Muchu. 8 - Bhaibheri Rakachena muChindau

¹ Ndiani wakadai ngowakangwara? Ndiani unozia kududzirwa kwechiro? Ungwaru hunoita kuti hope yake ijeke, nokukonza kwehope yake kunoshandurwa.

Purutana Mambo

² Inini ndinoti, “Ngwarira mipango yamambo, ngokuti Mwari wakapika mhiko kwaari.

³ Usatyiswa; ibva pamberi pake, usanonoka kwaitika ndaa yakashata; ngokuti unoita cheshe chaanoda.”

⁴ Ngokuti izwi ramambo rinesimba; ndiani ungakona kuronza kwaari kuti, “Unoitenyi?”

⁵ Uwo unongwarira mipango aazoshongani nechakashata; nomwoyo wowakangwara unozozia nguva nenjira.

⁶ Ngokuti chiro cheshe chine nguva yacho nenjira, kunyazwi kutambudzika kwomunhu kukuru padera pake.

⁷ Ngokuti aazii izvo zvinozoapo, ndiani ungamuronzera kuti zvinozoita maitikirenyi?

⁸ Ngokuti akuna munhu unesimba padera pomweya kuti aubate mweya nokuti kuane simba padera pezuva rokufa; akuna kurekererwa kubva mukurwa hondo, nokuti kushata akuzonunuri uwo unokuita.

Wakashata neWakarurama

⁹ Zveshe izvi ndakazviona, ndakaemesa mwoyo wangu kumishando yeshe inoitwa pashi pezuva, apo munhu unotonga padera poumweni kuita kuremadzwa kwoumweni.

¹⁰ Zvino ndakaona vakashata vechiikwa, avo vaigara vechipinda nokubuda kubva mundau yakachena, navo vakakudzwa mudhorobha umwo mwevakaita izvi zviro. Izviwo azvina shwiro.

¹¹ Ngokuti kuororwa ngendaa yemishando yakashata akuitwi ngokukasira, mwoyo womunhu unonasa kuemeswa kuita zvakashata.

¹² Kunyazwi mushaishi unoshaisha mikuwo iri zana, nokurebesa mazuva ake okupona asi ndinozia kuti zvinozonakira avo vanomutya Mwari, ngokuti vanoema mukutya pamberi pake.

¹³ Asi azvizonakiri wakashata, nokuti aazodziwanziri mazuva ake akadai ngebvuri, ngokuti aaemi mukutya pamberi paMwari.

¹⁴ Chiripo chiro chisina shwiro chinoitwa munyika, kuti varipo vakarurama avo vanoitirwa kudai ngezvinoitirwa vakashata; zve, varipo vakashata vanoitirwa kudai ngezvinoitirwa vakarurama. Ndakati neizviwo azvina shwiro.

¹⁵ Ndizvo ndakairikidza kudakara, ngokuti apana chiro chakapinda kunaka pashi pezuva chinopinda kudya nokumwa, nokudzikudza pachake, ngokuti ichi chinozoenda naye mukushanda kwake mumazuva eshe okupona kwake kwaanopuwa ndiMwari pashi pezuva.

¹⁶ Naapo pendakaemesa mwoyo wangu kuti uzie ungwaru, nokuona mishando inoitwa munyika nenjira iyo anoona ndiyo kuata hope madziso ake masikati nokuti usiku,

¹⁷ zvino ndakaona yeshe mishando yaMwari, kuti kusaapo naumwe ungakona kuona kuti chiinyi chinoitwa pashi pezuva. Kunyazwi munhu unoedza kutsvakisisa, aazochioni; kunyazwi munhu wakangwara echipinimidza kuti unozia, aakoni kuchiona.