Jobe 14 - Bhaibheri Rakachena muChindau

¹ “Munhu unoberekwa ngomudzimai mazuva ake mashomani, nawo akazara ngemadambudziko.

² Unobuda kudai ngeruva nokufota; unotiza kudai ngebvute, aagari.

³ Newe unobeura here madziso ako kuringira kunowakadai? Unondiunza mukutongwa newe?

⁴ Ndiani ungakona kubudisa chiro chakasukika kubva kunechiro chisikazi kusukika? Akuna naumwe ungakona.

⁵ Kwechioneka kuti mazuva ake akapimwa, uwandu hwemwedzi yake hunoziikanwa kwouri, iwewe wakaemesa migano yaasikakoni kudarika,

⁶ usaringira kwaari, muregere ari ega, metsa apedze zuva rake rokudakara kudai ngounobhadharwa.

⁷ Ngokuti riripo gonda kumuti kuti kudai wechitemerwa pashi, unozoburukirazve, kuti matai awo matsva aazorekeri kuapo.

⁸ Kunyazwi nzinde dzawo dzaasharuka mumavhu, neguri rawo rechifa mumavhu,

⁹ kudai wechizwa munuhwi wemvura unozoburukirazve, nokubudisa matai kudai ngechisimwa chitsva.

¹⁰ Asi munhu unofa, echiora; munhu unoparara, naye uri pari?

¹¹ Kudai ngezveinooma mvura kubva mugandwa, nemikova inooma nokupwa,

¹² ndizvo munhu unoata pashi, asikachamukizve; metsa matenga asisipo, avatongozomuki nokuti kumirudzwa kubva mukuata kwavo.

¹³ A, kudai iwewe waizondifisha muSheori, dai waizondiisa mundau yakafishika, metsa ushungu hwako hwapinda, kuti undiemesere mukuwo wakaemeserwa nokundikarakadza!

¹⁴ Kudai munhu echifa, uchazoraramazve here? Mazuva eshe okushanda kwangu ndinozogarira metsa ugume mukuwo wokusunhurwa kwangu.

¹⁵ Unozodaidza, neni ndinozokudaira; unozoshuwira mushando wenyara dzako.

¹⁶ Ngokuti zvino auzoerengi zvitsiko zvangu, auzoringiri kushaisha kwangu.

¹⁷ Kushaisha kwangu kunonamirwa musaka, newe unofukidza kushaisha kwangu.

¹⁸ Asi mutunhu unowa kuti mwarakata, nebuwe rinoduswa pandau yaro.

¹⁹ Mvura inotsa mapuwe; kupopoma kwayo kunotora ivhu renyika; ndizvo unoparadza gonda revanhu.

²⁰ Munomunyisa mhera nariini, naye unopinda; unoshandura hope yake, nokumuendesa kuretu.

²¹ Vana vake vanopotera mukuremeredzwa, asikazvizii; vanodzaswa pashi, asikazvioni.

²² unozwa kurwadzwa kwega kwomuiri wake, nomweya wake uri mukati nokudzichemera pachake.”