JOEUI 2 - Ngochang

¹ Ngvnyang pyo pyo nyeis las pyo cho ka cha nghuot yvlyis xo yoeuh das oen nghamh thyet. Nghuot laus eq haih zis eq vkom dvnghuot yvlyis xo nyvng.

² Yis zis gas koh las pyo cho ka nvng lyis ma gis cho dyei yvlyis ngos yoh nyvng.

³ Ngos gas joeui omes dah ehnyet yah, duon las zvbiq shuk zis yah pyo cho lhyi xo das zis nghamh thyet. Heika nyeisjvng mas dius jens dah dvsoq kyingh dah kang lhyi thank loh nhang das zis gis thank cho nghuot oen nghamh.

⁴ Ngos muhzains kuot goeus. Ngos ngvnyang xiklyis yhen tsain tsuk, zvbiq khyam tsain tsungh.

⁵ Ngos angh khyam, ban khyam kuot las houmha shihzains vja ja tsungh toh.

⁶ Tsungh toh yvmas jeis she kat das xiklyis, thomhlo eq tsain doeu toh.

⁷ Ngos jons nyoshoq wis toh las ngah yhenbang mha jons lo jens khoeu los. Ngos gas Yerusalem mas nyeis ku bang dvnganh thoq lyis gaunyhauq phung zes sain.

⁸ Ngos guon dah mau zau ziskwi jens masyah ngwis xing eq, boms toh. Vbusbih vmesbih jens ngos lyis lvkhyank kat las shvpyo dyei. Yukgis dvyuk khyvlyis o mes dah nyinhungh jens yoh toh.

⁹ Nghuot goeus, ngos kuhxing, Yerusalem mas nyeis ku bang dvnganh thoq lyis zes kuhxing. Ngah joeui eq ngos lyis khanhamp eq ma somh loh nhang.

¹⁰ Ngos o zis cha eq yoh, ngos nhaiqtap pyo cho cha lhyi eq ma he. Ngos kuot dah muh thoq mas khwank nyeis, hau dvnganh yvmas phauh shangh zis xauh.

¹¹ Hauh thang lhyi ngos kuot los goeus zis dvnganh yahge ngos muh kuot yvmas kha iq yomkat yvlyis nghamh yoeuh. Hauh zis gas cha eq ma nghuot yvlyis soh. Houka vkyuh ma bos, lyeis lyis chank khat teh dvnghuot.

¹² Jyoengh oen lhyi, hwankti dvyuk gas xikpheh hwankti jens kuot khoq zis kyingh dvyoh kuot. Housoeh las ngos gas joeui bos cho, nhaiq ma gying cho, koh cho ge zis chah vjyuk nghuot yvlyis doms tauh nghamh yoeuh.

¹³ Bvng zis gas chuot zis thoq lyis zes zis yah dvyhangteh, joeui ka koh cho thoq lyis zes yvlyis ngos nyvng seq.

¹⁴ Joeui bos bang gas nyamoq khapheh loh nyeis zis yoh nyvng laus eq koh bang gas ma yoh nyvng. Nghuot laus eq dvyhangteh dah uhpui loqkyoq gas yang dvnganh lyis langh nyeis zis eq ngos seq.

¹⁵ Koh soeu mha bweh zis ngos mas eq dvbweh das lyis gas, ngos joeui bos zis chah vkyuh bos lah, oen ngvnyang nghamh zo. Ngos phuk dang gas, Cha eq ma nghuot, chah vkyuh ma bos, oen.

¹⁶ Joeui bos bang lyis hank ma soh, koh bang lyis eq hank ma soh. Jweh los das buisnyeis lyis yang dvnganh dvyhangteh shei chah las yang lyis tohnyhik toh das.

¹⁷ Housoeh las kang dwis cho ka ngah xiklyis cha vjyuk ma bos dvbweh los, khasoeh ge lyis houmha zis dvnganh gas ngah xiklyis yau cho kyingh dvshe los. Dvnganh gas vkom, lyeis lyis dvchank khat nyeis.

¹⁸ Ngos yomkat zwi khank kuot las yoh los cho dvnganh ngah xiklyis cha vjyuk ma bos khasoeh ge lyis hau dvnganh gas ngah thang mha los das soeu lhyi toh dyei khoq chah yvlyis ngos seq.

¹⁹ Nyang gas joeui bos soeu nghuot das lah? Koh soeu nghuot das lah zis hank seq? Nghuot laus eq ngos zwi khank toh zis dvnganh, haih mungkvn mas ngah joeui yah yoh toh zis dvnganh xauh sain das. Haih zis eq dvnganh vkom dvnghuot.

²⁰ Housoeh las ngos yomkat zwi khank khoq yvlyis yom guons.

²¹ Nvng dvja ja lyis nah joeui, seq cho yahge lyes cho dvnganh yah kuot toh yvlyis hauh zis ma kuot soeu dvyuk yuk lyis dvnganh toh dyei khoq chah lyis hauh zis vkom dvnghuot, hauh zis lyi eq ma jus.

²² Nah kang dwis cho gonh mas zwi khank los, chiqh jyen khoq. Nghuot laus eq chah vkyuh xauh kham lah?

²³ Nah dvcaiq gonh, nvng kuot zis dvnganh gas chiqjyen cho yahge nhaiqkuk cho mha lai las chah vkyuh ma she los. Nyenh lyis yangh nah ehnyet ma yoh nyens. Haih dvnganh gas vkom dvnghuot.

²⁴ Yang yoh kuot dah gis thank cho ka, zo shuk las yoh xo los yvmas gauslaus nyeis das cho nghuot. Nghuot laus eq haih zis yangh, Mangso jyank masyah los yvlyis ngos soh seq.

²⁵ Mangso ma bos lyis hank eq ma xauh zo, hank eq ma yoh gauslaus nyeis.

²⁶ Mangso ka nyang lyis nhaiqdoeus nhang soeu lhyi joeui, seq cho yahge gauslaus cho dyei. Nghuot laus eq yaunos kuot bang lyis gas muh zwi las yung toh nhang. Housoeh hauh zis Mangso lhyi nhaiqdoeus nhang bang lyis dyei tyamp chah. Hau dvnganh eq vkom dvnghuot. Houeq lyeis lyis chank khat teh dvnghuot.