भजनसंग्रहया सफू 139 - नेवाः बाइबलपरमप्रभुं जितः म्हसीकादीगु दु दाऊदया भजन, लय् तइम्हय्सिगु निंतिं 1 हे परमप्रभु! छिं जितः जाँचय् यानादीगु दु, अले छिं जितः म्हस्यू। 2 छिं जि फ्यतुनागु व दनागु तकं स्यू छिं तापाकंनिसें हे जिगु नुगःखँ स्यू। 3 जि पिहां वनेगु व दुहां वयेगु छिं स्यू, जिगु फुक्क पहःचहः छिं स्यू। 4 हे परमप्रभु! जिं धाये न्ह्यः हे जिं छु धायेत्यंगु धकाः छिं सीकादी। 5 छि जिगु जवंखवं प्यखें दी, छिं थःगु ल्हाः जिगु छेनय् तयादीगु दु। 6 थज्याःगु ज्ञान जिगु निंतिं तसकं अजू चायापु, थ्व तसकं तःधं, अले जिं थुइके मफु। 7 छिगु मिखां जि गन सुपिले फइ? छिगु न्ह्यःनें जि गन बिस्युं वने फइ? 8 स्वर्गय् थाहां वंसां, छि अन दी, पातालय् कुहां वंसां छि अन नं दी। 9 पुर्बय् यक्व तापाक ब्वयावंसां वा पच्छिमय् तापाक समुद्रया सिथय् थ्यंक वंसां 10 छिगु हे ल्हातं जितः न्यासि ब्वना यंकी अले छिगु जव ल्हातं जितः ज्वनातःगु दइ। 11 जिं खिउँगुयात “जितः सुचुकी” धकाः धाःसां अले जिगु प्यखेंया जःयात “चा जुयाब्यु” धाःसां 12 खिउँगु छिगु निंतिं खिउँसे च्वनी मखु अले चा नं छिगु निंतिं न्हि थें झल्ल थी। छिगु निंतिं चा व न्हि उत्थें खः। 13 छिं जिगु म्हया छता छता ब्व दय्कादिल, छिं जितः जिमि मांया प्वाथय् हे ब्वलंकादिल। 14 जिं छितः सुभाय् बी, छाय्धाःसा छिं जितः अजू चायापुक दय्कादीगु दु। छिगु ज्या तसकं अजू चायापु, थ्व खँ जिं बांलाक स्यू। 15 खिउँसे च्वंगु मांया प्वाथय् जि ब्वलानाच्वनाबलय् अले जिगु छपु छपु क्वँय् ब्वलनाः जायावयाच्वंगु इलय् नं छिं जि अन दु धकाः स्यू। 16 जि बुइ न्ह्यः हे छिं जितः खंगु दु। अले जिगु आयुया छन्हु छन्हुयागु खँ छिं थःगु सफुलिइ च्वयादीगु दु। 17 हे परमेश्वर! छिगु बिचाः गुलि मू वं अले इमिगु ल्याः गुलि अप्वः दु। 18 ल्याः जक खाःसां थ्व फि स्वयाः यक्व दइ। जि गुबलय् न्ह्यलं चाइ, उबलय् छि जिलिसें दइ। अथे खःसां छि जिलिसें दया हे च्वनी। 19 हे परमेश्वर! जिगु इच्छा ला थथे दु, दुष्टत फुक्कं छिगु ल्हातिं नाश जुइमा, अले ज्यानमारात जिपाखें तापाक हे च्वनेमा। 20 इमिसं न्ह्याबलें छितः क्वह्यंकाः खँ ल्हाना जुइ। शत्रुतय्सं म्वाःमदुथाय् नं छिगु नां कयाजुइ। 21 हे परमप्रभु! छितः महीपिन्त जिं छाय् महिये! छिगु विरोधय् सनाजुइपिन्त जिं छाय् क्वमह्यंके! 22 जिं इमित दुनुगलंनिसें महिका, छिम्ह शत्रु जिम्ह नं शत्रु खः। 23 हे परमेश्वर! जितः जाँचय् यानादिसँ, अले जिगु नुगलय् छु छु दु सिइकादिसँ। जितः लनास्वयादिसँ, अले जिगु बिचाः सिइकादिसँ! 24 जिके गनं मभिंगु खँ दुसा क्यनादिसँ। अले जितः सदांया लँपुइ यंकादिसँ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.