Alom Ɛshɔwɔ nya long gɔ nwɛr Aluk 3 - Nnam

Jɔn wɔngɔ anɛ alab bungɔ alom Ɛshɔwɔ tɔng anɛ

¹ Ɔji Tibarus fila aji na njijɔg a ntol gɔ Rom gɔ nnya ɛbko. Pɔntus Pilɛt jɔlɔ ntoboɛshi gɔ Judiya, Ɛrɔd jɔl nfila aji gɔ Galili. Minyena Ɛrɔd, Filip, jɔl nfila aji gɔ Ɛturiya na Trakɔnitis, Lisaniyas jɔl nfila aji gɔ Abilɛnɛ.

² Annas na kayafas ba jɔlɔ atoboɛshi a bajɔmanjɔm Ɛshɔwɔ. Gɔ ngarɛ nyiɔ Ɛshɔwɔ bungɔ na Jɔn mɔna Sakariya gɔ ɛwungwung.

³ Ɔwɔ Jɔn jɛ gɔ aji kpɛk kpɛ nya le shingɛ aya Jɔdan, jɔ bung alom Ɛshɔwɔ jɔ tɔng anɛ rɛ bɔ wɔngɔ alab nɔngɔ teb rɛ bɔ yagɛ abɔ gɔ abi afɛm tɔnɔ Ɛshɔwɔ nɔngɔ atam ka bɔ.

⁴ Na Ashaya ntinge ateb yɛlɛ nɔ gɔ gɛya nwɛr rɛ, “Nɛ kpe binge gɔ ɛwungwung rɛ, ‘Tongo wan abang nka Nfɔnɔ Ɛying Nlim abang tannɛ bɔmɛ.

⁵ Shadɛ wan akpokpɔg anyinganyingɛ, Rɛnɛ wan ɛwɔng ajingajingɛ, Nɔngɔ ngɔda mbang tannɛ, Abi aji gɔ mbang jɔl shɛl.

⁶ Anɛ kpɛk kpɛ kpe nyenɛ na Ɛshɔwɔ le tarɛ bɔ.’ ”

⁷ Jɔn bungɔ tɔng ɛblɔng anɛ ni ba nɔ bǝkperɛ rɛ awɔngɔ bɔ alab rɛ, “Wan abɔn ɛnyɔ! Nyenɛ wɔ tɔngɔ wan rɛ wan mbɛ gɔ ɛragɛ ɛbtem ji Ɛshɔwɔ ji kpe bagɛ?

⁸ Lim wan nshɔl nyi liteb anɛ rɛ nyaga bɔ gɔ abi afɛm, mbɛl ɛbtamɛ tu Ɛshɔwɔ. Kǝ bungɔ wan tɔng ɛnanɛ rɛ, ‘War ɛkpe Ɛbraham na nshɔjarɛ.’ Nɔngɔ mɛ tɔng wan rɛ, Ɛshɔwɔ kpe malɛ lim atal nyaa shingɛ abɔn ka Ɛbraham.

⁹ Jɔl anu ɛfuk ɛshi yɛyɛl gɔ alɔkgɔ nte. Ɛte ajingajingɛ ji ki kab atinge akab bɔ kpe gbakgɛ tob gɔ ndi rɔ kag gɔ ngon.”

¹⁰ Anɛ kpɛk kpɛ kimawɛ bab rɛ, “Anu ɛlelim rɛnan?”

¹¹ Jɔn kim fangɛ bɔ rɛ, “Nɛ awɔngawɔngɔ nɔ kpɛ ɛlamɛ ɛbal atɔb ka anɛ ba ki kpe ajingajingɛ, nɛ awɔngawɔngɔ nɔ kpɛ nshɔl alɛgɛ atɔb bangɛ nɔ fufɔ na anɛ ba ki kpe.”

¹² Ba kaga atakshi fufɔ tɔb ba rɛ Jɔn wɔngɔ bɔ alab, bɔ kimawɛ bab rɛ, “Ntetebe, ɛlelim rɛnan?”

¹³ Jɔn kim tɔngɔ bɔ rɛ, “Kǝ kɔ wan gbal shingɛ na bɔ tɔngɔ wan rɛ nkɔ.”

¹⁴ Ɔwɔ ashɔja nyandige kimawɛ bab rɛ, “War fufɔ ɛlelim rɛnan?” Akim fangɛ bɔ rɛ, “Kǝ tarɛ akpɔgɔ gɔ nsham, kǝ lagɛ anɛ ɛjom ji bɔ ki lim, ɛbtem yɛba gɔ akpɔgɔ nya bɔ kpejɔ kpeya gɔ ga ɛbtom.”

¹⁵ Na nɛ jɔ babɛ kpeshege rɛ Krayis ba, bɔ jɔ tɔb kɛrɛ gɔ nteme bɔ rɛ ma Jɔn wɔ le Krayis nji?

¹⁶ Jɔn fangɛ bɔ anɛ kpɛk kpɛ rɛ, “Mɛ wɔngɔ wan alab nyaganyaga, wɔ nɛ nɔ gbalɛ shingim kpe bagɛ, nɔ alɛgɛ akpagɛta ɛnye nkiring nyi nlifangɛ. Yɛ kpe wɔngɔ wan alab nya Ɛtɔgɔ Ɛshɔwɔ na ngon.

¹⁷ Ɛkparashak ɛjɛ leyɛ gɔ bɔ. Ji a le kpar nkar gɔ arashi kpo arashi kag gɔ ɛbongɔ, afii nkar na ngon mi nkalkal.”

¹⁸ Jɔn kɔ alom gbalɛ gbalɛ teb bɔ, fɛrɛ jɔ bung anɔba alom Ɛshɔwɔ tɔng anɛ rɛ bɔ yagabɔ gɔ abebe.

¹⁹ Ɔji Jɔn nyamɛ Ɛrɔd nfila aji gɔ Galili teb ɛbal ɛnɛ na Ɛrɔdiyas, nkal a minyen. Jɔn fufɔ fɛrɛ tɔb nyamɛ gɔ abi nshɔl nyagɔ kpɛk kpɛ nya amelim.

²⁰ Ji Ɛrɔd grɛ lim rangɛ. A tomo Jɔn ngbakɔbɔ.

Jɔn wɔngɔ Jisɔs alab

²¹ Gɔ ngarɛ nyi Jɔn jɔ wɔngɔ anɛ kpɛk kpɛ alab, Jisɔs fufɔ tɔb wɔngɔ alab. Na ajɔ kag ɛrɔ ɛbung lingɛ.

²² Ɛtɔgɔ Ɛshɔwɔ badɛ na ɛmɛb bǝ komɛ, ɛlom lɔng gɔ rɔ ɛbung rɛ, “Wɔ wɔ le ɛkɔrkɔr mɔnɔwamɛ, nɔ nkpe ɛyɛbɛbtem na wɔ.”

Ɛtitɔngɔ Jisɔs Krayis

²³ Jisɔs jɔlɔ ɛtala nnya ɛwobo akim bɔmɔ ɛtomonɛ. Anɛ mangɛ na mɔna Josɛf. Josɛf jɔlɔ mɔna Ɛli.

²⁴ Ɛli jɔlɔ mɔna Matthat. Matthat jɔlɔ mɔna Lefi. Lefi jɔlɔ mɔna Meliki. Meliki jɔlɔ mɔna Janayi. Janayi jɔlɔ mɔna Josɛf.

²⁵ Josɛf jɔlɔ mɔna Matatiyas. Matatiyas jɔlɔ mɔna Ɛmɔs. Ɛmɔs jɔlɔ mɔna Nahum. Nahum jɔlɔ mɔna Ɛsili. Ɛsili jɔlɔ mɔna Nagayi.

²⁶ Nagayi jɔlɔ mɔna Maat. Maat jɔlɔ mɔna Matatiyas. Matatiyas jɔlɔ mɔna Sɛmin. Sɛmin jɔlɔ mɔna Josɛk. Josɛk jɔlɔ mɔna Joda.

²⁷ Joda jɔlɔ mɔna Joanan. Joanan jɔlɔ mɔna Rɛsa. Rɛsa jɔlɔ mɔna Jɛrubabɛl. Jɛrubabɛl jɔlɔ mɔna Shɛltɛl. Shɛltɛl jɔlɔ mɔna Neri.

²⁸ Neri jɔlɔ mɔna Mɛliki. Mɛliki jɔlɔ mɔna Adi. Adi jɔlɔ mɔna Kosam. Kosam jɔlɔ mɔna Ɛlimadam. Ɛlimadam jɔlɔ mɔna Ɛr.

²⁹ Ɛr jɔlɔ mɔna Joshua. Joshua jɔlɔ mɔna Ɛliɛsa. Ɛliɛsa jɔlɔ mɔna Jorim. Jorim jɔlɔ mɔna Matthat. Matthat jɔlɔ mɔna Lefi.

³⁰ Lefi jɔlɔ mɔna Simiyɔn. Sayimɔn jɔlɔ mɔna Judiya. Judiya jɔlɔ mɔna Josɛf. Josɛf jɔlɔ mɔna Jonam. Jonam jɔlɔ mɔna Ɛliyakim.

³¹ Ɛliyakim jɔlɔ mɔna Meleya. Meleya jɔlɔ mɔna Mena. Mena jɔlɔ mɔna Matata. Matata jɔlɔ mɔna Natan. Natan jɔlɔ mɔna Defid.

³² Defid jɔlɔ mɔna Jesi. Jesi jɔlɔ mɔna Ɔbɛd. Ɔbɛd jɔlɔ mɔna Boas. Boas jɔlɔ mɔna Salmɔn. Salmɔn jɔlɔ mɔna Nashɔn.

³³ Nashɔn jɔlɔ mɔna Aminadab. Aminadab jɔlɔ mɔna Adimin. Adimin jɔlɔ mɔna Arni. Arni jɔlɔ mɔna Ɛsrɔn. Ɛsrɔn jɔlɔ mɔna Pɛrɛs. Pɛrɛs jɔlɔ mɔna Judiya.

³⁴ Juda jɔlɔ mɔna Jɛkɔb. Jɛkɔb jɔlɔ mɔna Isaak. Isaak jɔlɔ mɔna Ɛbraham. Ɛbraham jɔlɔ mɔna Tɛra. Tɛra jɔlɔ mɔna Nahɔ.

³⁵ Nahɔ jɔlɔ mɔna Sɛrug. Sɛrug jɔlɔ mɔna Rɛu. Rɛu jɔlɔ mɔna Pɛlɛg. Pɛlɛg jɔlɔ mɔna Ɛba. Ɛba jɔlɔ mɔna Shɛla.

³⁶ Shɛla jɔlɔ mɔna Kenan. Kenan jɔlɔ mɔna Afasad. Afasad jɔlɔ mɔna Shɛm. Shɛm jɔlɔ mɔna Nɔa. Nɔa jɔlɔ mɔna Lamɛk.

³⁷ Lamɛk jɔlɔ mɔna Mɛtusɛla. Mɛtusɛla jɔlɔ mɔna Ɛnɔk. Ɛnɔk jɔlɔ mɔna Jarɛd. Jarɛd jɔlɔ mɔna Mahalalɛ. Mahalalɛ jɔlɔ mɔna kenan.

³⁸ Kenan jɔlɔ mɔna Ɛnɔsh. Ɛnɔsh jɔlɔ mɔna Sɛt. Sɛt jɔlɔ mɔna Adam. Adam jɔl mɔnɔ Ɛshɔwɔ.