Ezek. 1 - Bhaibheri Rakachena muChindau

Chioniso chaMwari chokutanga chaEzekieri ( 1:1—7:27 ) Dendemaro raMwari

¹ Mugore remakumi matatu, mumwedzi wechirongomuna, pazuva rechishanu, ndaiya pakati pehloko, pasinde porwizi Khebhari, matenga akabeuka, neni ndakaona zvioniso zvaMwari.

² Pazuva rechishanu remwedzi, wegore rechishanu rouhloko hwamambo Jehoiakhini,

³ izwi raMambo Mwari rakauya kunaEzekieri mupristi, mukororo waBhuzi, munyika yevaKharadhea pasinde porwizi Khebhari; nenyara yaMambo Mwari yaiya padera pake apo.

⁴ Pendakaringira, ndakaona chipupuri chakabva ngedera, gore guru rinokujeka kwakaritendenedza, nomuriro unoramba wechipenya, nepakati pemuriro pane chiro chakadai ngethusi rinon'anikira.

⁵ Mukati, pakati paro paiya nemiemo yakadai ngezvisikwa zvirongomuna zvinopona. Uku ndikwo kuringirika kwazvo: Zvaiya nechiemo chakadai ngechomunhu.

⁶ Chimwe ngachimwe chaiya nehope murongomuna, nachimwe ngachimwe chazvo chaiya nemaphaphiro marongomuna.

⁷ Mirenje yazvo yaiya yakatitwasa, nepashi petsoka dzazvo paiya pakadai ngepashi petsoka dzekonyana; nadzo dzain'anikira kudai ngethusi rakangwizirwa.

⁸ Pashi pemaphaphiro azvo kumarutii azvo marongomuna zvaiya nenyara dzakadai ngedzomunhu. Nazvo zveshe zvirongomuna zvaiya nehope dzazvo nemaphaphiro azvo ndizvo:

⁹ Maphaphiro azvo airimbana rimwe kunerimweni, chimwe ngachimwe chakahamba kururamisa kuenda mberi, azvizi kukunukuka apo zvaihamba.

¹⁰ Ngendaa yomuemo wehope dzazvo, zveshe zvirongomuna zvaiya nehope yomunhu, hope yemhondoro ngokurutii rwokumudyo, hope yekabi ngorutii rwokumuoshwe, nehope yegodzi.

¹¹ Izvi ndizvo zvaiya muemo wehope dzazvo. Maphaphiro azvo aiya akaparadzirwa padera, chisikwa chimwe chaiya nemaphaphiro mairi, rimwe ngarimwe rakarimbana nephaphiro rechimweni, apo mairi akafukidza muiri wacho.

¹² Chimwe ngachimwe chakahamba kururamisa kuenda mberi; peshe pewaizoda kuenda mweya, zvakaenda, zvisina kukunukuka apo zvaihamba.

¹³ Muemo wezvisikwa zvinopona waiya wakadai ngemasimbe anobaka ngomuriro, nokudai ngemasasi anohamba kuenda mberi ngesure pakati pezvisikwa zvinopona; muriro waijeka, kwakabuda mheni kubva pakati pomuriro.

¹⁴ Zvisikwa zvinopona zvairumba kuenda mberi nesure kudai ngokupenya kwemheni.

¹⁵ Naapo ndaringira kuzvisikwa zvinopona, ndakaona vhiri pashi pasinde pezvisikwa zvinopona, rimwe pachimwe ngechimwe pazvirongomuna.

¹⁶ Kuoneka kwemavhiri nokunasirwa kwawo kwaiya kwakadai ngokun'anikira kwemapuwe anomutengo mukuru; eshe marongomuna aiya nomuemo umwewo, kunasirwa kwawo kwaiya kwakadai ngechiro chakadai ngevhiri riri mukati mwevhiri.

¹⁷ Naapo ayihamba, ayikona kuhamba ngemarutii awo marongomuna, asikakunukuki apo ayihamba.

¹⁸ Magango awo aiya akareba nokutyisa, ngokuti magango awo eshe marongomuna aiya akazara ngemadziso kuatendenedza eshe.

¹⁹ Naapo zvisikwa zvinopona zvoohamba nemavhiri aihamba pasinde pazvo; naapo zvisikwa zvinopona zvakamiruka kubva panyika, nemavhiri aimirukawo.

²⁰ Kunyazwi ngepari pewaizoenda mweya, aizoenda powakaenda mweya, nemavhiri aizomirudzwa pamwepo nazvo; ngokuti mweya wezvisikwa zvinopona waiya mumavhiri.

²¹ Naapo zvahamba, aihambawo; naapo zvaema, aiemawo; naapo zvamiruka kubva pashi, mavhiri aimiruka pamwepo nazvo; ngokuti mweya wezvisikwa zvinopona waiya mumavhiri.

²² Padera pemasoro ezvisikwa zvinopona paiya nechiro chakadai ngedenga rinon'anikira kudai ngebuwe rinomutengo mukuru, chakatambanudzwa padera pemasoro azvo.

²³ Pashi pedenga maphaphiro azvo aiya akatambanudzwa, rimwe kunerimweni; chimwe ngachimwe chazvo chaiya nemaphaphiro mairi, aifukidzira muiri wacho.

²⁴ Naapo zvoohamba, ndakazwa bope remaphaphiro azvo, rakadai ngokuerera kwemvura inesimba, kudai ngokutinhira kweizwi roUne-simba-reshe, bope rehohoho kudai ngebope rehondo; apo zvaema, zvaipfinya maphaphiro azvo.

²⁵ Apo pakazwika izwi rakabva padera mudenga, padera pemasoro azvo; apo zvaema, zvaipfinya maphaphiro azvo.

²⁶ Nepadera pedenga raiya padera pemasoro azvo, paiya nechiro chakadai ngedendemaro, rinomuemo wakadai ngebuwe resafire; newaigara padera pomuemo wedendemaro chiro chairingirika chakadai ngomunhu.

²⁷ Padera kubva pane icho chairingirika chakadai ngechiunu chake ndakaona chiro chakadai ngesimbe raibaka, chiro chairingirika chakadai ngomuriro chaitendenedza mweshe; ngepashi kubva pane icho chairingirika chakadai nechiunu ndakaona chiro chairingirika chakadai ngomuriro, nawo wakajeka kumutendenedza.

²⁸ Kudai ngouta hwadandemutande huri mugore ngezuva rokunaya, uku ndikwo kujeka kwomuemo kwouthende hwaMambo Mwari. Naapo ndakuona, ndakawa pashi ngehope yangu, neni ndakazwa izwi roumwe echiereketa.