होशे 7 - नेवाः बाइबल1 जिं इस्राएलयात लाय्काबीबलय् एफ्राइमया दुष्टता, व सामरियाया दुष्ट ज्या खनेदः वइ। इमिसं मेपिन्त ध्वंलानां तुं च्वनी खुँतय्सं छेँ स्यंकी, खुयायंकी, डाँखुतय्सं लँय् लुतय् याइ। 2 तर जिं इमिसं याःगु दक्व दुष्ट ज्यायात लुमंकी धकाः इमिसं बिचाः हे मयाः। इमिसं याःगु पापया ज्यां हे इमित घेरय् यानातःगु दु। उपिं ज्या न्ह्याबलें जिगु न्ह्यःने दु। दरबारय् ग्वसाः ग्वःगु 3 “इमिसं थःगु दुष्ट ज्यां हे जुजुयात व थःगु मखुगु खं राजकुमारतय्त लय्ताय्की। 4 इपिं फुक्कं व्यभिचारीत खः। इपिं मरि छुइबलय् क्वाःकातःगु भुतू थें खः, गुकियागु मि मरि छुइम्हय्सिनं छ्वचुं न्हाःबलय् निसें फोंगाना मवतले मिलय् याये म्वाः। 5 झी जुजुया नखःया दिनय् राजकुमारत दाखमद्यं तसकं काय्काच्वनी। थःत गिजय् याइपिंनापं ल्हाः मिलय् याइ। 6 छाय्धाःसा वयागु मन तमं भुतू थें क्वाइ, इपिं ध्वंलायेत वया न्ह्यःने वनी। चच्छिं इमिगु तं च्यानाच्वनी, सुथय् व च्यानाच्वंगु मि थें जुइ। 7 इपिं दक्व भुतू थें क्वाइ, इमिसं थः शासकतय्त खतम याइ। इमि दक्व जुजुतय्त स्याइ, तर इपिं मध्ये सुनानं ग्वाहालिया निंतिं प्रार्थना याइ मखु। 8 “एफ्राइम यक्व जात जातितनापं ल्वाकःबुकः जुइ। एफ्राइम छखें जक बूगु मरि थें खः। 9 विदेशीतय्सं वयागु बल नाश यानाबी, अय्नं वं व खँ मस्यू। वयागु छेनय् गनं गनं तुयुगु सँ खनेदयावःगु दु अय्नं वं व खँ नं मस्यू। 10 इस्राएलया घमण्डं वयागु हे विरोधय् साक्षी बी, अय्नं थ्व फुक्क जुइ धुंकाः नं इपिं परमप्रभु थः परमेश्वरपाखे फहिला वइ मखु, न वय्कःयात माली। 11 “एफ्राइम बुद्धि मदुम्ह छम्ह बखुं थें खः – अःपुक हे ध्वं लायेफुम्ह व मूर्ख। आः हे इमिसं मिश्रयाके ग्वाहालि फ्वनी, आः हे इपिं अश्शूरपाखें वनी। 12 इपिं वनीबलय् जिं इमित जिगु जाः ह्वलाबी, जिं इमित आकाशया झंगःत थें क्वय् क्वफानाबी। जिं इमिगु बथां ब्वया मुंवंगु सः ताइबलय्, जिं इमित ज्वने। 13 धिक्कार इमित, छाय्धाःसा इपिं जिपाखें फहिलाः वंगु दु। इमिगु भज्यंक नाश जुइमा, छाय्धाःसा इपिं जिगु विरोधय् विद्रोही जूगु दु। इमित मू पुलाः त्वःतकेगु जिगु इच्छा दु, अय्नं इमिसं जिगु विरोधय् मखुगु खँ ल्हाइ। 14 इमिसं दुनुगलंनिसें जितः प्रार्थना याइ मखु, तर थःगु लासाय् बिलाप याइ। अन्न व न्हूगु दाखमद्यया निंतिं इपिं मुनाच्वनी, तर जिपाखें धाःसा ख्वाः फस्वय्की। 15 जिं इमित स्यनेकने यानाः अले बल्लाका, अय्नं इमिसं जिगु विरोधय् जाः ग्वयाजुइ। 16 इपिं दकलय् तःधंम्हय्सिथाय् लिहां वइ मखु, इपिं त्वधूगु धनुष थें खः। इमि न्हेलुवाःतय्त इमिगु घमण्डया वचनं यानाः तरवारं स्याइ। थुकिया निंतिं मिश्र देशय् इमित गिजय् याइ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.