Yuda 1 - Ngudradreadrekadhane Ka Sisiu 魯凱語聖經

¹ Kwaku yai sasiakawlaku ki Yesu Kirisitu, betakane ki Yakubu ka Yuda. Watigamiaku baai ki pinilriane ki Twaumase, ka panianianiake ikai adringi ki sakialibake ki Tama ka Twaumase, si ka kialakebe ki Yesu Kirisitu ka umawmase.

² Ku Twaumase ani pasuete baai numiane ku kalithane, sulivatane, si thalradhane.

Kaika patengane ka tarabulrubulru

³ Kinathalradhane ka latalragilragi, maulainga naku pasana tigami kikawriva numiane patharukai kudra ngwakai mitane ka sapalribulane, ai lu kidremedremaku kai ngwadringai lu kainaku makakaai pakipapawlringau numiane, ku apacungulane numi pasikai ku asanguvavaalane ki Twaumase si tulrepenge bulru ki lasinzia ku akikaruburane ki salrwane.

⁴ Asi lwiyane, yakai ku kai mwasakene ki Twaumase ka umawmase kiabubuli mudaane mwa kielre mitane, si pathivalrau ku tapelaelane patharukai ki migemi ki Twaumase arakai subusubu ki ngilisianane ki kakudhane lini. Kai lalasu pasiaulri ki vaeva ka waerece ka Tamatamata ka Yesu Kirisituta. Kunadruma, kai Sisiu wasakalainga kai lalasu lri tara kipathaavungu.

⁵ Adravane thingalenga numi kikai patuelre, lri pakipapawlringava naku numiane, ku tapangimiane ki Tamatama palribulu ki swa Iseraylri kidaili ki swa Izipiti, la pakaamudu kwidra ki kai masalru ka umawmase.

⁶ Madha karimurimuru kwidra kai pangiamia ki awngane lini, matwase ki taikaiyane lini ka lasasiakawlu belenge, kwini lalasu kiakerenge ikai kwidra apalralrawthanenga kai maka mukerengenga si ikadradridrimitane. Ku Twaumase waemenge liniane pikai kwini, ukalavalava ku akisaibangane ka vai.

⁷ Si kudra yakai Sudume, Gumura, si ngwadadeethe ka lacekele ku umawmase, ngiamia kwidra ki lasasiakawlu belenge, kwidra kakudhane lini wacapange ki sawvalai si ababai, pangilralraingi ki beate lini, lakamani ku kiarakai lini ku kai lri kaedrepenga ka apwi kipathavungu. Kikai miyaiya kikai akipapawlringavaneta sanaka umawmase.

⁸ Kikai kai mwasakene ki Twaumase ka laumawmase laka thadaalrane. Kwidra ngilisianane ki kidremedreme lini papasalriu liniane, kudrulru pangilisiane ki kinawmasane lini, kai lalasu twadrekase ku puku ki Twaumase, tusinalreme kudra ki yabelenge ka masasialrigu.

⁹ Adravane ku kiacapili ki sasiakawlu belenge ka Mikaele, ngwalai ki wapacainga ka kinawmasane ki Musi madradrikisi ki Akema la kai thuru arakai ku tusinalremeane ku vaga kaelaela iniane, amia kai lakathane, “Ku Tamatama lri kaelaela muswane!”

¹⁰ Ai, kikai laumawmase twalilisi kwidra kaika thingale lini ku lamanemane, mararaamau ki waudriwdripi, singiakai kwidra takaumawmasane lini kudra kakudhane lini si pia ku la angipapakamudane lini.

¹¹ Kikai laumawmase lri kisacepe ku amatikurwane! Thadaalrane ku angukaiyane lini ki Kaingi. Ngwalai ki zaisange, twaverevere mwa ki tapasalrivane ki Balame. Miyaiya ki Kura baebalre, mararaamau kaamudu.

¹² Kikai laumawmase ikai ki tangiakanekaneanane maramici ka kadrwa ku inwane, ngiakakudrulru, mia ki tarapagwagu ngiakakakalithi ku akabucukane sikakathane. Kai lalasu mia ki ememe kipalai ki valrigi, kai maka udale; la mia ki yakai ki kalalidrarane ai kai maka pwamadru ka angatu, akucane patala baalace, si kitulrepenge karudame pacai.

¹³ Kudra matikiarubwanane ku kakwakudhane lini mia ki lrapucu ki lu bikabiki ku laveke. Kai lalasu mia ki makawli ki kadalranane ka tariau mucilri mwa ki tudrulru ki Twaumase ka palralrawthu baai liniane ka kadradridrimitane.

¹⁴ Ku saka ngusipitulanenga ka lamwabaibalrithi ki Adame ka Inuke, papia kai ki lalasu yakainga ku tasakaladhaneini pelaela, amia kai, “Drela, ku Tamatama lri iluku ki tathathatha ki sasiakawlu belenge karedele kainganai.

¹⁵ Lri saibange sanaka umawmase, si pathavungu sanaka pasalrisalriu ka umawmase, asi lwiyane kudra kakwakudhane lini kai mwasakene ki Twaumase, la arakai ku sidrekasane ku vaga pasalriu ki Twaumase!”

¹⁶ Kikai laumawmase takalisiiane ki palrapalra, kaelaelaela ki palrapalra, patwapapalra kudra ngilisianane ki kidremedremeini, ngipaparamurane ku takawrivane, ngwalai ki akaesadhaneini la kathaithariri ki palrapalra.

Pakiapapawlringau si Wabulru

¹⁷ Ai, kinilibakane ka latalrailragi, madha karimurimuru ku taiyane ki lasasiakawlu ki Tamatamata ka Yesu Kirisitu.

¹⁸ Kwini lalasu amia kai numiane, “Ikai ki bilrilanenga ki lrikisi yakai ku umawmase ku lri kainganai, pasalaladha kudra ki ngilisianane lini si kadrwa ku usakenane ku kidremedreme si tudreadrekase numiane.”

¹⁹ Kikai laumawmase kadrwa ku Siri, kiarakai ki takaumawmasaneini beabekace ku rivwane.

²⁰ Ngukai numiane, kinilibakane ka latalrailragi, kunumi naika takapapedreengane numi acegecege ikai ki sanianiangenga ka takisuswane, satalu ku puku ki Siri inulri,

²¹ panianiaka ka taikaiyane adringi ki sakialibake ki Twaumase, ukalavalava ku kalithane ki Tamatama ka Yesu Kirisitu, lanu malra ku palralrawthu ka niake.

²² Papia kwidra ki la malrilrilrikiana ka laumawmase, kakurua liniane,

²³ yakai ku laumawmase, lri patwalai numi ki apwi kisaswarau palribulu liniane. Yakai ku drumane ku laumawmase, lri kakuru numi liniane, ai wadradreele madu ukuludru, adravane kwidra wasaela ki laimai lini ku pasalrivane madha kielrelre.

Wadrengedrengere ka inulri

²⁴ Ku Twaumase lri palakebe numiane ku kaika atubakebakane numi, si kakadrwa ku tangilisianane, si lri dulru numi kiraragai kainganai mucucubungu ki lriguini.

²⁵ Kikai vaeva ka Twaumase ka kadrwa ku sakadrusaini, pangwakai ki Tamatamata ka Yesu Kirisitu si palribulunga mitane. Ani kaamani ku wamalra ku lrigu, papedrengane, puku, si lrekeme, twalai kunadruma pakeelanga kaiasasane, pakela palralrawlrawthu. Amingi!