Mateu 1 - Bhaibheri Rakachena muChindau

Mazina aMadzibabamukuru aJesu Kristu

¹ Tsamba yokubarwa kwaJesu Kristu, mukororo waDhavhidha, mukororo waAbrahama.

² Abrahama wakabara Isaka, naIsaka wakabara Jakobe, naJakobe wakabara Judha nevanun'una vake;

³ naJudha wakabara Farezi naZara ndiTamari, naFarezi wakabara Hezironi, naHezironi wakabara Aramu,

⁴ naAramu wakabara Aminadhabhi, naAminadhabhi wakabara Nasoni, naNasoni wakabara Sarimoni

⁵ naSarimoni wakabara Bhoazi ndiRahabhi, naBhoazi wakabara Obhedhi ndiRute, naObhedhi wakabara Jesi,

⁶ naJesi wakabara Dhavhidha uwo waiya mambo. NaDhavhidha mambo wakabara Soromoni ngomukadzi uwo waiya waUria,

⁷ naSoromoni wakabara Rehobhoamu, naRehobhoamu wakabara Abhia, naAbhia wakabara Asa,

⁸ naAsa wakabara Jehoshafati, naJehoshafati wakabara Joramu, naJoramu wakabara Uzia,

⁹ naUzia wakabara Jotamu, naJotamu wakabara Ahazi, naAhazi wakabara Hezekia,

¹⁰ naHezekia wakabara Manase, naManase wakabara Amoni, naAmoni wakabara Josia,

¹¹ naJosia wakabara Jekonia nevanun'una vake, ngomukuwo wokutorwa kuenda Bhabhuroni.

¹² Ngesure kwokutorwa kuenda Bhabhuroni, Jekonia wakabara Saratieri, naSaratieri wakabara Zerubhabheri,

¹³ naZerubhabheri wakabara Abhiudhi, naAbhiudhi wakabara Eriakimu, naEriakimu wakabara Azo,

¹⁴ naAzo wakabara Zadhoki, naZadhoki wakabara Akimu, naAkimu wakabara Eriudhi,

¹⁵ naEriudhi wakabara Eriazari, naEriazari wakabara Matani, naMatani wakabara Jakobe,

¹⁶ naJakobe wakabara Josefa, mwamuna waMaria, uwo wakabara Jesu unozwi Kristu.

¹⁷ Ndizvo mibarirwana yeshe kubva kunaAbrahama kuguma kuna Dhavhidha iri gumi namirongomuna, kubvira kunaDhavhidha kuguma pakutorwa kuenda Bhabhuroni mibarirwana iri gumi namirongomuna, nokubvira pakutorwa kuenda Bhabhuroni metsa kuguma kunaKristu mibarirwana gumi namirongomuna.

Kubarwa kwaJesu Kristu

¹⁸ Zvino kubarwa kwaJesu Kristu kwaiya kwakadai; apo Maria mai ake aiya aemeserwa Josefa, vasati vashongana, iye wakaoneka aanemimba yoMweya Wakachena.

¹⁹ NaJosefa mwamuna wake, ngokuti waiya munhu wakarurama, asikadi kumutsverudzisa, waida kuti amurambe ngokufishika.

²⁰ Kwakati achakarakadza ndizvo, penya, ngirosi yaMambo yakaoneka kwaari ngokurota yechiti, “Josefa, iwewe Mukororo waDhavhidha, usatya kutora Maria mukadzi wako; ngokuti mimba iyo yaanayo ngeyoMweya Wakachena.

²¹ Unozobara mukororo; newe unozodudza zina rake kuti Jesu ngokuti ndiye unozoponesa vanhu vake kubva kuzvishaishi zvavo.”

²² Zveshe izvi zvakaitika kuti zvizadzisike izvo zvakaereketwa ndiMambo kubudikidza ngomuprofeti echiti,

²³ “Penya, mhandara inozoita mimba, ibereke mukororo, navo vanozodudza zina rake kuti Emanueri” ukwo ngokukumuchwa kunoti, “Mwari unesu.”

²⁴ NaJosefa amuka muhope wakaita kudai ngokuronza kwengirosi yaMambo, wakatora mukadzi wake.

²⁵ Naye aazi kushongana naye metsa wakabara mukororo; naye wakadudza zina rake kuti JESU.