GALATI 5 - Ngochang

Namoq Luiq Toeuh lyis Gomh

¹ Khristu gas yang lyis jons masyah lhuiq kat goeus las yang jons ma tsain nghuot lo. Housoeh las luiq goeus bang teh goeng goeng yap geh. Namoq dah gungs lyis jons tanzoe o mha vdoms bat lyet nyeis goh.

² Gyo geh! namoq vthyoh tyomh lyis gas, Khristu gas namoq xiklyis chah vkyuh ma bos oen ngos Paulo nyang namoq lyis taiq kyoh.

³ Hauh thoq lyis vthyoh tyomh soeu ka Lyi dvnganh chank tyink chah oen vthyoh tyomh bang dvnganh lyis ngos dvlhain doms zaih nhang.

⁴ Lyi chank tyink khyvlyis yah Mangso xikkhonh mas dan cho yoh das ge yomkat bang namoq gas, Khristu yah gang las Mangso dah jyehjuh lyis kat khyoq tyamp.

⁵ Yang gas Mangso dah Dyos yomsoq mas nges las lomsjingh gvng mas Mangso xikkhonh mas dan ge suon dyei dah toeuh yoh das oen nghamhloms las langh nyeis.

⁶ Khasoeh ge lyis yang Yhensain Yesu mas nghuot joq lyis gas vthyoh tyomh, vthyoh ma tyomh ge zis gas cha yhaugyen zis ma nghuot: yhaugyen cho ka jyetdap ehnyet nyvng shoq muh khanh dah hau lomsjingh cho dvnghuot.

⁷ Xikpheh namoq svsoh yhaugyen khyvlyis kuot loh goeus; hauh jyoeng cho lhyi domsyos ma gyo bas jungh ge, namoq lyis hank kyamp toh lah? Hauh soeu ka namoq lyis khasoeh mhuih loh?

⁸ Housoeh mhuih zis gas, namoq lyis khi yoeus dah Mangso bweh nhang zis ma nghuot.

⁹ Ohlhyoq dvjop gonh lyis bi nhang das xiklyis bicheih dvtsiq dvchah ge dah dang lyis soh geh.

¹⁰ Nghuot laus eq ngos gas gvshih jweh shoq namoq lyis tsoq loms nyeis. Ngos yahge namoq gas Yhensain mha dvdain dvlom nghuot joq yvmvyah namoq gas shaih dah cho lhyi ma lhom yoeus das oen loms. Namoq lyis khamkhvv shoq thauqkhyi soeu hank lyis laus eq Yhensain ka soetuon yobos dyei das.

¹¹ Nghuot laus eq boekyis eh, vthyoh tyomh cho yhaugyen oen ngos tsoq taiq kyoh nyeis ge cho jyoeng nghuot lyis gas, ngos chamus shoeuhshih zis xauh nyeis shih lah? Housoeh taiq kyoh ge zis jyoeng nghuot lyis gas, Khristu yah sen dah cho lhyi ngos taiq kyoh gvng mas yaukyenh cho bweh nhang das zis ma nghuot.

¹² Namoq lyis lhoq yau bang gas, vthyoh tyomh zis kyingh ma nghuot, nyamoq nyang thyet tyamp lyis zes gis.

¹³ Boekyis eh, namoq gas luiq cho yoh bas jungh, namoq lyis khi yoeus goeus, nghuot laus eq hau luiq toeuh lyis jyamp las gungsshoh o mes khyvlyis vkuot goh. Housoeh kuot das gungsthaiq namoq gas jyetdap ehnyet yah nyang changh nyang phuqsoe goh geh.

¹⁴ Khasoeh ge lyis, Nah yhenkyoh lyis nvnyang gungs lyis teh jyetdap aq, ge dah tyingtoh dang dvkoeuq lyis chank kuot zis yah hauh Lyi dvnganh yoh nyuk los cho taiq toh.

¹⁵ Nghuot laus eq yewus jens teh namoq nyang changh nyang ngatzo goh nyeis lyis gas namoq nyang changh thyuk tyamp goh cho duot das las zaih nyeis geh.

Dyos yahge Dius Ehnyet

¹⁶ Ngos taiq zis gas, Dyos taiq shet zis yah dvyhangteh chank kuot nyeis geh. Housoeh lyis namoq gungsshoh dah nyetnau cho ma kuot das.

¹⁷ Khasoeh ge lyis gungsshoh dah obos cho ka Dyos dah o cho yah tyixo goh. Gungsshoh dah o cho yahge Dyos dah o cho hai aiq koeuq gas jes dvtsain nghuot. Housoeh las namoq gas kuot mes khyvlyis ma tsain yoh kuot.

¹⁸ Hauh Dyos yah namoq lyis shwih nghuot lyis gas, namoq hau Lyi khau mha ma nghuot lo.

¹⁹ Gungsshoh dah muhzoh gas dede nghuot joq las, hauh zis gas nyi shuot lvng shuot, ma lhoq ma shang, yauxi nosxi,

²⁰ silho paiq, hweq kuot, hoeng goh, dyoqgoh, noh, nhaiqlom dyis, lvn loh, gang loh, vphung phung bweh loh cho,

²¹ yhei yet, yhei shuk shoh zo teh dah cho yahge houyah doeus goh dah cho tsain nghuot. Housoeh kuot bang gas Mangso munghdan vso vlho xauh kham yoeus das zis ma nghuot oen ngos namoq lyis xikpheh taiq goeus zis yah dvyhangteh gvshih eq zaih nhang.

²² Nghuot laus eq hau Dyos dah vshih gas: jyetdap, gauslaus, nyenstap, jhen, nhaiqnyen, gis cho, lomluk cho,

²³ nhaiqlom nyhen mha gyoh zis yahge nyang gungs nyang yoh joeu cho tsain nghuot. Haih cho jens lyis yoh tomp dah lyi ma bos.

²⁴ Khristu Yesu yah sen bang gas, vsainnyang gungsshoh ehnyet lyis eq, nyetnau cho yahge obos cho tapzains mas lhangh sat goeus.

²⁵ Yang hauh Dyos mas kang dwis nyeis lyis gas, Dyos yah shwih khyvlyis suh e nyeis goh.

²⁶ Yang gas vkom mha moengs las, nyang changh nyang jausxo goh, noh goh cho ma kuot goh.