SOLOMON 5 - Ngochang

Vbusbih

¹ Ngos jyet soeu, ngah lonyi saiq eh, ngos ngah khyam mha wvng goeus. Ngos mura yahge xangh tsainh nyeis. Ngos ngah dyoyhei yahge dyotvp zo nyeis; ngos ngah zvbiq yahge nauh shuk nyeis. Hwank phoq jens eh, zo geh, jyet cho yah yet shoq shuk geh!

Vmesbih jens Lvkhyank Nyei Vyang Vmesbih

² Ngos yhet joq uhlyis ngah nhaiqlom soh nyeis. Ngah hwank phoq khomh koq oen yhetmoq moq. Ngos jyet las dyinghjet shoq yungh soeu, ngah khotjyauh, ngos lyis wvng los nhang aq. Ngah uhloms gas jyweh yah jyweq goeus, ngah cam eq jyweh soq yah nam goeus.

Vbusbih Vmesbih

³ Ngos dyi dye thaiq goeus, chamus dyi doms saiq wuot das lah? Khyei eq cheih toh goeus, chamus doms lhoeuh das lah?

⁴ Ngah hwank phoq gas nyah loq khomh lyis zwi lyis nyang ni los las ngah sainhguk thungh.

⁵ Ngos nyang lyis wvng nhang das zis cicont nghuot. Ngah loq mas mura tsain dap las ngos khomhloq lyis zwi lyis loqnyhauh masyah mura coeu yings gyoh.

⁶ Ngos ngah hwank phoq lyis khomh phank dyei goeus, nghuot laus eq nyang loh dyuk goeus. Ngos nyah thwe kha iq gyo mes! Ngos nyang lyis xo laus eq ma nyvng lo. Lui laus eq ma toeuh lo.

⁷ Wus mas suh lhaink nyeis, wus zungh bang ngos lyis nyvng las nyamoq ngos lyis bat cwe. Wus ciank mas zungh bang eq ngos gangh toh misseh langchuiq tyamp dyei.

⁸ Yerusalem vmesbih jens eh, Namoq ngah hwank phoq lyis nyvng lyis, ngos jyetnos nos nyeis zis taiq kyoh das oen, ngos lyis dangthoengh toh geh.

Vmesbih jens

⁹ Vmesbih jens mas yungh thank soeu eh, nah hwank phoq gas gohyuk yah shaih lhyeh? Ngamoq nvng lyis dangthoengh toh shoq, nyah cho hou iq mauhphoh zis cha bos lah?

Vmesbih

¹⁰ Ngah hwank phoq gas yungh las yombos soeu nghuot. Dius dvmons mas nyang teh zis dvyuk eq ma bos.

¹¹ Nyah nyoqnho ka thunk vwot nghuot las jyuot. Nyah cam ka kuih las kvnhoq teh noq.

¹² Nyah nyoqjeih gas jeis yaus nyeis jeislo lvng yvm mas nauh mas cheih las tsain yap joq dah khotjyauh jens teh yungh.

¹³ Nyah bvlot gas mvcheih saiq, xangh saiq yah dyingh dah khyamh teh yoeuh ngwis phoh tsain nghuot. Nyah nhuotkuk gas mura yings yah jyweq dah anghchau ban teh nghuot.

¹⁴ Nyah loq eq vyungh vdvng tsain nghuot las phauhdap luk yah shunk toh dah loqkyop tsain kyop chi. Nyah gungsdom gas nila yah dungh toh cangzwis teh nghuot.

¹⁵ Nyah tanghbauh gas xing zains cuk mas cuk toh dah luk thyoeu zains teh tsain nghuot. Nyang gas Arit saiq nyhang zains tsain bos dah Lebanon boms teh shoenkkhyi bos soeu nghuot.

¹⁶ Nyah nhuot gas nauh chau. Nyah cho dvnganh ngah nhaiq lyis thungh. Yerusalem vmesbih jens eh, houka ngah hwank phoq yah doeus cho tsain nghuot.