भजनसंग्रहया सफू 15 - नेवाः बाइबलपरमप्रभुयात सुनां तःधंके फइ? दाऊदया भजन 1 हे परमप्रभु! छिगु पवित्र थासय् सु दुहां वने फइ? छिगु पवित्र पर्वतय् वयाः सुनां छितः तःधंके फइ? 2 व मनुखं फइ, गुम्ह दोष मदय्क म्वानाच्वनी, अले न्ह्याबलें भिंगु जक याइ, अले गुम्हय्सिनं दुनुगलंनिसें खःगु खँ ल्हाइ, 3 गुम्ह मेपिन्त मभिंकाः जुइ मखु, थः जःलाखःलायात नुगलय् स्याकाः जुइ मखु थः पासापिन्त मखुगु खँ ल्हाना जुइ मखु, 4 गुम्हय्सिनं मभिंपिं मनूतय्त इज्जत याइ मखु, परमप्रभुया ग्याःभय काइपिन्त धाःसा हनाबना तइ, थःत न्ह्याक्व हे थाकुसां थःगु बचं पूवंकी। 5 गुम्हय्सिनं ब्याज मकासे त्यासाबी। अले सुनां घुस कयाः दोष मदुपिं मनूतय्गु विरोधय् बयान बी मखु। थज्याःपिं मनूत गुबलें नं लिचिले माली मखु। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.