MATHE 8 - Ngochang

Mvnggvng Nos Gis Los

¹ Nyang boms masyah gyoh los lyis, moqjens nyah thang mha chank los.

² Yoeuh aq, mvnggvng dap soeu dvyuk nyang lyis los dupaiq las, Yhensain eh, nvng bauh nghuot lyis gas, ngos lyis yoh thyauhlhyang los nhang, ge.

³ Yesu nyah loq yhuonh kat las nyang lyis tanh zoh lyis yah taiq zis gas, Ngos mes, nvng thyauhlhyang los bas jungh, ge thangjang nyah gungs mas mvnggvng gas dyuk loh.

⁴ Housoeh Yesu nyang lyis taiq zis gas, Haih cho hank lyis eq vtaiq kyoh; nghuot laus eq nah gungs phudyei bang lyis loh chixoeuq aq. Housoeh las Moshe tying toh khoq zis yah dvyhangteh, jyungshuk phudyei zis yah nyamoq xikkhonh mas kanghjyoeng nghuot bas jungh, ge.

Jeslo Dvyuk Gis Los

⁵ Yesu Kaperna-um wus mas wvng loh lyis, jes dvxo guon zau dvyuk nyah jyank mas los las, nyang lyis sang zis gas,

⁶ Yhensain eh, ngah jyeidwis gas gungsjen shei lha yhen mha svsoh nos nyeis, ge dung lyis,

⁷ Yesu nyang lyis taiq zis gas, Ngos los las nyang lyis gis los nhang das, ge.

⁸ Nghuot laus eq hau jes dvxo guon zau phuk taiq zis gas, Yhensain eh, nvng ngah nyhanghmau thang mha wvng los das zis ngos ma mon: nghuot laus eq nah dang dvkhonh kyingh taiq kat lyis ngah jyeidwis gis los das.

⁹ Khasoeh ge lyis ngos gas vmingh khau mha dah dius dvyuk nghuot las ngah o mha eq jeslo jens nyeis: ngos haih soeu lhyi, Loh aq, oen lhyi nyang loh. Gohtoeu dvyuk lyis, Los aq, oen lhyi nyang los. Ngah jyeidwis lyis, Haih zis kuot aq, oen lhyi nyang kuot, ge.

¹⁰ Yesu hauh dang xauhgyo lyis mauh las, nyah thang mha chank yenh bang lyis, Ngos namoq lyis jyoengh taiq bah, Israel dius nyau mas yangh hei iq lomsjingh soeu ngos ma nyvng, ge.

¹¹ Ngos namoq lyis taiq zis gas, Buisthuq buiswvng pheh yah dius nyoshoq jweh los das las, maukhung munghdan mas Abraham, Isak, Yakop moq yah zo shuk das.

¹² Hauh munghdan lo jens nghuot vvng bang gas nghe pheh soeng soeng noq yvmas doeuh kat zis xauh das: hauh yvmas ngausdyeis ngausnhvp yah zwis khih chap loh das.

¹³ Yesu gas jes dvxo guon zau lyis, nvng loh aq, nvng lomsjingh zis yah dvyhangteh nah jyank mas bweh bas jungh, ge kat. Hauh shishenh lyis nyang, nyah jyeidwis gas gis los goeus.

Petru Yuknyih Gis los

¹⁴ Yesu gas Petru dah yhen mha wvng loh lyis, Petru dah yuknyih gungs ngeh las nos lhain toh zis lyis nyvng.

¹⁵ Housoeh Yesu nyah loq mas tanh lho lhyi hau gungs ngeh zis gis tyamp. Hauh uhlyis nyang toq las nyang lyis daih.

¹⁶ Nyenhthang jweh lyis nyamoq gas, yius kuq bang nyoshoq lyis nyah jyank mas shwih lyih las, nyang gas nyah dang khonh yah yius lyis khat tyamp: nos bang dvnganh lyis gis los nhang.

¹⁷ Haih zis gas, Nyang yamoq dah shanghsenh kham tyamp dyei las, Yamoq dah noslom wons tyamp dyei goeus, ge lvpe Esaia taiq toh dang nyuk los das xiklyis nghuot.

Changlo jens lyis Shi

¹⁸ Yesu gas nyah nvm yvm nvm wi lhaink toh dah moqjens zainsmuh lyis nyvng lho lhyi, thomh thyitvp pheh goeu e das xiklyis vmingh dyei.

¹⁹ Hauh uhlyis maussauh lhaih soeu dvyuk nyah jyank mas los las, Svra eh, nvng khalhye loh khalhye, ngos nah thang mha chank das, ge.

²⁰ Yesu nyang lyis taiq zis gas, Womkhuih jens eq khyung bos, mau dang nghoq jens eq sot yoh: nghuot laus eq Cangsoeu Lo gas nyah uhloms toh das joqyos ma yoh, ge.

²¹ Nyah changlo jens mas gohtoeu dvyuk eq, Yhensain eh, ngah uwus lyis shih loh nyhop khoq nhang aq, ge nyang lyis taiq.

²² Nghuot laus eq Yesu nyang lyis taiq zis gas, Ngah thang mha chank los aq; shei bang lyis gas nyamoq shei bang nyang nyhop bas jungh, ge.

Lyeisdons lyis Nyho

²³ Nyang lhyik khau mha wvng goeus ya, nyah changlo jens nyah thang mha chank los.

²⁴ Hauh uhlyis, yoeuh aq, hauh thomh mas lyeismuh jyang muot los lyis changhphauq doeuh las lhyik gas nyop bah ge lyis eq nyang gas yhet joq.

²⁵ Changlo jens nyang lyis loh nhauh las taiq zis gas, Yhensain eh, ngamoq lyis khyuot yoeus aq, gudwvng bah ge goeus, ge.

²⁶ Nyang nyamoq lyis taiq zis gas, Lomsjingh ehnyet ngis bang eh, chamus gyuk nyeis goh, ge uhjyangh nyang toq las lyeisdons yahge thomh lyis nyho lho lhyi hauh zis gas samlo no tyamp.

²⁷ Housoeh dius jens gas mauh las, Haih soeu ka khasoeh teh dah dius nghuot au lhyeh? Hau lyeis yahge thomh yangh nyah domsyos gyo, ge.

Yius Kuq Aiq Yuk Gis los

²⁸ Nyang thomh thyitvp Gadara mau jweh loh lyis, yius kuq dah dius aiq yuk gas lop masyah thuq los las nyang lyis zes langh. Nyah aiq yuk gas svsoh lhuon lha, hauh cho khvt chank yah hank eq ma yoh lai loh.

²⁹ Housoeh las yoeuh aq, hauh aiq yuk gas, Mangso dah Lo Yesu eh, ngamoq nvng yah cha sen lah? Shishenh ma jweh shih lyis nvng ngamoq lyis joeng das zis jweh los lhyeh, ge tsain kaiq.

³⁰ Gvshih nyamoq jyank masyah gvgis lo we yvmas wuq dvjens botzo nyeis.

³¹ Housoeh las yius jens nyang lyis dung zis gas, nvng ngamoq lyis khat tyamp das lyis gas, ngamoq lyis wuq jens mas wvng nhang aq, ge.

³² Nyang nyamoq lyis taiq zis gas, Thuq loh geh, ge. Nyamoq gas thuq las wuq jens mas tsain wvng loh. Yoeuh aq, hauh wuq jens dvnganh yah nyeismhung mhayah thomh mas tyauq wvng las ciang shei.

³³ Wuq yoeuh bang gas hauh wus mas phang wvng loh las, bweh ya bweh zis yahge yius kuq vzomh dah cho tsain taiq kyoh.

³⁴ Housoeh las, yoeuh aq dvwus gonh bang Yesu yah xauhgoh das xiklyis thuq loh las, nyang lyis nyvng goeus ya, nyang lyis nyamoq dah maukyo mhayah thuq loh das xiklyis tsain dung.