भजनसंग्रहया सफू 36 - नेवाः बाइबलन्ह्याबलें दयाच्वनीगु माया दाऊदया भजन 1 दुष्टतय्गु दुनुगलंनिसें पाप हाला हइ। इमिके परमेश्वरयागु ग्याःभय भ्याः भचा हे दइ मखु। 2 इमिसं थःपिन्त तसकं तःधं ताय्काजुइगुलिं परमेश्वरं इमिगु पाप खनी मखु, अले दोषी ठहरय् यानादी मखु धकाः च्वनी। 3 इमिगु न्ह्यागु खँ नं मभिंगु जुयाच्वनी। इमिसं भिंगु व गतिलाःगु ज्या धयागु हे याइ मखु। 4 लासाय् ग्वारातुलीबलय् तक नं इमिसं मभिंगु ग्वसाः ग्वयाच्वनी। इमिगु ज्या छुं नं भिंगु मदु। मभिंगु यायेत धाःसा इपिं छपलाः हे लिचिली मखु। 5 हे परमप्रभु! छिगु न्ह्याबलें दयाच्वनीगु माया आकाश थें तःधं। अले छि विश्वास याये बहःम्ह खः धयागु खँ सुपाँय् स्वयाः नं पुलाः वं। 6 छि धर्मीम्ह खः धयागु खँ पहाड थें धिसिलाः, छिगु न्याय समुद्र थें तःजाः। छिं मनू व पशुतय्गु बिचाः यानादी। 7 हे परमप्रभु! गुलि तःजि छिगु मदिक्क दयाच्वनीगु माया! छिगु पपूया किचलय् मनूतय्सं शरण कयाच्वंगु दु। 8 छिं इमित गाक्क नकेबियाच्वनादीगु दु। छिं थःगु लसताया खुसिं इमित लः त्वंकेबियाच्वंगु दु। 9 छि फुक्क जीवनया मुहान खः। छिगु जलं हे जिमिसं खंकाच्वना। 10 छितः माया याइपिन्त छिगु सदां दइगु माया प्वंकादिसँ। छितः मानय् याइपिन्त न्याय बियादिसँ। 11 तःधंछुना जुइपिन्त जितः हय्क्काय्के बियादी मते, अले दुष्टतय्त जितः लिकेबियादी मते। 12 स्वयादिसँ इपिं क्वःदल। इपिं आः गुबलें नं दनावये मफयेक क्वःदल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.