Online Bible

Lúkɩ 13 - Neyo

A cíe a nyumogbɩ̀ɛ̀ sá!

¹ Bhʋ́ a tányɩɛ́ nyʋa yi lé á srʋ Zozíi wɔlɩ́ɛ́ ɩ̀ ŋnɩ Galiléenyʋa a, ɩ́mɩ́ ŋwɔ́ɔ mà, Pilátɩ srʋ nyʋa lé á bhlá nyʋaá à mʋ Lagɔ bʋbɔ̀ kà a.

² Lé Zozíi srʋ á mà: «A dùòkʋ́ Galilée a nyʋaá Pilátɩ srʋ nyʋa lé á bhlá lɛ́ a, á nyumoé plɩ́ Galiléenyʋa ànàà fɩ́ɛ́ a nyumoé gɔ̀ a, ɩ́zà ɔ́ srʋ nyʋa lé á bhlá a?

³ Náa srʋɛ amɔ mà à nɩ́ ɩ́mɩ́ ŋwɔ́ɔ, mà a nɩ nɩ́ aa nyumoé a gbʋ́ wlʋ́ a, ámá bhísakʋ́ a na ká kɛ́zɔ̀ kúu.

⁴ Nyʋa a kʋ́gbá gbàátaá Silowée wlʋkádʋ̀ɔ̀ bhli wá jɩ̀ lé à kú a, a yì saá mà a nyumoé zù lé ɛ́ plɩ́ Zelízalɛ́mʋ a nyʋa fɩ́ɛ́ a nyumoé gɔ̀?

⁵ À nɩ́ sáà ɩ́mɩ́ ŋwɔ́ɔ, sɩ́tɛ̀ mʋ́ ɩ́ cí mà, a nɩ nɩ́ aa nyumoé a gbʋ́ wlʋ́ a, cémʋ́ nyʋa kú lɛ́ a, sɩ́tɛ̀ mʋ́ a na ká kúu.»

Figíesuó ʋ̀ nɩ́ trʋ a, ʋ núnúó

⁶ Zozíi pá núnúó lé ɔ́ srʋ á mà: «Nyɔ a múó glɩ figíesu ɔ́ glayʋlàgbaá, suó mʋ lé ʋ́ ŋnɩ trʋda. Tányɩ a múó ʋ́ kanyɔ yi ʋ wlú bhí sa ka mà ɔ nɩ́ ʋ wlú bhúó ŋnɩ.

⁷ Ɩ́ nio lé ɔ́ srʋ lágbàà a mnɩ́ a nɔnʋzrɩ̀nyɔ̀ɔ̀ mà: Lɩkpɩ ta lɛ̀ lé ɩ́ yie figíesuó lɩ̀à wlú dʋdʋ̀ kà lé nɩ́ ŋnɩ ʋ wlú bhúó, díú kʋ́ mà ʋ ná srí flɛ́flɛ̀sa bhʋ́anɩ dʋ̀dʋ̀drèè jɩ̀!

⁸ Bhʋ́ nɔnʋzrɩ̀nyɔ̀ɔ̀ srʋ ɔ́ mà: Kanyɔɔ̀, cíe sɔ́kʋ́ mʋ́ sá lʋkpaá lɩ̀à a múó a zà bhè kʋ́ʋ́ gɔ̀ a dʋ̀dʋ̀ɔ̀ wlúu lé kʋ́ʋ́ gɔ́zɩ gɔ̀ ŋwʋ́.

⁹ Nɩ nɩ sɩ́tɛ̀ a, mɔ̀ yì mà lʋkpaá à yie a, ʋ́ yi trʋ, ʋ nɩ nɩ́ yɩ́ trʋ a, kʋ̀ʋ̀ yɩ́ kʋ́ dí.»

Nyɔbhleyruó kʋ́ Zozíi yalɩma bhlɛ́kaŋwnɔ

¹⁰ Zúfʋnyʋa a nyɔbhleyru a múó kʋ́, Zozíi kʋ zúfʋcɛcɩwlʋ a mnɩ́ nyʋa a cɩ́ada,

¹¹ mà ŋwnɔ́ a múó kʋ̀ nyʋaá nyièdɩ a, lɩkpɩ kʋ́gbá lɩkpɩ gbàáta lɛ̀ lé nyumozùzu nie lé ɔ nɩ́ míi ɔ ká mʋ́ gbálɔ̀, ɔ́ɔ glelo mʋ́.

¹² Tányɩɛ́ mʋ́ Zozíi yɛ́ ɔ́ a, ɔ́ srʋ ɔ́, mà: «Ŋwnɔ́ɔ̀, nà gúó ya zɩmnɛ́ bhɩa.»

¹³ Ɔ́ gbɛlɔɔ́ glɔ̀gbɩ́ jɩ̀ a, ŋwnɔ́ɔ́ kʋ dáamúó lé ɔ́ yalɩma lé ɔ́ bháa ʋ́ Lagɔ a ŋwnú fafʋ́ kʋ́.

¹⁴ Mà zúfʋcɛcɩwlʋɔ́ á kámanyɔɔ́, cémʋ́ Zúfʋnyʋa a nyɔbhleyru kʋ́ Zozíi yalɩma ŋwnɔ́ a, wɔlɩ́ɛ́ nɩ́ ɔ duo kʋ́ náa, ɩ́ ka ŋnɩ́ lé ɔ́ srʋ jrè gɔ̀ a nyʋa mà: «Yri gbɩ́flɔ́ a tányɩ mʋ́ nyɔ ka lé ɔ ká nɔnʋ zrɩ, ɔ̀ nɩ yrá lé ɔ̀ kà yalɩma a, ɩ́mɩ́ mnɩ́ ɔ nɩ yii, a ná yi Zúfʋnyʋa a nyɔbhleyru kʋ́!»

¹⁵ Bhʋ́ Kláyɩ́sɩ sané, ɔ́ anɩ́: «Yrʋnyʋa yɩ, Zúfʋnyʋa a nyɔbhleyru kʋ́ amɔ mɔ̀glʋ̀ a nɩ́ vlulo á dòdòbhlìi yà a jákásɩ sɔ́ lé a nɩ́ sɩɩ́ liìda a, lé a nɩ́ fɩɩ́ nyíé gɔ̀ mná ka a?

¹⁶ Bhè ŋwnɔ́ɔ̀ ŋwɔ́ɔ à tɩtɔ Ablaámʋ a yʋ́ lé Dɩ́blʋ ŋwʋ́ jɩ̀ lé lɩkpɩ kʋ́gbá lɩkpɩ gbàáta lɛ̀ zɩmnɛ́ a, ɛ̀kɛzà Zúfʋnyʋa a nyɔbhleyru lɛ̀ a, zà a ná sɔɔ́ jɩ̀ɩ?»

¹⁷ Zozíi cí sɩ́tɛ̀ a, nyʋaá fɩ́ɛ́ à nɩ́ la mɔ́ bɩ́ kʋ́ a, zʋ̀ʋ yi laa kʋ́, náma wɔlɩ́ɛ́ Zozíi nɩ a, ɩ́ ka la jrèè a mnɩ́ a nyʋa a lɔ̀fɩ́ɛ́ lɔlɔ kʋ́.

Siyue ŋwɔ́ɔ mutádɩ a, ɛ núnúó
( Matíe 13.31‑32 ; Málɩ́kɩ 4.30‑32 )

¹⁸ Zozíi cí sɔ́kʋ́ mà: «Lɛ́gbá wlʋ́ʋ lɛ́ Lagɔ a Léyibhlɩɛ́ lɩ̀à a? Lɛ́gbá ɩ́ yie lɛ́ kɛtɛkʋ́ pápa áa?

¹⁹ Mà nɩ̀ yɛ́ɛ a, nànɩ siyue tòyilɛ̀ á wlele mutádɩ̀yie a, lé nyɔ glɩ ɔ zalɩdɛ́ɛ a mnɩ́ a, lé ɛ̀ wlʋ́ lé ɛ́ nyniì, lé ɛ plɩ́ su kádʋ lé nimni páa ʋ lábhɩɛ́ a mnɩ́ níní a.»

Flɔ́ɔ a bháabháagɔ̀zɩ̀ɛ̀ a núnúó
( Matíe 13.33 )

²⁰ Zozíi anɩ́: «Lɛ́gbá Lagɔ a Léyibhlɩɛ́ wlʋ́ lɛ́ kɛtɛkʋ́ bhè ɩ́ yie lɛ́ pápa áa?

²¹ Lagɔ a Léyibhlɩɛ́ wlʋ́ mànɩ́ flɔ́ɔ a bháabháagɔ̀zɩ ŋwnɔ́ bhá lé ɔ́ ŋwʋ́ flɔ́ɔ pʋ́ bhɛ̀gɩdrè a mnɩ́ lé ɛ̀ bhá a.»

Izrayɛ́lɩ yi lɛ́ Lagɔ a Léyibhlɩɛ́ a mnɩ́ plaa?
( Matíe 7.13‑14 ; 21.23 )

²² Zozíi bhlie díé yà bìdíé sɔ́ kʋ̀ nyúzɔ kʋ́ a, ɔ́ plɩ́ɛ́ ɔ́ mnɛ Zelízalɛ́mʋ bhè ɔ́ cɩ́alɛ nyʋa.

²³ Lé nyɔ a múó yrɔ́ɔ́ mà: «Kanyɔɔ̀, nyʋaá nà kà ʋ́ neé wlʋ́ a, a nɩ́ ka zumòò?» Bhʋ́ Zozíi srʋ ɔ́ mà:

²⁴ «A ŋwʋ́ fɩ́ a ká srínitòyilɛ̀ɛ̀ a mnɩ́ bléè, mà náa srʋɛ amɔ mà, kɔ́kɔ́mnɩ́ yrá yɩ́ lɛ a mnɩ́ a bléleé bhè a nɩ́ ka yɩ́ lɛ míi.

²⁵ Tányɩɛ́ mʋ́ gbó a kanyɔ nɩ bhle yɩ́ lɛ ɔ gbó a, jrùkʋ́ a na ká lɛ kʋʋ lé a ká lɛ kplu bhɩtɩ a ká cí mà: Kanyɔɔ̀, ɩ́ bhìè ka àmɔ̀ gbó klʋ́ àyé, bhʋ́ ɔ́ na ká yɩ́ lɛ amɔ srʋ mà: Nɩ́ amɔ yì!

²⁶ A yi yɩ́ lɛ cí mà: À yà mɔ̀ sɔ́ lile wá kʋ́, lé à mnálɛ wá kʋ́, lé ɩ̀ cɩ́alɛ wá à bhlé a dú a trí a mnɩ́ nyʋa Lagɔ wɔlɩ́.

²⁷ Ɔ́ yi sɔ́kʋ́ amɔ srʋ mà: Nɩ́ kɛ̀ nyʋa a ŋwɔ́ɔ a, yì, a wlʋ́ mɔ́ yɩ́ kʋ́, amɔɔ́ nie nyumogbɩ̀ɛ̀ a!

²⁸ Tányɩɛ́ mʋ́ a na ká yɩ́ lɛ Ablaámʋ, Izákɩ, Zakɔ́bʋ, lé Lagɔ a nékʋ́cinyʋaá fɩ́ɛ́ Lagɔ a Léyibhlɩɛ́ a mnɩ́ yɛ́ a, bhè amɔ a ká yɩ́ lɛ jrùkʋ́ tuo a, bhʋ́ a na ká yɩ́ lɛ ŋwí lé a ká yɩ́ lɛ glàa li.

²⁹ Nyʋa yi bhlɩ́ɛ́ fɩ́ɛ́ jɩ̀ wlʋ́ á yi yi, dɛ́ yrʋ́ la lɛ, dɛ́ ʋ́ bhli lé, nyʋa àna yi jie a blɛ kʋ́ wlʋ́, àna yi jie a zɔ̀ wlʋ́ á yi yi, lé á lɔ̀fɩ́ɛ́ yi ɔ̀ Lagɔ a Léyibhlɩɛ́ a mnɩ́ lida wlú ŋnɩlɔ.

³⁰ Bhʋ́ a tányɩɛ́, nyʋa à nà kà bɩ́ bhɩa, á nyièdɩ a bhlɔ̀bhlɔ̀ ana yi drɩ̀ plɩ́ɩ̀ lé ànàà kʋ̀ la drɩ̀ a, á yi bɩ́ plɩ́ɩ̀.»

Zozíi bhɔtɔ Zelízalɛ́mʋ a nyʋa a zà
( Matíe 23.37‑39 )

³¹ Zozíi kʋ cíida, lé Falizɩ́ɛnyʋa a zùò ŋnɩ ɔ́ gɔ̀, lé á srʋ ɔ́, mà: «Wlʋ́ bhlɩ́ɛ́ lɩ̀à jɩ̀ kà mʋ, mà lóo Elódʋ mʋ́mɔ mɔ̀ ɔ ká mɔ̀ bhlá!»

³² Bhʋ́ Zozíi srʋ á mà: «A mʋ a srʋ Elódʋ wlʋ́ mànɩ́ gboglìzàla a mà: Ɩ́ jɩ́lɛ nyumozìzi, ɩ́ yalɩmalɛ gupuonyʋa zɩmnɛ́ lé kɛ́ɛ̀lɛ, ta yruó kʋ́ ɩ́ yi zɔ̀ bhɩa.

³³ Sɩ́tɛ̀ ɩ́ kʋ lé ɩ́ ka lé ká ná nyúzɔ̀ɔ̀ bhli zɩmnɛ́, kɛ́ɛ̀lɛ lé kɛ́àlɩ́, mà nyɔ nɩ ŋwɔ́ɔ Lagɔ a nékʋ́cinyɔ a, ɔ nɩ́ ka lé ɔ ká bhlɩ́ ànɛ jɩ̀ kúu à nɩ̀ nɩ́ Zelízalɛ́mʋ ŋwɔ́ɔ a.

³⁴ Wé! Zelízalɛ́mʋ, Zelízalɛ́mʋ! Mɔ̀ bhlá Lagɔ a nékʋ́cinyʋa, lé ɔ̀ pá nyʋaá Lagɔ la mɔ̀ a cɔ́kpalɩ lé ɔ̀ bhlá á a a, bhè ná duo yrá la nà yúó a kʋgʋ̀gwlàlɛ̀ɛ ɩ̀ nyoku gɔ̀ cémʋ́ kɔkɔga gʋ́gwlalɛ a yúó kʋ́ lé á gbí á jɩ̀ a, mà a nɩ́ɩ kʋ́ ŋwnʋ́.

³⁵ Naa, náa srʋɛ amɔ mà a gbóó yi wɔlɔ, a nɩ́ ka yɩ́ sáà mɔ́ yɛ́, tányɩ nà kà kɛ́ ʋ́ kʋ lé a ká kɛ́ cí mà: Mɔ̀ɔ yi Kanyɔ a ŋnɩ́ɛ́ mʋ́ a, Lagɔ a nyúpajɔ̀lʋ̀ɔ̀ ŋnɩ mɔ̀ kʋ́!»

« Předchozí

další »

Wycliffe Bible Translators, Inc.

Následuj nás:

Sponzorované odkazy

Reklamy