भजनसंग्रहया सफू 150 - नेवाः बाइबलपरमप्रभुया प्रशंसा 1 हल्लेलूयाह! वय्कःया पवित्र थासय् परमेश्वरया प्रशंसा या, वय्कःया तःधंगु आकाशय् वय्कःया प्रशंसा या। 2 वय्कलं यानादीगु ततःधंगु ज्याया निंतिं वय्कःया प्रशंसा या। वय्कःया च्वन्ह्याःगु महानताया निंतिं वय्कःया प्रशंसा या। 3 नेकू पुयाः वय्कःया प्रशंसा या। वीणा थानाः, सारंगी कियाः वय्कःया प्रशंसा या। 4 दम्फु थाथां प्याखं ल्हुयाः वय्कःया प्रशंसा या। वीणा थानाः अले बाँसुरी पुयाः वय्कःया प्रशंसा या। 5 भुस्याः थानाः वय्कःया प्रशंसा या। तसकं झ्याईं झ्याईं सःवइगु भुस्याः थानाः वय्कःया प्रशंसा या। 6 सासः दुपिं फुक्क प्राणीतय्सं परमप्रभुया प्रशंसा यायेमा! हल्लेलूयाह! |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.