२ इतिहास 19 - नेवाः बाइबलछम्ह अगमवक्तां यहोशापातयात ब्वःब्यूगु 1 यहूदायाम्ह जुजु यहोशापात याउँक यरूशलेमय् थःगु लाय्कुलिइ लिहां वल। 2 हनानीया काय् अगमवक्ता येहूं वयात नापलाः वन। येहूं यहोशापातयात थथे धाल, “छिं मभिंपिं मनूतय्त छाय् ग्वाहालि यानादियागु? छिं परमप्रभुयात मयय्कीपिन्त छाय् माया यानादियागु? छिं थथे यानादीगु खनाः परमप्रभु तंचायादीगु दु। 3 अय्नं छिके छुं भिंगु खँ दु। छिं अशेरा द्यःमय्जुया थांत देशं चीकाछ्वल। छिं परमेश्वरयात मालेगु कुतः यानादीगु दु।” यहोशापातं न्यायाधीसत ल्यःगु 4 यहोशापात यरूशलेमय् च्वनाच्वन, अनं व दच्छिन बेर्शेबांनिसें कयाः उत्तरय् एफ्राइमया पहाडी देशयापिं थः प्रजायाथाय् वनाः इमित परमप्रभु इमि पुर्खातय् परमेश्वरयाथाय् लितहल। 5 हानं यहूदाया पखालं घेरय् यानातःगु फुक्क शहरय् वं न्यायाधीशत तल। 6 अले वं न्यायाधीशतय्त थथे आज्ञा बिल, “छिमिसं न्ह्याःगु हे याःसां उकी होसियार जु, छाय्धाःसा छिमिसं मनूतय्गु निंतिं मखु तर परमप्रभुया निंतिं न्याय याइ। फैसला याइबलय् वय्कः छिपिंनापं च्वनादी। 7 उकिं आः छिमिसं परमप्रभुया भय कायेमा। होसियार जुयाः थ्व ज्या या, छाय्धाःसा परमप्रभु छिमि परमेश्वरं अन्याय, सुयागुं पं काःगु व घुस नःगु सह यानादी मखु।” 8 यरूशलेमया लागिं नं यहोशापातं परमप्रभुयापाखें न्याय यायेत व यरूशलेमय् च्वंपिं मनूतय्गु मुद्दा मिलय् यायेत छुं लेवीत, पुजाहारीत व इस्राएली वंशया नायःतय्त ल्यल। इपिं यरूशलेमय् च्वना ज्या याइगु खः। 9 वं इमित थ्व आज्ञा बिल, “परमप्रभुया भय कयाः विश्वास यायेबहः जुयाः व दुनुगलंनिसें थःगु ज्या या। 10 छिमिथाय् थःगु शहरय् च्वंपिं दाजुकिजापिनिपाखें छुं मुद्दा वल धाःसा – व मनू स्याःगु मुद्दा जूसां व व्यवस्था, आज्ञा, विधि वा नियमया बारेया छुं नं कथंयागु मुद्दा जूसां, छिमिसं इमित परमप्रभुया विरोधय् अपराध याये मते धकाः ख्याच्वः ब्यु। मखुसा उकिया निंतिं छिमिसं व छिमि थःथितिपिन्सं नं परमप्रभुया तं फये मालि। थथे यात धाःसा छिमित दोष लाइ मखु। 11 “परमप्रभुनापं स्वापु दुगु फुक्क मुद्दाय् दकलय् तःधंम्ह पुजाहारी अजर्याह छिमि अधिकारी जुइ। अले जुजुनापं स्वापु दुगु छुं नं खँय् यहूदाया कुलनायः इश्माएलया काय् जबदियाह अधिकारी जुइ। लेवीतय्सं नं छिमिगु न्ह्यःने हाकिम जुयाः सेवा याइ। साहसी जुयाः ज्या या, भिं याइपिंनापं परमप्रभु दयेमा।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.