Alom Ɛshɔwɔ nya long gɔ nwɛr Aluk 20 - Nnam

Ɛkɔ Jisɔs

¹ Ɛfong abɔng na Jisɔs jɔ teb anɛ jɔ fɛrɛ bung anɔbɔ alom gɔ ɛtak gɛ Ɛshɔwɔ, ntoboɛshi a njɔmanjɔm Ɛshɔwɔ na batetebe ajang a Mosis, na ba bungɔ nfam, ba bǝkperɛ.

² Bɔ rɛ, “Tɔng war, ɛkɔ aji akpe nɔ ji akpe lime nshɔl nyaa? Nyenɛ wɔ ka ɛkɔ?”

³ Jisɔs kim fangɛ bɔ rɛ, “Ntɔb bab wan mbabɛ. Tɔngim wan:

⁴ Ɛwɔngɔ anɛ alab ji Jɔn lɔng gɔ ji Ɛshɔwɔ afi lɔng gɔ ɛlitak ga anɛ?”

⁵ Bɔ kpo ɛju bɛl tɔɔbɔ na atɛm rɛ, “Ɛle tɔngɛ rɛ, ‘Lɔng gɔ ji Ɛshɔwɔ,’ Akpe babɛ war rɛ, ‘Jɛn ji wangɛ ɛki tamɛ tu Jɔn?’

⁶ Wɔ ɛle tɔngɛ rɛ, ‘Lɔng gɔ ɛlitak anɛ,’ Anɛ kpɛk kpɛ kpe tobo war atal wol, teb bɔ kɛrɛ rɛ Jɔn ntinge ateb Ɛshɔwɔ wɔ.”

⁷ Ɔwɔ bɔ kimawɛ fangɛ rɛ, “War ɛnyim ɛji ji lɔng nɔ.”

⁸ Jisɔs kim tɔngɔ bɔ rɛ, “Nim tɔb tɔng wan ɛji ji ɛkɔ ji nkpe lime nshɔl nyaa lɔng nɔ.”

Ɛbganɛ ni le lagɛ nɛ nɔ yamɛ nɛ ndi ɛgbɛ

⁹ Jisɔs tobo ɛbganɛ niya tɔng anɛ rɛ: “Bɛlɛ nlolom awɔng nɔ bamɛ ɛgbɛ, yamɛ ka anɛ tam ɛbjɛn gɔ ɛjabɛ jindige gɔ nnya gbalɛgbalɛ.

¹⁰ Ɔji ngara nkpagɛ ɛgbɛ ringe nɔ, a tom njoo ɛnye tu nɛ nɔ ayamɛ ɛgbɛ rɛ a shɔng kɔ mbaga nshɔl ɛnye. Nɛ nɔ yamɛ ɛgbɛ file njoo du tomɛ akrɛ abɔ abɔ.

¹¹ A kpe tom njoo nɔndige, bɔ kpe file nɔ du nɔbɔnɔbɔ shɔnɛ tomɛ akrɛ abɔ abɔ.

¹² A kpe tom nɔndige gɔ tɔnɔ anɛ ara, bɔ lime nshɔl tɔngɛ yegɛ gɔ ɛgbɛ.

¹³ “Ɔwɔ nfɔnɔ ɛgbɛ kim tɔngɔ rɛ, ‘Nlelim rɛnan? Nle tom mɔnɔwamɛ, nɔ kpejɔ kɔrɔm; nyindige bɔ kpe kpono.’

¹⁴ “Ɔji nɛ nɔ yamɛ ɛgbɛ nyenɛ nɔ, bɔ bɛl tɔɔbɔ na atɛm rɛ, ‘Nlɛgɛ ɛbku ɛgbɛ wɔ a, Nɔngɔ war wolɛ, nɔngɔ ji ɛgbɛ jiya le jɔl ɛjarɛ.’

¹⁵ Ɔwɔ bɔ tɔngɛ lɔng awɔ gɔ ɛgbɛ wolɛ. “Jisɔs kim fɛrɛ bab bɔ rɛ anu, ɛjom aji nfɔnɔ ɛgbɛ nlelim bɔ?

¹⁶ A kpe bagɛ bǝwol anɛ ba ayamɛ bɔ ɛgbɛ fagɛ ɛgbɛ ka anɛ bandige.” Ɔji anɛ ba ajɔ bung na bɔ wogo nɔ, bɔ rɛ, “Ɛshɔwɔ nim tamɛ!”

¹⁷ Jisɔs bɔngɔ bɔ shogoshogo kim babɛ bɔ rɛ, “Ɛjom aji ji nwɛr Ɛshɔwɔ bungɔ nɔ? “ ‘Ɛbtal ni ba ashigɛ ɛtak tɛnɛ nɔ Nunu ni mɔfɔgɔ ɛtak anu.’

¹⁸ Nɛ awɔngawɔngɔ nɔ gbɔ komo gɔ ɛbtal nyiɔ kpe banɛ gɔ akuku; wɔ ɛbtal nyiɔ rɛfɛr gbɔ nyedɛ nɛ awɔngawɔngɔ kpɛ gɔgɔ ashingɛ ɛbugɔmbu.”

Mbabɛ nyi le lagɛ atakshi akɔgɔ

¹⁹ Batetebe ajang a Mosis na atoboɛshi a bajɔmanjɔm Ɛshɔwɔ jɔ shɛbɛ rɛ bɔ bɔb Jisɔs gɔ ndoando nyiɔ, teb bɔ gbegbɛrɛ rɛ ɛbganɛ nyiɔ atobo lagɛ bɔ. Wɔ bɔ jɔ fala anɛ.

²⁰ Ɔwɔ bɔ jɔ shɛb ɛyagɛ ji bɔ lebɔb Jisɔs. Bɔ gono ashi anɛ ba jɔ lime na atinge anɛ, bɔ tom bɔ rɛ bɔ jɔ babɛ Jisɔs bɔbɛ a rɛ bung ɛbe ɛblom, nɔngɔ bɔ fagɛ ka ntoboɛshi nɔ kpe ɛkɔ gɔ Rom.

²¹ Ɔwɔ anɛ ba bɔ tomo nɔ kim babɛ Jisɔs rɛ, “Ntetebe, war nyinyi rɛ ji akpe bungɔ fɛrɛ teb le gɔ ɛtinge mbang. War nyinyi rɛ anim bɔngɔ nɛ awɔngawɔngɔ gɔ ɛshimar, akpe tebe mbang Ɛshɔwɔ nyi ɛlɔgɔlɔgɔ.

²² Tɔng war, njang ɛnayarɛ tetamɛ rɛ war kpee atakshi ka Sisa afi tamim?”

²³ Jisɔs gbegbɛrɛ awagɛ bɔ, ɔwɔ a tɔngɔ bɔ rɛ,

²⁴ “Tebim wan akpɔgɔ Roman. Nyenɛ wɔ mbing ɛnye na ɛshimar ɛbɛ le gɔ akpɔgɔ nyaa?” Bɔ fangɛ rɛ, “Sisa wɔ.”

²⁵ Jisɔs kim fangɛ bɔ rɛ, “Ka Sisa ji le ka Sisa, wɔ ka Ɛshɔwɔ ji le ka Ɛshɔwɔ.”

²⁶ Bɔ mɛ malim bɔb gɔ ɛshimar anɛ gɔ nshɔl nyi abungɔ nɔ, fɛr lamɛ bɔ anyar anyɔ bɔ bolo.

Ɛka lagɛ ɛnyamɛ gɔ ɛbku

²⁷ Asadusi nyandige, nya ki jɔ tamɛ rɛ nɛ kpejɔ fɛrɛ nyamɛ gɔ ɛbku ɔji amǝkpɔ, ba gɔ ji Jisɔs.

²⁸ Bǝ babɛ rɛ, “Ntetebe, Mosis yɛlɛ njang nyaa ka war rɛ, nlolom rɛ kpɔ tam nkal sha kǝ jɛl mɔn awɔngawɔngɔ, minyen ɛwɛ fɛrɛ kɔ nkal nɔ nɔngɔ ale jɛl mɔn nɔ le jɔl mɔn a nkunɛ.

²⁹ Bɛlɛ abinyen ashima banlom. Mgbɔgambang kɔ nkal kpɔ mɔn ajɛlim.

³⁰ Ɛtɔnɔ minyen

³¹ na ɛkpe tɔnɔ anɛ ara minyen kpe kɔ nlikal nɔ, nɔwɔ bɔ anɛ ashima kpɛk kpɛ kɔ nlikal nɔ awɔngawuwɔngɔ bɔ kpɔ, abɔn bɔ jɛlim.

³² “Gɔ ɛbkrɔ ɛnɛ, nlikal nɔnu grɛ tɔb kpɔ.

³³ Gɔ ɛfong bi akunɛ kpe nyamɛ gɔ ɛbku, nyenɛ wɔ alijɔl nkalɛwɛ, ɔji abalɛ bɔ anɛ ashima kpɛk kpɛ?”

³⁴ Jisɔs kim fangɛ rɛ, “Anɛ ba ɛying ji anu kpe kɔgɔ akal, fɛrɛ jɔ ka anɛ gɔ mbal.

³⁵ Gɔ ɛying ji kpe bagɛ, anɛ ba fomo rɛ bɔ nyamɛ gɔ ɛbku nim kɔ akal, wɔ lim bɔ le ka anɛ gɔ mbal.

³⁶ Bɔ kpe jɔlɔ na alɔgɔ ɛbtom Ɛshɔwɔ, bɔ nim kpɛ kpɔ. Teb bɔ abɔnɔ Ɛshɔwɔ ba, ba fɛrɛ nyamɛ gɔ ɛbku.

³⁷ Wɔ Mosis ka ɛblingɛ rɛ akunɛ kpejɔ nyinyamɛ gɔ ɛbku. Gɔ nwɛr Ɛshɔwɔ nyi bungɔ lagɛ na ngon jɔ lul gɔ ɛkologbɛ, a rɛ Ntol ‘Ɛshɔwɔ Ɛbraham, Ɛshɔwɔ Isaak, na Ɛshɔwɔ Jɛkɔb.’

³⁸ Yɛ Ɛshɔwɔ akunɛ shang. Yɛ le Ɛshɔwɔ anɛ ba mber, teb gɔ ɛshimar ɛbɛ anɛ nim jɔ kpɔ.”

³⁹ Batetebe ajang a Mosis bandige fangɛ rɛ, “Ntetebe, a bung nɔb.”

⁴⁰ Nɛ awɔngawɔngɔ ɔ kpɛm garɛ rɛ akpɛ babɛ mbabɛ.

Mɔn a nyenɛ wɔ le Krayis?

⁴¹ Jisɔs kim babɛ bɔ rɛ, “Jɛn ji wangɛ bɔ le tɔng rɛ Krayis mɔn a Defid wɔ?

⁴² Defid nfɔnɔ yɛlɛ gɔ nwɛr a Sam: “ ‘Nshɔ Ɛshɔwɔ bungɔ tɔng nshɔjamɛ: “Rɛ jim a gɔ jangɛ ɛbɔblom

⁴³ Tɛtɛ nlim anɛ ba ɛjang ɛba ɛte ɛkono ata ɛja.” ’

⁴⁴ Ntol a Defid kpejɔ lɔngɛ rɛ Nshɔ. Alelim rɛnan fɛrɛ jɔl mɔnɔwɛ?”

Jisɔs ka ɛbragɛ lagɛ Atetebe Ajang a Mosis

⁴⁵ Na anɛ kpɛk kpɛ jɔ wongo atong kayɛ, Jisɔs bungɔ tɔng batɔtɔnɔ ɛbɛ rɛ,

⁴⁶ “Kono wan ɛkpo lagɛ batetebe ajang a Mosis. Ba kpejɔ jɛn shingɛ na alabɛ ɛlamɛ, kpe shɛbɛ anɛ ba lekag bɔ nyɔ na ɛkpono gɔ arɛ; bɔ kpejɔ shɛb ɛtinge ɛte gɔ ɛtak ji Aju kpejɔ wanɛ na nji ɛlobo gɔ ɛbkak.

⁴⁷ Bɔ kpejɔ tarɛ ntak akal akunɛ, fɛrɛ jɔ kag nlaba mbang ɛrɔ. Nkin anɛ ba ɛrɛm bi bɔ kpe gbalɛ shing.”