Jobe 11 - Bhaibheri Rakachena muChindau

Zofa

¹ Zvino Zofa muNaamathi wakapingura echiti,

² “Mazwi akawanda angapinda asikazi kupingurwa, noumwe unoereketesa ungapembedzwa here?

³ Maganzakatwa ako angaita here kuti vanhu vanyarare, naapo unosheka, akuna munhu ungaita kuti utsveruke here?

⁴ Ngokuti iwewe unoti, ‘Kuita kwangu kwakachena, neni ndakasukika mukuona kwaMwari.’

⁵ Asi A, dai Mwari aizoereketa, nokubeura miromo yake kwouri,

⁶ nokuti akuronzere zvakafishika zvoungwaru! Ngokuti ungwaru hunemarutii mazhinji. Zia zvino kuti Mwari unokukungurira kakurutu kupinda zvinosisira kushata kwako.

⁷ Unokona here kutsvakisisa ngezviro zvakadzama zvaMwari? Unokona here kuzwisisa ndiye Uwo Une-simba-reshe?

⁸ Kwakaturama kupinda matenga; ungakona kuitenyi? Kwakadzama kupinda Sheori; ungakona kuzienyi?

⁹ Chipimo chacho chakareba kupinda nyika, nokupamhama kupinda ruandhle.

¹⁰ Kudai echizopinda ndimwo nokukonyera mutirongo, naye unozounganidza kutonga pamwepo, ndiani ungamurambidza?

¹¹ Ngokuti unozia vanhu vasina shwiro; naapo paanoona kushata, aazopinimidzi ndikwo here?

¹² Asi munhu benzi unozozwisisa, apo mbongoro yomushango yabarwa iri munhu.

¹³ Kudai wechinasirira mwoyo wako kuti unake, unozotambanudza nyara dzako kwaari.

¹⁴ Kudai kushata kuri munyara dzako, kurashe kuretu kubva kwouri, usatenda kuti kushata kugare muugaro hwako.

¹⁵ Ngegwinyiso zvino unozomirudza hope yako isina chipodyo; iwewe unozoita wakatsima, auzotyi.

¹⁶ Unozoriyarwa kutambudzika kwako; unozokukarakadza kudai ngemvura yapinda.

¹⁷ Nokupona kwako kunozojeka kupinda masikati; nechidima chakwo chinozodai ngemangwanani.

¹⁸ Newe unozongwaririka, ngokuti gonda riripo; unozongwarirwa, unozoona kuzorora mukungwaririka.

¹⁹ Unozoata pashi, akuna naumwe unozokutyisidzira; vazhinji vanozotsvaka kuzwanana newe.

²⁰ Asi madziso evakashata anozopera, navo avazopokonyoki, negonda ravo kufema kwokupedzisira.”