Alom Ɛshɔwɔ nya long gɔ nwɛr Aluk 21 - Nnam

Ji nkala nkunɛ ka nɔ

¹ Na Jisɔs jɔ bɔngɔ a nyenɛ na afang anɛ jɔ kagɛ ɛblɔgɔ gɔ ɛbkǝl ni bɔ kpejɔ kag gɔ ɛtakgɛ Ɛshɔwɔ,

² a tɔb nyenɛ nkala nkunɛ nɔ le nkpak tɔb kagɛ abɔnshishɔgɔ akpɔgɔ abal.

³ A rɛ, “Ntɔng wan ɛlɔgɔlɔgɔ rɛ, nkala nkunɛ nɔa gɔ ɛkpak gɛ ɛbɛ ka shingɛ anɛ bagɔ kpɛk kpɛ.

⁴ Teb anɛ bagɔ yege ɛblɔgɔ bɔ gɔ ɛblɔng nshɔl nyi bɔ kpenɔ ka; wɔ yɛ gɔ ɛkpak gɛ ɛbɛ, ka kpɛk kpɛ ji akpenɔ.”

Jisɔs bungɔ lagɛ ji lijɔl gɔ ɛshishɔng

⁵ Atɔtɔnɔ Jisɔs bandige jɔ bungɔ lagɛ ɛtak gɛ Ɛshɔwɔ, na nɔbɔ nɔ ring na anɔba atal na ɛblɔgɔ ni bɔ ka Ɛshɔwɔ. Jisɔs kim bungɔ rɛ,

⁶ “Nshɔl nyaa kpɛk kpɛ nyi wan nkpe nyenɛ, ngarɛ kpe bagɛ nyi ɛbtal atingatingɛ aa nim kpe komo na gɔ ntɛmɛ ɛbtal; atingatingɛ bɔ kpe gbolo tob gɔ ndi.”

⁷ Bɔ kim babɛ Jisɔs rɛ, “Ntetebe, ngaranyi jiya lelem? Ɛjomaji le lim ji le teb nlinge rɛ ngarɛ ɛbring?”

⁸ Jisɔs kim fangɛ rɛ, “Kono wan ɛkpo nɔngɔ bɔ kinim wan. Teb anɛ gbalɛgbalɛ kpe bagɛ gɔ mbing ɛnyamɛ rɛ, ‘Mɛ wɔ le Jisɔs, ngarɛ ɛbkabɛ.’ Kǝ tɔnɔ wan bɔ.

⁹ Kǝfal wan nrɛ wog lagɛ ntah na ɛfigayɔ. Tɛb Nshɔl nyaa kpɛk kpɛ kpe tir gbɔmbang lim, wɔ nkalshi fufɔ nim gɔl ba.”

¹⁰ A shɔrashi ntɔng rɛ, “Ɛbjabɛ lejɔ nɔg na ntɛm ɛjabɛ, ɛjabɛ ɛtol ajing lejɔ nɔg na ɛjabɛ ɛtol jigɔ.

¹¹ Ndi kpegbɔgɔ, gɔ kpɛk kpɛ aji anɛ kpe gbɔgɔ ajal, abi ayam kpe jɔlɔ gɔ kpɛk kpɛ aji; amɔngɔmɔngɔ nshɔl na nshɔl nyi kpe kaga anɛ ɛfalfal kpe tebe gɔ ɛbung.

¹² Wɔ tɛtɛ rɛ kpɛk kpɛ nshɔl nyaa bilim, bɔ kpa bɔbɔ, bɔ kaga ɛrɛm. Bɔ kpa fagɛ ka ba atoboɛshi gɔ ɛtak ji Aju kpejɔ wanɛ toma ngbakɔbɔ, bɔ kpa kɔgɔ biyimi gɔ ɛshimar atol na ba afile mfam, teb ɛshi ɛjamɛ.

¹³ Ngarɛ nyaa nyi ɛle bɛl ɛyagɛ bung Nɔbɔ Ɛteb.

¹⁴ Wɔ kɛkɛrɛ lagɛ nyɔ ɛlam bi akpe kɔgɔ tarɛ ɛna gɔ ɛshishɔng.

¹⁵ Teb mɛ nkpa kagɛ alom na mgbɛrɛ nyi nɛ ɛjang ɛwa le kiya mal fabɛ.

¹⁶ Ba nshɔjanɛ na ba nɛjanɛ na abinyen ɛbanɛ na akono ɛnyenɛ na atobanɛ bɔ kpe fagɛ wan ka, ɛgɔm ɛjanɛ jindige bɔ wol.

¹⁷ Nɛ awɔngawɔngɔ kpa jangɛ teb ɛshi ɛjamɛ.

¹⁸ Wɔ jɔl ɛblu na ating gɔ ga ɛshi nim tan.

¹⁹ Yimi nkongonkongo nɔngɔ wɔ bɛl ɛbkpen.

Jisɔs bungɔ lagɛ na bɔ kpe rangɛ Jɛrushɛlɛm

²⁰ “Ɔji rɛ nyen na ashɔja mishingɛ Jɛrushɛlɛm kag, ɔwɔ ale gbɛrɛ rɛ ngarɛ ɛbring nyi bɔ miba ɛbrangɛ Jɛrushɛlɛm.

²¹ Ɔwɔ anɛ ba le gɔ Judiya le bɛ tam gɔ awɔng, anɛ ba le gɔ nla ɛjabɛ le tam na, wɔ ba ki le gɔ nla ɛjabɛ nimkpɛ yɛl.

²² Teb lijɔl ‘Ɛfong Ɛrɛm’ bi kpɛk kpɛ nshɔl nyi nwɛr Ɛshɔwɔ bungɔ nɔ kpe lime.

²³ Lijɔl ɛbe ngarɛ ka abǝkal ba le gɔ ala na ba kpee abɔn gɔ abɔ! Teb njɛnɛ ɛrɛm nyi kpe bagɛ ka ɛying bi Ɛshɔwɔ kpe kagɛ.

²⁴ Anɛ bandige bɔ kpe wolo bɔ gɔ akangkang, bandige bɔ kpe bɔbɔ bɔ tam na ba gɔ ɛbjabɛ kpɛk kpɛ na anɛ ba agbakɔbɔ. Anɛ ba ki le Aju kpe nyedɛ Jɛrushɛlɛm gɔ ata tɛtɛ ngarabɔ mal.

Mɔn a Nlolom kpe bagɛ

²⁵ “Ajɛnɛ nshɔl kpe lime gɔ njol, na ɛbarɛka, na gɔ alɔnlɔ. Ɛbjabɛ kpɛk kpɛ gɔ ɛying kpe jɔbɔ na ɛrogo ɛbɔga alab na ɛfrɛ alab kpe kime gɔ aya.

²⁶ Anɛ kpe gbɔgɔ nkuu gɔ ɛfalfal na bɔ kpe babɛ ji kpe bagɛ gɔ ɛying, teb ajingajingɛ ji le gɔ ɛbung kpe gbɔgɔ.

²⁷ Ɔwɔ Mɔna Nlolom kpe bagɛ gɔ ɛbɔkɔg na ɛkɔ jɛ na njijɔg ɛblobo.

²⁸ Nshɔl nyaa kpɛk kpɛ rɛkime ɛlime, tam yimi wɔ tab ɛshi gɔ rɔ, teb ɛbladɛ ɛna ɛkabɛ.”

Ɛbkpele ni le lagɛ ɛte fig

²⁹ Ɔwɔ Jisɔs tobo ɛbganɛ nyaa tɔng bɔ rɛ: “Bɔngɔ ɛte fig, na nte nyigɔ kpɛk kpɛ.

³⁰ Nrɛ nyen na mikime ɛnyɔnɔ, nkpe gbɛrɛ rɛ ɛlom yagɛ shɛ.

³¹ Nɔwɔ fufɔ, nrɛ nyen na nshɔl nyaa mikime, nkpe gbɛrɛ rɛ Ɛtol Ɛshɔwɔ ɛkabɛ.

³² “Nɔngɔ mɛ ntɔng wan ɛlɔgɔlɔgɔ rɛ, anɛ kpɛk kpɛ ba le anu nim kpɔ mal tɛtɛ nshɔl nyaa lim.

³³ Ɛbung na ndi kpe tanɛ, wɔ alom ɛnyamɛ nim tir tan.

Fomo rɛ war babɛ

³⁴ “Konokpo nɔngɔ a kǝ rangɛ ngarɛ jɔ kɛrɛ lagɛ ɛlɛgɛ na ɛwɔgɔ na ɛfigayɔ gɔ ɛbkpen, tɔgɔ jɔl nɔ ɛfong biɔ kpa

³⁵ gbɛdɛ na ɛkpɔg. Teb kpe bagɛ ka anɛ kpɛk kpɛ ba le gɔ ɛying jiya.

³⁶ Konokpo wɔ jɔ kag ɛrɔ kpɛk kpɛ ngarɛ, nɔngɔ wɔ bɛl ɛkɔ mal shing gɔ nshɔl nyaa nyi kpe lime gɔji alemal yimi gɔ ɛshimar Mɔna Nlolom.”

³⁷ Jisɔs jɔ tebe ɛfong abɔngabɔngɔ gɔ ɛtak gɛ Ɛshɔwɔ, ngarɛ ɛgon, atam gɔ ɛwɔngɔ Olifes shɔng kang gɔ.

³⁸ Fonfo brɛbrɛ anɛ kpɛk kpɛ jɔ jɛ gɔ ɛtak gɛ Ɛshɔwɔ shɔng wongo atong kayɛ.