१ राजा 5 - नेवाः बाइबल

देगः दय्‌केगु तयारी

¹ सोलोमन थः अबु दाऊदया थासय् जुजु अभिषेक जूगु दु धइगु खँ न्‍यनाः टुरोसया जुजु हीरामं वयाथाय् दूतत छ्वल। छाय्‌धाःसा व न्‍ह्याबलें दाऊदनापं मिलय् जुयाच्‍वंगु खः।

² सोलोमनं हीरामयात थ्‍व खबर छ्वल –

³ “थःगु जःखः च्‍वंगु शत्रु देशतनापं जिमि अबु दाऊदं लडाइँ याना हे च्‍वनेमाल। उकिं परमप्रभुं वय्‌कःया शत्रुतय्‌त वय्‌कःया अधीनय् तया मदितले परमप्रभु थः परमेश्‍वरया नांया निंतिं वय्‌कलं देगः दय्‌कादी मफुगु खँ छिं सी हे स्‍यू।

⁴ तर आः परमप्रभु जिमि परमेश्‍वरं जितः प्‍यखेरं आराम बियादीगु दु, उकिं आः जिगु सुं शत्रु मदु, छुं मभिंगु घटना नं जुयाच्‍वंगु मदु।

⁵ स्‍वयादिसँ, परमेश्‍वरं जिमि अबु दाऊदयात थथे धयादीगु खः, ‘जिं छंगु थासय् सिंहासनय् तयाम्‍ह काय्‌नं हे जिगु नांया निंतिं देगः दय्‌की।’ आः जिं जिमि परमप्रभु परमेश्‍वरया इज्‍जतया निंतिं उगु देगः दय्‌केगु क्‍वःछिनागु दु।

⁶ “उकिं छिं जिगु निंतिं लेबनानया देवदारुया सिमा पालेत आज्ञा बियादिसँ। जिमि मनूतय्‌सं छिकपिनि मनूतनापं मिलय् जुयाः ज्‍या याइ। छिं गुलि ज्‍याला क्‍वःछिनादिल उलि हे ज्‍याला जिं छिकपिनि मनूतय्‌त बी। सीदोनीत थें जिपिं सिँ पाले सःपिं मखु धकाः छिं सी हे स्‍यू।”

⁷ सोलोमनया थ्‍व खँ न्‍यनाः हीराम तसकं लय्‌ताल, अले वं थथे धाल, “थौं परमप्रभुया प्रशंसा जुइमा, छाय्‌धाःसा थ्‍व तःधंगु जातियात शासन यायेत दाऊदयात छम्‍ह बुद्धि दुम्‍ह काय् बियादीगु दु।”

⁸ अले हीरामं सोलोमनयात थ्‍व खबर छ्वयाहल, “छिं छ्वयाहयादीगु खबर जिथाय् थ्‍यन, छितः माक्‍व देवदारुया सिँ व थसिँ जिं छितः बी।

⁹ जिमि मनूतय्‌सं लेबनानं सिँ भूमध्‍यसागर तक हइ। अले सिँयात चिनाः नांचा थें दय्‌काः छिं धाःथाय् चुइकाछ्वयाहये। अन जिं सिँ फ्‍यंके बी। अले छिं यंकादिसँ। छिं जिगु परिवारया लागि नयेगु नसा बियाः जिगु इच्‍छा पूरा यानादिसँ।”

¹⁰ उकिं हीरामं सोलोमनयात वयागु इच्‍छा कथं देवदारुया सिँ व थसिँ छ्वयाबिल।

¹¹ सोलोमनं हीरामयात वयागु दरबारय् नइपिन्‍त नकेत दँय्‌दसं ५०,००० मुरी छ्व व ४,५०० लिटर भिंगु जैतूनमाया शुद्धगु चिकं बीगु यात।

¹² परमप्रभुं थःगु बचंकथं सोलोमनयात बुद्धि बियादिल। हीराम व सोलोमन मिलय् जुयाच्‍वन। इमिसं थःथवय् सन्‍धि नं यात।

¹³ सोलोमन जुजुं इस्राएलया फुक्‍क थासं ३०,००० म्‍ह मनूतय्‌त सितिकं ज्‍या याकेत मुंकल।

¹⁴ वं इमित छगू छगू लाय् १०,००० म्‍ह – १०,००० म्‍ह यानाः पालंपाः लेबनानय् छ्वइगु, इपिं लच्‍छि लेबनानय् व निला छेँय् च्‍वनीगु। अदोनीराम थुपिं सितिकं ज्‍या याइपिनि नायः खः।

¹⁵ सोलोमनया ७०,००० म्‍ह कु क्‍वबिपिं व पहाडय् ८०,००० म्‍ह ल्‍वहं चाइपिं दु।

¹⁶ थ्‍व ज्‍या याइपिं मनूतय्‌गु ज्‍या स्‍वयेत सोलोमनया ३,३०० म्‍ह नायःत नं दु।

¹⁷ सोलोमन जुजुया आज्ञा कथं इमिसं देगःया जग तयेत तसकं भिंगु ततःग्‍वःगु ल्‍वहं चानाः लिकाल।

¹⁸ गेबालया मनूतनापं सोलोमन व हीरामया कारीगरतय्‌सं देगः दय्‌केत सिँ व ल्‍वहं चानाः तयार यात।