EZEKIEL 1 - Ngochang

Ezekiel Cangxeih Nyoqnyvng 1.1—7.27 Mangso dah Hwankti Tank

¹ Somhci vzvn, lhamhmuh nyei vkhyvp, oeng vnyeih lyis Buzi lo ngos phudyei Ezekiel gas Babilon mau Kheba lvng yvm mas Yuda jonsdoeus loh bang yah nyeis. Maukhung phank los las ngos Mangso dah nyoqnyvng nyvng.

² Houka hwankti Yehoiakhin jonsdoeus loh thang lhyi oeng vzvn lyis nghuot.

³ Babilon mau Kheba lvng nvm mas Yhensain ngos lyis taiq dang xauhgyo las ngos mas nyah yomsoq bos nyhink.

⁴ Ngos yoeuh kat lyis, lyeis jyang ka mautsung pheh yah los. Jyommauh punk masyah maunyoq nyik nyeis. Hau jyommauh yvmlhaink dah maukhung ka bvng joq. Hau maunyoq nyik nyeis yvmas thunk teh zis bvng joq.

⁵ Hauh lyeisjyang vgungs mas ngos dius dah vzwvng teh dah yewus nyeis doeu lyis nyvng.

⁶ Dvdoeu dvdoeu mas nyoqnho nyei shot shot, dungs nyei koeuq koeuq dap.

⁷ Nyamoq khyei ka tsain dan, khyei mha noeulu dah khyeikhu teh zis dap. Hauh zis gas buot toh dah thunk teh bvng.

⁸ Hauh thoq lyis nyamoq dah nyoqnho nyei koeuq yahge dungs nyei koeuq mas dius loq nyei koeuq dap. Hau loq dvkoeuq dvkoeuq gas dungs o mha tsain dap.

⁹ Dvdoeu dvdoeu dah dungs aiq koeuq tyo kat lyis hauh doeu gas soehuqthunk teh dah vzwvng bweh joq. Nyamoq dah dungs thyoh changh tanh goh joq. Nyamoq suh loh lyis nyamoq dvphung teh loh las nyamoq dah gungs ma lhaiq noh.

¹⁰ Dvdoeu dvdoeu mas ma doeusgoh dah nyoqnho nyeis koeuq bos. Xikkhonh pheh dius nyoqnho, loqyos pheh khangkhyi nyoqnho, loqwi pheh noeujungs lu nyoqnho yahge nungs pheh zonsmuh nyoqnho tsain nghuot.

¹¹ Dvdoeu dvdoeu dah dungs aiq koeuq lyis nyhang pheh tyo lha gohtoeu dvdoeu dah dungs thyoh mas tanh toh. Dungs aiq koeuq gas nyamoq gungs lyis nghop toh.

¹² Dvdoeu dvdoeu gas nyamoq nyoqnho nyei shot xoeu toh las hau dvphung gonh gas Dyos yah shwih loh mes yvpheh, ma tauh noh yoh loh.

¹³ Hau yewus jens mas nyigywe duk nyeis teh, nghuot ya nyibuh teh zis e los ma no lo dwis nyeis. Hauh nyi gas duk los las maunyoq soeh nyik thuq nyeis.

¹⁴ Hauh yewus jens gas nyamoq nyang maunyoq nyik teh e los wuih nyeis.

¹⁵ Ngos hau yewus nyeis doeu lyis yoeuh nyeis lyis, lhyingh nyei koeuq nyeisjvng mas tanh toh zis nyvng. Houka yewus dvdoeu vyvm mas lhyingh dvkoeuq nghuot.

¹⁶ Hau nyei lhyingh yah dvyhangteh nghuot las dvkoeuq dvkoeuq gas phauhdap luk teh bvng. Lhyingh dvkoeuq mas gohtoeu lhyingh dvkoeuq thunk dan los kyank las,

¹⁷ houka hau lhyingh jens gas nyei shot yoh loh.

¹⁸ Lhyinghzam jens gas gyuk dvn phoh zis tsain nghuot. Hau nyei koeuq gonh mas nyoqjeih yah dyingh joq.

¹⁹ Hauh yewus jens loh khanghmuh lhyingh eq cheq loh.Yewus jens nyeisjvng masyah toq loh lyis lhyingh eq doq loh.

²⁰ Dyos khalhye loh mes yvmas jweh loh. Yewus jens dah dyos gas hau lhyingh mas bos yvmvyah yewus jens jweh yvmas lhyingh eq top jweh loh.

²¹ Housoeh las yewus jens loh khanghmuh, no khanghmuh, lyeis mas doq khanghmuh lhyingh eq dvyhangteh top kuot.

²² Yewus jens dah uhloms toeu mha kyi kyi bvng dah pvt yah kuot toh teh yoeuh doeus dah maunyaus zoh joq.

²³ Hau maunyaus zoh dah vjeis mas hau yewus jens yap las dvdoeu dvdoeu dah dungs aiq koeuq gas tyo lha nyah yvm mas dah vdoeu dah dungs lyis tanh toh. Gohtoeu aiq dungs gas nyamoq nyang gungs lyis nghop toh.

²⁴ Nyamoq dang lyis ngos nyamoq dah dungs phap sam xauhgyo. Houka thomh nyings thwe teh, jesphung zainsmuh thwe teh, Maukhung Jesphung Mangso dah thwe teh zis nghuot. Nyamoq dang masyah no yap lyis nyamoq dah dungs yop toh.

²⁵ Nghuot laus eq nyamoq dah uhloms toeu maunyaus zoh thoq masyah thwe thuq nyeis shih.

²⁶ Hau maunyaus zoh vtoeu mha nila yah kuot toh dah hwankti tank teh yoeuh doeus zis dvkoeuq joq. Hau hwankti tank mas cangsoeu dius teh zis tsung toh.

²⁷ Hauh vzwvng gas nyikhyomp mas thunk bvng nyeis teh nghuot. Houka dvgungs gonh yah bvng bvng nghuot.

²⁸ Hauh vkhau mha sainyvng yoqgan vwot dvnganh bos. Hau kyi kyi bvng zis gas Yhensain phunk lyis chixoeuq. Ngos haih zis nyvng lyis ngos nyeisjvng pheh gop gyoh loh. Hauh thang lhyi ngos thwe dvkoeuq xauhgyo.