उत्पत्ति 5 - पवित्र बाइबल नेपाली समकालीन संस्करण

आदमदेखि नोआसम्मको वंशावली

¹ आदमको वंशको विवरण यही हो: जब परमेश्‍वरले मानिस जातिलाई सृष्‍टि गर्नुभयो, तब उहाँले तिनलाई परमेश्‍वरको स्वरूपमा बनाउनुभयो।

² उहाँले तिनीहरूलाई पुरुष र स्त्री बनाउनुभयो, र तिनीहरूलाई आशिष् दिनुभयो। तिनीहरूको सृष्‍टि हुँदा उहाँले तिनीहरूलाई “मानिस जाति” नाम दिनुभयो।

³ आदम 130 वर्षको हुँदा, तिनीजस्तै तिनको आफ्नै स्वरूपमा एउटा छोरा भयो, र तिनले त्यसको नाम शेत राखे।

⁴ शेतको जन्मपछि आदम 800 वर्षसम्म बाँचे; अनि तिनका अरू छोराछोरी जन्मिए।

⁵ आदम जम्मा 930 वर्षसम्म बाँचे; अनि तिनी मरे।

⁶ शेतको उमेर 105 वर्षको हुँदा, तिनी एनोशका पिता भए।

⁷ तिनी एनोशका पिता भएपछि शेत 807 वर्ष बाँचे; अनि तिनका अरू छोराछोरी पनि जन्मिए।

⁸ शेत जम्मा 912 वर्षसम्म बाँचे; अनि तिनी मरे।

⁹ एनोशको उमेर 90 वर्षको हुँदा, तिनी केनानका पिता भए।

¹⁰ अनि तिनी केनानका पिता भएपछि, एनोश 815 वर्ष बाँचे; अनि तिनका अरू छोराछोरी भए।

¹¹ एनोश जम्मा 905 वर्षसम्म बाँचे; अनि तिनी मरे।

¹² केनानको उमेर 70 वर्षको हुँदा, तिनी महलालेलका पिता भए।

¹³ अनि तिनी महलालेलका पिता भएपछि, केनान 840 वर्ष बाँचे; र तिनका अरू छोराछोरी जन्मिए।

¹⁴ केनान जम्मा 910 वर्षसम्म बाँचे; अनि तिनी मरे।

¹⁵ महलालेलको उमेर 65 वर्षको हुँदा, तिनी येरेदका पिता भए।

¹⁶ अनि तिनी येरेदका पिता भएपछि, महलालेल 830 बाँचे; अनि तिनका अरू छोराछोरी जन्मिए।

¹⁷ महलालेल जम्मा 895 वर्षसम्म बाँचे; अनि तिनी मरे।

¹⁸ येरेदको उमेर 162 वर्षको हुँदा, तिनी हनोकका पिता भए।

¹⁹ अनि तिनी हनोकका पिता भएपछि येरेद 800 वर्ष बाँचे; अनि तिनका अरू छोराछोरी जन्मिए।

²⁰ येरेद जम्मा 962 वर्षसम्म बाँचे, र तिनी मरे।

²¹ हनोकको उमेर 65 वर्षको हुँदा, तिनी मतूशेलहका पिता भए।

²² अनि तिनी मतूशेलहका पिता भएपछि हनोक परमेश्‍वरसित 300 वर्ष विश्‍वासयोग्य भएर बाँचे; अनि तिनका अरू छोराछोरी जन्मिए।

²³ हनोक जम्मा 365 वर्षसम्म बाँचे।

²⁴ हनोक परमेश्‍वरसित विश्‍वासयोग्य भएर बाँचे। अनि तिनी अलप भए; किनकि परमेश्‍वरले तिनलाई उठाइलैजानुभयो।

²⁵ मतूशेलहको उमेर 187 वर्षको हुँदा, तिनी लेमेकका पिता भए।

²⁶ अनि तिनी लेमेकका पिता भएपछि मतूशेलह 782 वर्ष बाँचे; अनि तिनका अरू छोराछोरी जन्मिए।

²⁷ मतूशेलह जम्मा 969 वर्षसम्म बाँचे; अनि तिनी मरे।

²⁸ लेमेकको उमेर 182 वर्षको हुँदा, तिनको एउटा छोरा जन्मियो।

²⁹ अनि तिनले यसो भनेर त्यसको नाम नोआ राखे, “याहवेहले श्राप दिनुभएको भूमिमा हाम्रा हातले गरेको काम र कष्‍टदायक परिश्रममा यसले हामीलाई सान्त्वना दिनेछ।”

³⁰ नोआ जन्मेपछि लेमेक 595 वर्ष बाँचे; अनि तिनका अरू छोराछोरी जन्मिए।

³¹ लेमेक जम्मा 777 वर्षसम्म बाँचे; अनि तिनी मरे।

³² नोआ 500 वर्ष पुगेपछि तिनी शेम, हाम र येपेतका पिता भए।