LEWI 5 - Ngochang

Yaunos Jyungshuk mas Chah

¹ Yaunos jyungshuk gas o mha dah soe tsain chah. Dvyuk yuk soetuon jang mas dvja ja dah cho bvng bvng taiq das xiklyis khi zis xauh las nyang nyvng cho, xauhgyo cho loeus bvng bvng ma taiq lyis nyang yobos kham chah.

² Dvyuk yuk ma lhoq ge toh gaunyhauq mvng teh dah vyhang cha lhyi laus eq ma soh mathamh zangh tanh las nyang hauh zis soh yah dvyih nyang gas ma lhoq ma shang lha yobos bos.

³ Dvyuk yuk dius gungs mas dah ma lhoq yvlyis ma soh ma thamh zangh tanh lyis nyang hauh yvlyis soh yah dvyih nyang gas yobos bos.

⁴ Dius dvyuk yuk chah cho nghuot laus eq ma nghamh yoeuh nyhen toh laus eq nyang hauh yvlyis tohnyhik tyamp. Nyang hauh cho soh yah dvyih nyang yobos bos.

⁵ Dius dvyuk yobos bos lyis nyang yaunos rhen chah.

⁶ Hauh yaunos xiklyis nyang Yhensain jyank mas jyungshuk khyvlyis yvng zains, nghuot ya beq zains dvdoeu she los chah. Phudyei soeu ka hauh dius yuk dah yaunos xiklyis phudyei zis yah shangphu das.

⁷ Nyang yvng, nghuot ya shvbeq ma thyeh dyei lyis gas, nyah yaunos xiklyis Yhensain jyank mas khotjyauh aiq doeu, nghuot ya guzoe aiq doeu chi los chah. Houka yaunos jyungshuk xiklyis dvdoeu, ngheq dyei jyungshuk xiklyis dvdoeu nghuot.

⁸ Nyang hauh yvlyis phudyei soeu jyank mas tsain chi los das. Housoeh nyang gas nghoq cangxeih vdoeu lyis yaunos jyungshuk xiklyis phudyei das. Nyang hau nghoq lainzain ma lang thyet thyet khyauh las,

⁹ hauh suih lyis phon vyvm pheh juot das. Nyet dah suih lyis gas phon khyei mha huot das. Heika yaunos yoeus tyamp dyei das jyungshuk nghuot.

¹⁰ Hauh thang lhyi nyang hau nghoq aiq vdoeu lyis lyi yah dvyhangteh, ngheq dyei jyungshuk khyvlyis phudyei das. Heisoeh khyvlyis phudyei soeu ka hauh soeu dah yaunos nyhenshang shangphu lha nyang yaunos khyuot zis xauh das.

¹¹ Khotjyauh nghuot ya guzoe aiq doeu ma thyeh dyei lyis gas yaunos jyungshuk xiklyis monh aiq paung chi los chah. Nyang houmha tsanlun coeu, nghuot ya loban ma gis kih. Khasoeh ge lyis heika jyo jyungshuk ma nghuot, yaunos jyungshuk dvnghuot.

¹² Nyang hauh zis phudyei soeu jyank mas chi los las, nyang gas hauh yvmas zis Yhensain lhyi dvnganh dyei goeus jyungshuk khyvlyis dvtsop yoeus las phon mha zonoms jyungshuk teh ngheq phudyei das. Houka yaunos yoeus tyamp dyei das jyungshuk nghuot.

¹³ Heisoeh khyvlyis phudyei soeu ka hauh soeu dah yaunos xiklyis shangphu dyei las nyang yaunos khyuot zis xauh das. Nyet dah monh gas jyo jyungshuk cho teh, phudyei soeu yah sen, ge.

Yobos khyuot Jyungshuk

¹⁴ Yhensain Moshe lhyi o mha dah lyi dyei toh.

¹⁵ Dvyuk yuk Yhensain dah gyingshang vyhang yah tyi cho yaunos zangh kuot lyis, Yhensain jyank mas nos ma bos dah yvnglus, nghuot ya beq lus dvdoeu yobos khyuot jyungshuk chi los chah. Houka gyingshang joqyos mas thyet dah phauh khyvlyis nghuot chah.

¹⁶ Nyang gas hau dyei chah zis dyei thang lhyi hauh phauh dah oeng boms dvboms tsank dyei chah. Nyang hauh zis phudyei soeu lhyi dyei las phudyei soeu ka hauh gaunyhauq hauh soeu dah yaunos jyungshuk khyvlyis phudyei las nyang yaunos khyuot zis xauh das.

¹⁷ Dvyuk yuk Yhensain tyingtoh dang lyis masoh mathamh zangh thyoq las yaunos bos lyis nyang kham chah.

¹⁸ Nyang dyei chah jyungshuk khyvlyis nos ma bos dah yvng lus, nghuot ya beqlus dvdoeu phudyei soeu jyank mas she los chah. Houka gyingshang joqyos mas thyet dah phauh khyvlyis nghuot chah. Phudyei soeu ka hauh soeu zangh cu yaunos xiklyis shangphu lha nyang yaunos khyuot zis xauh das.

¹⁹ Houka Yhensain lhyi cu soeu dah yaunos xiklyis dyei dah yaunos khyuot jyungshuk nghuot.