२ राजा 14 - नेवाः बाइबलयहूदायाम्ह जुजु अमस्याह २ इति २५:१-२४ 1 इस्राएलयाम्ह जुजु येहोआहाजया काय् येहोआशं राज्य यानाच्वंगु निगूगु दँय् योआशया काय् अमस्याह यहूदायाम्ह जुजु जुल। 2 व निइन्यादँ दुबलय् जुजु जूगु खः। वं यरूशलेमय् निइगुंदँ राज्य यात। वया मां यरूशलेमयाम्ह यहोअदीन खः। 3 वं परमप्रभुयात यःगु ज्या यात। तर वं थः पुर्खा दाऊदं ति मयाः। वं न्ह्यागुं ज्या नं थः बौ योआश याःथें यात। 4 अय्नं वं पुजा याइगु थाय् चीकामछ्व। अन मनूतय्सं बलि छायेगु व धुपाँय् च्याकेगु ज्या याना हे च्वन। 5 देशया शासन थःगु ल्हातय् वयेधुंकाः वं थः बौ जुजुयात स्याःपिं भारदारतय्त स्यानाबिल। 6 तर वं मोशाया व्यवस्थाया सफुलिइ थथे धकाः च्वयातःगु परमप्रभुया आज्ञायात पालन यानाः इमि काय्पिन्त धाःसा मस्या, “बौपिन्त काय्म्हाय्पिनिगु निंतिं अले काय् म्ह्याय्पिन्त बौपिनिगु निंतिं स्याये मते। छम्ह छम्ह मनू थःम्हं याःगु पापया निंतिं जक सिनावनेमाः।” 7 वं चिया ब्यासिइ झिद्वःम्ह एदोमीतय्त स्यात। अले लडाइँ यानाः सेला त्याका काल। अले उकिया नां योक्तेल तल, गुगु थौं तक दनी। 8 यहूदायाम्ह जुजु अमस्याहं येहूया छय्, यहोआहाजया काय् येहोआशयाथाय् थथे धाय्के छ्वत, “वा, जिनापं ल्वाःवा।” 9 अले इस्राएलयाम्ह जुजु यहोआशं यहूदायाम्ह जुजु अमस्याहयात थथे लिसः बिल, “छकः लेबनान डाँडाया छमा कंमां छमा देवदारुया सिमायात थ्व खबर छ्वत, ‘छिमि म्ह्याय्यात जिमि काय्लिसें ब्याहा यानाब्यु।’ अबलय् लाक हे लेबनानया छम्ह गुँपशुं वयाः व कंमायात तुतिं न्हुल। 10 आः अमस्याह, ‘छ जिं एदोमीतय्त बुकाः’ धकाः तःधंछुया जुइगु, तर स्व, जिं छन्त छ त्याःगुलिं लय्ताः अले छेँय् हे च्वँ धकाः सल्लाह बी। थःत व यहूदायात छाय् आपतय् लाकेगु?” 11 तर अमस्याहं वयागु खँ मन्यन। अले इस्राएलयाम्ह जुजु येहोआश यहूदायाम्ह जुजु अमस्याहनापं लडाइँ याः वन। इपिं यहूदाया बेथ-शेमेशय् ल्वात। 12 यहूदा इस्राएलपाखें बुत, अले इपिं सकलें थथःगु छेँय् बिस्युं वन। 13 इस्राएलयाम्ह जुजु येहोआशं अहज्याहया छय्, योआशया काय् यहूदायाम्ह जुजु अमस्याहयात बेथ-शेमेशय् ज्वनाः यरूशलेमय् वल। वं एफ्राइमया ध्वाखांनिसें कुन्चा ध्वाखा तक निसः मिटर ताहाकःगु शहरया पखाः थुनाबिल। 14 अले परमप्रभुया देगः व लाय्कूया धुकुतिइ दुगु फुक्क लुँ, वहः, थलबल व कैदीतय्त ज्वनाः सामरियाय् लिहां वल। 15 यहोआहाज जुजु जुयाच्वंबलय् जूगु फुक्क घटनात, वं याःगु फुक्क ज्या, वयागु बहादुर ज्या व गथे यानाः यहूदाया जुजु अमस्याहलिसें लडाइँ यात, व फुक्क इस्राएलया जुजुपिनिगु इतिहासया सफुलिइ च्वयातःगु दु। 16 यहोआहाज थः पुर्खात थें सित। वयात सामरियाय् जुजुपिं थुनिगु थासय् थुन। वयागु थासय् वया काय् यारोबाम इस्राएलया जुजु जुल। यहूदायाम्ह जुजु अमस्याह सीगु २ इति २५:२५-२८ 17 इस्राएलया जुजु यहोआहाजया काय् यहोआश सीधुंकाः यहूदायाम्ह जुजु योआशया काय् अमस्याह झिंन्यादँ तक म्वानाच्वन। 18 अमस्याह जुजु जुयाच्वंबलय् जूगु फुक्क घटना यहूदाया जुजुपिनिगु इतिहासया सफुलिइ च्वयातःगु दु। 19 इमिसं यरूशलेमय् वयागु विरोधय् जाः ग्वल। अले व लाकीशय् बिस्युं वन। अय्नं इमिसं अन नं मनूत छ्वल अले वयात अन हेस्यात। 20 अनंलि सलया म्हय् तयाः वयागु सीम्ह यरूशलेमय् हल। वयात दाऊदया शहरया जुजुपिं थुनिगु चिहानय् थुन। 21 यहूदाया फुक्क मनूतय्सं झिंखुदँ दुम्ह अजर्याहयात वया बौ अमस्याहया थासय् जुजु दय्कल। 22 अमस्याह पुर्खात थें सीधुंकाः वं एलात शहरयात हाकनं दय्काः यहूदाय् लितहल। इस्राएलया जुजु यारोबाम निम्हम्ह 23 यहूदाया जुजु योआशया काय् अमस्याहं राज्य यानाच्वंगु झिंन्यागूगु दँय् सामरियाय् योआशया काय् यारोबाम जुजु जुल। वं पिइछदँ राज्य यात। 24 वं परमप्रभुयात मयःगु मभिंगु ज्या यात। छाय्धाःसा व नबातया काय् यारोबामं इस्राएलीतय्त याकूगु पापपाखें अलग मजू। 25 वं गात-हेपेरयाम्ह अमित्तैया काय् अगमवक्ता योनापाखें धयादीगु इस्राएलया परमप्रभु परमेश्वरया वचनकथं लेबोहमातंनिसें मृत सागर तक इस्राएलया सिमाना लित काल। 26 परमप्रभुं इस्राएलय् दास जुइमा वा स्वतन्त्र सकसिनं दुःख सियाच्वंगु खन। इमित ग्वाहालि याइपिं सुं हे मदु। 27 “जिं इस्राएलया नां संसारं हुयाछ्वये” धकाः परमप्रभुं धयादीगु मदु। उकिं वय्कलं यहोआशया काय् यारोबामयापाखें इमित त्वःतकादिल। 28 यारोबाम जुजु जुयाच्वंबलय् जूगु फुक्क घटना, वं याःगु फुक्क ज्या, व बहादुर जुयाः ल्वाःगु लडाइँ अले गय् यानाः दमस्कस व हमात शहर गुगु शहर न्हापा यहूदाया खः, वं इस्राएलय् लितहल। व फुक्क इस्राएलया जुजुपिनिगु इतिहासया सफुलिइ च्वयातःगु दु। 29 यारोबाम थः पुर्खात थें सित। वयात जुजु थुनिगु चिहानय् थुन। वयागु थासय् वया काय् जकरिया जुजु जुल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.