Lúkɩ 16 - Neyo

Dɩgàlɩcòyʋ̀ɔ̀ a núnúó

¹ Zozíi srʋ ɔ́ kʋjɩ̀nyʋ̀àà mà: «Lóo a múó a cóyʋ, ɔ́mɔ́ ŋwʋ́ɛ́ ɔ kakalɩ yɩ́gɔ̀, mà nyʋa mʋ lé á srʋ lóo mà nà kakalɩɛ́ nyɔɔ́ ŋwʋ́ɛ́ yɩ́gɔ̀ a, ɩ́mɩ́ ɔ́ ŋátalɛ mɔ̀ bɩ́.

² Lé ɔ́ Kanyɔ wleó, lé ɔ́ srʋ ɔ́ mà: Wɔlíɛ́ ɩ́ nú nà zà a, ɩ́ ya mɔ́ neé mna, ná kakalɩɛ́ ɩ́ nyɛ́ mɔ̀ yɩ́gɔ̀ ŋwʋ̀da a, dɛ́gbá ɩ́ bhli kʋ́ a, srʋ ca mɔ́ɔ a, mà bhá yɩ́ lɛ́ zɩmnɛ́ jɩ̀ a, nɩ ka yɩ́ ná kakalɛ yɩ́gɔ̀ ŋwʋ́.

³ Mà cóyʋɔ́ srʋ ɔ nyoku mà: Bhè cégbá ɩ́ yi yɩ́ lɛ́ nɩ a? Máà ná kanyɔ ya yɩ́ mɔ́ɔ nɔnʋɔ́ yɩ́ kʋ́ sa, dɛ́ ɩ́ kʋ yɩ́ lɛ́ a, nɩ́ ka yɩ́ lágbɩ̀nɔ̀nʋ míi, nɩ́ yɩ́ bhʋ́anɩ fɩ́ɛ́ ka. Lé nɩ́ ka sáà zra a, ɩ́ yi mɔ́ɔ zʋ̀ kʋ́ ka.

⁴ Naa cémʋ́ ná ká nɩ lé nɩ wlʋ́ nɔnʋɔ́ yɩ́ kʋ́ a, nyʋa ká mɔ́ɔ kɛ́zɔ̀ a kʋda wlɩ tʋa a, yɩ́ɩ yɩ́bhlɩɩ̀.

⁵ Ɔ́ wlʋ́ ʋ́ a, nyʋa fɩ́ɛ́ kà wá ɔ́ kanyɔ a kpa a, ɔ́ɔ wle á lɔ̀fɩ́ɛ́ bhlɔ̀bhlɔ̀ɔ̀ lé ɔ́ yrá tagà nyɔ̀ɔ̀ mà: Ná kanyɔ a zùò a kpa ɩ̀ kà a?

⁶ Nyɔ anɩ́: ɩ́ ka ɔ kpʋ́ tití a gwlɩ̀ gbɩ́ a kpa. Cóyʋɔ́ anɩ́: Yáa nú mà, nà kpa a bɔ́gʋ̀ɔ̀ à jɩ́jrà wá a, ʋ́mʋ́ lɛ̀, bɔ́ɔ sá lé cɩ́cɩ nábàà vʋ́vʋ̀à kʋ́, jɩ́jrà kpʋ́ tití a gwlɩ̀ sɔ́ lé kʋ́gbá a kpa.

⁷ Lé ɔ́ yrá nyɔ ànɔ mà: Bhè mɔ̀, zùò a kpa ɩ̀ kà a? Nyɔ anɩ́: Ɩ́ ka ɔ wɩ́ bhɛ̀gɩ a gwlɩ̀ gbɩ́ a kpa. Cóyʋɔ́ anɩ́: Bhá nà kpa a bɔ́gʋ̀ɔ̀ ɩ̀ jɩ́jrà wá a, lé jɩ́jrà wɩ́ bhɛ̀gɩ a gwlɩ̀ mɔ̀na.

⁸ Mà tányɩɛ́ mʋ́ dɩgàlɩcòyʋ̀ɔ̀ a kanyɔɔ́ nú wɔlɩ́ɛ́ ɔ́ nie a, ɔ́ɔ falɔɔ́ ŋwnú, ɔ́ anɩ́: A dʋdʋɛ, zɩkpa zɔ̀ a nyʋa a, cémʋ́ á yì á wɔlɩ́ a kʋ bhli sa a, lé á núnule lé á zi Lagɔ a yúó kʋ́.»

⁹ Lé Zozíi srʋ á sɔ́kʋ́ mà: «Mà mɔ́ɔ náa srʋɛ yɩ́ amɔ lé a bhá dɛ́ zɩkpa zɔ̀ a sɩsɩ́ leyrié lé a kla a nyoku bheyinyʋa, bhè moníe nɩ bhɩa amɔ wlɩ a, a bheyinyʋaá ká kɔ́ɔ̀kɔ́ amɔ wlɩ tʋa.

¹⁰ Nyɔ nɩ yì lɛ tòyipɛ a sa ŋwʋ̀ sa a, ɔ́ yi lɛ kɔ́kɔ́mnɩ́ sá ŋwʋ́; nyɔɔ́ ɔ nɩ́ɩ lɛtòyipɛ a yɩ́gɔ̀ ŋwʋ́ sa yì a, ɔ́ nɩ́ ka lɛ kɔ́kɔ́mnɩ́ a yɩ́gɔ̀ ŋwʋ̀ sa yɩbhlɩ.

¹¹ Naa, dɛ́ zɩkpa zɔ̀ a sɩsɩ́ leyrié, a nɩ nɩ́ ɛ yɩ́gɔ̀ ŋwʋ̀ sa yì a, nyɔ gbá yi amɔ cɩ́cáleyri dɛdɛ da nyɛ́ à?

¹² Lɛ́ á nyɛ́ amɔ saŋwʋ̀da a, a nɩ nɩ́ ɛ kʋbhlisa yɩbhlɩ a, lɛ́ ɛ̀ ŋwɔ́ɔ amɔ mɔ̀glʋ̀ a nɛ a, ɔ̀ yi amɔ mɛ́ yɩ́gɔ̀ŋwʋ̀da nyɛ́ à?»

¹³ Zozíi srʋ á sɔ́kʋ́ mà: «Cóyʋ a múó nɩ́ ka míi lé ɔ ká kanyʋa a sɔ́ gà zrɩɩ, ɔ nɩ nií a, ɔ́ yi múó gblɩ̀ bhè ɔ́ yi ànɔ wà, ɩ́zà ɔ yà múó sɔ́ nɩ núnu a, ɔ ya ànɔ̀ɔ̀ sɔ́ nɩ́ ka núnuù. A nɩ́ ka míi a ká Lagɔ gà zrɩ lé a ká nyumozùzu gà zrɩ.»

Moyízɩ a Jràmáá lé Lagɔ a Léyibhlɩɛ́

¹⁴ Tányɩɛ́ mʋ́ Zozíi cí wɔlɩ́ɛ́ lé ɩ́ bhli a, Falizɩ́ɛnyʋaá à wà moníi a, á nyɩalɔɔ́.

¹⁵ Bhʋ́ ɔ́ srʋ á mà: «Amɔ a nie nànɩ́ cémʋ́ námanyʋa a ŋwɔ́ɔ a, bhè Lagɔ yì a di a nyumoé a wɔlɩ́. Nyʋaá á ŋwʋ́ɛ́ lɛ́ ʋ́ dɛ́ zɩkpa zɔ̀ a, a nɩ́ Lagɔ a drɩ̀ lɛ́ ŋwɔ́ɔ.

¹⁶ Zán Batísɩ a tányɩɛ́ ɛ́mɛ́ sà Moyízɩ a Jràmáá yà Lagɔ a nékʋ́cinyʋaá sɔ́ tányɩ kʋ́, bhá yɩ́ Zán Batísɩ a tányɩɛ́ jɩ̀ lé kà zɩmnɛ́ ŋnɩ a, Lagɔ a Léyibhlɩɛ́ a Námadìè ɩ́mɩ́ á sa yɩ́, mɔ̀ nyɔɔ́ ɔ̀ ŋwʋ́ɛ́ fɩ́ a, mɔ̀ pla mɔ̀ɔ.

¹⁷ Lagɔ yà dʋ̀dʋ sɔ́ yi plɩ́, mà ɛ̀ nɩ̀ ŋwɔ́ɔ Lagɔ̀jràmá a, nábàyìè a múó coco nɩ́ ka ʋ́ jɩ̀ wlʋ́.

¹⁸ Nyɔɔ́ nɩ̀ jɩ́ɩ ɔ ŋwnɔ́ lé ɔ̀ nɩ̀ bhá ŋwnɔ́ ànɔ a, ɔ́ ya ŋnɩ́gbʋ yɛ́. Mɔ̀ nyɔɔ́ nà kà ŋwnɔ́ ɔ nyɩtʋ sa glù a, bhá a, yà sáà ŋnɩ́gbʋ yɛ́.

Ŋazɩ̀nyɔ Lazáa yà lóo sɔ́ a núnúó

¹⁹ Á anɩ́ lóo a múó kʋ̀ a, kótié ɩ̀ náa lé ɩ̀ pá dìè a, ɩ́mɩ́ ɔ́ pla mʋ́, lé yrié fɩ́ɛ́ ŋwɔ́ɔ ɔ́ lɔlɔ a yrií, ɔ́ lie námasa.

²⁰ Mà ŋazɩ̀nyɔ a múó ɔ̀ sí ɔ sríne kʋ́ a, ɔ́mɔ́ á wlele Lazáa, ɔ́ kpɩkpɩ a lɔ̀fɩ́ɛ́ ŋwɔ́ɔ jí a pʋpʋ.

²¹ Mà lóo nɩ li a, ɩ́ ŋányɩɛ́ ɩ̀ bhlie zɔ̀ a, ɔ́ duo yrá ɩ́ lilie mà ɔ̀ nà kɔ̀ɔ mɩ́ liìda nyɛ́ à? Fɩ́ɛ́ lé vʋ̀ʋ yie ɔ jí a yɩ́ mɛ ka.

²² Yruú kʋ̀ʋ a, nyazɩ̀nyɔ̀ɔ̀ ɔ́mɔ́ ɔ̀ kú, mà ɔ́ kú a, kplɔkplɔzìzi yio bhá ka lé ɩ́ fɔɔ́ Ablaámʋ gɔ̀. Lé lóo a sɛ́fʋ pla mɔ̀ lé ɔ́ kú, lé á zizìò.

²³ Mà lóo, pɛpɛkalɩmɛ ɔ nɩ́ kúdukʋ́ mɔ̀ yɛ́ɛ, mà ɔ́ bhá wlú kʋ́ lé ɔ́ dʋdʋ̀ a, ɔ yɩ́ bhli Ablaámʋ jɩ̀, ɔ́ dʋdʋ̀ sɔ́kʋ́ a, Lazáa bɔ́ɔ Ablaámʋ gɔ̀.

²⁴ Lé ɔ́ pá á wɔlɩ́: À tʋ́ Ablaámʋ, ɩ́bhìè bhobho ná ŋazɩ lé cíe Lazáa bhè ɔ ŋwʋ́a ɔ́ wlie nyú, ɔ ká mɔ́ɔ mɛ́ mɩɔ jɩ̀ tátà mà a kosugàla mnɩ́ ɩ́ kʋ a, náa kúé.

²⁵ Lé Ablaámʋ srʋ ɔ́ mà: Ná yʋ́ʋ̀ bhobho mà ɩ̀ yi luò, tányɩɛ́ mʋ́ ɩ̀ kʋ àyɩ wá zɩkpa zɔ̀ a, yà wá nà nɩ námɛɛ́ fɩ́ɛ́ yɛ́, Lazáa yɛ́ wá kalɩmɛ a, ɔ́mɔ́ yɛ́ yɩ́ zɩmnɛ́ lɩ̀à pʋ́pʋ́ɛ́ bhè mɔ̀ yɛ́ yɩ́ kalɩmɛ.

²⁶ Lé sɔ́kʋ́ à yà mɔ̀ sɔ́ nyièdɩ, gbàzrʋ̀ʋ kádʋ kʋ ʋ́, nyɔ nɩ́ ka míi lé ɔ ká àmɔ̀ gɔ̀ yi. Lé nyɔ nɩ́ ka sáà àmɔ̀ gɔ̀ wlʋ́ lé ɔ ká amɔ gɔ̀ mʋ.

²⁷ Lé lóo srʋ sɔ́kʋ́ Ablaámʋ mà: À tʋ́ Ablaámʋ, ɩ́ bhibhie mɔ̀, cíe Lazáa lé ɔ mʋ zɩkpa zɔ̀, ɩ tʋ́ a gbo,

²⁸ mà ɩ́ ka ɔ̀ níayúó a gbɩ́, ɔ ká á gɔ̀ cíi, lé dɛ́ ɩ́ kʋ lɛ́ a, kalɩmɛ mʋ́ ɩ́ kʋ, a nɩ ka mɔ̀ɔ yi!

²⁹ Mà ɔ́ cí sɩ́tɛ̀ a, Ablaámʋ srʋ ɔ́ mà: Ɩ̀ níayúó, Moyízɩ a Jràmáá yà Lagɔ a nékʋ́cinyʋaá sɔ́ kʋ á gɔ̀, á pʋ a nyúkwlí!

³⁰ Nyɔɔ́ anɩ́: Aan, mà à tʋ́ Ablaámʋʋ̀, nyɔ nɩ yi la dɛ́ kúdukʋ́ wlʋ́ lé ɔ nɩ yi la má dí fa a, bhʋ́ á yi la á nyumoé a gbʋ́ wlʋ́.

³¹ Lé Ablaámʋ srʋ ɔ́ mà: A nɩ nɩ́ ka Moyízɩ yà Lagɔ a nékʋ́cinyʋa sɔ́ a cɩ́acɩ́awɔlɩ nyúkwlí pʋ a, nyɔ yi lɛ́ dɛ́ kúdukʋ́ wlʋ́ ɔ́ yi mʋ ɔ́ yi a srʋ, ɩ nɩ́ kaa cɩ́cɩɩ̀.»