२ इतिहास 32 - नेवाः बाइबलयरूशलेमयात अश्शूरीतय्गु ख्याच्वः २ इति ३२:१-१९ ; यशै ३६:१-२२ 1 थ्व फुक्क खँय् हिजकिया जुजुं विश्वास यायेबहः जुयाः ज्या यायेधुंकाः अश्शूरयाम्ह जुजु सनहेरीबं यहूदाय् हमला यात। वं यहूदाया छचाःखेरं पखाः ग्वयातःगु शहरत थःम्हं हे त्याकेगु बिचाः यानाः उपिं शहरतय्त घेरय् यात। 2 सनहेरीब यरूशलेमय् हमला यायेत वये धुंकूगु दु धइगु खँ हिजकियां सीवं 3 वं शहर पिनेया बुँगाःचाया लः पनाबीत थः भारदारत व सेनाया नायःतलिसें सल्लाह काल। इमिसं वयात थुकी ग्वाहालि बिल। 4 इमिसं यक्व मनूत मुंकाः लःया मुहान व देशया दथुं न्ह्याइगु खुसिचात पनाबिल। इमिसं धाल, “अश्शूरयाम्ह जुजुयात थन वइबलय् गाक्क लः दइ मखु।” 5 जुजुं साहस पिकयाः शहरया पखाः गन गन दुंगु खः, अन अन ल्ह्वन, अले उकी धरहरात दय्कल। पखाःया पिनेपाखे वं मेगु पखाः दय्कल। अले दाऊदया शहरया तिबः बीगु तगिंत बल्लाकल। वं यक्व ल्वाभःत व ढालत नं दय्कल। 6 वं शहरयापिं मनूतय्त सेना नायःतय् अधीनय् तल, अले मनूतय्त शहरया ध्वाखाया लिक्क चुकय् मुंकाः थथे धकाः इमित हपाः बिल, 7 “साहस पिका अले थःत बल्लाकि। अश्शूरया जुजु व वनापं वइपिं ग्वाः ग्वाः मनूत खनाः ग्याये मते, नुगः क्वतुंके मते इमिगुपाखे स्वयाः झीगुपाखे यक्व शक्ति दु। 8 वयाके मनूया शक्ति दु तर झीके परमप्रभु झी परमेश्वर दी। वय्कलं झीत ग्वाहालि यानादी, अले झीगु लडाइँ ल्वानादी।” मनूतय्सं हिजकिया जुजुया खँ पत्याः यात। 9 थुकिया लिपा थः सेनानापं लाकीशयात घेरय् यानाच्वंबलय् अश्शूरयाम्ह जुजु सनहेरीबं यहूदायाम्ह जुजु हिजकिया व यरूशलेमयापिं फुक्क यहूदीतय्त थ्व खबर बीत थः हाकिमत छ्वल – 10 अश्शूरयाम्ह जुजु सनहेरीबं थथे धाइ, “छिपिं सुयागु भर कयाः घेरय् यानातःगु यरूशलेमय् च्वंच्वनागु? 11 ‘परमप्रभु झी परमेश्वरं अश्शूरया जुजुया ल्हातं झीत बचय् यानादी’ धकाः धयाः हिजकिया जुजुं छु छिमित नयेत्वने मखंकाः स्यायेत ध्वंलानाच्वंगु मदु ला? 12 छु हिजकिया थःम्हं हे छिमि पुजा यायेगुथाय् व वेदीत स्यंकाः यहूदा व यरूशलेमयापिं मनूतय्त ‘छगू हे जक वेदीइ पुजा या! अले अन जक बलि ब्यु’ धकाः धाःगु मखु ला? 13 “जि व जिमि पुर्खातय्सं देश देशयापिं सकल मनूतय्त छु छु यात व छिमिसं मस्यू ला? छु थुपिं जातितय् द्यःतय्सं जिगु ल्हातं थुमिगु देशत बचय् याये फत ला? 14 जिमि पुर्खातय्सं नाश याःगु जातितय् द्यःत मध्ये सुनां जिगु ल्हातं थः मनूतय्त बचय् याये फत? अथे जुयाः गथे यानाः छिमि ईश्वरं छिमित बचय् याये फइ? 15 आः छिमिसं थुकथं हिजकियायात ध्वंलाके बी मते अले झंग लाके बी मते। छिमिसं वयात विश्वास याये मते, छाय्धाःसा सुं नं द्यवं थः मनूतय्त जिगु वा जिमि पुर्खातय्गु ल्हातं बचय् याये मफुनि धाःसा छिमि ईश्वरं छिमित जिगु ल्हातं गुलि बचय् याये फइ?” सनहेरीबं परमेश्वरयात क्वह्यंकूगु 16 सनहेरीबया हाकिमतय्सं परमप्रभु परमेश्वर व वय्कःया दास हिजकियायात मभिंकाः मेमेगु खँ नं ल्हात। 17 जुजु सनहेरीब थःम्हं हे थथे धकाः परमप्रभु इस्राएलया परमेश्वरयात क्वह्यंकाः छगू पौ च्वल, “गथे मेमेगु देशयापिं मनूतय् द्यःतय्सं थः मनूतय्त जिगु ल्हातं बचय् याये मफुत अथे हे हिजकियाया ईश्वरं नं थः मनूतय्त जिगु ल्हातं बचय् याये फइ मखु।” 18 यरूशलेम शहर त्याका कायेगु निंतिं शहरया पखालय् दनाच्वंपिं मनूतय्त ख्यायेत व उमिगु नुगः क्वतुंकाबीत उपिं हाकिमतय्सं थ्व खँ हिब्रू भाषां ततःसलं हालाः न्यंकल। 19 इमिसं मनूतय्गु ल्हातं दय्कूगु मेमेगु जातितय् द्यःतय्गु बारे धाइगु थें हे यरूशलेमया परमेश्वरया बारे नं धाल। 20 थज्याःबलय् हिजकिया जुजु व आमोजया काय् यशैया अगमवक्तां स्वर्गपाखे स्वयाः तःसलं प्रार्थना यात। 21 परमप्रभुं छम्ह स्वर्गदूत छ्वयाहयादिल, वं अश्शूरी सेनाया सिपाइँत व नायःतय्त स्यात। उकिं जुजु सनहेरीब लज्या चायाः थःगु हे देशय् लिहां वन। अले व थः द्यःया देगलय् दुहां वंबलय् वया थः हे काय्पिन्सं वयात तरवारं स्यानाबिल। 22 थुकथं परमप्रभुं हिजकिया व यरूशलेमय् च्वंपिन्त अश्शूरया जुजु सनहेरीबया ल्हातं व मेपिं सकसिगुं ल्हातं बचय् यानादिल। वय्कलं इमित प्यखेरं शान्ति बियादिल। 23 यक्व मनूतय्सं यरूशलेमय् परमप्रभुया निंतिं देछा व जुजु हिजकियाया निंतिं मू वंगु कोस्यालि हल। अबलय् निसें फुक्क जातितय्सं हिजकियायात इज्जत यात। हिजकिया उसाँय् मदुगु व तःधंछु जूगु २ राज २०:१-३ , १२-१९ ; यशै ३८:१-३ ; ३९:१-८ 24 उबलय्पाखे हिजकिया जुजु उसाँय् मदयाः सी थें च्वन। वं परमप्रभुयात प्रार्थना यात अले परमप्रभुं वनापं खँ ल्हानाः वयात छगू अजू चायापुगु चिं बियादिल। 25 तर हिजकिया तसकं तःधंछु जुल। परमप्रभुं थःगु निंतिं गुलि नं यानादीगु खः, उकिया निंतिं वं परमप्रभुयात सुभाय् मब्यू। उकिं वं अले यहूदा व यरूशलेमं परमप्रभुया तं फये माल। 26 अय्नं लिपातय् हिजकिया व यरूशलेमयापिं मनूतय्सं थःगु नुगःया घमण्डया निंतिं पश्चाताप यात। उकिं हिजकिया मसीतले परमप्रभुया तं इमिके मलाः। 27 हिजकिया जुजु तसकं तःमि जुल। अले सकसिनं वयात इज्जत याइगु। वं थःगु लुँ, वहः, मू वंगु ल्वहंत, मसला, ढालत व मू वंगु ज्वलं तयेत धुकूत दय्केबिल। 28 हानं वं अन्न, न्हूगु दाखमद्य, जैतूनया चिकं तयेगु धुकूत अले सा द्वहं व फैच्वलय्तय्गु गः नं दय्कल। 29 वं यक्व शहर नं दय्कल अले वयात यक्व सा द्वहं व फै-च्वलय् नं दत। छाय्धाःसा परमेश्वरं वयात यक्व धन-सम्पत्ति बियादीगु खः। 30 गीहोन बुँगाःचाया च्वय्यागु मुहान तिनाः क्वय्पाखे दाऊदया शहरया पच्छिमपाखे लः यंकूम्ह थ्व हे हिजकिया जुजु खः। वं याःगु फुक्क ज्याय् धात्थें हे व ताःलात। 31 तर बेबिलोनयापिं शासकतय्सं छ्वयाहःपिं दूतत देशय् खनेदुगु अजू चायापुगु चिंया बारे न्यंवःबलय् परमेश्वरं वयात जाँच यायेत व वयागु मनय् च्वंगु फुक्क खँ क्यनेत वयात त्वःतादिल। हिजकिया जुजु सीगु 32 हिजकिया जुजु जुयाच्वंबलय् जूगु फुक्क खँ व वयागु भक्तिया ज्यात आमोजया काय् यशैया अगमवक्ताया दर्शनया सफुलिइ अले यहूदा व इस्राएलया जुजुपिनिगु इतिहासया सफुलिइ च्वयातःगु दु। 33 हिजकिया सित, वयात दाऊदया सन्तानतय्गु चिहानया च्वय् थुन। व सीबलय् यहूदा व यरूशलेमयापिं सकल मनूतय्सं वयात तसकं हनाबना तल। वया लिपा वया काय् मनश्शे जुजु जुल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.