Lúkɩ 11 - Neyo

Zozíi cɩ́a ɔ́ kʋjɩ̀nyʋ̀àà bhibhie

¹ Tányɩ a múó Zozíi kʋ dáamúó ɔ́ bhibhie, ɔ́ bhɩa bhibhie zɔ̀ a, ɔ́ kʋjɩ̀nyʋ̀àà a nyièdɩ a nyɔ a múó srʋ ɔ́ mà: «Kanyɔɔ̀, cémʋ́ Záan cɩ́a lɛ́ ɔ́ kʋjɩ̀nyʋ̀àà bhibhie a, cɩ́a sáà àmɔ̀ bhlɛ́ɛ!»

² Zozíi anɩ́: «A nɩ bhibhie a, a cí mà: À Tʋ́ɔ́ kʋ̀ lagɔɔ́ a, Nà ŋnɩ́ɛ́ ɩ blɔ̀! Nàa pʋ́pʋ́ɛ́ yi!

³ Nyɛ́ àmɔ̀ à yruú a lelilɛ

⁴ Cie àmɔ̀ à nyumoé, Cémʋ́ à sɛ́fʋɔ́, à ciele lɛ́ sáà Nyʋaá à nie àmɔ̀ nyumoé a! Lé nàa cíe àmɔ̀ sá Lé nyumozùzu nɩ ka àmɔ̀ zɔ̀ sa à À nɩ̀ kà nyumoé a mnɩ́ bhli!»

Nɩ̀ yráa Lagɔ lɛ́ mʋ́ a, ɔ́ nyɛ́ mɔ̀ mɛ́

⁵ Lé Zozíi srʋ á sɔ́kʋ́: «A nyièdɩ á nyɔ a múó nɩ ka bheyi, lé ɔ nɩ yi dʋdʋ́kádʋʋ́ ɔ́ kplu bhɩtɩ ka, lé ɔ nɩ srʋ ɔ́ mà: Bhéè, ɩ́bhìè gbla mɔ́ɔ flɔ́ɔbhi a ta

⁶ mà ɩ bheyi a múó ya lówùduú wlʋ́ ɔ́ ya mɔ́ɔ zɔ̀ vú, lé nɩ́ ʋ́ lelilɛ ka kɔ́ɔ́ nyɛ́.

⁷ Lé ɔ bheyie nɩ kʋ sré lé ɔ nɩ srʋ ɔ́ mà: Ɔ̀ɔ̀, nàa yɩa mɔ́ɔ kwlʋ́ mà yáà ná yúó sɔ́, à yà sá pʋ́. Nɩ́ a ká yɩ́ glù sɔɔ̀ lé ká nyɔ flɔ́ɔ nyɛ́.

⁸ Náa srʋɛ amɔ mà: lɩ́ɛ́ fɩ́ɛ́ ɔ́ bheyie yrálɔɔ́ lɛ́ mʋ́ a, ɔ́ yi ɔ̀ mɩ́ nyɛ́, mà ɛ̀ nɩ́ bheyilɛ a zà ŋwɔ́ɔ, mà cémʋ́ ɔ́ bhite kpluó lé ɔ́ yɩɔ kwlʋ́ a, ɩ́zà ɔ́ na ká glùsɔɔ̀.

⁹ Naa náa srʋɛ amɔ mà: a zraà mà á yi amɔ nyɛ́, a mʋ́mɔɔ̀, mà lɛ́ a mʋ́mɔ a, a yie yɛ́, a bhɩtɩ kplu, mà á yi ʋ́ ka.

¹⁰ Nyɔ nɩ zra a áa nyɛ́ ɔ́, nyɔɔ́ ɔ̀ mʋ́mɔ a, ɔ́ɔ yɛ́, lé nyɔ nɩ bhɩtɩ kplu a, áa kalʋʋ́.

¹¹ Yʋ́ gbá ɔ̀ yi ɔ́ tʋ́ zrɩ̀ zra lé ɔ tʋ́ yi bɛbɛlɛ nyɛ́ à?

¹² Yʋ́ nɩ́ zra sáà ɔ tʋ́ kɔkɔgè, lé ɔ kɔ́ɔ́ gbúkɛ́ nyɛ́?

¹³ Amɔɔ́ à ŋwɔ́ɔ mɔ́nyùmònyʋa a, a yì a yúó a námalɩ a nyɛ́ sa. Bhʋ́ à Tʋ́ɔ́ ɔ̀ kʋ̀ ɔ̀ lagɔɔ́ a, cégbá mʋ́ ɔ nɩ́ ka nyʋaá à yrálɔɔ́ Blɔ̀blɔ̀zùzùò mʋ́ a, nyɛ́ a?»

Zozíi a pɔ́waá Lagɔ ɔ̀ nyɛ́ ɔ̀ má

¹⁴ Zozíi jɩ́ɩ yruú a múó kʋ́ nyumozùzùò ʋ̀ kʋ̀ nyɔɔ́ jɩ̀ lé ɔ nɩ́ cí a. Tányɩɛ́ mʋ́ nyumozùzùò wlʋ́ nyɔɔ́ jɩ̀ lé ɔ́ bháa ʋ́ cícíé kʋ́ a, neé mna nyʋa fɩ́ɛ́ kʋ̀ ʋ́ a.

¹⁵ Sɩ́tɛ̀ ɩ́ kʋ bhè bhlɔ̀bhlɔ̀nyʋa anɩ́: «Nyumozùzùò ʋ̀ kámalɛ nyumozìzìè fɩ́ɛ́ lé á wlele Bezebúlʋ a, ʋ́mʋ́ ʋ̀ nyɛ́ Zozíi pɔ́wa lé ɔ́ jɩ́lɛ nyumozìzi.»

¹⁶ Lé nyʋa àna yrá ɔ zɔ̀ sasʋ́, á srʋ ɔ́ mà: «Nɩ àa drɩ̀ wɔlɩ́ɛ́ yi amɔ neé mna a, bhʋ́ a yi saá yɩbhlɩ mà Lagɔ nyɛ́ mɔ̀ pɔ́wa.»

¹⁷ Cémʋ́ Zozíi yì á bhobhoé a, ɔ́ srʋ á mà: «Léyibhlɩ a mnɩ́ a nyʋa a pʋpʋ nɩ dúlo mʋ́ lé a nɩ vʋ a, bhlɩ́ɛ́ ɛ́ɛ bhusule lé ɛ mnɩ́ a ghlɩ bhlibhlile jɩ̀.»

¹⁸ A nie mà: «Bezebúlʋ nyɛɛ́ mɔ́ɔ pɔ́wa lé ɩ́ jɩ́lɛ nyumozìzìè, nɩ̀ yɩ́ a, nànɩ cémʋ́ Dɩ́blʋ̀ɔ̀ fa lɛ́ ɔ nyoku tʋ́ a, bhè Dɩ́blʋ̀ɔ̀ nɩ fa ɔ nyoku tʋ́ a, cégbá mʋ́ ɔ léyibhlɩɛ́ yi dá ka áa?

¹⁹ Bhè Bezebúlʋ nɩ nyɛ́ mɔ́ɔ pɔ́wa lé nɩ jɩ́ɩ nyumozìzìè a, bhè amɔ, nyɔ gbá ɔ̀ nyɛ́ a yúó pɔ́wa lé á jɩ́lɛ nyumozìzìè áa? Ná srʋɛ amɔ mà a yúóó mɔ̀glʋ̀ nà kà a tɩ́tɩ́ plɔɔ̀.

²⁰ Mà Lagɔ a pɔ́wa nɩ bhá lé nɩ jɩ́ɩ nyumozìzìè a, a yɩbhlɩ saá mà Lagɔ a Léyibhlɩɛ́ a pɔ́waá ya amɔ gɔ̀ ŋnɩ.

²¹ Nyɔɔ́ kà fɩ́ lé ɔ̀ kà pápálɩ a, ɔ gbó nɩ klulo námasa a, nyɔ nɩ́ ka míi lé ɔ ká ʋ́ ɔ kakalɛ bhá lé ɔ kɛ́ɛ́ fa.

²² Mà nyɔ kà fɩ́ lé ɔ̀ zio kʋ́ a, ɔ́mɔ́ nà kɔ̀ɔ sɩa, lé ɔ̀ kà ʋ́ ɔ pápálɩɛ́ ɔ́ tɔ̀ duo a, ɔ́mɔ́ gɔ̀ bhá, lé ɔ̀ kà sáà ʋ́ ɔ kakalɩɛ́ fɩ́ɛ́ bhá lé ɔ̀ kɩɩ nyʋa bhábhà.

²³ Nyɔɔ́ yɔ́ɔ̀sɔ́ à nɩ́ núnu a, ná gblɩ̀nyɔ kʋ̀ʋ, lé nyɔɔ́ yɔ́ɔ̀sɔ́ à nɩ́ mʋ́mɔ kʋ́ a, ɔ́ɔ ŋáta.

Nyumozùzu yie dɛ́ɛ́ á jɩ́lʋʋ́ a dʋdʋ̀ kà

²⁴ Nyumozùzu nɩ wlʋ́ nyɔ jɩ̀ lé ʋ́ nɩ mʋ a, bhlɩ́ɛ́ kɛ̀ɛ̀ dʋ̀dʋ tɛ́ síóko síóko lé pitíplʋ nɩ́ wlʋ́ʋ jɩ̀ a, mɔ̀ɔmɔ̀ ʋ́ mnɛ. Mɔ̀ɔmɔ ʋ́ mʋ́mɔlɛ kʋwɔtɔmada, ʋ nɩ nɩ́ kʋwɔtɔmada yɛ́ a, ʋ́ nie mà: Ká ná wlʋɔ́ mnɩ́ ɩ́ wlʋ́ a, yrɩ́bha.

²⁵ Ʋ́ nɩ yrɩ́bha lé ʋ nɩ yi, lé wlʋɔ́ mnɩ́ nɩ nynʋpʋɔ námasa a,

²⁶ ʋ́ʋ mnɛ lé ʋ́ wle nyumozìzi kádɩ ànɩ a gbàásɔ́ lé ɩ́ yie wlʋɔ́ a mnɩ́ sí ka, zɔ̀bhɩ̀àdàà mɔ̀ nyɔɔ́ jɩ̀ ɩ́ yie a, nà kɔ́ ŋátɔ lé ʋ́ plɩ́ɛ́ gɔ̀.»

Wɔlɩ́ gbá ɩ̀ nyɛ́ nyɔ jɔ̀lʋ a?

²⁷ Zozíi bhɩa kɔ́ɔ̀kʋ́ cícíé zɔ̀ a, ŋwnɔ́ a múó sané jrè a mnɩ́, ɔ́ anɩ́: «Ŋwnɔ́ɔ́ ɔ̀ gbɩdɩ̀ mɔ̀ ɔ nɩkpla a mnɩ́ lé ɔ̀ nyɩ́a mɔ̀ a, ɔ pʋ́!»

²⁸ Zozíi bháʋ́ niwɔlɩ ɔ́ anɩ́: «Nyʋaá à pʋ́ a, ámá ŋwɔ́ɔ nyʋaá à pʋɛ Lagɔ̀wɔ̀lɩ̀ɛ̀ nyúkwlí lé à ŋwʋ́ɩ́ kpá a.»

Nyʋa yráa Zozíi lɛ̀ mʋ́

²⁹ Cémʋ́ nyʋaá yiyile kɔ́ɔ̀kɔ́ jɩ̀ a, bhʋ́ Zozíi sané, ɔ́ anɩ́: «Zɩmnɛ́ a nyʋa a nɩnɩgbɩ nyù kpʋanyɩ, sɩ́tɛ̀ ɩ́ kʋ bhè á yrá lé a nɩ á lɛ̀wɔ̀lɩ, mà lɛ̀wɔ̀lɩ nɩ́ ka nilo, ɛ̀ nɩ̀ nɩ́ ka Zonásɩ a lɛ̀wɔ̀lɩ̀ɛ̀ ŋwɔ́ɔ a.

³⁰ Cémʋ́ Zonásɩ plɩ́ wá Ninívʋ a nyʋa á lɛ̀ a, sɩ́tɛ̀ tɛ̀ɛ̀ Nyɔɔ́ a Yuwliyʋɔ́ na ká zɩmnɛ́ a nyʋa a lɛ̀ plɩ́.

³¹ Lagɔ a tɩ́tɩ́ plɔyruo kʋ́, jie á zɔ̀ a léyiŋwnɔɔ́ yi zɩmnɛ́ a nyʋaá lɩ̀à a drɩ̀ nynʋ́vʋ̀ kà yi ɔ ká a gbʋ́ wlú ŋwʋ́, máà ɔ́ wlʋ́ ɔ bhlé, bhè mɔ̀ nɩ́ bɛ́ lé ɔ́ yi lóo Salomɔ́ɔ a dɔ̀ nyúkwlí pʋ ka, bhè nyɔɔ́ kʋ dɛ́ amɔ nyièdɩ a, ɔ́ zi lóo Salomɔ́ɔ kʋ́!

³² Lagɔ a tɩ́tɩ́ plɔyruo kʋ́, Ninívʋ a nyʋa yi zɩmnɛ́ a nyʋaá lɩ̀à a drɩ̀ nynʋ́vʋ̀ kà yi ɔ ká á gbʋ́ wlú ŋwʋ́ʋ. Máa tányɩɛ́ mʋ́ Ninívʋ a nyʋa nú wá Lagɔ a nékʋ́cinyɔ Zonásɩ a cícíwɔlɩ a, á wlʋ́ wá á nyumoé a gbʋ́, náa srʋɛ sáà amɔ mà nyɔ kʋ dɛ́ amɔ nyièdɩ, lé ɔ́ zi Lagɔ a nékʋ́cinyɔ Zonásɩ kʋ́!

Nápɛ a núnúó

³³ Nyɔ nɩ́ ŋwʋ́ nápɛ klʋ́ lé ɔ kɛ́ɛ́ zizìè, a nɩ́ ŋwʋ́ sáà nápɛ klʋ́ lé a kɛ́ɛ́ sòlú zɔ̀ zízìè zɩkpa a mnɩ́ á bubuole lé nyʋa fɩ́ɛ́ ɩ̀ yie a, ɛ́ ŋana a kʋ́.

³⁴ Nà yɩ́ ŋwɔ́ɔ nà kpɩkpɩ a nápɛ. Nà yɩ́ nɩ ná a, nà kpʋkpa a yɩ́ wlʋ́ɛ́ mɔ̀. Ɩ́zà, ɛ nɩ nɩ́ ná a, cúcú mʋ́ nà kpʋkpa kʋɛ.

³⁵ Naa, mányɩ ɩ̀ nyòku bhè nápɛɛ́ kʋ mɔ̀ mʋ́ a, ɛ nɩ ka nyúmo, ɛ nɩ ka cúcú plɩ́.

³⁶ Mà nà kpɩkpɩ a lɔ̀fɩ́ɛ́ nɩ kʋ nápɛ a mnɩ́ a, lé pɩ́ʋ́ ànʋ nɩ nɩ́ cúcú kʋ a, cémʋ́ nápɛɛ́ ŋana lɛ́ plátata a, sɩ́tɛ̀ mʋ́ nà kpɩkpɩ a lɔ̀fɩ́ɛ́ na ká lʋ.»

Zozíi pla Falizɩ́ɛnyʋa yà lɔ̀ a másɛnyʋa sɔ́ nékʋ́

³⁷ Tanyɩɛ́ mʋ́ Zozíi bhɩa kɔ́ɔ̀kʋ́ cícíé zɔ̀ a, Falizɩ́ɛyʋ a múó wleloó ɔ gbó lilie a zà, lé Zozíi mʋ lé ɔ́ gblà tébhle jɩ̀.

³⁸ Mà cémʋ́ Falizɩ́ɛnyʋa a Jràmá a mnɩ́, nyɔ ka li a, ɔ́ wɔlɔ fɩ́ɛ́ wlɩ a, Zozíi nɩ́ɩ nɩ lé ɔ́ cíe lilie kʋ́, neé mna Falizɩ́ɛyʋɔ́.

³⁹ Lé Kanyɔ srʋ ɔ́ mà: «A lɛ́bhɛɛ, amɔ Falizɩ́ɛnyʋaá lɩ̀à, a dàplɩ yà a glàsɩ sɔ́ jɩ̀ a wɔlɔ, bhè a nɩ́ wɔlɔ ɩ mnɩ́, ɩ́zà a ŋwʋ́ɛ́ a mnɩ́ ghlíighlíé yà bhàlʋ sɔ́ sá.

⁴⁰ Nɩnànyʋa yɩ, cémʋ́ Lagɔ nɩ kpɩkpɩ a, sɩ́tɛ̀ mʋ́ ɔ́ nɩ́ sáà mnɩ́ nɩɩ?

⁴¹ A bhá bhlɛ́ɛ a kplɔkplɔdì a mnɩ́ lé a nyɛ́ bhlɛ́ɛ ŋazɩ̀nyʋa, a nɩ nii a, bhʋ́ a wɔlɩ́ɛ́ fɩ́ɛ́ yi dá ka, lé ɩ́ yi kplɔɔ.

⁴² Mà kplé ya amɔ kla amɔ Falizɩ́ɛnyʋa, ɛ̀kʋ̀ʋ̀ a? A pɛ́lɛ Lagɔ a nɔ́nʋ́nyokwié ɩ̀ ŋwɔ́ɔ mátɩ a, ɩ dímʋ, lé lelilɩɛ́ kʋ̀ lágbaá lé ɩ̀ ŋwɔ́ɔ gblɔ̀gblɔ, flɩ, yɩ́bhɛ, tomátɩ, ɩ́ lɔ̀fɩ́ɛ́ lɩ̀à, a pɛ́lɛ ɩ dímʋ, mà Lagɔ a cɩ́cása yà ɔ kpá ŋwʋ̀ŋwʋ́ɛ́ sɔ́ a pálɛɛ́ sɩsa kʋ́. Bhè ɩ́mɩ́ a ka lé a ká la fɩ́ɛ́ nɩ, lé ànɩ̀ɛ̀ a nie lɛ́ a, ká yɩ́ la bɩ́ bhɩa.

⁴³ Kplé ya amɔ kla amɔ Falizɩ́ɛnyʋa, ɛ̀kʋ̀ʋ̀ a? A nɩ yi zúfʋcɛcɩghlɩɛ́ a mnɩ́ a, drɩ̀ a kpí a mnɩ́ a bɔ́ɔtʋ bhlá amɔ, a nɩ yi sáà crɩ́kpaá nyʋa nyièdɩ a, bhʋ́ a yrá lé nyʋa kwlée a nyoku sá lé a pá amɔ yúó.

⁴⁴ Kplé ya amɔ kla, amɔɔ́ wlʋ́ mànɩ́ lésu nyʋa nɩ́ lùò bhè a námnɩ jɩ̀ a.»

⁴⁵ Zozíi bhɩa cícíé zɔ̀ a, lɔ̀ a másɛ a múó srʋ ɔ́ mà: «Másɛɛ̀, cémʋ́ ɩ̀ cíe lɛ́ a, àmɔ̀ ɩ̀ bhʋ́sʋlɛɛ!»

⁴⁶ Zozíi anɩ́: «Amɔ lɔ̀ a nyʋa, kplé ya sáà a sɛ́fʋ kla! Bédìè ɩ̀ ŋwnɔ́ kʋ́ a, ɩ́mɩ́ a sro a lía wlú lé amɔ á wlie a múó coco nɩ́ gbɔ́ lɛ́.

⁴⁷ Kplé ya amɔ kla, amɔɔ́ à malɛ Lagɔ a nékʋ́cinyʋa a lesié a, bhè a tinyʋa à bhlá á.

⁴⁸ Naa wɔlɩ́ɛ́ a tinyʋa nie a, ɩ́ ka amɔ lɔlɔ kʋ́, ɩ́zà á bhlá á, lé amɔɔ̀ malɛ yɩ́ a lési.

⁴⁹ Ɩ́mɩ́ ka ŋnɩ́ a zà Lagɔ bhá fíke lé ɔ́ srʋ amɔ mà: Ɩ́ yi á Lagɔ a nékʋ́cinyʋa yà cíecíenyʋa sɔ́ fa, Mà á yi á nyièdɩ àna bhlá Lé á yi àna kalɩmɛ mʋ́ ŋwʋ́.

⁵⁰ Ɩ̀lɩa á lɔ̀fɩ́ɛ́ a zà, kɔ́ nɩ ka wá wlʋ́ lé Lagɔ a nékʋ́cinyʋaá nɩ̀ kà wá kú lé à kúé a, zɩmnɛ́ a nyʋa nà kà a kwɩ́ɛ́ a kpaá pɛ́ɛ.

⁵¹ Aan, náa srʋɛ yɩ́ amɔ mà, bhá wá Abɛ́lɩ a kwɩ́ jɩ̀ lé kà Zakalíi a bhlá Lagɔ̀bʋ̀bɔ̀dàà kwɩ́ jɩ̀ ŋnɩ a, ɩ kúó fɩ́ɛ́ a kpaá, zɩmnɛ́ a nyʋa nà kà a pɛ́ɛ.

⁵² Kplé ya amɔ kla amɔ lɔ̀ a másɛnyʋa, a ya ʋ́ klóníyié ɛ̀ kalɛ Lagɔ a fikeé a kpluó a bhá, amɔ mɔ̀glʋ̀ a nɩ́ pla mɔ̀ɔ lé a nɩ́ yrá yɩ́ sáà lé nyɔɔ́ ɔ̀ yrá mɔ̀ɔ a plaplʋ́ a, ɔ ká mɔ̀ɔ pla.»

⁵³ Zozíi wlʋ́ wlʋɔ́ mnɩ́ ɔ́ kʋ la a, lɔ̀ a másɛnyʋaá yà Falizɩ́ɛnyʋaá sɔ́ fɔɔ́ cícíé, lé a yrálɔɔ́ wɔlɩ́ kɔ́kɔ́mnɩ́ kʋ́.

⁵⁴ A fʋfʋɔ́ lé ɔ ká wɔlɩ́ neé páa bhè a kɔ́ɔ́ gbʋ́ wlú ŋwʋ́ʋ.