Lúkɩ 10 - Neyo

Zozíi cíe ɔ́ kʋjɩ̀nyʋ̀àà á gwlɩ̀ ta lé kʋ́gbá sɔ́

¹ Ɩ̀lɩa plɩ́ a, Kanyɔ sa sɔ́kʋ́ kʋjɩ̀nyʋ̀àà á gwlɩ̀ ta lé kʋ́gbá sɔ́ lé ɔ́ cíe a, sɔ́ sɔ́ sɔ́, ɔ́ srʋ á mà a plɩ́ bhlà dí a mnɩ́ lé dááfɩ́ɛ́ ɔ́mɔ́ mɔ̀glʋ̀ na ká la plɩ́ a, á mʋ mɔ̀ɔ.

² Lé ɔ́ srʋ á mà: «Lágbàà nɩ́ bɛ́ bhè a fányʋaá nɩ́ zù, a bhibhie lágbàà a kanyɔ ɔ ká fányʋa wɔlɩ́ pá.

³ A mʋ mà náa cíe amɔ, cémʋ́ á cíele bhlábhlɩ́ vʋvʋmna á nyièdɩ a.

⁴ A nɩ mʋ a, a ná ŋwʋ́ a nyoku moníi a mʋ́ŋwʋ̀lɛ gɔ̀, a ná fa sakɔ́sʋ, a ná fa síi, a yà nyɔ sɔ́ ná pápa sáà yúó nyúzɔ kʋ́.

⁵ Gbíé fɩ́ɛ́ mnɩ́ a na ká pla a, a cí fɩ́ɛ́ mà: pʋ́pʋ́ɛ́ yi Gbó a mnɩ́!

⁶ Mà nyɔ nɩ kʋ gbó lé ɔ nɩ ŋwɔ́ɔ pʋ́pʋ́ɛ́ a nyɔ a, a pʋpʋ́ɛ́ yio kʋ́ ŋnɩ, ɩ́zà sɩ́tɛ̀ a nyɔ nɩ nɩ́ gbóó a mnɩ́ kʋ a, ɛ́ yi amɔ kʋ́ yrɩ́bhaà.

⁷ Nyɔ nɩ nyɛ́ amɔ sabɔ̀da ɔ gbó a, a bɔ́ɔ sá, a nɩ nyɛ́ amɔ nyú a, a mná, a nɩ nyɛ́ amɔ lelilɩ a, a li, mà nɔnʋzrɩ̀nyɔ ka lɛ pɛ́ɛ. A ná wlʋ́ bhʋ́anɩ gbóó á mnɩ́ lé a ká yígàdà gbo àna a mnɩ́ mʋ.

⁸ Díé fɩ́ɛ́ mnɩ́ a na ká mʋ a, a nɩ nyɛ́ amɔ kʋplada a, lelilɩɛ́ á na ká amɔ nyɛ́ a, a lii!

⁹ A yalɩma gupuonyʋa a na ká mɔ̀ɔ ŋnɩ a, lé a srʋ á mà: Lagɔ a Léyibhlɩɛ́ ya amɔ gɔ̀ ŋnɩ.

¹⁰ A nɩ ŋnɩ dú kʋ́, lé mɔ̀ɔ a nyʋa nɩ nɩ́ amɔ kʋplada bhá a, a bhli dúó lé a srʋ nyʋaá mà:

¹¹ A dúó mnɩ́ a mʋ́mʋɩɛ́ kʋ̀ à kokokpí jɩ̀ a, ɩ́mɩ́ à gbɔ́dɔ lé à tie mɔ̀ɔ, mà a yɩbhlɩ sáà sa mà Lagɔ a Léyibhlɩɛ́ ya amɔ gɔ̀ ŋnɩ.

¹² Náa srʋɛ yɩ́ sáà amɔ mà, Lagɔ a tɩ́tɩ́plɔyruo kʋ́, bhʋ́anɩ dúó mnɩ́ nyʋaá a nɩ kalɩmɛɛ́ yi Sɔdɔ́mʋ a nyʋaá a nɩ kalɩmɛɛ́ gɔ̀ plɩ́.

Dí ànɩ nɩ́ ŋwnʋ́ Lagɔ̀wɔ̀lɩ̀ɛ̀ kʋ́

¹³ Kplé ya mɔ̀ kla mɔ̀ Kolazɛ́ɛ, kplé ya sáà mɔ̀ kla mɔ̀ Besayidáa! A ká saá yɩbhlɩ mà lɛ̀ wɔ̀lɩ̀ɛ̀ fɩ́ɛ́ ɩ̀ nilo amɔ mnɩ́ a, Tílɩ yà Sidɔ́ɔ sɔ́ ɩ ná nilo a, mɔ̀ɔ a nyʋa yi la cɩ́cɩɩ̀. Á yi la bhɛ̀gɩ yrʋ́ʋ̀, lé á yi tʋ́tɔ a mnɩ́ sá kplákplaà, lé á yi la Lagɔ á drɩ̀ bhɔtɔɔ̀, á nyumoé a zà.

¹⁴ Ɩ́mɩ́ nà kà ŋnɩ́ ka lé Lagɔ a tɩ́tɩ́plɔyruo kʋ́, Tílɩ yà Sidɔ́ɔ sɔ́ anɛɛ́ yi kʋ́ yɔ́lʋma lé ɛ́ yi amɔ anɛɛ́ kʋ́ zi.

¹⁵ Ɛ̀ nɩ̀ ŋwɔ́ɔ mɔ̀ Kapɛnayʋ́mʋ a, nà dùòkʋ́ Lagɔ na ká mɔ̀ ŋwnú fa a? Kpɔkplá di ɩ̀ ŋwʋ́ɛ́. Ɔ́ na ká mɔ̀ sá kwlée lé kà dʋ̀dʋ a glù ŋnɩ.»

¹⁶ Zozíi srʋ sɔ́kʋ́ ɔ́ kʋjɩ̀nyʋ̀àà mà: «Ɔ̀ nɩ pʋ amɔ nyúkwlí a, mɔ́ɔ ɔ́ pʋ nyúkwlí, ɔ̀ nɩ̀ gblɩ̀ amɔ a, mɔ́ɔ ɔ́ gblɩ̀, ɔ̀ nɩ̀ gblɩ̀ sáà mɔ́ɔ a, nyɔɔ́ ɔ̀ cíe mɔ́ɔ a, ɔ́mɔ́ ɔ́ gblɩ̀.»

Zozíi a kʋjɩ̀nyʋ̀àà gwlɩ̀ɛ̀taá lé kʋ́gbá sɔ́ɔ́ ya yrɩ́bha

¹⁷ Zozíi a kʋjɩ̀nyʋ̀àà gwlɩ̀ɛ̀taá lé kʋ́gbá sɔ́ɔ́ ɔ́ cíe wá a, á yrɩ́bha lɔlɔ a mnɩ́ lé á srʋ Zozíi mà: «Kanyɔɔ̀, nà ŋnɩ́ mʋ́ nyumozìzi ŋwʋ́ɛ́ ʋ́ àmɔ̀.»

¹⁸ Bhʋ́ Zozíi srʋ á mà: «Ɩ́ yɛ́ Dɩ́blʋ lé ɔ́ wlʋ́ lagɔɔ́ lé ɔ́ bhli zɔ̀ nànɩ cémʋ́ lagɔ̀ɔ̀ wɛ́zɛ a.

¹⁹ A dʋdʋ̀ yáa amɔ pɔ́wa nyɛ́ a ká bɛbɛlɩ yà gbúkɩ́ sɔ́ jɩ̀ námnɩ, a ká sáà a gblɩ̀nyʋa a pɔ́waá jɩ̀ námnɩ lé wɔlɩ́ nɩ́ ka amɔ ŋnɩ.

²⁰ Ɩ́zà nyumozìzi ŋwʋ́ɛ́ ʋ́ amɔ a, ɩ́mɩ́ nàa ŋwɔ́ɔ a lɔlɔ, mà a ŋnɩ́ɛ́ ɩ̀ jɩ́jrɔ̀ lagɔ̀duú a, ɩ́mɩ́ nɩ̀ ka amɔ lɔlɔ kʋ́!»

Ɔ̀ kalɛ yídùò a ɔ́mɔ́ núé Lagɔ̀wɔ̀lɩ̀ɛ̀

²¹ Tányɩɛ́ a múó a mnɩ́, Zozíi kʋ cída lé Blɔ̀blɔ̀zùzùò ŋwʋ́ ɔ́ lɔlɔ duo kʋ́ lé ɔ́ bhɩa wɔlɩ́, ɔ́ anɩ́: «Tʋ́ʋ̀, mɔ̀ ɩ́ falɛ ŋwnú nà gbɩ́ a námɛ a zà, mɔ̀ ŋwɔ́ɔ lagɔɔ́ yà dʋ̀dʋ kʋ́ sɔ́ a Kanyɔ! Àyúó, cémʋ́ ɩ̀ nɩ lé ɩ̀ pápa a yúósʋsʋ́ wɔlɩ́ɛ́ ɩ̀ zizie fíkenyʋa yà bɔ́gʋ̀yɩ̀bhlɩ̀nyʋa sɔ́ yɩ́ a. Aan, à Tʋ́ʋ̀, sɩ́tɛ̀ mʋ́ ɩ̀ yrá lé ɩ nɩ kʋ la, ɩ́zà ɩ́ kʋ́ saá.

²² Ɩ tʋ́ nyɛ́ mɔ́ lɩ́ɛ́ fɩ́ɛ́, nyɔ a múó nɩ́ yʋ́ɔ́ yì, Tʋ́ɔ́ a múó yìo, lé nyɔ nɩ́ sáà Tʋ́ɔ́ yì, yʋ́ɔ́ a múó yìo, lé nyʋaá, yʋ́ɔ́ yrá lé ɔ ká Tʋ́ɔ́ pápa lé à kɔ̀ sáà yɩbhlɩ a.»

²³ Tányɩɛ́ mʋ́ Zozíi cí sɩ́tɛ̀ a, ɔ́ gà ɔ́ kʋjɩ̀nyʋ̀àà klʋ́ lé ɔ yàsɔ́ gbʋ́gbʋ lé ɔ́ srʋ á mà: «Amɔ nyʋaá à lɛ́bhɛ wɔlɩ́ɛ́ a yɩ́ dʋdʋɛ lɛ́ a, a ya pʋ́!

²⁴ Náa srʋɛ amɔ mà Lagɔ a nékʋ́cinyʋa kɔ́kɔ́mnɩ́ yà léyuo kɔ́kɔ́mnɩ́ sɔ́, yrá la wɔlɩ́ɛ́ a lɛ́bhɛ lɛ́ a, yɛ́yʋ́, mà á nɩ́ɩ yɛ́, a ká la sáà mɩ́ nú mà á nɩ́ɩ nú.»

Náma Samalitɛ́ɛyʋ a núnúó

²⁵ Zozíi bhɩa cícíé zɔ̀ a, lɔ̀ a másɛ a múó yio zɔ̀ sa ka. Ɔ́ yi a, ɔ́ srʋ ɔ́ mà: «Másɛɛ̀, cégbá mʋ́ ɩ́ yi nɩ lé ɩ́ yi kɔ́ɔ́ ʋ̀ nɩ́ bhɩàda ka a, yɛ́ a?»

²⁶ Bhʋ́ Zozíi yrɔ́ɔ́ mà: «Cégbá á jɩ́jrà Jràmáá a bɔ́gʋ̀ɔ̀ a mnɩ́ à? Wɔlɩ gbá ɩ̀ zɛ̀lɛ mɔ̀ à?»

²⁷ Nyɔɔ́ anɩ́: «Á jɩ́jrà mɔ̀ɔ mà: Wà nà Kanyɔɔ́ ɔ̀ ŋwɔ́ɔ nà Lagɔ a, nà duo a lɔ̀fɩ́ɛ́ a mnɩ́, wàlɔ̀ɔ̀ nà zuzu a lɔ̀fɩ́ɛ́ a mnɩ́, wàlɔ̀ɔ̀ nà fɩ́ɛ́ a lɔ̀fɩ́ɛ́ a mnɩ́, lé nà bhobhoé a lɔ̀fɩ́ɛ́ a mnɩ́, lé cémʋ́ ɩ̀ wà ɩ̀ nyoku a, wà sɩ́tɛ̀ ɩ̀ liyʋ.»

²⁸ Zozíi srʋ ɔ́ mà: «Wɔlɩ́ɛ́ ɩ̀ cí a, nà bhɩa ʋ́ mɩ́. Naa, nɩ̀ mʋ a, cémʋ́ ɩ̀ cí lɛ́ a, nɩ sɩ́tɛ̀ mà kɔ́ɔ́ ʋ̀ nɩ́ bhɩada ka a, ɩ̀ yi ʋ yɛ́.»

²⁹ Nyɔɔ́ bhlalɛ àyɩ wɔlɩ́ kʋ́, ɔ́ yra sɔ́kʋ́ Zozíi mà: «Bhè ɔ̀ ŋwɔ́ɔ lɛ́ ɩ lía áa?»

³⁰ Lé Zozíi bhá sɔ́kʋ́ ʋ́ niwɔlɩ lé ɔ́ srʋ ɔ́ mà: «Nyɔ a múó wlʋ́ɛ́ Zelízalɛ́mʋ ɔ́ mnɛ Zelikóo, lé kàpàkápányʋa ŋnɩlɔ nyúzɔ kʋ́ lé lɩ́ɛ́ fɩ́ɛ́ ɔ́ ka a, á bhɔ́ɔ́ ɔ̀ mɩ́ gɔ̀, lé á bhítoó kúkúsa, lé á tɩ ʋ́ mɔ́ lé á mʋ.

³¹ Ɔ́ pʋ́ nyúzɔ kʋ́ lé Lagɔ̀bʋ̀bɔ̀nyɔ a múó yi plɩ́ ka a, ɔ́ yɛ́ ɔ́ a, ɔ́ɔ kpálɔɔ́ lé ɔ́ plɩ́.

³² Bhʋ́ ɔ́ pʋ́ lé Levítɩyʋ a múó yi sɔ́kʋ́ plɩ́ ka a, céamúó mɩ́ ɔ́ nɩ, ɔ́ɔ kpálɔɔ́ lé ɔ́ plɩ́.

³³ Mà Samalitɛ́ɛyʋ a múó ɔ̀ plɩ́ɛ́ ɔ̀ mnɛ lówùduú a, tanyɩɛ́ mʋ́ ɔ́ yɛ́ ɔ́ a, ɔ́ ŋazɩ kɔ́sɔlɔɔ́ kʋ́.

³⁴ Ɔ́mɔ́ Samalitɛ́ɛyʋɔ́ mɔ́ ŋnɩ ɔ́ gɔ̀ lé ɔ́ dʋdʋ̀ɔ̀, lé ɔ̀ bhá kpʋ́ lé duváa lé ɔ̀ jrió, lé ɔ̀ gbàdɩ̀ ɔ jíé, lé ɔ́ ŋwʋ́ ɔ́ ɔ jákásɩɛ́ jɩ̀, lé ɔ́ fɔɔ́ otɛ́lɩ a múó a mnɩ́, mɔ̀ɔmɔ̀ ɔ́ zrɩ námasa ɔ́ nɔnʋ.

³⁵ Zrɩ̀ɩ zɩ lé Samalitɛ́ɛyʋɔ́ na ká mʋ a, ɔ́ nyɛ́ otɛ́lɩɛ́ a nɔnʋzrɩ̀nyɔ̀ɔ̀ flèejì a sɔ́ lé ɔ́ srʋ ɔ́ mà: Ɩ́bhìè bhá moníe lɩ̀à lé ŋwʋ́ nyɔ lɩ̀à yɩ́gɔ̀ àyé, mà náa mnɛ ká yi, moníe nɩ nɩ́ wlú ŋnɩ a, nɩ yrɩ́bha, ɩ́ yii bhleè.»

³⁶ Zozíi bhɩa cícíé zɔ̀ a, bhʋ́ ɔ́ yrá lɔ̀ a másɛ mà: «Nyɩ́kpɔcié taá à kà a wɔlɩ́ ɩ́ cí lɛ́ a, á nyièdɩ a, nyɔ gbá ŋwɔ́ɔ nyɔɔ́ a liyrukanyɔ áa?»

³⁷ Lɔ̀ a másɛ anɩ́: «Nyɔɔ́ ɔ̀ bhá ŋazɩ̀dùò lé ɔ̀ zrɩ ɔ́ nɔnʋ a, ɔ́mɔ́ ŋwɔ́ɔ ɔ liyrukanyɔ.» Ɔ́ cíi a, bhʋ́ Zozíi srʋ ɔ́ mà: «Mɔ̀ nà sɛ́fʋɔ́ nɩ mʋ a, nɩ ɔ́mɔ́ nyɔɔ́ bhísakʋ́!»

Zozíi kʋ Mátɩ yà Malíi sɔ́ gɔ̀

³⁸ Zozíi yà ɔ́ kʋjɩ̀nyʋ̀àà sɔ́ kʋ nyúzɔ kʋ́ á mnɛ lé ɔ́ pla dú a múó a mnɩ́, mà ŋwnɔ́ kʋ̀ mɔ̀ɔ lé á wlele Mátɩ a, ɔ́mɔ́ bhɔ́ɔ kʋplada.

³⁹ Mà Mátɩɛ́ ka nɩ́ayʋ́ŋnɩkeyʋ a múó, ɔ́mɔ́ a wlele Malíi, ɔ́ yi lé ɔ́ plɩ́ɩ Kanyɔ a bhɩ zɔ̀ lé ɔ́ kplá sá lé ɔ́ pʋɛ yɩ́ wɔlɩ́ɛ́ ɔ́ cíe a, nyúkwlí.

⁴⁰ Bhè Mátɩ a múó bie ʋ́, ɔ nɩ́ cásɩ ka, ɩ́ nɩ lé ɔ́ ŋnɩ Zozíi gɔ̀ lé ɔ́ srʋ ɔ́ mà: «Kanyɔɔ̀, ná múó bie ʋ́ ɔ̀ zrɩɛ, bhè ɩ nɩ́ayʋ́ŋnɩkeyʋɔ́ kplá nà bhɩɩ́ zɔ̀ sá, ɩ nɩ́ bhlá mɔ̀ɔ̀? Srʋ ɔ́ bhlɛ́ɛ̀ lé ɔ yi ɔ ká mɔ́ɔ kʋ́ fa à!»

⁴¹ Lé Kanyɔ srʋ Mátɩ mà: «Mátɩ, Mátɩ, ɩ̀ yɩa ɩ̀ nyoku kwlɩ́ flɛ́ɛsa wɔlɩ́ kɔ́kɔ́mnɩ́ a ninie a zà.

⁴² Bhè wɔlɩpɩʋ a múó coco kà gbʋ́ a, ʋ́mʋ́ Malíi bhá lɛ́ mɔ̀ɔ, ʋ́mʋ́ náa sáà nyɔ nɩ́ ka míi lé ɔ ká ɔ̀ mʋ́ gɔ̀ bhá.»