Alom Ɛshɔwɔ nya long gɔ nwɛr Aluk 22 - Nnam

Juda gongɔ Jisɔs

¹ Na Ɛbkak ni bɔ kijɔlɔ jɔ shimɛ nshɔl nyi kpejɔ lim Ɛbrɛd tong, ni bɔ lɔngɔ rɛ Ɛbkak gɛ Ɛbshiri, jɔ kabɛ bagɛ.

² Atoboɛshi a bajɔmanjɔm Ɛshɔwɔ na batetebe ajang a Mosis jɔ shɛbɛ mbang nyi bɔ le wol Jisɔs, wɔ bɔ jɔ fal anɛ.

³ Ɔwɔ Nshɛtan yɛlɛ Juda, nɔ bɔ jɔ tɔb lɔngɛ rɛ Ɛshikarɔd nɔ jɔlɔ gɔ ɛblɔngɔ akpɛlɛ Jisɔs Ɛwobo anɛ abal.

⁴ Juda tamɛ gɔ ji atoboɛshi a bajɔmanjɔm Ɛshɔwɔ na atoboɛshi anɛ ba kpejɔ babɛ ɛtakgɛ Ɛshɔwɔ shɔng bɛl ntɔbɔ na bɔ na alemal gongɔ Jisɔs ka bɔ.

⁵ Ɛbtem yɛbɛ bɔ gbalɛgbalɛ bɔ tamɛ rɛ bɔ kpɛ kagɛ akpɔgɔ.

⁶ Juda tamɛ tu bɔ, kimɛshɛbɛ mbang nyi a le fagɛ Jisɔs ka bɔ nɔngɔ anɛ kǝ gbɛrɛ.

Jisɔs jɔ tongo ɛbjing rɛ ali nkalshi ɛjoma alɛgɛ ɛbkak gɛ ɛbshiri

⁷ Ɔji ɛbkak gɛ ɛbshiri ni bɔ kpejɔ wol ɛjɔrɔ ni bɔ kijɔlɔ jɔ shimɛ nshɔl nyi kpejɔ lim ɛbrɛd tong ringe nɔ.

⁸ Jisɔs tomo Pita na Jɔn rɛ, “Shɔng nshɔ lim nshɔl alɛgɛ nyi ɛbkak gɛ ɛbshiri mbom war nyi ɛkpelɛgɛ.”

⁹ Bɔ kimawɛ bab rɛ, “Gan wɔ akpe shɛbɛ rɛ war lim bom?”

¹⁰ Jisɔs kim fangɛ bɔ rɛ, “Na nkpe yɛlɛ gɔ ɛjabɛ, nkpe kpere nlolom awɔng nɔ shɔlɔ ɛbar alab. Tɔnɛ wan nyɛl gɔ ɛtak ji afenɔ,

¹¹ wan ntɔng nfontak rɛ, ‘Ntetebe ɛwarɛ rɛ war baba rɛ; Njo mɛɛ nyi mɛ na batɔtɔnɔ ɛbamɛ ɛlili nshɔl nyi ɛbkak gɛ ɛbshiri?’

¹² Akpe tebe wan nkpangɛ ɛkpɔ nyi bɔ mitongo nɔbɔnɔbɔ gɔ ɛrɔ ɛnyɔng. Tongo wan ajingajingɛ mbom ɔ.”

¹³ Bɔ tam shɔngɔ shɔnyen ɛjom ajingajingɛ na Jisɔs tɔngɔ bɔ. Ɔwɔ bɔ tongo nshɔl alɛgɛ ɛbkak gɛ ɛbshiri bom.

Jisɔs li nkalshi ɛjoma alɛgɛ

¹⁴ Ɔji ngarɛ ringe nɔ, Jisɔs na akpɛlɛ ɛnye ji gɔ ɛkpokoro.

¹⁵ Akim tɔngɔ bɔ rɛ, “Njɔ tir shɛbɛ rɛ nli nshɔl alɛgɛ nyi ɛbkak gɛ ɛbshiri na nanɛ nkim nyenɛ ɛrɛm.

¹⁶ Nɔngɔ mɛ tɔng wan rɛ, nim kpe tir li nshɔl alɛgɛ ɛbkak niya tɛtɛ bɛl ɛblingɛ ɛnɛ gɔ Ɛtol Ɛshɔwɔ.”

¹⁷ Ɔwɔ Jisɔs rɔdɔ ɛbtogo, kag sham rɛ ɛjijige jɔl nana O Nshɔ, Ɛshɔwɔ ɛbarɛ, nɔ kpejɔ ka nshɔl alɛgɛ gɔ ndi, akim fagɛ ka bɔ rɛ, “Kɔ wan mbangɛ ka atɛm.

¹⁸ Ntɔng wan rɛ tab anu shɔngɔ nim kpe wɔɔ amam nya lɔng gɔ ɛgbɛ akabɛ nte tɛtɛ Ɛtol Ɛshɔwɔ ba.”

¹⁹ Ɔwɔ a rɔdɔ ɛbrɛd, kag Ɛshɔwɔ sham, bagɛ ka bɔ, kim bungɔ rɛ, “Ngɔbjing ɛnyamɛ nyi aa, nyi nkpe kagɛ wan. Jɔ lim wan jiya nɔngɔ njɔ kɔ bomom.”

²⁰ Gɔ mbang nyiɔ fufɔ, ɔji bɔ mili nshɔl alɛgɛ mal a ka bɔ ɛbtogo, rɛ, “Ɛbtogo niya ɛlene nfɛnfɛ ji Ɛshɔwɔ milim kongo na alung ɛnyamɛ, nya bɔ ka wan.

²¹ “Wɔ nɛ nɔ kpim gongɔ jig aa kpelɛgɛ nshɔl na namɛ gɔ ɛkpokoro jiya.

²² Mɔna Nlolom kpe kpɔgɔ na Ɛshɔwɔ tɔngɔ nɔ, wɔ le beb na nɛ nɔ gongɛ nɔ!”

²³ Bɔ kime babɛ atɛm rɛ nyenɛ wɔ lijɔl nɛ nɔ lelem ɛfɔngɔ ɛjom na jiya.

Batɔtɔnɔ Jisɔs bɛlɛ nfab

²⁴ Ɔwɔ nfab gbɔ atɔtɔnɔ Jisɔs lagɛ nɛ gɔ ɛblɔngɔ bɔ nɔ bɔ lekɔyɛ na nɛ nɔ gagbal.

²⁵ Jisɔs kim bungɔ tɔng bɔ rɛ, “Atol nya anɛ ba ki le Aju kpe ɛkɔ kpe nyedɛ anɛ bɔ, ba file nfam kɔ ɛbgam, lɔng ni bɔ rɛ, ‘Atɛm Anɛ.’

²⁶ Wɔ nɔ shang fomo rɛ jɔl nananɛ. Teb rɛ, nɛ nɔ ga gbal gɔ ɛblɔng ɛnanɛ fomo rɛ ajɔl na mɔnshɛ, ntoboɛshi jɔl na nlɔgɔ ɛbtom.

²⁷ Nyenɛ wɔ ga gbal, nɛ nɔ jig kpe lɛgɛ nshɔl afi nɛ nɔ kpe lɔgɔ ɛbtom? Gɔ ɛlɔgɔlɔgɔ nɛ nɔ jig na kpe lɛgɛ nshɔl wɔ, wɔ mɛ nle na nanɛ na nɛ nɔ kpe lɔgɔ ɛbtom.

²⁸ “Wan ba le anɛ ba mɔjɔl na namɛ gɔ ngarɛ ɛbgarɛ ɛnamɛ;

²⁹ wɔ na nshɔjamɛ mim ka ɛkɔ rɛ mɛ file anɛ, nɔwɔ nkpetɔb ka wan ɛkɔ fufɔ.

³⁰ Nɔngɔ ji nli li nfɛrɛ wɔɔ gɔ gamɛ ɛkpokoro gɔ ɛtol ɛbamɛ, nfɛrɛ ji gɔ njia atol, jɔ lam ɛwobo ɛbange nab ɛbal ji Isɛrɛl.

Jisɔs tɔngɔ Pita rɛ akpɛ tɛnɛ

³¹ “Jisɔs rɛ, Sayimɔn, Sayimɔn, Nshɛtan ɛkɔ ɛkɔ rɛ agarɛ wan nɔngɔ ajag anɔbɔ yege gɔ abebe, na mbamgbɛ kpejɔ jag nkar yege gɔ akǝl.

³² Wɔ Sayimɔn nkag ɛrɔ ka, rɛ akǝ gbɔ ɛbɔ gɔ ɛbtamɛ ɛna tu Ɛshɔwɔ. Arɛ fɛrɛ gɔ gamɛ ɛji, lim abinnɛ kongo.”

³³ Pita kimawɛ fangɛ rɛ, “Nshɔ, mɛ ntongo ɛbjing bi nfe ngbakɔbɔ nana fɛrɛ kpɔ nana.”

³⁴ Jisɔs kimawɛ tɔng rɛ, Pita, “Nɔngɔ mɛ ntɔnga rɛ, jɔl nkɔk nim kogo lɛl, akpim tɛnɛ nkpɛlɛ ɛra rɛ amɛ nyim.”

³⁵ Ɔwɔ Jisɔs kim babɛ atɔtɔnɔ ɛbɛ rɛ, “Ɔji ntomo wan nyanjɛlɛ, ji nki tab ɛbam ji nkpejɔ kag akpɔgɔ, jɔlɔ ɛbam ɛbjen na akpagɛta, ɛjomaji nki bɛl?” Bɔ rɛ, “Ɛjomjom.”

³⁶ Jisɔs kim tɔngɔ bɔ rɛ, “Wɔ anu, rɛjɔl rɛya akpe ɛbam ji akpejɔ kag akpɔgɔ na ɛbam ɛbjɛn tab, wɔ rɛfɛr jɔl rɛya ɛkangkang akpim, gongɔ ɛlamɛ ɛja wɔ gono ajing.

³⁷ Nɔngɔ mɛ ntɔng wan rɛ ji Nwɛr Ɛshɔwɔ bungɔ nɔ lagim rɛ, ‘Bɔ kpim falɛ kag gɔ ɛblɔngɔ anɛ ba agbɔgajang.’ Teb ajingajingɛ ji bɔ yɛlɛ nɔ lagim yagaba ɛbjɔlɔ ɛlɔgɔlɔgɔ.”

³⁸ Atɔtɔnɔ Jisɔs rɛ, “Nshɔ, nyen ɛkangkang ɛbal aa.” Jisɔs fangɛ rɛ, “Nɔngɔ!”

Jisɔs kagɛ ɛrɔ gɔ ɛwɔngɔ Olifes

³⁹ Jisɔs tamɛ ɛjabɛ sha tam nyi ɛwɔngɔ Olifes na a kpejɔ klɛ ɛlimɛ. Batɔtɔnɔ ɛbɛ tɔnɛ.

⁴⁰ Ɔji aringɛ gɔ ɛji junu, atɔngɔ bɔ rɛ, “Kag wan ɛrɔ rɛ nkǝgbɔ yɛl gɔ ɛbgarɛ.”

⁴¹ Atam bɔ sha ka bɔ mɔyagɛ nɔ akpe malɛ rɔ ɛbtal ring, jama alang jɔ kag ɛrɔ,

⁴² A rɛ, “Nshɔ, rɛ kɔra, radim ɛbkpang ɛrɛm biya gɔ gamɛ ɛshi. Wɔ kǝ jɔl na mɛ kɛrɛ, nɔngɔ jɔl na wɔ shɛbɛ nɔ.”

⁴³ Nlɔgɔ ɛbtom Ɛshɔwɔ lɔng gɔ rɔ bǝkperɛ kayɛ ɛkɔ.

⁴⁴ Jisɔs gɔ njijɔg ɛrɛm ɛbɛ kagɛ ɛrɔ nkongonkongo; nworo lɔngɛ gɔ ngɔbjing jɔ tɔngɔ gɔ ndi na alung.

⁴⁵ Na Jisɔs malɛ gɔ ɛrɔ akagɛ, a fɛrɛ bǝkperɛ batɔtɔnɔ ɛbɛ kpe lalɛ teb ɛlanglang agbinge ɛbtem.

⁴⁶ Jisɔs kim bungɔ tɔng bɔ rɛ, “Jɛn ji wangɛ nkpe lalɛ? Nyamɛ wan nkag ɛrɔ nɔngɔ wan nkǝ gbɔ yɛl gɔ ɛbgarɛ.”

Bɔ bɔbɔ Jisɔs

⁴⁷ Jisɔs bɛlɛ ntɔng gɔ nyɔ jɔ bung ɛblɔng anɛ kim bagɛ, ji Juda ɛkpɛlɛ ɛjɛ ajing gɔ ɛblɔngɔ ɛwobo anɛ abal shɔlɔ bɔ ba. Akim jɛnɛ shɔng kperɛ Jisɔs kɔgɛ nyɔ.

⁴⁸ Ɔwɔ Jisɔs kimawɛ bab rɛ, “Juda, ɛlɔng rɛ nyɔ akɔgɔ mi amigongho Mɔna Nlolom a?”

⁴⁹ Ɔji batɔtɔnɔ ɛbɛ ba jɔlɔ nanɛ nyen ji mikim lim, bɔ babɛ rɛ, “Nshɔ, war nɔg na akangkang ɛnyar a?”

⁵⁰ Ɔwɔ nɛ awɔng gɔ ɛblɔngɔ bɔ kime bomo mɔnanjo a nlokol atoboɛshi a bajɔmanjɔm Ɛshɔwɔ awɔng kim ɛtong ɛbɔblom.

⁵¹ Wɔ Jisɔs rɛ, “Nkpɛm shɛb jiɔ!” Alagɛ nlolom nɔnu abɔ gɔ ɛtong lime a nɔb.

⁵² Ɔwɔ Jisɔs kim bungɔ tɔng atoboɛshi a bajɔmanjɔm Ɛshɔwɔ na atoboɛshi anɛ ba kpejɔ babɛ ɛtak gɛ Ɛshɔwɔ, na abokol ba ba rɛ bɔ bebɔbɛ rɛ, “Mɛ nwaju nyaa nyi mba na akangkang na arɔgɔ nte rɛ mbebɔbim a?

⁵³ Ɛfong abɔngabɔngɔ njɔ jɔlɔ na nanɛ gɔ ɛtak gɛ Ɛshɔwɔ, wan ntirim garɛ rɛ nkpim bɔbɔ. Wɔ ngarɛ ɛnyanɛ nyi aa, nyi ɛjangɛ kpe bɛlɛ ɛkɔ.”

Pita tɛnɛ Jisɔs

⁵⁴ Bɔ bɔb Jisɔs tam na wɔ gɔ ɛtak gɛ Nlokol atoboɛshi a bajɔmanjɔm Ɛshɔwɔ. Pita jɔ tɔnɔ bɔ dagɛdagɛ.

⁵⁵ Bɔ kono agon gɔ ɛbka nlatak ji shinge, Pita tɔb yɛl bɔ gɔ ɛblɔng.

⁵⁶ Ɔji ngbamɛ anying nɔ kpejɔ lime ɛbtom ɔ nyenɛ nɔ ajig gɔ nkpɛya ngon, abɔngɛ shogoshogo kim bungɔ rɛ, “Nlolom nɔa fufɔ jɔlɔ na Jisɔs.”

⁵⁷ Wɔ Pita tetɛn rɛ, “Nɛ, mɛnyim.”

⁵⁸ Gɔ mɔn ngarɛ tilim nɛ nɔndige kpɛ ba bi nyenɛ ajig nɔ a rɛ, “Wɔ fufɔ a wɔb bɔ.” Pita kim fangɛ rɛ, “Nshɔ, mɛ shang!”

⁵⁹ Gɔ ji mi kpɛ jiya nɛ nɔndige kpe bung nkongo kongo rɛ, “Gɔ ɛlɔgɔlɔgɔ nlolom nɔa jɔlɔ na Jisɔs, teb atɔb lɔng Galili.”

⁶⁰ Pita kim fangɛ rɛ, “Nshɔ, nyim ji akpe bungɔ lagɛ!” Gɔ ndoando nyiɔ, ji akpagɛkpe ntɔng gɔ nyɔ, nkɔk kog.

⁶¹ Jisɔs kɛbɛ bɔngɔ Pita shogoshogo, Pita kim bomo rɛ Jisɔs tɔngɛ rɛ, “Jɔl nkɔk nim kogo lɛl, akpim tɛnɛ nkpɛlɛ ɛra rɛ amɛ nyim.”

⁶² Pita tam lɔng gɔ ɛlitak shɔng ling mɛmagɛ.

Bɔ nyɔgɔ Jisɔs fɛrɛ duɛ

⁶³ Anɛ ba jɔ babɛ Jisɔs jɔ nyɔgɛ fɛrɛ duɛ.

⁶⁴ Bɔ gbayɛ ɛjom gɔ ɛshimar jɔ babɛ ababbɛ rɛ, “Nyenɛ wɔ roma? Tɔng war!”

⁶⁵ Bɔ kim jɔ fɛrɛ bung abi nshɔl gbalɛgbalɛ lagɛ.

Bɔ kɔ Jisɔs ba gɔ ji ba lamɛblam

⁶⁶ Gɔ ji fonfo ɛkparɛ nɔ, abokol, atoboɛshi a bajɔmanjɔm Ɛshɔwɔ na batetebe ajang a Mosis wanɛ ɛji ajing, bɔ kim kɔgɔ Jisɔs ba bǝkperɛ bɔ.

⁶⁷ Bɔ rɛ, tɔng war “Wɔ wɔ le Krayis a?” Jisɔs kim fangɛ rɛ, “Nrɛtɔng wan, nim tamɛ tuim;

⁶⁸ wɔ nrɛ bab wan mbabɛ, nim fangɛ.

⁶⁹ Wɔ bɔmɔ anu shɔngɔ, Mɔna Nlolom kpe jige gɔ ɛjangɛ ɛbɔblom bi Ɛshɔwɔ nɔ gbalɛ shing.”

⁷⁰ Bɔ anɛ kpɛk kpɛ kimawɛ bab rɛ, “Wɔ wɔ le Mɔn Ɛshɔwɔ a?” Jisɔs kim fangɛ bɔ rɛ, “Wan ba mibung rɛ mɛ wɔ.”

⁷¹ Ɔwɔ bɔ kim bungɔ rɛ, “Ɛkpɛm shɛb ntiyanshɛ anyinganyingɛ! Teb war ɛbwog gɔ gɛya nyɔ!”