Alom Ɛshɔwɔ nya long gɔ nwɛr Aluk 23 - Nnam

Bɔ kɔ Jisɔs ba wɔ gɔ ji Pilɛt

¹ Ɛblɔng anɛ kpɛk kpɛ tamɛ yimi tab Jisɔs tamawɔ gɔ ji Pilɛt.

² Bɔ jɔ kim afangɛ lagɛ Jisɔs rɛ, “Ɛbɔbɔ nlolom nɔa kpe tebe anɛ ɛbra abi abang, akpe tɔngɔ bɔ rɛ bɔ nkǝ kpee atakshi ka Sisa rɛ yɛ wɔ le Krayis, nɔ le Ntol.”

³ Ɔwɔ Pilɛt kim babɛ Jisɔs rɛ, “Wɔwɔ le Ntol a Aju a?” Jisɔs kim fangɛ rɛ, “Wɔwɔ bungɔ nɔ.”

⁴ Pilɛt kim bungɔ tɔng atoboɛshi a bajɔmanjɔm Ɛshɔwɔ na ɛblɔng anɛ kpɛk kpɛ rɛ, “Nyenim ɛbe ɛjom ji nlolom nɔa milim ji nle kayɛ ɛbe.”

⁵ Wɔ bɔ tirim tamɛ, bɔ yimi nkongonkongo rɛ, “Teb ɛbtebe ɛnɛ ni miba na mburu ka anɛ gɔ ɛbjabɛ Judiya kpɛk kpɛ. Abɔmɔ gɔ Galili anu aring aa.”

Pilɛt tomo Jisɔs tu Ɛrɔd

⁶ Na Pilɛt wogo nshɔl nyaa kpɛk kpɛ, akim babɛ rɛ, “Nlolom nɔa lɔng Galili a?”

⁷ Ɔji agbɛrɛ nɔ rɛ Jisɔs lɔng gɔ ɛjangɛ ɛbjabɛ ji Ɛrɔd le ntol, a tomɛ tu gɔ ji Ɛrɔd, nɔ tɔb jɔlɔ gɔ Jɛrushɛlɛm ngarɛ nyiɔ.

⁸ Ɔji Ɛrɔd nyenɛ Jisɔs, ɛbtem yɛbɛ, teb mbang ɛblab nyi akimɛ shɛbɛ rɛ anyɛnɛ, teb awog lagɛ, a jɔ shɛb rɛ nu anyɛnɛ atɔb bilim ajene nshɔl yɛ nyen.

⁹ Ɛrɔd kim jɔ bab Jisɔs ababbɛ gbalɛgbalɛ, wɔ Jisɔs mɛ kam nfangɛ anyinganyingɛ.

¹⁰ Atoboɛshi a bajɔmanjɔm Ɛshɔwɔ na batetebe ajang a Mosis yimi ɔ jɔ kime afangɛ gbogbo lagɛ Jisɔs.

¹¹ Ɛrɔd na ashɔja ɛnye jɔ nyɔgɔ Jisɔs fɛrɛ rɔdɛ jɔ ta ntua. Bɔ kagɛ nɔbɔ ɛlamɛ, a fɛrɛ tomɛ tu Pilɛt.

¹² Ɛfong biɔ Ɛrɔd na Pilɛt bɔngɔ ɛtɛm; teb wogowogo bɔ jɔɔm kono.

Pilɛt kim ɛlam rɛ bɔ wol Jisɔs

¹³ Pilɛt lɔngɔ atoboɛshi a bajɔmanjɔm Ɛshɔwɔ, na ba bungɔ nfam, na anɛ bagɔ tu ɛji ajing,

¹⁴ kim tɔngɔ bɔ rɛ, “Wan mba na nlolom nɔa gɔ gamɛ ɛji rɛ akpe buru aji. Wɔ mɛ fɛdɛ gɔ ganɛ ɛshimar, agbɔm ajang nyaa nya tɔngɔ nɔ.

¹⁵ Nɔwɔ Ɛrɔd tɔb nyenɛ rɛ ɛjomjom alemim, afɛrɛ tomɛ tu war. Ɛjomjom nlolom nɔa limim ji fomo rɛ akpɔ.

¹⁶ Nlega, tɔng wan rɛ nduɛna yagɛ abɔ atam.”

¹⁷ Anu fofomo rɛ atir yege nɛ agbakɔbɔ awɔng ka bɔ gɔ ngarɛ Ɛbkak gɛ Ɛbshiri.

¹⁸ Ɛblɔng anɛ kpɛk kpɛ binge rɛ, “Wolɛ! Wɔ yagɛ Barabbas ka war!”

¹⁹ (Bɔ tomo Barabbas ngbakɔbɔ gɔ mburu nyi jɔlɔ gɔ ɛjabɛ, na nɛ nɔ awolo nɔ.)

²⁰ Pilɛt jɔ shɛbɛ rɛ a yagɛ Jisɔs, ɔwɔ ajɔ bung na bɔ gɔ nkpɛlakpɛlɛ.

²¹ Wɔ na bɔ jɔ bibinge rɛ “Komɛ gɔ Ɛte ji bɔ shege na ntɛm! Komɛ gɔ Ɛte ji bɔ shege na ntɛm!”

²² Pilɛt kpɛ bung tɔng bɔ gɔ nkpɛlɛ ɛra rɛ, “Jɛn ji? Ɛbe ɛjom aji aleme lim? Mɛ nyenim ɛbe ɛjom ajingajingɛ ji amilim ji fomo rɛ akpɔ! Nlega tɔng wan rɛ duɛ na yagɛ abɔ atam.”

²³ Ɔwɔ bɔ tongo jɔ bibinge gbogbo rɛ bɔ tir kokom Jisɔs gɔ ɛte ji bɔ shege na ntɛm, gɔ ɛbkrɔ ɛnɛ abinge bɔ lɔng ɛshi ka bɔ.

²⁴ Ɔwɔ Pilɛt kim ɛlam rɛ bɔ wol Jisɔs na bɔ jɔ shɛb.

²⁵ Pilɛt yege Barabbas gɔ ngbakɔbɔ teb mfam aburu na nɛ nɔ awolo nɔ na bɔ shɛbɛ nɔ, fagɛ Jisɔs ka bɔ rɛ bɔ lim na kɔrɔ bɔ.

Bɔ komo Jisɔs gɔ ɛte ji bɔ shege na ntɛm

²⁶ Na ashɔja jɔ tam na Jisɔs, bɔ kpere nlolom awɔng nɔ bɔ jɔ lɔngɛ rɛ Sayimɔn nɔ lɔng Syrene. A jɔ ba nyi ɛjabɛ. Bɔ bɔbɛ, shiyɛ ɛjangɛ ɛte ji bɔ shege na ntɛm, a jɔ tɔnɔ Jisɔs.

²⁷ Ɛblɔng anɛ gbalɛgbalɛ tɔnɛ, kpɛlɛ na abǝkal ba jɔ ling jɔ magɛ kayɛ.

²⁸ Jisɔs kɛbɛ bɔngɔ bɔ tɔng bɔ rɛ, “Abǝkal lɛ Jɛrushɛlɛm, kim kpɛ ling wan; ling wan ɛnanɛ na abɔn ɛbanɛ.

²⁹ Teb ɛfong kpe bagɛ bi nle bung rɛ, ‘Ɛyɛbɛbtem na agom, ka abǝkal ba ki jɛl, na abɛl nya ki lɛɛ abɔn!’

³⁰ Ngarɛ nyiɔ anɛ le tɔng nwarɛ ɛwɔng rɛ, ‘Gbɔ bolo war!’ Fɛrɛ tɔng rɛdɛ wɔng rɛ, ‘Brɛ war!’

³¹ Rɛjɔlarɛ anɛ kpemalɛ lim nshɔl nyaa ɔji ɛte kpagɛ le mberber, rɛjɔl rɛnan ɔji mɔwomo?”

³² Abolom abal bagɔ, ba gbɔajang, bɔ tɔb yege bɔ kpɛlɛ na Jisɔs shɔng wol.

³³ Ɔji bɔ ringe gɔ ɛji ji bɔ lɔngɔ rɛ “Nkpagɛ ɛhi”, ɔwɔ bɔ komo jisɔs gɔ ɛte ji bɔ shege na ntɛm, kpɛlɛ na anɛ abal ba gbɔajang, awɔng gɔ ɛjang ɛbɔblom ɛbɛ, nɔgɔ gɔ ɛjangɛ ɛbɔbkal ɛbɛ.

³⁴ Jisɔs kim bungɔ rɛ, “Tam ka bɔ, Nshɔ! Bɔ nyim ji bɔ kpe lime.” Bɔ bangɛ abɔmɔ ɛnye jɔ ta ntua.

³⁵ Anɛ yimi ɔ jɔ nyen. Ba bungɔ nfam Aju kimɛ nyɔgɔ Jisɔs rɛ: “Atarɛ anɛ bagɔ; nɔngɔ atɔb tarɛ ɛnɛ rɛjɔlarɛ yɛ Krayis wɔ nɔ Ɛshɔwɔ jagɛ nɔ!”

³⁶ Ashɔja fufɔ jɔ tɔb nyɔgɛ: bɔ ba bǝkperɛ kayɛ ɛkang amam,

³⁷ bɔ rɛ, “Tarɛ ɛnawɔfɔnɔ rɛjɔlarɛ wɔ Ntol a Aju wɔ!”

³⁸ Bɔ yɛlɛ alom nyaa, gɔ mɔ ɛkpagɛte lagɛ gɔ ɛte ji bɔ shege na ntɛm ji bɔ komo Jisɔs, nya lɔngɔ rɛ: “AWƆ LE NTOL A AJU.”

³⁹ Ngbɔgajang awɔng nɔ bɔ komɛ ɔ fufɔ jɔ sho Jisɔs rɛ: “Wɔ shang le Krayis a? Tarɛ ɛna wɔ tɔb tarɛ war mɛɛ!”

⁴⁰ Wɔ nɔgɔ, kimawɛ nyam rɛ, “Wɔ nim jɔ fal Ɛshɔwɔ a? Teb ɛkpe kpɔgɔ ɛbku ating.

⁴¹ War ɛfofomo rɛ ɛkpɔ, gɔ abi nshɔl ɛnyarɛ nya ɛmelim. Wɔ nlolom nɔa ɛbe ɛjom ajingajingɛ alemim.”

⁴² Ɔwɔ a rɛ, “Jisɔs, bomom a rɛ fɛrɛ gɔ Ɛtolo ɛba.”

⁴³ Jisɔs kimawɛ fangɛ rɛ, “Gɔ ɛlɔgɔlɔgɔ ntɔnga rɛ, lɛl akpe jɔlɔ na namɛ gɔ Paradise.”

Ɛbku Jisɔs

⁴⁴ Na mǝkim ring gɔ ɛfen ɛjangɛ gbɔ gɔ aji kpɛk kpɛ tɛtɛ nkaranka ɛra nyi ɛgon,

⁴⁵ njol ragɛ ɛbyagɛ. Ɛkpege ji bɔ kanɛ gɔ ɛtak gɛ Ɛshɔwɔ yamɛ gɔ nji ɛbal.

⁴⁶ Jisɔs binge gbogbo rɛ, “Nshɔ! Nfagɛ ɛtɔgɔ ɛjamɛ kaga gɔ ɛbɔ!” Jiya ji agrɛ bung akim kpɔgɔ.

⁴⁷ Ɔji njijɔg a nɛ a nshɔja Roman nyenɛ ajingajingɛ ji milim, ajige Ɛshɔwɔ rɛ, “Gɔ ɛlɔgɔlɔgɔ nlolom nɔa jɔlɔ ɛtinge nɛ.”

⁴⁸ Ɔji anɛ kpɛk kpɛ ba gba ɛkan nyenɛ ji lime nɔ, bɔ fɛrɛ krɛ na abɔ gɔ ngang jɔ kagɛ.

⁴⁹ Wɔ anɛ kpɛk kpɛ ba mangɛ Jisɔs, kpɛlɛ na abǝkal ba tɔnɛ nɔ gɔ Galili, yimi dagɛdagɛ, jɔ nyen ajingajingɛ.

Na bɔ ramɛ ɛku Jisɔs

⁵⁰ Bɛlɛ nlolom awɔng nɔ bɔ jɔ lɔngɛ rɛ Josɛf, nɔ wɔbɔ gɔ ɛblɔngɔ atabɛ ɛshi Aju, a jɔlɔ ɛtinge nɛ gɔ ɛshimar Ɛshɔwɔ.

⁵¹ Bɛlɛ nlolom awɔng nɔ bɔ jɔ lɔngɛ rɛ Josɛf nɔ lɔng Arimatiya ɛjabɛ Judiya, a jɔlɔ ɛtinge nɛ, nɔ ji kpe shek rɛ Ɛtol Ɛshɔwɔ ba. Tu ji ajɔlɔ gɔ ɛblɔngɔ ba file nfam, ajɔm tir tamɛ tu nshɔl nyi bɔ jɔ lim.

⁵² Akim tamɛ gɔ ji Pilɛt shɔng bab rɛ bɔ kayɛ ɛku Jisɔs.

⁵³ Ɔwɔ a jɛ shɔng fɔnɛ gɔ ɛte ji bɔ shege na ntɛm, fɛdɛ gɔ nlaba mbɔmɔ shɔng konɛ gɔ ɛlam bi bɔ ramɛ gɔ ɛbtal, ni bɔ kana kokono nɛ.

⁵⁴ Jɔlɔ gɔ ɛfong ɛragɛ ɛku Aju bi bɔ kpejɔ tongo aji, ji ɛragɛ ɛku mǝkim bɔm.

⁵⁵ Abǝkal ba tɔnɔ Jisɔs gɔ Galili tɔb tɔnɔ Josɛf shɔng nyen ɛlam na na bɔ ramɛ nɔ.

⁵⁶ Ɔwɔ bɔ fɛrɛ nyi ɛtak shɔng lim aking nfam nya bɔ le tamɛ Jisɔs gɔ ngɔbjing wɔ na bɔ malɛ nɔ, Ɛfong Ɛragɛ Ɛku Aju ɛbɔm, bɔ bɛl ragɛ ɛku na njang a Mosis bungɔ nɔ.