२ इतिहास 2 - नेवाः बाइबलदेगः दय्केगु तयारी 1 जुजु सोलोमनं परमप्रभुया नांया आराधना यायेत छगः देगः व थःगु लागि छगू दरबार दय्केगु क्वःछित। 2 वं सामान क्वबीत न्हयेद्वःम्ह (७०,०००) मनू, डाँडां ल्वहं लिकायेत चयद्वःम्ह (८०,०००) मनू व इमिगु ज्या स्वयेत स्विखुसःम्ह (३,६००) मनू ल्यल। 3 अले सोलोमनं टुरोसयाम्ह जुजु हीरामयाथाय् थ्व खबर छ्वत, “यक्व दँ न्ह्यः, छिं जिमि बाः दाऊदयात वय्कःया दरबार दनेत देवदारुया सिँ बियाः ग्वाहालि ब्यूगु थें आः जितः नं देवदारुया सिँ बियाः ग्वाहालि बियादिसँ। 4 छाय्धाःसा जिं जिमि परमप्रभु परमेश्वरया निंतिं छगः देगः दय्के त्यनागु दु। व जिं वय्कःयात देछाये। अन जि व जिमि प्रजां वय्कःया आराधना यायेगु, गुँगू थनेगु देछागु मरि न्ह्याबलें झ्वःलाक तयाः छायेगु अले सुथय्, बहनिइ, विश्रामबार पतिकं, अमइया नखः व परमप्रभु जिमि परमेश्वरया क्वःछिनातःगु नखः नखःबलय् होमबलि छायेगु जुइ। वय्कलं न्ह्याबलें थथे यायेगु आज्ञा बियादीगु दु। 5 “जिं दय्के त्यनागु देगः तःधंगु जुइ छाय्धाःसा जिमि परमप्रभु परमेश्वर फुक्क द्यःत स्वयाः तःधं। 6 तर दकलय् तःजाःगु स्वर्ग हे वय्कःया लागि चिधं धाःसा सुनां वय्कःया निंतिं देगः दय्के फइ? वय्कःया निंतिं देगः दय्केत जि सु खः धकाः? थ्व ला वय्कःया न्ह्यःने धुपाँय् च्याकेगु बाहेक मेगु छुं ज्याया लागि मखु। 7 “आः जिथाय् लुँ, वहः, कँय् व नँयागु अले प्याजीगु, ह्याउँगु व वँचुगु काया ज्या बांलाक यायेसःम्ह छम्ह मनूयात छ्वयाहयादिसँ। जिमि बाःनं ल्यःपिं यहूदा व यरूशलेमयापिं बांलाक ज्या याये सःपिं कारीगरतनापं वं ज्या याइ। 8 “छिकपिनि मनूत लेबनानय् सिँ पालेत गुलि सः धकाः जिं स्यू। उकिं जिथाय् देवदारु, सल्लाह व चन्दनया सिँ नं छ्वयाहयादिसँ। 9 जितः यक्व सिँ माः। छाय्धाःसा जिं दय्के त्यनागु देगः तःधंगु व तसकं बांलाःगु जुइ। 10 जिं छिकपिनि सिँ पालीपिं मनूतय्त नकेत निइखुसः टन छ्व (२,६००), निइखुसः व पिइगू टन तछ्व (२,६४०), प्यंगू लाख व पिइद्वः लिटर (४,४०,०००) दाखमद्य व प्यंगू लाख व पिइद्वः लिटर (४,४०,०००) जैतूनया चिकं छ्वयाहये।” 11 टुरोसया जुजु हीरामं सोलोमनयात थथे लिसः बिल, “परमप्रभुं थः प्रजायात माया यानादी, अथे जुयाः हे छितः इमि जुजु दय्कादिल। 12 “आकाश व पृथ्वीयात दय्कादीम्ह परमेश्वर परमप्रभुया प्रशंसा जुइमा! वय्कलं परमप्रभुया लागि छगः देगः व थःगु लागि छगू दरबार दय्केत दाऊदयात बुद्धि दुम्ह, चलाखम्ह व थूम्ह काय् बियादीगु दु। 13 “उकिं आः जिं छिथाय् बुद्धि व यक्व सीप दुम्ह छम्ह कारीगर हुराम-अब्बीयात छ्वया हयाच्वनागु दु। 14 व दान कुलयाम्ह मिसाया काय् खः। वया अबुम्ह धाःसा टुरोसयाम्ह खः। व लुँ, वहः, कँय्, न, ल्वहं, सिँया ज्या व प्याजीगु, ह्याउँगु, वँचुगु का अले भिंगु सूती कापःया ज्या बांलाक यायेसःम्ह कारीगर खः। व फुक्क कथंया कीगु ज्याय् तालिम कयातःम्ह मनू खः। वं वयात ब्यूगु न्ह्यागु नं नमूनाकथं ज्या याये फु। वयात छिकपिनि कारीगर व छिमि मालिक छिकपिनि बाः दाऊद जुजुया निंतिं ज्या याइपिं कारीगरतनापं ज्या याके बियादिसँ। 15 “आः छिं बी धकाः धयादीगु छ्व, तछ्व, दाखमद्य व जैतूनया चिकं जि दासतय्गु निंतिं छ्वयाहायादिसँ। 16 छितः लेबनानं गुलि सिँ माः, जिमिसं उलि सिँ पाले। अले सिँ चिनाः नांचा थे दय्काः भूमध्यसागरया लँपुं छिथाय् योप्पा तक छ्वयाहये। अनं छिं यरूशलेमय् यंकादिसँ।” 17 थः अबु दाऊदं मनूत ल्याः खाःगु थें सोलोमनं इस्राएलय् च्वंपिं विदेशीत ल्याः खात। थुपिं १,५३,६०० म्ह दु। 18 अले सोलोमनं उपिं मध्ये न्हयेद्वःम्हय्सित (७०,०००) सामान क्वबिइत, चयद्वःम्हय्सित (८०,०००) डाँडां ल्वहँ चायेत व स्विखुसःम्हय्सित (३,६००) इमिगु ज्या स्वयेत ल्यल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.