श्रेष्ठगीत 8 - नेवाः बाइबल1 छ छम्ह हे मांया दुरु त्वनाः ब्वलंगु जूसा अले छ जिमि थः हे दाजु जूगु जूसा छन्त जिं लँय् नापलाइबलय् चुप्पा नयेगु जुइ। अले सुनानं जितः खँल्हाय्थाय् दइ मखु। 2 जिं छन्त जिमि मांया छेँय् ब्वनायंकीगु जुइ, वं जितः स्यनाब्यूगु खः। जिं छन्त मसला दुगु दाखमद्य व धालेसिया रस त्वंकेगु जुइ। 3 वय्कःया खव ल्हाः जिगु छ्यं क्वय् दु, अले वय्कःया जव ल्हातं जितः घय्पुनातःगु दु। 4 हे यरूशलेमया मिसापिं, जिं छिमित आज्ञा बी, पाय्छिगु ई मजुतले मतिनायात थनेमते। खुगूगु म्ये पासापिं ८:५-१४ 5 थः प्रियनापं प्यपुनाः मरूभूमिपाखें वःम्ह व सु खः? स्याउमाया तलय् जिं छन्त थनाः, अन हे छिमि मांनं छन्त प्वाथय् दय्कूगु खः, अन हे छिमि मांया मचाबू ब्यथा जुल अले छन्त बुइकल। ल्यासेम्ह मिसा 6 जितः छिगु नुगलय् छाप थें तयादिसँ, छिसं जि बाहेक मेपिं सुयातं घय्पुनादीमते। छाय्धाःसा माया मृत्यु थें तसकं बल्लाः, प्याःचाः पाताल थें जिद्दी। व मिप्वाः थें जुयाः पिहां वइ, अले च्यानाच्वंगु मि थें ह्वानाः ह्वानाः च्याइ। 7 न्ह्यानाच्वंगु लखं नं मायायात हुयाछ्वये फइ मखु अले तसकं न्ह्याःगु खुसिबालं नं मायायात चुइकायंके फइ मखु। सुं मनुखं मायाया पलेसा थःगु छेँया फुक्क सम्पत्ति हे ब्यूसां वयात हेला याइगु जुइ। ल्यासेम्ह मिसाया दाजुकिजापिं 8 जिमि चिचाधिकःम्ह तसकं यःम्ह छम्ह मय्जु दु, वयागु दुरुप्वः उलि जाया मवनी, वयात ब्याहा यायेत सुं छम्हय्सिनं फ्वँ वल धाःसा उखुन्हु झीसं वयात छु धायेगु? 9 व पःखाः जूगु जूसा उकी वहःया धरहरा दय्कीगु जुइ। व लुखा जूगु जूसा जिमिसं वयात देवदारुया सिँनं बांलाकेगु। ल्यासेम्ह मिसा 10 जि पःखाः खः, तर आः जिगु दुरुप्वः धरहरा थें च्वं! जिमि प्रियनं बांलाक स्यू कि जिं वयाके प्याःचाः व शान्ति काये दइ। ल्याय्मम्ह मिजं 11 बाल-हामोनय् सोलोमनया छगू दाखक्यब दु, वं थःगु दाखक्यब मेपिन्त ज्याके बिल। अले व क्यबय् फलफुल सय्कीपिं फुक्कसिनं फलफुलयात काय्त १,००० शेकेल पुले हयेमाः। 12 तर जिगु थःगु हे दाखक्यब मेपिन्त बीगु अधिकार जिगु हे खः। हे सोलोमन, व १,००० शेकेल छिगु हे निंतिं खः, अले २०० शेकेल उपिं फलफुल सय्कीपिनीगु निंतिं नं खः। 13 हे थः पासपिंनापं बगैँचाय् च्वनीम्ह जिं छंगु सः न्यने दयेमा। ल्यासेम्ह मिसा 14 हे जितः यःम्ह प्रिय पिहां वा, अले तसकं नस्वाःगु मसलां जाःगु पर्वतय् च्वनीम्ह चल्ला वा मचाम्ह हरिण थें जुयाब्यु। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.