भजनसंग्रहया सफू 133 - नेवाः बाइबल

दाजुकिजापिं मिलय् जुयाः च्‍वनेगु

दाऊदया भजन, यरूशलेमय् थाहां वनेत हाःगु म्‍ये

¹ दाजुकिजापिं मिलय् जुयाः च्‍वनेगु गुलि बांलाःगु व न्‍ह्यइपुसे च्‍वंगु खँ खः।

² थ्‍व ला हारूनया छेनय् तयाब्‍यूगु व वया दारीइ न्‍ह्यानाः वयागु वसःया गःतां तक थ्‍यंगु मू वंगु चिकं थें खः।

³ थ्‍व सियोन पर्वतय् गाःगु हेर्मोनया सुतिलः थें खः, अन हे परमप्रभुं न्‍ह्याबलें जीवनया आशिष प्‍वंकादी।