Online Bible

Galashiya 1 - Aŋwɛʼrɛ Ebuumu Fe Nè Ngwe

Paalo saa atsaʼra

¹ Aŋwɛʼrɛ zɔnɔ ne zeʼe ena Paalo m̀pwɔnɔntɔm Yeso Kristo. Ke ma gho deʼ wɛ a me be ma gho ngɛ à ge angu kà le kpe mmɛ mwɔ ngɛ bo. Na Yeso Kristo mane Ngwe Àtɛ yɛ a zhwɛɛmɛ engɔ ene ewu ngɛ à zɔʼ angu é mwɔ m̀pwɔnɔntɔm.

² Bɔ kristo gimkpaʼ byɛ e mwɔ anɔ ngɛ mane mmɛ saa atsaʼra ebe ndɔrɔngwe gimkpaʼ abɛ Galasha.

³ Ngwe àtɛ bɔ mane Masakɛ bɔ Yeso Kristo ndɛʼ enarataa mane m̀bwarambwad endɔn.

⁴ Kristo à zo ega ebe Ngwe àtɛ bɔ è ndɛʼ ato mɔ é pwèerè abɔ efwɔ ese bɔɔbɔɔ zɔnɔ. Engɔ à le énde é chi abɔ efwɔ abwa bɔɔbɔɔ bɔ.

⁵ Eghɔ kɛ́ mwɔ ebe Ngwe ene akyɛ kengudu! Ekoʼro.

Ǹtɔm ǹchwɔ̀ tye ŋwaʼ

⁶ Mmɛ we kɔrɔ ene mbɔn! Êwɛwɛ̀ anɔ mbɔn à sa bɛ̀ʼrɛ̀ Ngwe yɛ à zɔʼ angɔn nyɛ̀rɛ̀ zèʼe ene enarataa Kristo ngɛ sa bɛ̀rɛ me Ǹtɔm ǹchwɔ̀ tsɛrɛ.

⁷ Éŋwaʼaŋwâʼ tsɛʼ Ǹtɔm ǹchwɔ̀ tsɛrɛ bo. Mmɛ na ga énde mbɔʼnga bɔ deʼ ba aŋu ma tsɔŋɔ eto mbɔn mà ke é kobo Ǹtɔm ǹchwɔ̀ Kristo.

⁸ Bɛʼngɛ mala ka de ma mbyɛɛ kà engere deʼ kla zeʼe ezob sɛ̀ɛrɛ̀ Ǹtɔm ǹchwɔ̀ deʼ yɛ e me kobo nè engɔ yɛ mbyɛɛ à sɛɛrɛ endɔn ngɛ, Ngwe ge enyii ekwa egho wɛ!

⁹ Mbyɛɛ à shi dye ga, shi mmɛ wu hli, mala gho sɛɛrɛ Ǹtɔm ǹchwɔ̀ deʼ endɔn yɛ è me kobo ene engɔ yɛ mbyɛɛ shi dye sɛɛrɛ ngɛ, Ngwe ge enyii ekwa egho wɛ.

¹⁰ Aŋu mmɛ ma ga abwa zɔnɔ ngɛ, mbɔn bwaʼ kpe mmɛ na ke kpe bɔ ndɛʼ ekumu ǹchwɔ̀ ena de? Keʼ! Mmɛ na ke kpe à ndɛʼ ekumu ǹchwɔ̀ ena ma Ngwe. Mala mmɛ à ma ke le bɔ gɛnɛ àmɔ̀, shi mmɛ à ke bli gho afwɛʼ Kristo bo.

Aŋu Paalo à da mwɔ M̀pwɔnɔntɔm ngɛ

¹¹ Bwɔngwa mbu, shi mmɛ ga endɔn kpe, Ǹtɔm ǹchwɔ̀ yɛ mmɛ ma sɛ̀ɛrɛ̀ ngɛ ke me zeʼe ebe gho bo.

¹² Mmɛ à ke nu zeʼe ebe gho deʼ bo. Gho deʼ à ke tee ena bo. À na Yeso Kristo mɔmbwo à toʼro ena.

¹³ Â shi tòʼro endɔn aghɛʼ yɛ mmɛ à mwɔ ngɛ èndzobo chɛ mmɛ à me shi etaa mfu ene ebwa Ngwe bɔ Juu ngɛ. Mmɛ à na nyii ashunu bɔ Ngwe ne ma klasɔn bo. Mmɛ à na zɛʼɛ eghɛʼnji gimkpaʼ é nyiimi ebwa Ngwe.

¹⁴ Mmɛ à na kìrì ebwa Ngwe bɔ Juu fɔɔ bɔ Juu gimkpaʼ byɛ â mwɔ ekyɛ ndza ngɛ. Mmɛ à gɛrɛ ne shi etaa mfu ghɛʼ ene eleabwa ètɛ sam mbu.

¹⁵ Bɛʼngɛ Ngwe ene enarataa mɔ à chi angu dye e sa be angu. Engɔ à zɔʼ angu é fwɛʼ ebe engɔ. Èndzobo chɛ engɔ à nu etsɛrɛ

¹⁶ é tòʼrò ŋwɔ mɔ ena mbɔʼtye mmɛ sɛɛrɛ ekɔn ǹchwɔ̀ mbɔʼ engɔ ebe ebɛbɔ ngɛ, mmɛ à ke ngɔɔ kla gho deʼ kpe è tɛʼ angu é le éngɛ bo.

¹⁷ Mmɛ à ke ngɔɔ a Jerusalɛm é zɔ abɔ â shi dye mwɔ̀ bèmpwɔnɔntɔm ngɛ bo. Mmɛ à dye ngɔɔ abɛɛ abɛ Arabya de shi ghɛɛbɛ ngɔɔ a Damaskɔs.

¹⁸ Enɔm â fɔɔ tɛd de mmɛ shi ngɔ̀ɔ a Jerusalɛm é nɛɛ abwa deʼ ebe Petoro, tsɔmɔ nè engɔ efwɔ enji wum ǹchwɔ̀ tan.

¹⁹ Mmɛ à ke zɔ m̀pwɔnɔntɔm tsɛrɛ bo à tye Jems ghongwa Masakɛ.

²⁰ Ebwa mmɛ ma ŋwɛ̀ʼrɛ̀ nɔ ne éŋwaʼa, Ngwe nɛɛ kpe mmɛ ke ga andɔɔ bo!

²¹ Éngɛ mmɛ à ngɔɔ akwâ tsɛrɛ efwɔ abɛɛ abɛ Sirya mane abɛɛ abɛ Silisya.

²² À ne èndzobo chɛ bɔ kristo efwɔ ndɔrɔngwe a Judeya ne me nɛɛ angu anchwɔnchwɔ bo.

²³ Angɔ à ne nɛɛ ma ebwa wɛ bɔ tsɛrɛ â ma ga mbɔʼ mmɛ ngɛ kpe, “Egho wɛ à ma nyii abɔ ngɛ à sa sɛ̀ɛrɛ̀ mbɔʼ ebɛrɛtaa yɛ engɔ à ma ke é nyiimi ngɛ.”

²⁴ Éngɛ angɔ ghɔ Ngwe mbɔʼ mmɛ.

Následuj nás:

Sponzorované odkazy

Reklamy