श्रेष्ठगीत 3 - नेवाः बाइबल1 चान्हय् लासाय् ग्वःतुलाच्वनाबलय्, जिं जिमि प्रिययात यय्का, जिं वयात माला स्वयाः अय्नं वयात लुइके मफु। 2 जिं फुक्क शहर चाःहुलाः माला स्वये, उकिया लँय् व चुक चुकय् माले। जिं जिमि प्रिययात यय्के, जिं वयात माला स्वयाः अय्नं वयात लुइके मफु। 3 पिवाः च्वनीपिं सिपाइँत शहरय् चाहिला च्वंबलय् इमिसं जितः खन। जिं इमिके न्यना, “छु छिमिसं जिमि प्रिययात खनागु दु ला?” 4 जिं इपिं पिवाःतय्त त्वःतावनेवं जिं जिमि प्रिययात नापलात। जिं वयात जिमि मांया छेँय्, जितः बुइकूम्हसय्सियागु क्वथाय् महःतले वनेमब्युसें ज्वनातया। 5 हे यरूशलेमया मिसापिं, जिं छिमित आज्ञा बी, ख्यःया हरिण व चल्लाया नामं पाफयाः धा, “पाय्छिगु ई मजुतले मतिनायात थनेमते।” स्वंगूगु म्ये ल्यासेम्ह मिसा ३:६–५:१ 6 ब्यापार याइपिन्सं मिइगु मूर्र व गुगुं नस्वाः वय्काः, मरुभूमिं पिहां वःगु थ्व कुँत्याः थें ज्याःगु छु खः? 7 स्व, थ्व ला सोलोमन रथय् सवार जुयाच्वंगु खः, थुकी इस्राएलया तसकं बहादुरपिं खुइम्ह सिपाइँत पिवाः च्वं वनाच्वंगु दु। 8 इपिं फुक्कसिनं तरवार घानातःगु दु, इपिं तसकं लडाइँ यायेफुपिं खः, इमिगु तरवार सिथय् घानाः तःगु दु, इपिं चान्हय्या भयनापं सामना यायेत तयार दु। 9 जुजु सोलोमनं थःगु निंतिं दुली दय्कल, व दय्केत लेबनानं सिँ कयाहःगु खः। 10 वं थुकिया कथि वहःया, अले लिधंसा लुँया दय्कूगु खः। थुकिया फ्यतुइगु थाय् यरूशलेमया मिसापिन्सं मायां बुट्टा भरय् यानातःगु प्याजीगु रंगया कापतं भुनातःगु दु। 11 हे सियोनया म्ह्याय्पिं, पिने पिहां वा, जुजु सोलोमनं मुकुट पुगू स्वः वा, व मुकुट वया मांनं ब्याहाया दिंखुन्हु लय्ताःबलय् वयात पुइकाब्यूगु खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.