Zek. 3 - Bhaibheri Rakachena muChindau

Chioniso cheMuprofeti cheMupristi Mukuru

¹ Zvino wakandionisa Joshua mupristi mukuru akaema pamberi pengirosi yaMambo Mwari, naSathani akaema kunyara yake yokumudyo kumuitira ndaa.

² NaMambo Mwari wakati kunaSathani, “Mambo Mwari ngaakurambidze, O Sathani! Mambo Mwari uwo wakatsanangura Jerusarema ngaakurambidze! Ichi andichopi chitsiki chakabviswa mumuriro here?”

³ Zvino Joshua waiya akasimira zvokusimira zvinetsvina, apo akaema pamberi pengirosi.

⁴ Ngirosi yakati kwevari avo vaiya vakaema pamberi pake, “Dusai kubva kwaari zvokusimira zvinetsvina.” Nokwaari wakati, “Ringira, ndatora kushaisha kwako kubva kwouri, neni ndinozokusimidza ngezvokusimira zvemadhiri.”

⁵ Neni ndakati, “Ngavaise pasoro pake dzungudza rakasukika.” Ndizvo vakaisa dzungudza rakasukika pasoro pake, vakamusimidza ngezvokusimira; nengirosi yaMambo Mwari yakaema pasinde.

⁶ Zvino ngirosi yaMambo Mwari yakagondisa Joshua yechiti,

⁷ “Izvi ndizvo zvinoronza Mambo Mwari wehondo: Kudai ukahamba ngenjira dzangu, wechingwarira mitemo yangu, zvino unozotonga padera pemhatso yangu nokungwarira maruwanze angu, neni ndinozokupa simba rokuhamba pakati paavo vanoema pano.

⁸ Zvino, purutana, O Joshua, mupristi mukuru, nevangani vako vanogara pamberi pako! Ngokuti vari chioniso chezviro zvichauya: Ndinozounza muranda wangu, Nhai.

⁹ Ngokuti ringira, padera pebuwe rendaisa pamberi paJoshua, padera pebuwe rimwe anozoapo madziso manomwe; ndinozonangura kunyorwa kwaro, unoronza Mambo Mwari wehondo, neni ndinozobvisa kushaisha kweiyi nyika ngezuva rimwe.

¹⁰ Pairo zuva, unoronza Mambo Mwari wehondo, munozodaidzana umwe neumweni kuuya pashi pomuvhini nepomuonde.”