Alom Ɛshɔwɔ nya long gɔ nwɛr Aluk 24 - Nnam

Jisɔs ɛnyamɛ gɔ ɛbku

¹ Gɔ ngbɔga mbang ɛfong Ɛkɔbashi, fonfo brɛbrɛ, abǝkal kɔ akam na aking nfam nya bɔ lime nɔ tam na nya gɔ ɛlam bi bɔ ramɛ Jisɔs.

² Bɔ shɔng nyenɛ na ɛbtal mibangɛ gɔ nyɔ ɛlam,

³ Na bɔ yɛlɛ gɔ atang; bɔ nyenim ngɔbjing a Ntol a Jisɔs.

⁴ Na bɔ yimi ɔ jɔ kɛrɛ lagɛ, abolom abal shɔrɔ lɔng gɔ abara abɔmɔ nya kpe nyanɛ biyimi tɔb bɔ.

⁵ Ɛfafal bɔb bɔ, bɔ kɔgɔ ashimar gɔ ndi, abolom banu kim bungɔ tɔng bɔ rɛ, “Jɛn ji wangɛ nkpe shɛbɛ nɛ abir gɔ ɛblɔngɔ akunɛ?

⁶ Yɛ kpɛm le a; a nyamɛ! Bomo ji a tɔngɔ wan, gɔ garɛ nyi akpagɛ le na nanɛ gɔ Galili rɛ:

⁷ ‘Bɔ kpe fagɛ Mɔna Nlolom ka anɛ ba abi afɛm, komɛ gɔ ɛjangɛ ɛte ji bɔ shege na ntɛm, gɔ nfong ɛra a fɛrɛ nyamɛ gɔ ɛbku.’ ”

⁸ Ɔwɔ abǝkal banu bomo alom ɛnye.

⁹ Ɔji bɔ lɔngɔ gɔ ɛlam krɛ, bɔ bǝtɔrɔ nshɔl nyaa kpɛk kpɛ tɔng alɔgɔ ɛbtom Ɛshɔwɔ ɛwobo a nɛ awɔng na anɛ bagɔ kpɛk kpɛ.

¹⁰ Abǝkal ba jɔlɔ ɔ, Mɛri Madalen na Joanna na Mɛri nyen a Jɛmshi na abǝkal bagɔ ba tɔb jɔlɔ ɔ bɔ ba tɔngɔ akpɛlɛ Jisɔs nshɔl nyaa kpɛk kpɛ.

¹¹ Wɔ akpɛlɛ Jisɔs tire rɛ abǝkal banu jɔ bungɔ ɛbgbɔlɔ, bɔ tamim tu bɔ.

¹² Pita mɛlɛ bɛ tam gɔ ɛlam; na akimɛ nɔ fang, anyɛnɛ abɔmɔ nyanya ɛjomjom akpɛm nyen. Ɔwɔ anyar lamɛ nɔ afɛrɛ krɛ jɔ kɛrɛ ji mǝlim.

Jisɔs tebe atɔtɔnɔ ɛbɛ ɛnɛ gɔ mbang a Ɛmmayɔs

¹³ Ɛfong biyɔ fufɔ atɔtɔnɔ Jisɔs abal jɔ tamɛ gɔ ɛjabɛ ji bɔ lɔngɔ rɛ Ɛmmayɔs, ji kpe ringe malɛ ɛshima bɔmɔ gɔ Jɛrushɛlɛm.

¹⁴ Bɔ jɔ tobo ɛka na atɛm lagɛ kpɛk kpɛ nshɔl nyi milim.

¹⁵ Na bɔ jɔ tobo ɛka shɔngɔ, Jisɔs bǝyɛl bɔ gɔ ɛblɔng jɔ jɛn na bɔ;

¹⁶ bɔ nyenenyen wɔ bɔ mɛ malim linge.

¹⁷ Jisɔs kim babɛ bɔ rɛ, “Ɛjomaji nkpe bungɔ na atɛm, na nkpe jɛnɛ shɔngɔ?” Bɔ bɔb yimi, na ashimar ndɔndɔn.

¹⁸ Awɔng nɔ bɔ kpejɔ lɔngɛ rɛ, Kleopas, kimawɛ bab rɛ, “Wɔ njɛn nɛ nyi gɔ Jɛrushɛlɛm nɔ ki nyi nshɔl nyi milim gɔ abɔn afong ba?”

¹⁹ Akim babɛ bɔ rɛ, “Nshɔl anyi?” Bɔ fangɛ rɛ, “Ɛkpe bungɔ nshɔl nyi milim lagɛ Jisɔs nɛ a Nasarɛt, Nlolom nɔa jɔlɔ ntinge ateb Ɛshɔwɔ nɔ Ɛshɔwɔ na anɛ kpɛk kpɛ kɔyɛ nɔ na nɛ nɔ kpe ɛkɔ gɔ ɛjom ajingajingɛ ji ajɔ bung fɛrɛ lim.

²⁰ Atoboɛshi a bajɔmanjɔm Ɛshɔwɔ ɛnyarɛ na ba file aji kim ɛlam fagɛ ka rɛ bɔ wolɛ, ɔwɔ bɔ komɛ gɔ ɛjangɛ ɛte ji bɔ shege na ntɛm.

²¹ Wɔ war jɔ tire rɛ yɛ wɔ kpe bagɛ jɔlɔ nɛ nɔ le tarɛ anɛ ba Isɛrɛl! Anu ɛring nfong ɛra lɛl nyi nshɔl nyaa kpɛk kpɛ lime nɔ.

²² Rɛ nkpɛkpɛlɛ ɔ, abǝkal bandige gɔ gra ɛblɔng bungɔ ɛjom ji lamɛ war anyar; bɔ jɛ gɔ ɛlam lɛl fonfo,

²³ bɔ nyenim ngɔbjing ɛnye. Bɔ fɛrɛ bǝkeme tɔng war rɛ bɔ nyenɛ balɔgɔ ɛbtom Ɛshɔwɔ, ba tɔngɔ bɔ rɛ anyamɛ.

²⁴ Ɔwɔ ɛgɔɔm ɛjarɛ jindige jɛ gɔ ɛlam shɔng nyen naji abǝkal banu bungɔ nɔ, wɔ bɔ fufɔ mɛtɔbim nyen.”

²⁵ Ɔwɔ Jisɔs kim bungɔ tɔng bɔ rɛ, “Ngbɔlɔ shing, jɛn ji wangɛ nkigol bɛl ɛbtamɛ tu gɔ kpɛk kpɛ nshɔl nyi ntinge ateb Ɛshɔwɔ bungɔ nɔ!

²⁶ Nyim rɛ Krayis kpenyɛnɛ ɛrɛm gɔ nshɔl nyaa kpɛk kpɛ akim yɛlɛ gɔ ɛblobo ɛnɛ a?”

²⁷ Jisɔs kim lingɛ tɔng bɔ nya bɔ bungɔ nɔ lagɛ gɔ nwɛr Ɛshɔwɔ bɔmɔ gɔ nwɛr a Mosis ring gɔ nya ba atinge ateb Ɛshɔwɔ yɛlɛ nɔ.

²⁸ Na bɔ jɔ kabɛ ɛjabɛ ji bɔ fenɔ, Jisɔs jɔ lime na akpagɛ le shɔrashi ɛbjɛn.

²⁹ Wɔ bɔ gbɔngɛ rɛ atir, “Jɔl nabɔ; teb ngarɛ ɛjɛ ɛgong ɛkabɛ, ɛfong yagɛ mal.” Ɔwɔ atamɛ shɔng ji na bɔ.

³⁰ Na aji gɔ ɛkpokoro na bɔ, a kɔ ɛbrɛd, kag Ɛshɔwɔ sham, bag ka bɔ.

³¹ Ɔwɔ amar lingɛ bɔ bɔ lingɛ, ashɔrɔ lamɛ bɔ mɛkpɛm nyen.

³² Bɔ jɔ babɛ atɛm rɛ, “Ɛbtem jɔm yɛbɛ wara ɔji ajɔ bung na narɛ gɔ mbang lagɛ nwɛr Ɛshɔwɔ a?”

³³ Bɔ mɛlɛ tutu tam nyi Jɛrushɛlɛm. Ɔwɔ bɔ shɔng kpere alɔgɔ ɛbtom Ɛshɔwɔ ɛwobo a nɛ awɔng gba ɛkan na anɛ bagɔ

³⁴ jɔ bung rɛ, “Ɛlɔgɔlɔgɔ! Nshɔ ɛbnyamɛ gɔ ɛbku. Bǝlɔng gɔ ji Sayimɔn!”

³⁵ Ɔwɔ abolom abal banu kim jɔ tɔng bɔ ji lime gɔ mbang, na na bɔ lingɛ Jisɔs ɔji abagɛ ɛbrɛd.

Jisɔs lɔngɔ bǝtebe ɛnɛ gɔ ɛblɔng atɔtɔnɔ ɛbɛ

³⁶ Na abolom abal ba jɔ tɔng bɔ ɛka jiya, gɔ ndoando nyiɔ Jisɔs nfɔnɔ lɔng bǝyɛl bɔ gɔ ɛblɔng kim bungɔ rɛ “Ɛbkɔnɔ jɔl ananɛ.”

³⁷ Ɛfalfal bɔb bɔ, rɛ bɔ nyen ɛtɔgɔ nkunɛ.

³⁸ Ɔwɔ akim tɔngɔ bɔ rɛ, “Jɛn ji wangɛ nkpe ɛfige ɛnanɛ ayɔ? Jɛn ji wangɛ nki kpe ɛbtamɛ gɔ gana ntem?

³⁹ Bɔngɔ gɔ abɔ ɛnyamɛ na ata ɛnyamɛ, akpe nyenɛ rɛ mɛ nfɔnɔ wɔ! Lagim abɔ nɔngɔ wɔ nyen rɛ mɛwɔ; ɛtɔgɔ nim jɔ bɛl ngɔbjing na akab, na akpim nyenɛ nkpenɔ.”

⁴⁰ Ɔji abungɔ nɔ mal, akim tebe bɔ abɔ na ata ɛnye.

⁴¹ Wɔ ɔji bɔ ki tir tamɛ, teb ɛyɛbɛbtem na anyar nya lamɛ bɔ, ɔwɔ akim babɛ bɔ rɛ, “Nkpekpe ɛjom alɛgɛ ajingajingɛ aa ji ɛlɛga?”

⁴² Bɔ kayɛ ɛrɔgɔ nsharɛ nyi bɔ lamalam,

⁴³ a tarɛ li gɔ ɛshimar ɛbɔ.

⁴⁴ Ɔwɔ akim tɔngɔ bɔ rɛ, “Nshɔl nyaa nyi tɔngɔ wan lagɛ ngarɛ nyi nkpagɛ le na nanɛ: ajingajingɛ ji bɔ yɛlɛ nɔ lagim gɔ nwɛr ajang a Mosis, na nyi Atinge ateb Ɛshɔwɔ na nyi sam kpejɔlɔ nɔ.”

⁴⁵ Ɔwɔ alingɛ nteme bɔ nɔngɔ bɔ bɛl ɛblingɛ lagɛ Nwɛr Ɛshɔwɔ,

⁴⁶ akim tɔngɔ bɔ rɛ, “Jiya ji bɔ yɛlɛ nɔ rɛ: Krayis kpe tir nyenɛ ɛrɛm gɔ nfong ɛra akim fɛrɛ nyamɛ gɔ ɛbku.

⁴⁷ Nwɛr Ɛshɔwɔ tɔb bungɔ rɛ gɔ mbing ɛnye bɔ kpe tɔngɔ anɛ rɛ bɔ tamɛ tu Ɛshɔwɔ, nɔngɔ bɔ yangɛ gɔ abi afɛm aleme nɔngɔ ji Ɛshɔwɔ le tam ka bɔ. Bɔ kpe tinge anɛ ɛteb biya gɔ ɛbjabɛ kpɛk kpɛ, bɔmɔ gɔ Jɛrushɛlɛm.

⁴⁸ Wan ba le atiyanshɛ gɔ nshɔl nyaa.

⁴⁹ Nkpe tomo tu wan ji Nshɔjamɛ tɔngɔ nɔ. Wɔ ji wan gɔ Jɛrushɛlɛm wan babɛ tɛtɛ mbɛl ɛkɔ gɔ ji Ɛshɔwɔ gɔ rɔ.”

Jisɔs fɛrɛ tam GƆ RƆ

⁵⁰ Ɔwɔ atabɛ bɔ lɔng naba gɔ Jɛrushɛlɛm tam nyi Bɛtani, a taba abɔ ɛnye gɔ rɔ folo bɔ.

⁵¹ Na ajɔ folo bɔ, a tam bɔ sha Ɛshɔwɔ tabɛ tam gɔ rɔ.

⁵² Bɔ jige fɛrɛ krɛ nyi Jɛrushɛlɛm, na njijɔgɔ ɛyɛbɛbtem.

⁵³ Bɔ tɔgɔ jɛ shɔng sha gɔ ɛtak gɛ Ɛshɔwɔ tɛtɛ jɔ jigɛ.