Lúkɩ 12 - Neyo

Zozíi anɩ́ ŋanɩmɛ ná bhlá ɔ kʋjɩ̀nyɔ

¹ Bhʋ́ a tányɩɛ́ nyʋa kɔ́kɔ́mnɩ́ ŋnɩlɔ̀ Zozíi gɔ̀ wlú, nyʋa a zumole ka ŋnɩ́ lé á cécrele a nyoku jɩ̀, lé Zozíi srʋ ɔ́ kʋjɩ̀nyʋ̀àà mà: «A mányɩ Falizɩ́ɛnyʋa á nɩnɩgbɩ, mà áa ka yrʋʋ́.

² Wɔlíɛ́ fɩ́ɛ́ ɩ̀ zúzùò wá a, ɩ́ yi klʋ́ kalɔ. Lé wɔlɩ́ɛ́ fɩ́ɛ́ ɩ̀ nilo wá kotí kʋ́ a, ɩ́ yi zɔ̀ flʋ.

³ Ɩ́mɩ́ kà ŋnɩ́ a zà wɔlɩ́ɛ́ fɩ́ɛ́ á na ká cúcú a mnɩ́ cí a, ɩ́ yi gàgàzrɩ̀ zɔ̀ flʋ; lé wɔlɩ́ɛ́ a na ká sré ŋwúŋwùò a, á yii crɩ́kpa dí kʋ́ ŋwʋ́ʋ.

⁴ Na náa srʋɛ amɔɔ ŋwɔ́ɔ ɩ bheyinyʋa a, mà: Nyɩ́kpɔbhlanyʋa ná ka amɔ ŋanɩmɛ kʋ́, mà yɛ́kɛ́ a múó á yi mi lé á yi bhlá, a nɩ ka sɔ́kʋ́ wɔlɩ́ ànɩ a niníé míi!

⁵ Ká amɔ nyɔɔ́ nà kà amɔ ŋanɩmɛ kʋ́ ka a, pápa a: Nyɔɔ́ nà kà amɔ ŋanɩmɛ kʋ́ ka a, ɔ́mɔ́ ŋwɔ́ɔ Lagɔ! Ɔ́mɔ́ kà pɔ́wa lé ɔ̀ yi míi lé ɔ̀ yi nyɔɔ́ ɔ̀ kú a, kosugàlàà à nɩ́ nyúmo a, mnɩ́ páa.

⁶ Nimnilɔlɔkpa a múó kʋ ʋ́ lé a nɩ́ mákɩtɩ kʋ́ pɛ́lʋ́ ka, sɩ́tɛ̀ ɩ́ kʋ bhè ɩ́ ka Lagɔ gbʋ́!

⁷ Amɔ, Lagɔ yì a wlú a nyí a zumole, ŋanɩmɛ ná bhlá amɔ mà a ka gbʋ́ lé a zi bhʋ́anɩ nimnilɔlɔkpaá a lɔ̀fɩ́ɛ́ kʋ́.

⁸ Nyɔɔ́ nɩ̀ bhɩtɩ digblè nyʋa fɩ́ɛ́ a klʋ́ jɩ̀ mà, ná kʋjɩ̀nyɔ ɔ́ ŋwɔ́ɔ a, ná srʋɛ amɔ mà, Kplɔkplɔzìzi a klʋ́ jɩ̀, Nyɔɔ́ a Yuwliyʋɔ́ yi sáà bhʋ́anɩ nyɔ a zà digblè bhɩtɩɩ̀ cémʋ́ ɔ́ ŋwɔ́ɔ cɩ́cása ɔ kʋjɩ̀nyɔ a.

⁹ Ɩ́zà, nyɔ nɩ cíi nyʋa a klʋ́ jɩ̀ mà ɔ nɩ́ ná kʋjɩ̀nyɔ ŋwɔ́ɔ a, Kplɔkplɔzìzi a klʋ́ jɩ̀, Nyɔɔ́ a Yuwliyʋɔ́ yi sáà cí mà ɔ nɩ́ ɔ́ yì.

¹⁰ Nyɔ nɩ cí Nyɔɔ́ a Yuwliyʋɔ́ a zà nyumo wɔlɩ́ a, Lagɔ yi míi lé ɔ́ yi bhʋ́anɩ nyɔɔ́ cie. Mà nyɔ ká Blɔ̀blɔ̀zùzùò a zà nyumo wɔlɩ́ cí a, bhʋ́anɩ nyɔɔ́, Lagɔ nɩ́ kɔɔ́ kɔ́ɔ̀kɔ́ cie.

¹¹ Á yi amɔ zúfʋcɛcɩghlɩɛ́ a mnɩ́ wɔlɩ́ gɔ̀ fa, á yi amɔ gɔ̀mnanyʋa drɩ̀ wɔlɩ́ gɔ̀ fa, ŋanɩmɛ ná bhlá amɔ lé a ká cí mà: Bhè cégbá à yi cí bhè à yi à nyòku kʋ́ bhla áa?

¹² Cémʋ́ a na ká cí a, Blɔ̀blɔ̀zùzùò yi amɔ mɩ́ duo kʋ́ páa.»

A ná máa zɩkpa zɔ̀ a léyri kʋ́

¹³ Zozíi yà nyʋa sɔ́ kʋ jrèè, lé nyɔ a múó so á nyièdɩ glù, lé ɔ́ srʋ Zozíi mà: «Másɛɛ̀, srʋ ɩ nɩ́ayʋɔ́ bhè à kà àa jáa bhábhaa.»

¹⁴ Bhʋ́ Zozíi srʋ ɔ́ mà: «Ɔ̀ ŋwʋ́ mɔ́ɔ a tʋ́ a jáa bhábha wɔlɩ́ yɩ́kʋ́ à?»

¹⁵ Lé Zozíi srʋ nyʋa a lɔ̀fɩ́ɛ́ mà: «A nɩ nɩ a, a mányɩ! A ná máa lɩ́ a wàwʋ́ kʋ́, mà nyɔ yi léyri a céàna li, lé léyrie nɩ́ ka míi lé ɩ ká ʋ́ mɔ́ neé saà.»

¹⁶ Lé Zozíi pá núnúó a múó, ɔ́ anɩ́: «Lɛkanyɔ a múó lʋ lágbɩ, lé ɔ lágbɩ̀ɛ̀ nyɛ́ ɔ́ cɩ́cálelilɩ.

¹⁷ Lé ɔ́ srʋ ɔ nyoku mà: Cégbá mʋ́ ɩ́ yi lɛ́ nɩ áa? Nɩ́ ka lelilɩɛ́ lɩ̀à a ŋwʋ́ da yɛ́.

¹⁸ Cémʋ́ na ká nɩ a, yɩ́ɩ yɛ́. Ná totíé fɩ́ɛ́ mnɩ́ ɩ́ gɩglalɛ ná lelilɩ a, náa kɩ́ɩ́ wlawlaà, lé ká lɛkádɩ pá, bhʋ́ ná lelilɩ yà ná lɩ́ ànɩ̀ɛ̀ fɩ́ɛ́ sɔ́ yi plaàda yɛ́.

¹⁹ Bhʋ́ a tányɩɛ́ ɩ́ yì yɩ́ sa mà, yáa yɩ́ lelilɩ yɛ́ lɩkpɩ kɔ́kɔ́mnɩ́ a zà; ɩ́ yi yɩ́ duo sá páa, lé ɩ́ yi yɩ́ li, ɩ́ yi yɩ́ mná, lé ɩ́ yi yɩ́ lúbhoò!»

²⁰ Ɔ́ cí sɩ́tɛ̀ a, bhʋ́ Lagɔ srʋ ɔ́ mà: «Nɩnànyɔ̀, náa srʋɛ mɔ̀ mà dɩ́bɩ̀ɛ̀ lɩ̀à bhlɔ̀bhlɔ̀, ɩ̀ yi yrá tuò, lé nyɔɔ́ ɔ̀ kɔ̀ɔ̀ zà ɩ̀ ŋwʋ́ lɩ́ɛ́ fɩ́ɛ́ lɩ̀à sá a, à kɔ̀ɔ̀ yɛ́.»

²¹ Zozíi srʋ ɔ́ sɔ́kʋ́ mà: «Lɛ́bhɛɛ wɔlɩ́ɛ́ ɩ̀ ŋnɩɛ nyɔɔ́ ɔ̀ lie léyri ɔ́ a múó a zà a, lé ɔ̀ nɩ́ mányɩ Lagɔ a wɔlɩ́ a.»

Lagɔ ŋwʋ́ɛ́ ɔ yúó yɩ́gɔ̀

²² Zozíi srʋ ɔ́ kʋjɩ̀nyʋ̀àà mà: «Ná srʋɛ amɔ, a ná bhɔtɔ aa zɩkpa a zà, lé a ká cí mà, dɛ́gbá à yi lelilɛ yɛ́ lé à yi li áa? A ná bhɔtɔ sáà aa kpɩkpɩ a zà, lé a ká cí mà, bhè dɛ́gbá à yi kótu yɛ́ɛ lé à yi mʋ́ pla áa?

²³ A lɛ́bhɛɛ, nyɔ a kɔ́ náa lé ʋ́ zi lelilɩ kʋ́ lé nyɔ a kpɩkpɩ a námɛ zi sáà kóti kʋ́.

²⁴ A dʋdʋ̀ caá kɔ̀kɔ̀bàyrɩ́ a, ɩ nɩ́ glɩ lelilɩ lé ɩ nɩ́ ŋwʋ́ sáà lelilɩ wlʋ kʋ́ sá, sɩ́tɛ̀ ɩ́ kʋ bhè Lagɔ fínilɩɩ́. Bhè amɔ, a nɩ́ gbʋ́ ka lé a nɩ́ nimni kʋ́ zii? A ka kpanyɩ gbʋ́ à!

²⁵ A nyièdɩ a nyɔ gbá yi míi lé ɔ̀ yi bhɔtɔɛ bhá lé ɔ̀ yi ɔ zɩkpa zɔ̀ a yri kʋ́ ŋwʋ́ áa?

²⁶ Nyɔ nɩ́ kɩɩ míi, bhè ɛ̀ kʋ̀ bhè aa bhɔtɔɛ zù saá a?

²⁷ A dʋdʋ̀ ca flɛ́lɩ a námɛ a, flɛ́lɩ nɩ́ kótu a kplá sa yì, ɩ nɩ́ sáà gèseplʋ a bhla sa yì, sɩ́tɛ̀ ɩ́ kʋ bhè Salomɔ́ɔ mɔ̀glʋ̀ɔ̀ ŋwɔ́ɔ wázɔ̀ lóo a, tányɩɛ́ fɩ́ɛ́ ɔ́ zi zɩkpa zɔ̀ a, ɔ mʋ́plakotu a námɛ nɩ́ flɛ́lɩ námɛ zi.

²⁸ Pití a pʋpʋ́ɔ́ lɩ̀à, Lagɔ ŋwʋ́ ɩ́ yɩ́gɔ̀ lé nɩ̀ yɩ́ a, námɛ zii wlú, bhè sɩ́tɛ̀ ɩ́ kʋ bhè zrɩɩ ká zɩ ka mʋ a, á ŋwʋ́ ɩ́ kosu, bhè amɔɔ ŋwɔ́ɔ yrúkanyʋa a, amɔ Lagɔ nɩ́ ka yɩ́gɔ̀ ŋwʋ́ʋ, a yì saá mà Lagɔ yi amɔ né gɔ̀ sa a? Ɛ̀kʋ̀ʋ̀ lɛ́ ʋ́ bhè aa ditátɩ́ nɩ́ lɛ́ zù a?

²⁹ Náa srʋɛ sáà amɔ mà lelilɩ yà nyú sɔ́ a wɔlɩ́ ná gbláa amɔ duo nyú.

³⁰ Mà nyʋaá à nɩ́ Lagɔ yì a, ámá bhobho sɩ́tɛ̀, à nɩ̀ ŋwɔ́ɔ amɔ a, a Tʋ́ Lagɔ yì wɔlɩ́ɛ́ a yrá yru a.

³¹ Lɛ́ɛ́ a na ká mʋ́mɔ a, ɛ́mɛ́ ŋwɔ́ɔ Lagɔ a Léyibhlɩɛ́, wɔlɩ́ɛ́ ànɩ̀ɛ̀ fɩ́ɛ́, Lagɔ yi amɔ mɩ́ nyɛ́.»

A ŋwʋ́ʋ Lagɔ gɔ̀ sá

³² Lé Zozíi srʋ á sɔ́kʋ́ mà: «Ŋanɩmɛ ná bhlá mɔ̀, Lagɔ a mnakpɩtòyilɛ̀! Mà amɔ a Tʋ́ Lagɔ yrá lé ɔ ká ɔ Léyibhlɩɛ́ nyɛ́.

³³ A ŋwʋ́ a kakalɩɛ fɩ́ɛ́ pɛ́lʋ́, moníe á na ká ɩ mnɩ́ yɛ́ a, a bhábhalɩɩ́ ŋazɩ̀nyʋa. Bhɔ́klɔɔ́ ɔ̀ nɩ́ɩ ŋátɔ a, ʋ́mʋ́ a nɩ nɩ a nyoku gà, lagɔ̀duú a nɩ léyrie ɩ́mɩ́ a nɩ mʋ́mɔɔ̀, ɩ́mɩ́ nɩ́ bhɩa kʋ́, lé ghlíighlíinyɔ nɩ́ mɔ̀ɔmɔ̀ kʋ, gwlɩ̀gwlɩ̀ɩ nɩ́ sáà mɔ̀ɔmɔ̀ kʋ.

³⁴ Dɛ́ɛ́ a kakalɩ kʋ a, bhʋ́ a di kʋ.

A yrɩ̀lɩ!

³⁵ A pla nɔnʋzrɩ̀kòti mʋ́, a gʋa bɛ́tɩ gwá, a nápɩ ŋwʋ́lɔ kɔ́ɔ̀kɔ́ klʋ́!

³⁶ A nɩ cémʋ́ nyʋa gláa lɛ́ a kanyɔɔ́ ɔ̀ wlʋ́ɛ́ lówʋ̀duú ŋnɩ́ fla ka a, bhè ɔ nɩ bhɩtɩ ɔ gbó a, a ká á ka lé ɔ ká pla a.

³⁷ Cóyuó nà kà gláa, lé à nɩ ka ŋwɔ́ɔ lé a kanyɔ ká jɩ̀ ŋnɩ a, á ya pʋ́. Ná srʋɛ amɔ cɩ́cása, a kanyɔɔ́ nɩ yrɩ́bha a, ɔ́ yi nɔnʋzrɩ̀kòti mʋ́ pla lé ɔ́ yi a tébhle ŋwʋ́ lé á yi li.

³⁸ Á kanyɔ yi dʋdʋ́kádʋʋ́ yii, ɔ́ yi zizìèda yii, ɔ nɩ ŋnɩlaá dɛdɛ̀da a, á ya pʋ́.

³⁹ A dʋdʋ̀ ca a, gbó a kanyɔ nɩ yì tányɩɛ́ mʋ́ ghlíighlíinyɔ yio ghlí ka a, ɔ nɩ́ kɔɔ́ la sá cíe lé ɔ ká gbó pla.

⁴⁰ A sɛ́fʋɔ́, a yrɩ̀lɩ, mà tányɩɛ́ a nɩ́ lùò a, ɛ́mɛ́ mʋ́ Nyɔɔ́ a Yuwliyʋɔ́ na ká yi.»

⁴¹ Tányɩɛ́ mʋ́ Zozíi cí sɩ́tɛ̀ a, Pɩ́ɛ́lɩ yrɔ́ɔ́ mà: «Kanyɔɔ̀, dɔ̀ɔ̀ ɩ̀ pá lɛ́ a, àmɔ̀ ɩ̀ srʋɛ, mà nyʋa fɩ́ɛ́ ɩ̀ srʋɛ?»

⁴² Bhʋ́ Zozíi anɩ́: «Cóyʋ gbá ɔ̀ kɔ̀ nɩnɩgbɩ srí sá, lé ɔ̀ fíke lé ɔ kanyɔ yi lɛ́ srʋ mà ɔ ŋwʋ́ gbó yɩ́ gɔ̀, lé lelitanyɩ nɩ ŋnɩ a, ɔ nyɛ́ gbó a nɔnʋzrɩ̀nyʋ̀àà a lɔ̀fɩ́ɛ́ lelilɩ áa?

⁴³ Cóyʋɔ́ nà kà bhʋ́anɩ nɔnʋɔ́ a zrɩda kʋ lé ɔ kanyɔ ká yrɩ́bha a, ɔ́ ya pʋ́!

⁴⁴ Cɩ́cása a mnɩ́, ná srʋɛ amɔ mà bhʋ́anɩ cóyʋɔ́, ɔ kanyɔ yio ɔ gbó a kakalɩɛ́ fɩ́ɛ́ yɩ́ gɔ̀ ŋwʋ̀ da nyɛ́.

⁴⁵ Mà cóyʋɔ́ nɩ srʋ ɔ́ nyoku mà: Ná kanyɔ nɩ́ ka kamnɩ́lɛ́ yi, lé ɔ nɩ bháa ʋ́ cóyuoó yà geyiŋwnaá sɔ́ a bhite kʋ́, lé ɔ nɩ li, lé ɔ nɩ mná lé nʋ́ nɩ bhlɔ́ a,

⁴⁶ yruó kʋ́ ɔ kanyɔ na ká yrɩ́bha a, ɔ́ na kɔ́ɔ́ zɔ̀ vú; ɔ nɩ yi a, cémʋ́ á bhlile kàpàkápányʋa kʋ́ a, sɩ́tɛ̀ mʋ́ ɔ́ na kɔ́ɔ́ kʋ́ bhli, lé ɔ kɔ́ɔ́ jɩ́.

⁴⁷ Cóyʋɔ́ yi wɔlɩ́ɛ́ ɔ kanyɔ yrá, bhè ɔ̀ nɩ́ nií a, áa bhɩtoó.

⁴⁸ Cóyʋɔ́ nɩ́ wɔlɩ́ɛ́ ɔ kanyɔ yrá a, yì lé ɔ̀ nɩ nyumo sa a, ɔ́ nɩ bhiteé tɩ́tɩlɔ kʋ́. A lɛ́bhɛɛ! Nyɔ á nyɛ́ kpanyɩ a, ɔ́mɔ́ á yrálɛ kpanyɩ mʋ́. A nɩ nyɛ́ nyɔ lɛkɔ́kɔ́mnɩ́ sa ŋwʋ̀da a, á nɩ yralɔ lɛ́ mʋ́ a, áa plɩ́ɛ́ wlú.»

Zozíi a zà nyʋa na ká mʋ́ dúlo

⁴⁹ Zozíi anɩ́: «Náa yi lé ká dʋ̀dʋ kʋ́ kosu ŋwʋ́, lé ɩ́ yrá lé ʋ vɩ́da sɩsɔɔ́!

⁵⁰ Náa ká wɔlɩ́ kádɩ mʋ́ blée, mà cémʋ́ duo gblálɛ mɔ́ɔ ɩ́zà nyú a, ɩ́ yra lé ɩ nilo yɩ́ sɩsɔɔ́!

⁵¹ A yì saa mà náa yi lé dʋ̀dʋ kʋ́ ká kʋ́ wɔtɔma a? Ɛ̀ nɩ́ ɩ́mɩ́ ŋwɔ́ɔ, ná srʋɛ amɔ mà náa yi lé zɩkpa zɔ̀ a nyʋa ká ná zà mʋ́ dúlo!

⁵² Bhá yɩ́ lɛ́ zɩmnɛ́ jɩ̀ a, nyʋa gbɩ́ yi gbó a múó mnɩ́ kʋ, á yi mʋ́ dúlò, ta yi ànàà sɔ́ lɔ́lɔ́kpá fa, lé sɔ́ yi ànàà taa lɔ́lɔ́kpá fa.

⁵³ Tʋ́ yi ɔ́ yʋ́ mʋ́ gblɩ̀, lé yʋ́ yi sáà ɔ tʋ́ mʋ́ gblɩ̀, ŋnɩ́keyʋ ya ɔ́ nɛ́ sɔ́ yi cí, lé nɛ́ yi ɔ ŋnɩ́keyʋ cícíé fa, ŋwʋ́trɔ yi ɔ́ yʋ́ a ŋwnɔ́ mʋ́ gblɩ̀, yʋ́ a ŋwnɔ́ yi sáà ɔ ŋwʋ́trɔ cícíé fa.»

A nɩ wɔlɩ́ɛ́ ɩ̀ ná a

⁵⁴ Zozíi srʋ sɔ́kʋ́ jrèè a mnɩ́ a nyʋaá mà: «A nɩ yɛ́ jrù lé ʋ nɩ la jie a, a nie mà nyú ya kla, ʋ́ na ká bhla, Lé cɩ́cása ʋ́ bhla.

⁵⁵ Lé a nɩ yɛ́ sáà vʋ̀vɔ̀lʋ̀ɔ̀ lalɛ klá wlú lé ʋ yie a, a nie mà: Yrʋ́ na ká pʋ́! Lé cɩ́cása, yrʋ́ pʋ́ɛ́.

⁵⁶ Yrʋnyʋa yɩ, a dʋdʋɛ lagɔɔ́ lé dʋ̀dʋ kʋ́, lé a yɩbhlɩɛ wɔlɩ́ɛ́ nà kà ŋnɩ a, bhè ɛ̀kʋ̀ʋ̀ bhè a nɩ yɩbhlɩ tányɩɛ́ lɩ̀à a mnɩ́ a wɔlɩ́ɛ́ à?

A yɩbhlɩ wɔlɩ́ a kʋbhlisa

⁵⁷ Bhè ɛ̀kʋ̀ʋ̀ bhè amɔ mɔ̀glʋ̀ a nɩ́ lɛ́ wɔlɩ́ a kʋbhlisa yɩ̀ a?

⁵⁸ A dʋdʋ̀ʋ̀, yà nyɔ sɔ́ a nɩ yɛ́ wɔlɩ́ a, bhobho lé yɔ̀sɔ́ ká núnu ɔ nɩ ka mɔ̀ lɔ́ya drɩ̀ fa, lɔ́ya nɩ ka sʋ́ja ku a nɩ ka mɔ̀ jɩ̀ ŋwʋ́.

⁵⁹ Náa srʋɛ mɔ̀ mà, nɩ̀ nɩ́ sɩ́tɛ̀ nɩ lé a nɩ ŋwʋ́ mɔ̀ jɩ̀ a, ɩ̀ yi mɔ̀ɔ kʋ lé ɩ̀ yi kpaá a lɔ̀fɩ́ɛ́ pɛ́ɛ, lé a nɩ́ ka mɔ̀ pìkìni a múó coco ciè.»