यर्मिया 2 - पवित्र बाइबल नेपाली समकालीन संस्करण

इस्राएलले याहवेहलाई त्यागेको

¹ याहवेहको वचन मकहाँ आयो:

² “जा, र यरूशलेमका मानिसहरूले सुन्‍ने गरी घोषणा गर्: “याहवेह यसो भन्‍नुहुन्छ: “ ‘तेरो युवा अवस्थाको भक्ति म सम्झना गर्छु; कसरी तैँले एउटी दुलहीले झैँ मलाई प्रेम गर्थिस्; अनि बिउ नछरिएको भूमिमा, मलाई मरुभूमिमा पछ्याइस्।

³ याहवेहका निम्ति इस्राएल पवित्र थियो; उहाँको फसलको पहिलो फल थियो; इस्राएललाई निल्नेहरू सबै दोषी ठहरिए; अनि तिनीहरूमाथि विपत्ति आइलाग्यो,’ ” याहवेह घोषणा गर्नुहुन्छ।

⁴ हे याकोबका सन्तान, इस्राएलका सबै वंशहरू हो, याहवेहको वचन सुन।

⁵ याहवेह यसो भन्‍नुहुन्छ: “तिमीहरूका पितापुर्खाहरूले ममा के दोष भेट्टाए, र तिनीहरू मबाट यति धेरै टाढा भए? तिनीहरू काम नलाग्ने मूर्तिहरूका पछि लागेर तिनीहरू आफैँ काम नलाग्ने भए।

⁶ तिनीहरूले यसो भनी सोधेनन्, ‘याहवेह कहाँ हुनुहुन्छ? जसले हामीलाई इजिप्टबाट ल्याउनुभयो; र हामीलाई उजाडस्थानबाट मरुभूमिको ठाउँ र खाडलबाट, सुक्खा भूमि र घोर अन्धकार ठाउँबाट, कुनै मानिस नहिँडेको र कोही नबसेको देशबाट डोर्‍याउनुभयो?’

⁷ मैले तिमीहरूलाई मलिलो देशमा त्यसका फलहरू र असल उब्जनी खानका निम्ति ल्याएँ। तर तिमीहरू आयौ र मेरो देशलाई अशुद्ध पार्‍यौ; अनि मेरो उत्तराधिकारलाई घृणित बनायौ।

⁸ पुजारीहरूले, ‘याहवेह कहाँ हुनुहुन्छ?’ भनी सोधेनन्; व्यवस्थाका काम गर्नेहरूले मलाई चिनेनन्; अगुवाहरूले मेरो विरुद्धमा विद्रोह गरे। काम नलाग्ने मूर्तिहरूका पछि लागेर, अगमवक्ताहरूले बाल-देवताको नाममा अगमवाणी गरे।

⁹ “यसकारण म फेरि तिमीहरूको विरुद्धमा मुद्दा लगाउनेछु,” याहवेह घोषणा गर्नुहुन्छ। “अनि म तिमीहरू, तिमीहरूका छोराछोरी र नातिनातिनाहरूका विरुद्धमा मुद्दा लगाउनेछु।

¹⁰ कित्तीमको किनारपारि गएर हेर्, केदार मरुभूमिमा पठा, र ध्यानपूर्वक हेर्; त्यहाँ यस्तो कहिल्यै भएको छ कि छैन, सो पत्ता लगा:

¹¹ के कुनै राष्ट्रले आफ्ना देवी-देवताहरू बदली गरेका छन्? (यद्यपि तिनीहरू देवता नै होइनन्।) तर मेरो आफ्नै जातिले आफ्ना महिमित परमेश्‍वरलाई व्यर्थका मूर्तिहरूसित साटेका छन्।

¹² हे आकाशमण्डल हो, तिमीहरू यस कुरामा चकित होओ; अनि भयानक डरले थरथर काम,” याहवेह घोषणा गर्नुहुन्छ।

¹³ “मेरा मानिसहरूले दुई वटा पापहरू गरेका छन्: तिनीहरूले मलाई त्यागेका छन्, जिउँदो पानीको मूललाई; अनि तिनीहरूले पानी नअडिने आफ्नै कुवाहरू खनेका छन्।

¹⁴ के इस्राएल एउटा सेवक, जन्मजात दास हो र? तब किन त्यो लुटिएको छ?

¹⁵ सिंहहरू गर्जेका छन्; तिनीहरूले इस्राएललाई झम्टेका छन्। तिनीहरूले त्यसको भूमिलाई उजाड पारिदिएका छन्; त्यसका सहरहरू जलाइएका र त्यागिएका छन्।

¹⁶ मेम्फिस र तहपनेसका मानिसहरूले पनि तिमीहरूका खप्परलाई कुच्याइदिएका छन्।”

¹⁷ जब तिमीहरूलाई याहवेह तिमीहरूका परमेश्‍वरले बाटोमा डोर्‍याउँदै हुनुहुन्थ्यो, तब उहाँलाई तिमीहरूले त्यागेर, यो कुरा आफैँमाथि ल्याएका होइनौ र?

¹⁸ अब नील नदीबाट पानी पिउन इजिप्टमा किन जान्छौ? अनि यूफ्रेटिस नदीबाट पानी पिउन अश्शूरमा किन जान्छौ?

¹⁹ तिमीहरूको दुष्‍टताले तिमीहरूलाई दण्ड दिनेछ; “तिमीहरूको धर्म-त्यागले तिमीहरूलाई हप्काउनेछ। तिमीहरूले याहवेह तिमीहरूका आफ्ना परमेश्‍वरलाई त्यागेर मेरो भय नराख्दा त्यो तिमीहरूका निम्ति कति दुष्‍टता र तितोपना हुनेछ भनी विचार गरेर जान,” सेनाहरूका याहवेह घोषणा गर्नुहुन्छ।

²⁰ “धेरै समयअगि नै तैँले आफ्नो जुवा भाँचिस् र आफ्ना बन्धनहरू फुकाइस्; तैँले भनिस्, ‘म तपाईंको सेवा गर्नेछैनँ!’ अनि प्रत्येक अग्ला डाँडाहरूमाथि र हरेक झ्याम्म परेको रूखमुनि तँ वेश्याजस्तै ढल्किस्।

²¹ मैले तँलाई एक असल र भरपर्दो बोटबाट एउटा उत्तम दाखको बोटझैँ रोपेको थिएँ। तर कसरी तँ मेरो विरुद्धमा खडा भएर, भ्रष्‍ट जङ्गली दाखको बोट भइस्?

²² तैँले आफूलाई कडा साबुन र सोडाले धोए तापनि तेरो अपराधको दाग अझै पनि मेरो सामु रहेको छ,” प्रभु याहवेह घोषणा गर्नुहुन्छ।

²³ “कसरी तैँले भन्‍न सक्छस्, ‘म अशुद्ध भएको छैनँ; म बाल-देवताहरूका पछि लागेको छैनँ?’ हेर्, तैँले बेँसीमा कस्तो व्यवहार गरेको थिइस्; तैँले के गरेको थिइस्, सो विचार गर्। तँ त यताउता दौडिहिँड्ने उत्तेजित ऊँटजस्तै छस्,

²⁴ उजाडस्थानमा रहने बानी भएकी, कामुक भएर हावा सुँघिहिँड्ने जङ्गली गधैनीजस्तै। त्यसको उन्मात कामुकतालाई कसले रोक्न सक्छ? त्यसलाई पछ्याउने गधाहरूले आफूलाई थकाउनुपर्दैन; कामवासनाको समयमा तिनीहरूले त्यसलाई भेट्टाइहाल्छन्।

²⁵ तेरा खुट्टा नाङ्गो नभएसम्म र तेरो घाँटी तिर्खाले सुक्खा नहुन्जेल नकुद्। तर तैँले भनिस्, ‘म फर्कन सक्दिनँ! म विदेशी देवताहरूलाई प्रेम गर्छु; अनि मैले तिनीहरूलाई पछ्याउनैपर्छ।’

²⁶ “पक्राउ पर्दा चोर लज्जित भएझैँ, इस्राएलको घराना लज्जित भएको छ; अर्थात् तिनीहरू, आफ्ना राजाहरू र तिनीहरूका अधिकारीहरू, तिनीहरूका पुजारीहरू र तिनीहरूका अगमवक्ताहरू सबै लज्जित भएका छन्।

²⁷ तिनीहरूले काठलाई भन्छन्, ‘तपाईं मेरा पिता हुनुहुन्छ,’ अनि ढुङ्गालाई भन्छन्, ‘तपाईंले मलाई जन्माउनुभयो।’ तिनीहरूले मतिर मुख होइन, तर आफ्नो पिठिउँ फर्काएका छन्; तापनि तिनीहरू विपत्तिमा पर्दा तिनीहरू भन्छन्, ‘आएर हामीलाई बचाउनुहोस्!’

²⁸ त्यसो भए तिमीहरूले आफ्ना निम्ति बनाएका देवी-देवताहरू चाहिँ कहाँ छन् त? तिमीहरू विपत्तिमा परेको बेला तिनीहरूले बचाउन सक्छन् भने तिनीहरू आऊन्! किनकि हे यहूदा, तँसित जति सहरहरू छन्, त्यति नै धेरै देवी-देवताहरू पनि छन्।

²⁹ “तिमीहरू मेरो विरुद्धमा किन अभियोग लगाउँछौ? तिमीहरू सबै मेरो विरुद्धमा बागी भएका छौ,” याहवेह घोषणा गर्नुहुन्छ।

³⁰ “मैले व्यर्थैमा तिम्रा मानिसहरूलाई दण्ड दिएँ; किनकि तिनीहरूले सुध्रिन मानेनन्। तिमीहरूका तरवारले तिमीहरूका अगमवक्ताहरूलाई निलिहाल्ने शिकारी सिंहले जस्तै नाश गरेका छौ।

³¹ “यस पुस्ताका मानिसहरू, तिमीहरूले याहवेहको वचन विचार गर: “के म इस्राएलका निम्ति मरुभूमि अथवा घोर अन्धकारको देशजस्तै भएको छु? किन मेरा मानिसहरूले यसो भन्छन्, ‘हामी आफूखुशी गर्न स्वतन्त्र छौँ; हामी तपाईंकहाँ फेरि फर्केर आउनेछैनौँ?’

³² के एउटी कन्याले आफ्ना गरगहना, वा एउटी दुलहीले आफ्नो विवाहका गरगहनाहरू बिर्सन सक्छे र? तापनि मेरा मानिसहरूले, धेरै समयदेखि मलाई बिर्सेका छन्।

³³ तँ प्रेमिका पछि लाग्नलाई कति सिपालु छेस्! अति दुष्‍ट स्त्रीहरूले पनि तेरो चालहरूबाट सिक्न सक्छन्।

³⁴ तेरा लुगाहरूमा निर्दोष गरिबहरूको रगत भेटिन्छ, यद्यपि तैँले तिनीहरूले घर फोर्दै गरेको भेट्टाइनस्। तर यी सबै कुरा हुँदा-हुँदै पनि

³⁵ तँ भन्छस्, ‘म त निर्दोष छु; उहाँ मसित रिसाउनुभएको छैन।’ तर तैँले, ‘मैले पाप गरेकी छैनँ’ भनेकै कारण म तेरो न्याय गर्नेछु।

³⁶ तँ किन आफ्ना मार्गहरू बदलेर, यताउता डुलिहिँड्छस्? अश्शूरले तँलाई निराश तुल्याएजस्तै तँ इजिप्टबाट पनि निराश हुनेछस्।

³⁷ तैँले त्यो ठाउँलाई पनि आफ्ना हात आफ्नै थाप्लोमा राखेर छाड्नेछस्; किनकि तैँले भरोसा राखेकाहरूलाई याहवेहले त्याग्नुभएको छ; तैँले तिनीहरूबाट सहायता पाउनेछैनस्।