MATHE 12 - Ngochang

No Buisnyeis dah Yhensain

¹ Yesu gas Yuda No Buisnyeis lyis sunghso yos cho yah lai loh. Nyah changlo jens gas wom yuot las, sunghso nham lhyi tsain shap zo.

² Hauh zis lyis Pharishe moq nyvng las, nyamoq nyang lyis taiq zis gas, Yoeuh aq, nah changlo jens gas Yuda No Buisnyeis lyis kuot das lyi ma bos zis tsain kuot, ge.

³ Nyang nyamoq lyis taiq zis gas, Dawi gas yuot shet dah uhlyis nyang gas nyang yah nyeis bang yah dvgeh,

⁴ Mangso dah yhen mha khasoeh wvng loh las, phudyei bang kyingh ma nghuot lyis gas, nyang yahge, nyang yah dvgeh bang ma gis zo dah hau chixoeuq ohlhyoq lyis nyamoq khasoeh zo tyamp zis lyis namoq ma tsain nghap ku lhyeh?

⁵ Nghuot ya phudyei bang Yuda No Buisnyeis dah lyi lhyweq laus eq, nyamoq gas yobos ma bos cho Moshe dah lyi maussauh lyis ma tsain nghap yoeuh goh lhyeh?

⁶ Ngos namoq lyis taiq bah, Yhenmuh thoq lyis zes kuh zis heimha joq.

⁷ Ngos o mes zis gas phudyei cho ma nghuot, nhaiqnyen cho lhyi dv o mes ge dah dang khonh vjyuk lyis namoq seq nghuot lyis gas, yobos ma bos bang lyis namoq dang thang thyet das zis ma nghuot.

⁸ Khasoeh ge lyis hauh Cangsoeu Lo gas hau Yuda No Buisnyeis dah Yhensain nghuot, ge.

Loq Dvshot Shei zis Gis Los

⁹ Hou mhayah nyang toq loh lyis, nyamoq dah lyi jungs mas wvng loh.

¹⁰ Houmha loq dvshot shei soeu dvyuk nyeis. Nyamoq gas nyang lyis yoh kauq shoq nyang lyis nyei zis gas, Yuda No Buisnyeis lyis nos bang lyis gis los nhang zis, lyi bos lah, ge.

¹¹ Nyang nyamoq lyis taiq zis gas, Namoq dvyuk yuk mas yvng dvdoeu kyingh yoh las hauh zis Yuda No Buisnyeis lyis dwang mas dyet gyoh joq lyis, ma siq yoeus das lhyeh?

¹² Dius gas yvng thoq lyis kha iq zes phauhdap lah? Housoeh yvmvyah Yuda No Buisnyeis lyis, gis dah muh zwi das zis gas lyi bos, ge.

¹³ Hauh uhlyis nyang hauh soeu lhyi, Nah loq yhuonh kat aq, ge. Nyang loq yhuonh kat lyis hauh zis gas gohtoeu dvshot yhangteh gis los.

¹⁴ Pharishe moq thuq loh las, nyang lyis khasoeh yoh mhont das cho xamgoh nyeis.

Mangso Khyen Toh Jyeidwis

¹⁵ Yesu haih zis lyis seq lyis, hou mhayah jhank loh. Nyah thang mha chank los dah moqjens zainsmuh dvnganhmoq lyis nyang gis los nhang.

¹⁶ Nyang lyis gohtoeu dius jens lyis ma seq nhang das xiklyis nyang nyamoq lyis taiq toh.

¹⁷ Haih zis gas lvpe Esaia taiq khoq zis nyuk los das xiklyis nghuot.

¹⁸ Hauh dang gas, Ngos khyen yoeus toh ngah jyeidwis lyis yoeuh aq; Ngos nhaiqdoeus las ngos jyetdap soeu nghuot; Ngos nyang lyis ngah Dyos kat dyei las, Nyang gas ngah soetuon cho gohnyau bang lyis kyoh das,

¹⁹ Nyang gas nyingh ma nyo, ma kaiq las, Nyah thwe lhyi talhoeu mha hank eq ma xauhgyo das.

²⁰ Lyi jus cho lhyi ung cho yoh nhang buisnyeis jweh shoq, Nyang gas jap dah jvmbu lyis ma khyauh das zis yahge Nyikhauh thuq nyeis dah nyizoh lyis ma sat das.

²¹ Nyah nyings mas gohnyau bang eq loms das, ge.

Yesu yahge Bezebu

²² Hauh thang lhyi nyoqjet, nhuot jet dah yius kuq soeu dvyuk lyis, nyah jyank mas shwih los. Nyang gas hauh soeu lhyi gis los nhang lha, dang yoh jis los, nyoq eq nyvng los.

²³ Dius jens dvnganh gas mauh las, Haih soeu ka Dawi dah Lo ma nghuot lhyeh, ge.

²⁴ Nghuot laus eq Pharishe jens hauh zis xauhgyo lyis, Haih soeu ka yius zau Bezebu dah vmingh yah yius lyis khat tyamp, tsain ge.

²⁵ Nyamoq nghamh yvlyis Yesu seq las, nyamoq lyis taiq zis gas, Nyang changh nyang gang lvn loh dah munghdan khanghmuh gas dyoqbis das. Nyang changh nyang gang lvn loh dah wugungs, nghuot ya yhen ka yoh goeng joq das zis ma nghuot.

²⁶ Satan yah Satan lhyi khat tyamp nghuot lyis gas, nyang gas, nyang gungs lyis nyang zan nyeis yvmvyah nyah munghdan gas khasoeh yoh goeng joq das lah?

²⁷ Ngos Bezebu dah vmingh yah yius khat tyamp nghuot lyis gas, namoq dah lo jens gas hank dah vmingh yah yius lyis khat thuq lah? Housoeh yvmvyah nyamoq gas namoq lyis soetuon das bang duot das.

²⁸ Nghuot laus eq Mangso dah Dyos masyah ngos yius lyis khat tyamp nghuot lyis gas, Mangso munghdan namoq jyank mas jweh goeus.

²⁹ Yombos soeu lhyi shih cangxeih ma twih lyis gas, nyah yhen mha wvng las nyah zisyos lyis hank ma yoh thyoq yoeus. Nyang lyis twih thang lhyi nyah yhen dvyoh thyoq das.

³⁰ Ngos yah dvgeh ma nyeis soeu ka ngos lyis jes sont zis nghuot. Ngos yah dvgeh ma huom nyeis soeu ka dungsshih lvnggang mus loh das.

³¹ Housoeh yvmvyah ngos namoq lyis taiq bah, dius jens dah yaunos yahge loeusmus soqzo zis dvnganh khyuot tyamp dyei zis xauh das. Nghuot laus eq Gyingshang Dyos lyis loeusmus soqzo dah yobos lyis gas ma yoh khyuot tyamp dyei.

³² Cangsoeu Lo lyis nhuot yah taiq shuot soeu hank lyis laus eq yobos yoh khyuot dyei, nghuot laus eq Gyingshang Dyos lyis taiq shuot soeu lhyi ka haq caiq mas eq, jweh los das vcaiq mas eq yobos ma yoh khyuot dyei das.

Saiqzains yah Nyah Vshih

³³ Gis dah vshih yoh das xiklyis gas gis dah saiqzains yoh chah. Ma gis dah saiqzains yoh lyis gas ma gis dah vshih yoh das: khasoeh ge lyis nyamoq dah vshih lyis yoeuh las hauh saiqzains lyis yoh tsain seq.

³⁴ Ywimuhtsanh vnyau eh, namoq ma tsain gis zis, gis dah dang khasoeh yoh taiq das lah? Khasoeh ge lyis nhaiqlom mas dyingh las nhuot mas taiq thuq los.

³⁵ Gis soeu ka nyah gis dah zisyos mhayah gis zis thuq kat. Ma gis soeu ka ma gis dah zisyos masyah ma gis zis thuq kat.

³⁶ Ngos namoq lyis taiq bah, Soetuon buisnyeis lyis yuk khanghmuh gas nyang taiq dah yhung pvjus dang khanghmuh nyhenshang dang thang thyet zis xauh das.

³⁷ Khasoeh ge lyis, nah dang gvng mas nvng lyis jyoeng khyvlyis suon dyei das. Nah dang gvng mas nvng dang thang thyet zis xauh das, ge.

Vlho Sang

³⁸ Hauh thang lhyi maussauh lhaih bang yahge Pharishe dvyhamh gas, nyang lyis, Svra eh, ngamoq nvng chixoeuq dah vlho dvkoeuq nyvng mes, ge.

³⁹ Nghuot laus eq nyang nyamoq lyis phuk taiq zis gas, Ma gis zis yahge Mangso lhyi tyamp khoq dah caiq mas bang gas vlho tsain xo. Nghuot laus eq lvpe Yona dah vlho mha lai las gohtoeu chah vlho eq nyamoq lyis ma dyei das.

⁴⁰ Khasoeh ge lyis Yona gas somh nyeih somh nyens hau oengmuh womdau mas lungh joq zis yah dvyhangteh, Cangsoeu Lo eq somh nyeih somh nyens jweh shoq nyeisjvng khau mha lungh das.

⁴¹ Soetuon dah uhlyis Ninewe dius jens gas haq caiq mas bang yah dvgeh toq los las nyamoq lyis dang thang thyet das. Khasoeh ge lyis nyamoq gas Yona taiq kyoh dah dang gvng mas nhaiqlom tsain thaiq goeus. Yoeuh aq, heimha Yona thoq lyis zes cho joq.

⁴² Soetuon dah buisnyeis lyis mautyi pheh dah hwankti nyih gas haq caiq mas bang yah dvgeh toq los las nyamoq lyis dang thang thyet das. Khasoeh ge lyis nyamoq gas Solomon dah joeui gyo yoeus das xiklyis mau thang mhayah jweh los. Yoeuh aq, heimha Solomon thoq lyis zes soeu nyeis.

Yius Tauh Los

⁴³ Yius gas dius jyank masyah thuq loh las, kyuk dah mau mas lamh yenh. Nyang noyos xo laus eq ma nyvng.

⁴⁴ Hauh thang lhyi nyang doms taiq zis gas, Ngos thuq khoq dah yhen mha tauh loh das, ge. Nyang jweh loh lyis, yhen ka shenh shang lha vshung vgvn joq yvlyis nyvng.

⁴⁵ Hauh thang lhyi nyang loh las, nyah thoq lyis zes xungh xent dah yius nyhet doeu shwih las, hauh vkhau mha los tsain wvng lungh joq. Housoeh las hauh soeu dah wotwu gas xikpheh thoq lyis zes yau los. Hai lhung dah vcaiq mas bang eq houyah dvyhangteh bweh los das, ge.

Yesu Ungwes, Vnoeuh moq

⁴⁶ Yesu dius jens lyis dang taiq nyeis shih lyis, yoeuh aq, nyah ungwes yahge nyah vwik jens gas nghe mha yap las nyang lyis dang jis mes nyeis.

⁴⁷ Housoeh las dius dvyuk nyang lyis taiq zis gas, Yoeuh aq, nah ungwes yahge nah vwik jens nvng lyis dang jis mes las nghe mha yap joq, ge.

⁴⁸ Nghuot laus eq nyang hau los taiq soeu lhyi phuk taiq zis gas, Ngah ungwes yahge ngah vwik jens gas hank nghuot lah, ge.

⁴⁹ Housoeh nyang nyah changlo jens lyis loq tuonh kat las taiq zis gas, Yoeuh aq, haih bang gas ngah ungwes yahge ngah vwik jens nghuot, ge.

⁵⁰ Khasoeh ge lyis maukhung mha ngah Uwus dah ehnyet chank bang hank laus eq ngah vwik, ngah nhamhmuh, ngah ungwes tsain nghuot, ge.