Jobe 13 - Bhaibheri Rakachena muChindau

¹ Ringirai, madziso angu aona izvi zveshe, nzee dzangu dzazvizwa nokuzvizwisisa.

² Izvo zvomunozia, neniwo ndinozvizia; andisiri pashi penyu akadi.

³ Asi ndingada kuereketa kunouwo Une-simba-reshe, neni ndinodisisa kuphikisana naMwari.

⁴ Asi imwimwi munofukidza ngemanyepo; imwimwi mweshe muri n'anga dzisina shwiro.

⁵ A, kudai mungatonyarara kwega, ndikwo kungaita ungwaru hwenyu!

⁶ Izwai zvino kupinimidza kwangu, mupurutane kupota kwemiromo yangu.

⁷ Munozoereketera Mwari manyepo here, nokumuereketera kuchengedza?

⁸ Munozomuremeredza here? Munozopota mwakaemera ndaa yaMwari here?

⁹ Zvinozomunakira here apo echimutsvakisisa? Nokuti mungakona kumuchengedzera here, kudai ngoumwe unochengedzera umweni?

¹⁰ Ngegwinyiso unozomurambidza kudai imwimwi mukufishika mwechiita mukheto kuvanhu.

¹¹ Ukuru hwake ahumutyisi, nokutyisa kwake akuwiri padera penyu here?

¹² Mazwi enyu akangwara zvisana zvemarota, kudzirwira kwenyu kwakadai ngokudzirwira kwedongo.

¹³ Nyararai, mundirekere kuti ndierekete, ngachiitike kwendiri icho chinozoitika.

¹⁴ Ndinozohwijura nyama yangu ngemazino angu, ndechiisa kupona kwangu munyara dzangu here?

¹⁵ Ringirai, unozondiuraya, andichina gonda; asi ndinozorwisa njira dzangu pamberi pake.

¹⁶ Izvi zvinozoita ruponeso rwangu; kuti usikatendi Mwari asazouya pamberi pake.

¹⁷ Nasai kupurutana kuereketa kwangu, nokudaidzira kwangu ngakuzwike munzee dzenyu.

¹⁸ Ringirai zvino, ndarongedza ndaa yangu; ndinozia kuti ndinozopembedzwa.

¹⁹ Ndiani uwo unozophikisana neni? Ngokuti zvino ndinozonyarara ndife.

²⁰ Kwega ndiitirenyi zviro zviiri, zvino andizodzifishi kubva pamberi pako:

²¹ Dusa nyara yako kubva kwendiri, usaita kuti kutyisa kwako kundikarudze.

²² Zvino daidza, ndinozodaira; nokuti tenda kuti ndierekete, undipingure.

²³ Zvinganai zvakashata zvangu nezvishaishi zvangu? Ita kuti ndizie zvakashata zvangu nezvishaishi zvangu.

²⁴ Ngenyi wechifisha hope yako, wechindierenga kudai ngegaa rako?

²⁵ Unozotyisidzira shakani rinopepetwa ngedutu nokurumbirira mazungu akaoma here?

²⁶ Ngokuti iwewe unonyora zviro zvinondishatira, wechiita kuti ndigare nhaka yezvishaishi zvoutsva hwangu.

²⁷ Iwewe unoisa tsoka dzangu mumanguri, wechiringisisa njira dzangu dzeshe; unotara muganu kutendenedza tsoka dzangu.

²⁸ Umwe unopera kudai ngechiro chinoora, chinopera kudai ngechokufuka chinodyiwa ngounundu.