Taasipane 2 - Ngudradreadrekadhane Ka Sisiu 魯凱語聖經

Tasakaiyane ki tasuladhane ki lazuku

¹ Ku Tamatama peaelaela ku apiane ki Musi si Arungu:

² Ku swa Iseraylri lu cegecege ku tasuladhane, ku laumawmase lri ikai ki tailebe ki talikai lini ki kalralradha lini, si singikaai ku kalralradha ki zukuini, papia ki Alrivilrivi ka balrawbau ngithalringulu cegecege ku tasuladhane.

^3-9 Ku satali talrawane swa Yuda: Kwini yatailebe ki kalralradha ki Yuda ku umawmase lri singikai ku taisarubwane ki talikaikaini, tukabicelrakane kwini ki kiacapili ki zuku lini cegecege ku tasuladhane. Zuku ki Yuda: Ku kiacapili, Nahasunge lalake ki Aminadabe, ta 74,600. Zuku ki Isakare: Ku kiacapili, Nathaneile lalake ki Zuare, ta 54,400 Zuku ki Zibulungu: Ku kiacapili, Ilriabe lalake ki Hilungu, ta 57,400 Lu elrelreeane, 186,400. Ku Yuda lrika amani ku sacucubungu sangiluku arucucubungu.

^10-16 Ku satali lrawdru swa Riwbingi: Kwini yatailebe ki kalralradha ki Yuda ku umawmase lri singikai ku taisarubwane ki talikaini, tukabicelrakane kwini ki kiacapili ki zuku lini cegecege ku tasuladhane. Zuku ki Riwbingi: Ku kiacapili, Ilrizure lalake ki Sidiure, ta 46,500 Zuku ki Simiune: Ku kiacapili, Silumile lalake ki Zurisadai, ta 59,300 Zuku ki Gade: Ku kiacapili, Ilriasape lalake ki Diule, ta 45,650 Lu elrelreeane: 151,450. Ku Riwbingi lri kamani ku salrilrikudru ki swa Yuda.

¹⁷ Ikai kwini kabicelrakane ki sacucubungu ka taidrusa si salrilrikudru ka taidrusa, ku swa Lrivi lri bulri kwini Alrivilrivi ka balrawbau katwase aru cucubungu. Sanaka taingeane ka tairubwane lri singikai ku tamasakaikaiyane ki tacegecegane ku tasuladhane, ikai kwini ki nikelretane ki kalralradha lini katwase arucucubungu.

^18-24 Ku talikai sapakalriwgu yai, swa Iparaime; kwidra yakai tailebe ki kalralradha ki swa Iparaime ka laumawmase lri singikai ku taikaiyane yelrelre, si sikabicelrakane ki kiacapili, ngithalringulu cegecege ku tasuladhane. Zuku ki Iparaime: Ku kiacapili, Ilrisama lalake ki Amihude, ta 40,500 Zuku ki Manase: Ku kiacapili, Gamalile lalake ki Pidazure, ta 32,200 Zuku ki Biniyamingi: Ku kiacapili, Abidange lalake ki Gidiuni, ta 35,400 Lu elrelreeane, 108,100 Ku swa Iparaime lri salrilrikudru ki Riwbingi si swa Lrivi arucucubungu.

^25-31 Ku swa tali dradha amani ku Dange: Kwini yatailebe ki kalralradha ki Yuda ku umawmase lri singikai ku taisarubwane ki talikaini, tukabicelrakane kwini ki kiacapili ki zuku lini cegecege ku tasuladhane. Zuku ki Dange: Ku kiacapili, Ahiezere lalake ki Amisadai, ta 62,700 Zuku ki Asere: Ku kiacapili, Pagiele lalake ki Ukerange, ta 41,500 Zuku ki Napetali: Ku kiacapili, Ahira lalake ki Inane, ta 53,400 Lu elrelreeane, 157,600. Kai swa Dange lrika amani ku abibiilrilinga katwase arucucubungu.

³² Singikai ki swa tali inunga, kwini nipacasane ku swa Iseraylri ku nipaelrelreeane ku umawmase ta 603,550.

³³ Singikai ku tadrekasane ki Tamatama ki Musi, ku swa Lrivi kai kiapaelre ki drumane ka swa Iseraylri kipacase.

³⁴ Ku swa Iseraylri makitwa singikai ku tadrekasane ki Tamatama ki Musi pangimianga, la makitu ikai kwini ki talikai lini ka kalralradha cegecege ku tasuladhane lini, si tupapalra ki laretesane lini katwase aru cucubungu.