɩ lɛ́ Nowée a tanyɩɛ́ a, ɩ́mɩ́ tɛ̀ɛ̀ nà kà Nyɔɔ́ a Yuwliyʋɔ́ a yiyitanyɩɛ́ ŋnɩ.

²⁷ Nowée a tányɩɛ́ a nyʋa lie wá, á mna wá, á síé wá, á sie wá sáà a ŋnɩ́keyuo, lé a yuwliyuo. Á kʋ sɩ́tɛ̀ a nɩda àààn, lé Nowée pla gékpoó a mnɩ́, lé nyúkádʋ̀ɔ̀ bhla, lé ʋ́ bhlá nyʋaá a lɔ̀fɩ́ɛ́.

²⁸ Ɩ́ na ká sáà wlʋ́ mà Lɔ́tʋ a tanyɩɛ́ a wɔlɩɛ́ ɩ̀ plɩ́ wá a. Lɔ́tʋ a tanyɩɛ́, nyʋa lie, á mná, á pá pɛ́lʋ́, á glɩɛ a lágbɩ, á pá wá sáà ghlɩ.

²⁹ Mà yruó kʋ́ Lɔ́tʋ wlʋ́ Sɔdɔ́mʋ a, kosu lé mʋ́mʋɩ́, ɩ́mɩ́ ɩ̀ wlʋ́ lagɔɔ́ lé ɩ́ kɔ́sɔ Sodɔ́mʋdùò jɩ̀ nànɩ́ cémʋ́ nyú bhla a, lé ɩ̀ sie dú a lɔ̀fɩ́ɛ́.

³⁰ Yruó kʋ́ Nyɔɔ́ a Yuwliyʋɔ́ na ká ʋ́ flʋ a, sɩ́tɛ̀ mʋ́ ɩ́ na ká sáà nyʋa zɔ̀ vú.

³¹ Bhʋanɩ yruó kʋ́, ɔ̀ nɩ kʋ̀ gbògbú zɔ̀ a, lé ɔ̀ nɩ kà lɩ́ sré a, ɔ ná pla sré ɔ ká mɔ̀ɔ mɩ́ bhá. Lé ɔ̀ nɩ kʋ̀ la lágbaá a, ɔ ná yrɩ́bha dú!

³² Wɔlíɛ́ ɩ̀ ŋnɩ wá Lɔ́tʋ a ŋwnɔ́ a, a pɩ́ duo gɔ̀!

³³ Ɔ̀ nɩ̀ yrá ɔ̀ kà ɔ kɔ́ kʋ́ bhla a, ɔ yiú tɩ. Ɩ́zà ɔ̀ nɩ́ tɩ ɔ́ kɔ́ a, ɔ́ yi ʋ́ neé wlʋ́.

³⁴ Náa srʋɛ yɩ́ sáà amɔ mà, dɩ́bɩ̀ɛ̀ lɩ̀à nyʋa sɔ́ yi bɔ̀gɩ a múó jɩ̀ pʋ́, múó yi ʋ́ bhálɔɔ̀, lé anɔ yi ʋ́ tuo.

³⁵ Ŋwná sɔ́ yi gwlè zɔ̀ kʋ, lé múó yi ʋ́ bhálɔɔ̀ lé ànɔ yi ʋ́ tuo. [

³⁶ Nyʋa a sɔ́ yi lágbaá kʋʋ, múó yi ʋ́ bhálɔɔ̀, lé ànɔ yi ʋ́ tuo.]»

³⁷ Zozíi cí sɩ́tɛ̀ a, ɔ́ kʋjɩ̀nyʋ̀àà yrɔ́ɔ́ mà: «Kanyɔɔ̀, dɛ́gbá mɔ̀ ɩ̀lɩa á lɔ̀fɩ́ɛ́ na ká lɛ́ nilo áa?» Zozíi anɩ́: «Dɛ́ gàzɛ̀ɛ̀ na ká kʋ a, bhʋ́ kɔ̀kɔ̀bàyrɩ́ɛ́ na ká wlú ŋnɩlɔ̀.»

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy