१ इतिहास 2 - पवित्र बाइबल नेपाली समकालीन संस्करण

इस्राएलका छोराहरू

¹ इस्राएलका छोराहरू यिनै थिए: रूबेन, शिमियोन, लेवी, यहूदा, इस्साखार, जबूलून,

² दान, योसेफ, बेन्यामीन, नप्‍ताली, गाद र आशेर थिए।

यहूदादेखि हेस्रोनका सन्तानहरूसम्म

³ यहूदाका छोराहरू: एर, ओनान र शेलह। यी तीन जना छोराहरूकी आमाचाहिँ कनानी स्त्री शूआ थिइन्। (यहूदाका जेठा छोरा एर याहवेहको दृष्‍टिमा दुष्‍ट थिए। यसकारण याहवेहले तिनलाई मार्नुभयो।)

⁴ यहूदाकी बुहारी तामारले तिनको निम्ति पेरेस र जेरहलाई जन्माइन्। यहूदाका जम्मा पाँच जना छोराहरू थिए।

⁵ पेरेसका छोराहरू: हेस्रोन र हामूल।

⁶ जेरहका छोराहरू: जिम्री, एतान, हेमान, कलकोल र दर्दा, गरेर जम्मा पाँच जना।

⁷ कर्मीका छोरा: आकार, जसले अर्पण गरिएका थोकहरू लिएर आज्ञा उल्‍लङ्घन गरी इस्राएलमाथि विपत्ति ल्याएका थिए।

⁸ एतानका छोरा: अजर्याह।

⁹ हेस्रोनका छोराहरू यिनै थिए: यरहमेल, राम र कालेब।

हेस्रोनका छोरा रामका सन्तानहरू

¹⁰ राम अम्मीनादाबका पिता थिए; अनि अम्मीनादाबचाहिँ नहशोनका पिता थिए, जो यहूदाका मानिसहरूका अगुवा थिए।

¹¹ नहशोन सल्मोनका पिता थिए; सल्मोन बोअजका पिता थिए।

¹² बोअज ओबेदका पिता थिए; र ओबेद यिशैका पिता थिए।

¹³ यिशै यिनीहरूका पिता थिए: पहिलो छोरा एलिआब; दोस्रो छोरा अबीनादाब, तेस्रो छोरा शिमेअ,

¹⁴ चौथो नथनिएल, पाँचौँ रद्दै,

¹⁵ छैटौँ ओसेम र सातौँचाहिँ दावीद थिए।

¹⁶ तिनीहरूका बहिनीहरू सरूयाह र अबीगेल थिए। सरूयाहका तीन जना छोराहरू थिए—अबीशै, योआब र असाहेल थिए।

¹⁷ अबीगेलचाहिँ अमासाकी आमा थिइन्। अमासाका पिता इश्माएली येतेर थिए।

हेस्रोनका छोरा कालेब

¹⁸ हेस्रोनका छोरा कालेबकी पत्नी अजूबा (र यरीओत) बाट छोराहरू भए। तिनका छोराहरू यिनै हुन्: येशेर, शोबाब र अर्दोन थिए।

¹⁹ जब अजूबाको मृत्यु भयो, तब कालेबले एप्रातलाई विवाह गरे, जसले तिनका निम्ति हूरलाई जन्माइन्।

²⁰ हूर ऊरीका पिता थिए; अनि ऊरीचाहिँ बजलेलका पिता थिए।

²¹ हेस्रोन साठी वर्ष पुग्दा, तिनले गिलादका पिता माकीरकी छोरीसँग विवाह गरे। हेस्रोनले तिनीसँग सहबास गरे, र तिनले हेस्रोनका निम्ति सगूबलाई जन्माइन्।

²² सगूब याईरका पिता थिए, जसले गिलादका तेईस वटा सहरहरूमा शासन गर्दथे।

²³ (तर गेशूर र अरामले हव्वोत-याईर र केनातका, साथै त्यसका चारैतिरका गाउँहरू र साठी वटा नगरहरूसमेत कब्जा गरेका थिए।) यी सबै गिलादका पिता माकीरका सन्तानहरू थिए।

²⁴ कालेब-एप्रातामा हेस्रोनको मृत्यु भएको केही समयपछि तिनकी पत्नी अबीयाहले तिनका निम्ति अशहूरलाई जन्माइन्, जो तकोका पिता थिए।

हेस्रोनका छोरा यरहमेल

²⁵ हेस्रोनका जेठा छोरा यरहमेलका छोराहरू: जेठा छोरा राम, र बूना, ओरेन, ओसेम र अहीयाह।

²⁶ यरहमेलकी अर्की पत्नी थिइन्, जसको नाम अतारा थियो; तिनी ओनामकी आमा थिइन्।

²⁷ यरहमेलका जेठा छोरा रामका छोराहरू: मास, यामीन र एकेर।

²⁸ ओनामका छोराहरू: शम्मै र यादा। शम्मैका छोराहरू: नादाब र अबीशूर।

²⁹ अबीशूरकी पत्नीको नाम अबीहेल राखिएको थियो, जसले तिनका निम्ति अहबान र मोलीदलाई जन्माइन्।

³⁰ नादाबका छोराहरू: सेलेद र अप्पेम। सेलेद निःसन्तान नै मरे।

³¹ अप्पेमका छोरा: यिशी, जो शेशानका पिता थिए। शेशानचाहिँ अहलैका पिता थिए।

³² शम्मैका भाइ यादाका छोराहरू: येतेर र जोनाथन। येतेरचाहिँ निःसन्तान नै मरे।

³³ जोनाथनका छोराहरू: पेलेत र जाजा। यरहमेलका सन्तानहरू यिनीहरू नै थिए।

³⁴ शेशानका छोराहरू थिएनन्, छोरीहरू मात्र थिए। तिनको यर्हा नाम भएको एउटा इजिप्टियन सेवक थियो।

³⁵ अनि शेशानले यही यर्हासँग आफ्नी छोरीलाई विवाह गरिदिए। तब तिनले अत्तैलाई जन्माइन्।

³⁶ अत्तै नातानका पिता थिए; र नातान जाबादका पिता थिए;

³⁷ जाबाद एपलालका पिता थिए; एपलाल ओबेदका पिता थिए;

³⁸ ओबेद येहूका पिता थिए; येहू अजर्याहका पिता थिए,

³⁹ अजर्याह हेलेसका पिता थिए; हेलेस एलासाका पिता थिए,

⁴⁰ एलासा सिस्मैका पिता थिए; सिस्मै शल्‍लूमका पिता थिए;

⁴¹ शल्‍लूम यकम्याहका पिता थिए; र यकम्याह एलीशामाका पिता थिए।

कालेबका वंशहरू

⁴² यरहमेलका भाइ कालेबका छोराहरू: जेठा छोरा मेशा, जो जीपका पिता थिए; अनि दोस्रो मारेशा, जो हेब्रोनका पिता थिए।

⁴³ हेब्रोनका छोराहरू: कोरह, तप्पूह, रेकेम र शेमा।

⁴⁴ शेमा रहमका पिता थिए; र रहमचाहिँ योर्कामका पिता थिए। रेकेम शम्मैका पिता थिए।

⁴⁵ शम्मैका छोरा माओन थिए; र माओनचाहिँ बेथ-सूरका पिता थिए।

⁴⁶ कालेबको उपपत्नी एपाचाहिँ हारान, मोस र गाजेजको आमा थिइन्। हारानचाहिँ गाजेजका पिता थिए।

⁴⁷ यहदैका छोराहरू: रेगेम, योताम, गेशान, पेलेत, एपा र शाप।

⁴⁸ कालेबकी उपपत्नी माकाचाहिँ शेबेर र तिर्हानाकी आमा थिइन्।

⁴⁹ तिनले मदमन्‍नाका पिता शाप र मक्बेना र गेबाका पिता शेबालाई पनि जन्माइन्। कालेबकी छोरी अक्सा थिइन्।

⁵⁰ कालेबका सन्तानहरू यिनै थिए। एप्राताका जेठा छोरा हूरका छोराहरू: किर्यत-यारीमका पिता शोबाल।

⁵¹ बेथलेहेमका पिता सल्मा र बेथ-गादेरका पिता हारेप।

⁵² किर्यत-यारीमका पिता शोबालका सन्तानहरू यिनै थिए: हारोए, मनुहोतीहरूका आधा भाग,

⁵³ अनि किर्यत-यारीमका वंशहरू: यित्रीहरू, पूतवंशीहरू, शुमातीहरू र मिश्राईहरू। यिनीहरूबाट नै सोरातीहरू र एश्तोलीहरूका वंश आएका हुन्।

⁵⁴ सल्माका सन्तानहरू: बेथलेहेम, नतोपातीहरू, अत्रोतबेथ-योआब, मानहतीहरूका आधा भाग, सोरीहरू,

⁵⁵ अनि याबेसमा बस्‍ने शास्त्रीहरूका वंशहरू: तिरातीहरू, शिमातीहरू र सुकातीहरू। केनीहरू यिनै हुन्, जो रेकाबीहरूका पुर्खा हम्मतबाट आएका थिए।