Online Bible

Eleabwa 1 - Aŋwɛʼrɛ Ebuumu Fe Nè Ngwe

Yeso tɔ̧ɔrɔ é sàa azhwɛɛrɛ Ngwe

¹ Tyofilɔs, gho kɛ̀, efwɔ aŋwɛʼrɛ mbèmbè ndza, mmɛ à ŋwɛʼrɛ mbɔʼ abwa gimkpaʼ yɛ Yeso à le gɛ̀rɛ̀ tee nyɛrɛ èndzobo chɛ à klada afwɛʼ mɔ efwɔ ese ngɛ,

² bwɛn èndzobo chɛ Ngwe à nu engɔ ngɔ̀ɔ ezob ngɛ. Â sa nu engɔ ngɔ̀ɔ ezob, engɔ ndɛʼ afwɛʼ ebe abɔ byɛ engɔ à shi chidi na bèmpwɔnɔntɔm mɔ ene ekama azhwɛɛrɛ Ngwe ngɛ.

³ Èndzobo chɛ Yeso à zɔ ǹgoʼ, ku gɛ̀rɛ̀ wu zhwɛm ene ewu ngɛ, engɔ tsɔmɔ efwɔ enji èsama fyee ma tee amɔ ene eghɛʼ akɛkɛ ebe angɔ é tee kpe mbè we ekɔʼɔ. Angɔ à zɔ engɔ, engɔ ma gà ebe angɔ mbɔʼ ebwa m̀fɔ̀ Ngwe.

⁴ Èndzobo chɛ bèmpwɔnɔntɔm à sɔŋɔ nè Yeso ngɛ, Yeso gâ ebe angɔ kpe, “Mbɔn ka a Jerusalɛm nyɛn, mbɔn tsɔmɔ kɔ̀ʼ ala yɛ mmɛ à ga endɔn kpe àtɛ ngu à shi tɔ̧ɔrɔ é ndɛʼ endɔn ngɛ.

⁵ Eyɔɔ à ndɛʼ me ndim, bɛʼngɛ enji deʼ mpiʼ ba sa zeʼe nɔ, e ba ndɛʼ endɔn ma azhwɛɛrɛ pɛ.”

E nu Yeso ngɔ̀ɔ ezob

⁶ Èndzobo chɛ bèmpwɔnɔntɔm byɛ à sɔŋɔ nè Yeso ngɛ, e biiri ebe engɔ kpe, “Masakɛ, enjitsɔ ngwo wa ngo nu abwa m̀fɔ̀ bɔ Israel é ndɛ̀ʼ achim ebe angɔ?”

⁷ Yeso gâ ebe angɔ kpe, “Ne ekama àtɛ ngu é ma shi endzobo mane abwa yɛ a ma gli ngɛ, ke mwɔ afwɔ ndzɔn é nɛɛ èndzobo chɛ a ma gli ngɛ bo.

⁸ Bɛʼngɛ èndzobo chɛ azhwɛɛrɛ pɛ ma zeʼe endɔn ngɛ, ekama yà shwe akwa ndzɔn, mbɔn mwɔ entsɛ mbu a Jerusalɛm, efwɔ ebɛɛ ebɛ Judeya gimkpaʼ mane Samariya ngɔ̀ɔ bwɛn ene endɔʼrɔ ese gimkpaʼ.”

⁹ Aŋu engɔ à mɛɛrɛ gà énde ngɛ, e nu engɔ ngɔ̀ɔ ezob, angɔ ma kede, m̀bɛ̀ʼ koo engɔ angɔ ne wu zɔ engɔ bo.

¹⁰ Angɔ à da me nɔm aghɔɔ àmɔ̀ ekere ezob, aŋu engɔ à ma ngɔ̀ɔ ngɛ. Sa klikɔ̀ʼ, anɔm deʼ èfyee byɛ â me ge ǹdiri bla ngɛ bum ebara angɔ.

¹¹ E ga kpe, “Bɔ Galilii, mbɔn ne tamma ma kɔʼɔ ekere kpe ayɛ? E Yeso ŋwaʼ wɛ e nu efàarà ndzɔn ngɔ̀ɔ ekere nɔ, e yà zeʼe achim anji deʼ ene aghɛʼnji ŋwaʼ yɛ mbɔn zɔ e nu engɔ kwaʼ ngɔɔ ngɛ.”

Matyɛ nu afwɔ Judas

¹² Éngɛ bèmpwɔnɔntɔm byɛ nyɛnnɛ egu Olifs, ngɔ̀ɔ achim a Jerusalɛm. Egu Olifs à ne mwɔ na kilomɛta ŋwàʼ é bwɛn a Jerusalɛm nɔ.

¹³ Èndzobo chɛ angɔ à bwɛn a Jerusalɛm ngɛ, angɔ ngɔ̀ɔ efwɔ atwɔndɔ ekere yɛ angɔ à ma tsɔmɔ aŋu ngɛ. Abɔ byɛ â ma aŋu ngɛ a na Petoro, Eyɔɔ, Jems mane Andere, Firiboʼ, Tɔmas, Batolomyo, Matyo, Jems ŋwɔ Alfiyɔs, Shimun ŋwɔ abɛ, Judas ŋwɔ Jems.

¹⁴ Angɔ à na bwò à sɔŋɔ na ǹtìmi nɔ, ma tsàʼrà Ngwe mane âye. Meri áʼɔ̧̀ Yeso mane bwɔngwaanɔm Yeso â na abwaʼ.

¹⁵ Efwɔ enji byɛ abɔ byɛ â me bɛrɛ Ngwe ngɛ, e bwɛn na bɔ eko tɛʼ asamabi nɔ, shùnu afwɔbi. Petoro tam ekere gâ ebe angɔ kpe

¹⁶ “Asɔrɔ ndza yɛ a me bɛrɛ ene Ngwe ngɛ, ebwa wɛ aŋwɛʼrɛ Ngwe à ga ngɛ shi gli éŋwaʼa, aŋu azhwɛɛrɛ pɛ à le Devid gâ mbɔʼ Judas wɛ à mwɔ àgbeenji ebe abɔ byɛ â bere Yeso ngɛ.

¹⁷ Judas à ne egho bi abwaʼ njɛɛ mbɔʼnga â shi chi engɔ é fwɛʼ nè mbyɛɛ.”

¹⁸ Judas à nu ekɛb enɔgho mɔ zɔn afwɔ chwâ deʼ anyi. Engɔ à shwɛn, è tsɛrɛ turu, mɔrɔ è toʼ, atwe ngɔ gli ese afwɔ yɛ.

¹⁹ Bɔ gimkpaʼ byɛ â ma tsɔmɔ a Jerusalɛm ngɛ zo mbɔʼ ebwa wunɔ. E sa zɔʼrɔ ekwâ yɛ ene atsoʼ abɛ àmɔ̀ kpe Akɛldama, éngɛ me ga kpe afwɔ chwâ anɔm.

²⁰ Petoro wu zhiiri kpe, “E be ŋwɛʼrɛ efwɔ aŋwɛʼrɛ Mban Yawe kpe ‘Ndɔ ngɔ yaa tsɔmɔ ekɛɛ, gho deʼ yaa me tsɛʼ é tsɔmɔ efwɔ bo.’ E gɛrɛ be wu ŋwɛʼrɛ kpe ‘Egho tsɛrɛ nu afwɔ afwɛʼ ngɔ.’

²¹ Éngɛ e we nara kpe ntsɔ chi gho bi abwaʼ abɔ byɛ à mwɔ nè ntsɔ èndzobo chɛ Masakɛ Yeso à ma zhiri nè ntsɔ ngɛ.

²² Egho wunɔ mwɔ ma gho deʼ wɛ à mwɔ nè ntsɔ enyɛrɛ èndzobo chɛ Eyɔɔ à ndɛʼ ndim ebe Yeso bwɛn anji yɛ â nu Yeso ngɔ̀ɔ ezob ngɛ. Egho wunɔ wara mwɔ antsɛ mane ntsɔ aŋu engɔ à zhwɛm ene ewu ngɛ.”

²³ Éngɛ angɔ ndɛʼ bɔ fyee, Yɔsɛf wɛ â ma zɔʼrɔ kpe Basabas gɛrɛ ma wa zɔʼrɔ kpe Jɔstɔs ngɛ mane Matyɛ.

²⁴ Éngɛ angɔ tsàʼrà Ngwe kpe, “Masakɛ, ngwo we nɛɛ ezhuŋu gho ŋwàʼaŋwàʼ, éngɛ tee egho abwaʼ abɔ fyee bɔnɔ wɛ ngwo me chi ngɛ,

²⁵ é nu afwɔ Judas na m̀pwɔnɔntɔm nɔ. Judas wɛ à waʼ aghɛʼ ǹchwɔ̀ nyɛn ngɔɔ afwɔ yɛ engɔ à chi é ngɔ̀ɔ ngɛ.”

²⁶ Angɔ à le ndwa antsántsá é chi egho bi abwaʼ abɔ fyee bɔnɔ. Antsántsá mɔmbwo turu ene Matyɛ, éngɛ e zhiiri engɔ abwaʼ bèmpwɔnɔntɔm wum ǹchwɔ̀ ŋwaʼ byɛ.

Následuj nás:

Sponzorované odkazy

Reklamy